1. Lomunye umfana waveta njani kutsi beketsemba kutsi labafile batawuvuswa?

 LOMUNYE umfana lokutsiwa nguMatthew bekagula kakhulu futsi ahlindvwe tikhatsi letinyenti. Nakaneminyaka lengu-7 budzala, yena nemndeni wakubo babukela luhlelo lweMsakato We-JW. Naseluyophela loluhlelo, babukela umculo we-video lobewukhuluma ngekwemukela labo labavusiwe. b Ngemuva kwaloluhlelo, Matthew waya kubatali bakhe wafike wababamba tandla futsi watsi: “Niyabona make nababe, ngisho ngingafa, ngitawuvuka. Ningangigadza.” Cabanga nje kutsi labatali bativa njani nababona kutsi indvodzana yabo beyinelitsemba lelicinile lekutsi labafile batawuvuswa.

2-3. Kubaluleke ngani kutsi sicabange ngesetsembiso sekuvuswa kwalabafile?

² Kuhle kutsi sihlale sicabanga ngesetsembiso lesiseBhayibhelini sekuvuswa kwebantfu labafile. (Joh. 5:28, 29) Ngasiphi sizatfu? Ngenca yekutsi asati kutsi sitawuba naso nini sifo lesimatima nobe kutsi sitawushonelwa nini ngumuntfu lesimtsandzako. (Shu. 9:11; Jak. 4:13, 14) Litsemba lesinalo lekutsi labafile batawuvuswa lingasisita kutsi sikhone kubeketelela timo letifana naleti. (1 Thes. 4:13) ImiBhalo iyasicinisekisa kutsi Babe wetfu wasezulwini usati kahle futsi usitsandza kakhulu. (Luk. 12:7) Jehova Nkulunkulu usati kahle kangangekutsi utawukhona kusivusa sinalobuntfu lesinabo nyalo futsi abuyisele naloko lobekusetingcondvweni tetfu. Ukhombisile kutsi uyasitsandza ngekutsi asinikete litfuba lekutsi siphile phakadze, ngisho singafa, utasivusa!

³ Kulesihloko, sitawucale sicoce ngekutsi yini lesenta setsembe  kutsi labafile batawuvuswa. Sitawubese sicoca ngendzaba leseBhayibhelini lecinisa kukholwa lenalamavi lokusekelwe kuwo lesihloko setfu latsi: “Umnakenu utawuvuka.” (Joh. 11:23) Ekugcineni sitawufundza ngekutsi yini lesingayenta kuze lelitsemba lesinalo lekuvuswa kwebantfu labafile libe yintfo mbamba kitsi.

4. Kuze setsembe setsembiso, yini lokufanele siciniseke ngayo? Fanekisa.

⁴ Kuze setsembe setsembiso kufanele siciniseke kutsi lona losentako unaso sifiso kanye nemandla ekusifeza nobe kutsi angakhona kusifeza. Ase sifanekise: Ase sitsi indlu yakho ibhidlitwa siphepho, umngani wakho ete kuwe afike akwetsembise atsi: ‘Ngitakusita siyakhe kabusha lendlu yakho.’ Uyambona kutsi usho mbamba futsi uyaciniseka kutsi unaso sifiso sekukusita. Unalo likhono lekwakha kanye nemathulusi ladzingekako futsi uyati kutsi utawukhona kukusita. Ngako uyasetsemba setsembiso sakhe. Kodvwa kutsiwani ngesetsembiso saNkulunkulu sekuvusa bantfu labafile? Unaso yini vele sifiso kanye nemandla ekusifeza?

5-6. Yini lesenta siciniseke kutsi Jehova unaso sifiso sekuvusa labafile?

⁵ Jehova unaso yini sifiso sekuvusa labafile? Yebo unaso. Waphefumulela babhali beliBhayibheli labanyenti kutsi babhale ngesetsembiso sekuvuswa kwebantfu labafile. (Isa. 26:19; Hos. 13:14; Semb. 20:11-13) Jehova uhlale asifeza setsembiso lasentako. (Josh. 23:14) Jehova uyakulangatelela kuvusa labafile. Sisho ngani?

⁶ Cabanga ngemavi lashiwo nguJobe. Bekaciniseka kutsi ngisho angafa, Jehova bekatakulangatelela kuphindze ambone. (Jobe 14:14, 15) Jehova utiva ngendlela lefanako nangato tonkhe tikhonti takhe letishonile. Uyakulangatelela kutivusa, tiphile saka futsi tijabulile. Kutsiwani ngetigidzigidzi letife tingakalitfoli litfuba lekufundza liciniso ngaJehova? Nkulunkulu wetfu lositsandzako uyafuna kutivusa nato. (Imis. 24:15) Ufuna titfole litfuba lekuba bangani bakhe futsi tiphile phakadze emhlabeni. (Joh. 3:16) Kusebaleni kutsi Jehova unaso sifiso sekuvusa labafile.

7-8. Yini lesenta siciniseke kutsi Jehova unawo emandla ekuvusa labafile?

⁷ Jehova unawo yini emandla ekuvusa labafile? Yebo unawo! ‘UnguSomandla.’ (Semb. 1:8) Ngako unemandla ekuncoba nobe ngabe ngusiphi sitsa, lokufaka ekhatsi kufa. (1 Khor. 15:26) Kwati loku kusiniketa emandla futsi kuyasidvudvuta. Cabanga ngalokwenteka kudzadze Emma Arnold. Yena nemndeni wakhe babhekana neluvivinyo lolumatima ngesikhatsi seMphi Yelive Yesibili. Kuze advudvute indvodzakati yakhe leyashonelwa bantfu lebatsandzako etinkambu tekuhlushwa temaNazi, Emma bekatsi: “Nangabe bantfu labafile bangeke baphindze bavuke, loko bekungasho kutsi lesitsa setfu lesikufa sinemandla kunaNkulunkulu. Kodvwa loko akusilo liciniso.” Siyaciniseka kutsi kute lokunemandla kunaJehova! Nkulunkulu Somandla lowadala kuphila angakhona kubuyisela kuphila kwalabo labafile.

⁸ Lesinye sizatfu lesenta siciniseke kutsi Nkulunkulu angakhona kubavusa labafile kutsi ukhumbula konkhe. Tonkhe tinkhanyeti utibita ngemagama ato. (Isa. 40:26) Ngetulu kwaloko, uyabakhumbula labo labashona. (Jobe 14:13; Luk. 20:37, 38) Angakhona kukhumbula ngisho netintfo letincane ngabo, lokufaka ekhatsi indlela lebebabukeka ngayo, buntfu babo, loko lokwenteka ekuphileni  kwabo kanye naloko lobekusetingcondvweni tabo.

9. Yini lekwenta usetsembe setsembiso saJehova sekuvusa bantfu labafile esikhatsini lesitako?

⁹ Kusebaleni kutsi singasetsemba setsembiso saJehova sekutsi labafile batawuvuswa esikhatsini lesitako, ngobe siyati kutsi unaso sifiso sekubavusa kanye nemandla ekukwenta loko. Cabanga nganasi lesinye sizatfu lesisenta sisetsembe lesetsembiso saNkulunkulu: Jehova uke wabavusa bantfu labafile. Ngetikhatsi tekubhalwa kweliBhayibheli, waniketa emadvodza letsembekile emandla ekuvusa bantfu labafile, lokufaka ekhatsi naJesu. Nyalo asesicoce ngalenye indzaba yekuvuswa kwemuntfu lobekafile lokwentiwa nguJesu njengobe kubhalwe kuJohane sehluko 11.

10. Yini leyenteka ngesikhatsi Jesu ashumayela ngesheya kweJordane, futsi yini layenta? (Johane 11:1-3)

¹⁰ Fundza Johane 11:1-3. Cabanga ngaloko lokwenteka eBhetani ngasekupheleni kwa-32 C.E. Jesu bekanebangani kulendzawo, lokunguLazaro kanye nabosisi bakhe lababili lokunguMariya naMata. (Luk. 10:38-42) Kodvwa Lazaro wagula futsi bosisi bakhe besebakhatsatekile. Batfumela umlayeto kuJesu lobekangesheya kweJordane, lokungatsatsa emalanga lamabili kuya khona usuka eBhetani. (Joh. 10:40) Lokubuhlungu kutsi Lazaro washona ngesikhatsi lomlayeto ufika kuJesu. Nanobe Jesu besekati kutsi umngani wakhe ushonile, wahlala lapho emalanga lamabili wabese utsatsa luhambo loluya eBhetani. Ngesikhatsi efika, besekuphele emalanga lamane Lazaro ashonile. Jesu bekafuna kwenta lokutsite lebekutawusita bangani bakhe futsi kudvumise Nkulunkulu.—Joh. 11:4, 6, 11, 17.

11. Ngusiphi sifundvo lesimayelana nebungani lesingasifundza kulendzaba?

¹¹ Kulendzaba sifundza sifundvo lesimayelana nebungani. Cabanga nganaku: Ngesikhatsi Mariya naMata batfumela umlayeto kuJesu abazange bamcele kutsi ete eBhetani. Bamane nje batsi umngani wakhe lamtsandzako uyagula. (Joh. 11:3) Ngesikhatsi Lazaro sekashonile, Jesu bekangamvusa akhashane. Nanobe kunjalo, wakhetsa kuya eBhetani kuze abe nebangani bakhe, boMariya naMata. Unaye yini umngani longakusita ungakamceli? Nangabe unaye, uyati kutsi ungametsemba kutsi angakusita “ngesikhatsi sekuhlupheka.” (Taga 17:17) NjengaJesu, shengatsi natsi singaba bangani labanjalo kulabanye! Nyalo asesibuyele kulendzaba futsi sibone kutsi yini leyabese iyenteka.

12. Yini Jesu layetsembisa Mata, futsi yini lebeyingamenta asetsembe lesetsembiso? (Johane 11:23-26)

¹² Fundza Johane 11:23-26. Mata weva kutsi Jesu sewusedvutane naseBhetani. Wagijima wayomhlangabeta, wafike watsi: “Nkhosi, kube bewukhona, umnaketfu ngabe akakafi.” (Joh. 11:21) Kuliciniso kutsi Jesu bekangamelapha Lazaro. Kodvwa bekafuna kwenta intfo lemangalisako. Wametsembisa watsi: “Umnakenu utawuvuka.” Waphindze wacinisekisa Mata kutsi angasetsemba lesetsembiso ngekutsi  atsi: “Mine ngikuvuka nekuphila.” Nkulunkulu waniketa Jesu emandla ekuvusa labafile. Ngaphambili bekavuse intfombatanyana lebeyishonile futsi waphindze wavusa lelinye lijaha lokungenteka belishone ngalelolanga. (Luk. 7:11-15; 8:49-55) Kodvwa bekangakhona yini kuvusa umuntfu lobesekanemalanga lamane ashonile futsi umtimba wakhe sewucale konakala?

13. Njengobe kubhalwe kuJohane 11:32-35, Jesu wenta njani nakabona Mariya kanye nalabanye bakhala? (Buka nesitfombe.)

¹³ Fundza Johane 11:32-35. Cabanga ngaloko lokwabese kuyenteka. Mariya, longusisi waLazaro waya kuyohlangabeta Jesu. Washo emavi lafanako nalawo lashiwo ngusisi wakhe, watsi: “Nkhosi, kube bewukhona, umnaketfu ngabe akakafi.” Yena kanye nalabanye lebebanaye bebaselusizini. Jesu watsi nakababona bakhala, weva buhlungu kakhulu. Ngenca yekutsi bekabavela bangani bakhe, wakhala. Bekati kutsi kubuhlungu kangakanani kushonelwa ngumuntfu lomtsandzako. Siyaciniseka kutsi bekakufuna mbamba kususa loko bekubenta bakhale!

14. Loko lokwentiwa nguJesu ngesikhatsi abona Mariya akhala kusifundzisani ngaJehova?

¹⁴ Loko lokwentiwa nguJesu nakabona Mariya akhala kusifundzisa kutsi Jehova unguNkulunkulu loneluvelo. Sisho ngani? Njengobe sibonile esihlokweni lesendlulile, Jesu wayiveta kahle indlela Babe wakhe lacabanga ngayo nalativa ngayo. (Joh. 12:45) Ngako nasifundza kutsi Jesu weva buhlungu kakhulu ngesikhatsi abona bangani bakhe baselusizini kangangekutsi waze wakhala, siyaciniseka kutsi naJehova uva buhlungu kakhulu nakasibona sikhala. (Hla. 56:8) Loku akukwenti yini ufune kusondzelana kakhulu naNkulunkulu wetfu loneluvelo?

15. Njengobe kubhalwe kuJohane 11:41-44, yini leyenteka ethuneni laLazaro. (Buka nesitfombe.)

¹⁵ Fundza Johane 11:41-44. Jesu wefika ethuneni laLazaro futsi watsi akususwe lelitje lebelilivalile. Mata wala, watsi kungenteka kube lesidvumbu sesiyanuka. Jesu waphendvula watsi: “Angikakutjeli yini kutsi nangabe ukholwa utawubona inkhatimulo  yaNkulunkulu?” (Joh. 11:39, 40) Jesu wase ubuka ezulwini futsi wathantaza. Bekafuna kuniketa Jehova lonkhe ludvumo ngaloko lebekutakwenteka. Ngemuva kwaloko, Jesu wamemeta watsi: “Lazaro, phuma!” Lazaro waphuma kulelithuna! Jesu wenta loko labanye lebebacabanga kutsi angeke kwenteke.—“Buka sihloko lesitsi, “Kungani kwamthatha izinsuku ezine uJesu ngaphambi kokuba afike ethuneni likaLazaru?” ku-Sicongosekulindza saJanuary 1, 2008, lesitfolakala ngesiZulu.

16. Lendzaba lekuJohane sehluko 11 isenta njani sisetsembe kakhulu setsembiso sekuvuswa kwalabafile?

¹⁶ Lendzaba lekuJohane sehluko 11 yenta sisetsembe kakhulu setsembiso sekuvuswa kwalabafile. Kanjani? Khumbula loko Jesu lakwetsembisa Mata nakatsi: “Umnakenu utawuvuka.” (Joh. 11:23) NjengaBabe wakhe, Jesu unesifiso sekufeza lesetsembiso futsi unawo nemandla ekusifeza. Tinyembeti takhe taveta kutsi unesifiso lesikhulu sekuvusa bantfu labafile, acedze nabo bonkhe buhlungu lobubangelwa kufa. Ngesikhatsi Lazaro aphuma ethuneni, Jesu waphindze wakhombisa kutsi unemandla ekuvusa labafile. Ngetulu kwaloko, cabanga nangaloko Jesu lakukhumbuta Mata nakatsi: “Angikakutjeli yini kutsi nangabe ukholwa utawubona inkhatimulo yaNkulunkulu?” (Joh. 11:40) Sinesizatfu lesihle sekwetsemba kutsi Nkulunkulu utawusifeza setsembiso sakhe sekuvusa bantfu labafile. Kodvwa yini lesingayenta kuze lelitsemba libe yintfo mbamba kitsi?

17. Yini lokufanele sihlale siyikhumbula nasifundza tindzaba letimayelana nekuvuswa kwebantfu labafile letiseBhayibhelini?

¹⁷ Fundza ngebantfu labavuswa esikhatsini lesendlulile futsi ucabangisise ngaletindzaba. LiBhayibheli likhuluma ngekuvuswa kwebantfu labangu-8. c Tidadishe ngekutimisela letindzaba. Njengobe wenta njalo, khumbula  kutsi laba bekubantfu mbamba, bekungemadvodza, bafati nebantfwana. Buka tifundvo longatifundza. Cabanga ngekutsi sibonelo ngasinye sikhombisa njani kutsi Nkulunkulu unesifiso sekuvusa bantfu labafile futsi unawo nemandla ekukwenta loko. Ngetulu kwako konkhe, cabanga ngekuvuswa kwaJesu lokuyintfo lebaluleke kakhulu leyake yenteka. Khumbula kutsi kuvuswa kwakhe kwacinisekiswa ngemakhulu ebantfu labatibonela ngewabo, futsi kusisekelo lesicinile sekukholwa kwetfu.​—1 Khor. 15:3-6, 20-22.

18. Ungatisebentisa njani kahle tingoma tetfu letimayelana nekuvuswa kwebantfu labafile? (Buka nembhalo longentasi.)

¹⁸ Tisebentise kahle ‘tingoma tekukhonta Nkulunkulu’ letikhuluma ngekuvuswa kwalabafile. d (Ef. 5:19) Letingoma tenta kuvuswa kwalabafile kube yintfo mbamba kitsi futsi tenta sisetsembe kakhulu lesetsembiso lesiligugu. Tilalele, utiphrakthize futsi nicoce ngaloko letikushoko nanenta kukhonta kwemndeni. Tibambe ngenhloko futsi ucabangisise ngato kuze ticinise kukholwa kwakho futsi tikutsintse enhlitiyweni. Nawubhekana neluvivinyo lolumatima nobe nawushonelwa ngumuntfu lomtsandzako, umoya waJehova utakusita kutsi utikhumbule letingoma kuze tikudvudvute futsi tikucinise.

19. Yini lesingahle siyicabange lephatselene nekuvuswa kwalabafile? (Buka libhokisi lelitsi, “ Utawubabuta Kutsini?”)

¹⁹ Bona tintfo ngeliso lengcondvo. Jehova usinikete likhono lekuticabanga siseveni lelisha. Lomunye dzadze utsi: “Ngicitse sikhatsi sami lesinyenti ngiticabanga ngiseveni lelisha kangangekutsi kuba shengatsi ngiva liphunga letimbali letichakazile ePharadisi.” Tibone ngeliso lengcondvo uhlangana nemadvodza nebafati labanekukholwa lokukhulunywa ngabo eBhayibhelini. Ngubani lokubuke ngalabovu kumbona? Ngumiphi imibuto lotambuta yona? Ticabange uhlangana netihlobo takho lotitsandzako lesetashona. Cabanga ngekutsi yini lotawuyisho nawucala kutibona, indlela lotawutihaga ngayo kanye netinyembeti tenjabulo letitawugeleta nawutibona.

20. Yini lokufanele sitimisele kuyenta?

²⁰ Sibonga kakhulu ngesetsembiso saJehova sekutsi labafile batawuvuka! Singaciniseka kutsi lesetsembiso sitawufezeka ngobe Jehova unaso sifiso kanye nemandla ekusifeza. Shengatsi singatimisela kuchubeka sisetsemba kakhulu lesetsembiso lesiligugu lesimayelana nekuvuswa kwalabafile. Nasenta njalo, sitawusondzelana kakhulu naNkulunkulu lowetsembise ngamunye wetfu watsi: ‘Bantfu lobatsandzako labafile batawuvuka!’