Ngatalwa nga-1955, futsi ngingulomncane kubafana labatsatfu. Ngakhulela eningizimu yeFinland, endzaweni nyalo leyatiwa ngekutsi lidolobha laseVantaa.

Make wabhajatiswa futsi waba nguFakazi waJehova eminyakeni lembalwa ngaphambi kwekutsi ngitalwe. Nobe kunjalo, babe bekamelene neliciniso futsi bekamalela make kutsi adadishe natsi nobe kutsi ahambe natsi emihlanganweni yelibandla. Ngako bekasifundzisa emaciniso lasisekelo eliBhayibheli nakangekho babe.

Ngamelela Jehova kusukela ngisemncane. Sibonelo nje, nangineminyaka lengu-7, thishela wami watfukutsela wabila ngesikhatsi ngala kudla i-verilättyjä (lokulikhekhe laseFinland lelakhiwe ngengati). Ngesandla sinye, wamoncota tihlatsi tami etama kungivula umlomo, ngalelesinye wasebentisa imfologo kuze etame kungifunta ngenkhani lelikhekhe, ngakhona kushaya sandla sakhe yawa lemfologo.

Nangineminyaka lengu-12, babe washona. Ngemuva kwaloko, bese ngikhona kuya emihlanganweni yelibandla. Bazalwane ebandleni banginaka futsi loko kwangisita kutsi ngitfutfuke. Ngacala kufundza liBhayibheli onkhe malanga kanye nekudadisha tincwadzi tetfu. Ngenca yaloko, ngabhajatiswa nangineminyaka lengu-14, nga-August 8, 1969.

 Ngekushesha nje nangicedza sikolwa, ngaba lihlahlandlela lelivamile. Ngemuva kwemaviki lambalwa, ngatfutsela ePielavesi, lapho bekunesidzingo lesikhulu khona sebamemeteli, lokuyindzawo lebeyicishe ibe sekhatsi nekhatsi neFinland.

EPielavesi, ngahlangana nadzadze lowaba ngumkami lengimtsandzako, lokunguSirkka. Lokwangenta ngamtsandza kutsi bekatfobekile futsi bekamtsandza kakhulu Jehova. Bekangafuni kuvelela nobe kuphila ntofontofo. Sobabili besifuna kwenta konkhe lesingakwenta emsebentini waJehova futsi besikulungele kwenta nobe ngabe ngusiphi sabelo lebesiniketwa sona. Sashada ngaMarch 23, 1974. Kunekutsi sishaywe ngumoya nasisandza kushada, satfutsela eKarttula, lapho bekunesidzingo lesikhulu khona sebamemeteli.

Kusukela ekucaleni kwemshado wetfu, Jehova wasikhombisa kutsi utawutinakekela tidzingo tetfu nangabe sibeka uMbuso wakhe kucala. (Mat. 6:33) Sibonelo nje, eKarttula besite imoto. Ekucaleni besihamba ngelibhayisikili. Nobe kunjalo, ebusika bekubandza kakhulu kube nelichwa. Kuze sikhone kushumayela insimu lenkhulu yelibandla letfu, besidzinga imoto. Kodvwa besite imali yekuyitsenga.

Singakagadzi, bhuti wami lomdzala wasivakashela. Wasipha imoto yakhe. Umshwalensi wayo bewubhadelwe, kwetfu nje bekukwetsa phethiloli. Bese sinayo imoto!

Jehova wasikhombisa kutsi utawutinakekela tidzingo tetfu. Tsine nje bekufanele sibeke kucala uMbuso wakhe ekuphileni kwetfu.

Ngesikhatsi siya eSikolweni Semsebenti Semahlahlandlela nga-1978, umzalwane Raimo Kuokkanen, a lebekangulomunye wabothishela wasikhutsata kutsi sifake sicelo sekuya eSikolweni SaseGileyadi. Ngako sacala kufundza siNgisi sinemgomo wekufaneleka kutsi singaya kulesikolwa. Kodvwa nga-1980, ngaphambi kwekutsi sifake lesicelo, sacelwa kutsi siyosebenta ehhovisini leligatja eFinland. Ngaleso sikhatsi, labo labasebenta eBethel bebangakavumeleki kutsi bafake sicelo sekuya eGileyadi. Besifuna kukhonta Jehova nobe ngukuphi lapho bekatsi kukahle khona, hhayi lapho tsine besibona ngatsi kukahle khona.  Ngako saya eBethel. Nobe kunjalo, sachubeka sifundza siNgisi kuze nje kutsi nakwenteka kuvela litfuba, sikhone kufaka sicelo sekuya eGileyadi.

Ngemuva kweminyaka lembalwa, Sigungu Lesibusako satsi labo labasebenta eBethel sebangasifaka sicelo sekuya eGileyadi. Ngekushesha safaka ticelo tetfu, hhayi ngobe besingajabuli ngekuba seBethel. Besikutsandza! Besifuna nje kusebenta nobe ngukuphi lapho kunesidzingo lesikhulu khona nakuvela litfuba. Sicelo setfu semukelwa futsi saphotfula eklasini lesi-79 ngaSeptember 1985. Sanikwa sabelo sekuya eColombia.

EColombia, sacale saniketwa umsebenti wekuyosebenta ehhovisini leligatja. Ngetama kwenta konkhe lokusemandleni ami esabelweni sami, kodvwa ngemuva kwemnyaka ngabona ngatsi bekudzingeka sishintje sabelo. Bekukwekucala ngca ekuphileni kwami ngicela kushintja sabelo futsi bekukwekugcina. Ngemuva kwaloko, sanikwa sabelo sekuba titfunywa telivangeli edolobheni laseNeiva, esigodzini saseHuila.

Bengisolo ngiwutsandza umsebenti wekushumayela. Ngesikhatsi ngilihlahlandlela eFinland ngisengakashadi, bengivame kushumayela kusukela ekuseni lize liyoshona. Nasesishadile, mine naSirkka besishumayela lilanga lonkhe. Nasishumayela etindzaweni letikhashane, besihle silala emotweni yetfu. Loko bekusongela sikhatsi futsi bekwenta kutsi sisheshe sicale kushumayela ngelilanga lelilandzelako.

Njengobe sititfunywa telivangeli, saphindze saba nemdlandla lebesinawo ekucaleni. Libandla letfu lakhula, futsi bazalwane nabodzadze baseColombia bebasihlonipha, banelutsandvo futsi babonga.

Emadolobha ladvute neNeiva bekete boFakazi. Bengikhatsateke kakhulu ngekutsi tindzaba letimnandzi betitawufika njani kuletindzawo. Ngetulu kwaloko, bekunemacembu lavukelako, ngako bekungakaphephi kutsi umuntfu longasuye wakuletindzawo ahlale kuto. Ngako ngathantazela kutsi kube nemuntfu wakulamadolobha lebekatawuba nguFakazi. Bengicabanga kutsi lomuntfu bekutawudzingeka ahlale eNeiva kuze afundze liciniso. Ngako ngaphindze ngathantaza kutsi ngemuva kwekubhajatiswa lomuntfu abe nebuhlobo lobucinile naNkulunkulu futsi abuyele ekhaya kuze ayoshumayela. Bengingakabuti elangeni, Jehova bekanelicebo lelihle kakhulu.

Ngekushesha nje ngemuva kwaloko, ngacala kudadisha liBhayibheli nalelinye lijaha lokutsiwa nguFernando González. Belihlala e-Algeciras, lokungulelinye lalamadolobha lebelite boFakazi. Fernando bekahamba emakhilomitha langetulu kwalangu-50 nakaya emsebentini eNeiva. Bekasilungiselela kahle sifundvo ngasinye futsi ngekushesha wacala kuba khona kuyo yonkhe imihlangano. Kusukela ngeliviki lacala ngalo kudadisha liBhayibheli, Fernando bekahlanganisa bantfu basedolobheni lakubo futsi abafundzise loko besekakufundzile.

Fernando wabhajatiswa ngaJanuary 1990, ngemuva kwetinyanga letisitfupha acale kudadisha liBhayibheli. Ngemuva kwaloko waba lihlahlandlela lelivamile. Njengobe besekunaFakazi e-Algeciras, besekuphephile kutsi lihhovisi leligatja  lingatfumela emahlahlandlela lakhetsekile kulendzawo. NgaFebruary 1992, kwasungulwa libandla kulelidolobha.

Fernando wagcina kushumayela edolobheni lakubo yini? Cha! Ngemuva kwekushada, yena nemkakhe batfutsela eSan Vicente del Caguán, lokungulelinye lidolobha lebelite boFakazi. Nabalapho basita ekusunguleni libandla. Nga-2002, Fernando waba ngumbonisi wesigodzi, futsi kuze kube ngulamuhla yena nemkakhe Olga bayachubeka nemsebenti wekujikeleta.

Loku kungifundzisile kutsi kubalulekile kutithantazela ngalokucondzile tindzaba letitsintsa umsebenti lesiwentela Jehova. Jehova wenta loko lesingeke sikhone kukwenta. Kube kufanele, lomsebenti wekuvuna ngewakhe, awusiwo wetfu.​—Mat. 9:38.

Nga-1990 sanikwa sabelo sekujikeleta. Sigodzi sekucala lesajikeleta kuso besisenhlokodolobha, eBogotá. Besisesaba lesabelo. Mine nemkami sibantfu nje, futsi site emakhono langakanani. Besingakwetayeli kuhlala edolobheni leliphitsitelako. Nobe kunjalo, Jehova wasifeza setsembiso sakhe lesisembhalweni waKubaseFiliphi 2:13 lesitsi: “Nkulunkulu nguye lonenta nibe nemandla, futsi uninika sifiso nemandla ekwenta intsandvo yakhe.”

Ngekuhamba kwesikhatsi, sabelwa kutsi siyojikeleta eMedellín, lelidolobha lengikhulume ngalo ekucaleni. Bantfu kulendzawo bese babutayele kakhulu budlova kangangekutsi bebangasetfuki. Sibonelo nje, ngalelinye lilanga ngidadisha liBhayibheli nalotsite, kwacala umsindvo wetibhamu ngephandle. Ngatsi nangifuna kulala phansi, lona lengidadisha naye liBhayibheli wachubeka wafundza sigaba, kwaba shengatsi kute lokwentekako. Watsi nakacedza kufundza, wacela kuphumela ngephandle. Ngemuva kwesikhashana, wabuya nebantfwana lababili labancane futsi angaketfuki watsi: “Ncesi, bengisayolandza bantfwabami.”

Asigcinanga lapho kuba sengotini. Ngalelinye lilanga sishumayela emtini ngemuti, umkami weta kimi agijima, etfuke kakhulu. Watsi kunemuntfu beketama kumdubula. Loko kwangetfusa kakhulu. Kodvwa ngekuhamba kwesikhatsi sabona kutsi bekangadubuli Sirkka; bekadubula lenye indvodza lebeyengca eceleni kwakhe.

Ngekuhamba kwesikhatsi, bese singasabesabi lobudlova. Sakhutsatwa bamemeteli bendzawo lebebabhekene netimo letinjengaleti naletinye letimatima kakhulu. Sabona kutsi nangabe Jehova abasita, natsi utasisita. Besihlale sisilalela seluleko salabadzala belibandla, sihlala sigadzile futsi lokunye sakushiyela etandleni taJehova.

Kuliciniso kutsi letinye timo betingasitimbi njengobe besicabanga. Ngalelinye lilanga, ngeva umsindvo lebekungatsi bafati lababili labetfukanako ngephandle kwalelikhaya bengivakashe kulo. Bengingafuni kubukela bantfu baphikisana, kodvwa lomnikati welikhaya watsi angite ngitewubona. Ngamangala ngobe bekungasinjengobe bengicabanga, kunaloko bekutinyoni letimbili (parrots) lebetilingisela bomakhelwane.

Nga-1997, ngatfola sabelo sekuba nguthishela eSikolweni Lesisekelwe EBhayibhelini  Sebazalwane Labangakashadi. b Bengititsandza kakhulu tikolwa letihlelwe yinhlangano, kodvwa bengingacabangi kutsi ngiyawuke ngifundzise kulesinye sato.

Ngekuhamba kwesikhatsi ngaba ngumbonisi wesifundza. Ngesikhatsi kumiswa kutsi kube nebabonisi betifundza, ngabuyela ngajikeleta. Sekuphele iminyaka lengetulu kwalengu-30 ngifundzisa futsi ngijikeleta. Letabelo tingiletsele tibusiso letinyenti. Nobe kunjalo, loko akusho kutsi tonkhe tintfo betishelela. Ase ngichaze.

Ngingumuntfu longaligegi liguma. Loko kungisitile kutsi ngibhekane netimo letimatima. Nobe kunjalo, ngaletinye tikhatsi bengihle ngifuna kulungisa tonkhe tintfo ngekushesha emabandleni. Bengihle ngikhutsata labanye ngemdlandla kutsi batsandze futsi bacabangele labanye. Kodvwa ecinisweni bewutfola kutsi ngimi lokufanele ngente loko.​—Rom. 7:21-23.

Ngaletinye tikhatsi bengihle ngidvumateka kakhulu ngenca yemaphutsa ami. (Rom. 7:24) Ngalelinye lilanga ngatjela Jehova kutsi kuncono ngiyekele kuba sitfunywa selivangeli futsi ngibuyele eFinland. Ngalelo langa ntsambama, ngaya emihlanganweni yelibandla. Lengakuva lapho kwangicinisekisa kutsi kufanele ngihlale esabelweni sami futsi ngichubeke ngilungisa emaphutsa ami. Kuze kube ngulamuhla, ngiyatsintseka nangicabanga ngendlela Jehova lawuphendvula ngayo lomthantazo wami. Ngetulu kwaloko, ngijabula kakhulu ngekutsi Jehova ungisite ngemusa kuze ngilwe nebutsakatsaka bami.

Mine naSirkka sitiva simkweleta kakhulu Jehova ngekusiniketa litfuba lelihle kangaka lekucitsa kuphila kwetfu sisemsebentini wasikhatsi sonkhe. Ngiphindze ngimbonge kakhulu Jehova ngekutsi kuyo yonkhe leminyaka ungiphe umfati longitsandzako nalowetsembekile.

Ngekushesha nje ngitawuba neminyaka lengu-70, futsi kutawudzingeka ngiyekele kuba nguthishela nekuba ngumbonisi wesigodzi. Nobe kunjalo, loko akungivisi buhlungu. Ngasiphi sizatfu? Ngobe ngiyaciniseka kutsi lokumdvumisa kakhulu Jehova kumkhonta ngekutfobeka, futsi simdvumise ngenhlitiyo lephuphuma lutsandvo nekubonga. (Mik. 6:8; Mak. 12:32-34) Akudzingeki satiwe bantfu labanyenti kuze sidvumise Jehova.

Nangibuka tabelo lengitentile, ngiyabona kutsi angikatitfoli ngobe ngincono kunalabanye; nobe ngenca yekutsi nginemakhono labalulekile. Cha! Kunaloko, Jehova unginike letabelo ngobe unemusa lomkhulu. Ungivumele kutsi ngitente nanobe nginemaphutsa. Ngiyati kutsi ngikhone kutenta ngenca yekusitwa nguJehova. Ngako butsakatsaka bami bungente ngabona emandla aNkulunkulu.​—2 Khor. 12:9.