1. Liyini lipharadisi lelingumfanekiso, futsi yini lokufanele sitimisele kuyenta?

 LAMUHLA emhlabeni kunelipharadisi lelinebantfu labenta tintfo letinhle. Linebantfu labatigidzi labanekuthula mbamba. Labo labakulelipharadisi batimisele ngekungacali balishiye. Bafuna nekutsi bantfu labanyenti kakhulu babe nabo kulendzawo lengakavami. Nguyiphi lendzawo? Lipharadisi lelingumfanekiso! a

2. Yini lesimangalisako ngelipharadisi lelingumfanekiso?

² Kuyamangalisa kutsi Jehova wente indzawo lapho khona bantfu bakhe bahlala ngekuthula nangebunye, nanobe baphila eveni laSathane leligcwele bubi, leliyingoti futsi lelinebantfu labenyanyanako. (1 Joh. 5:19; Semb. 12:12) Nkulunkulu wetfu lositsandzako uyabona kutsi lelive libaphatsa kabi bantfu, kodvwa wente kutsi labo labamtsandzako bative bavikelekile kuze bachubeke bamkhonta bajabulile. LiVi lakhe lichaza lelipharadisi lelingumfanekiso ngekutsi liyindzawo ‘yekukhosela’ levikelekile nangekutsi ‘liyingadze leniselwa kahle.’ (Isa. 4:6; 58:11) Ngekusitwa nguJehova, labo labahlala kulelipharadisi bativa bavikelekile futsi bajabulile nanobe baphila kulesikhatsi lesimatima.​—Isa. 54:14; 2 Thim. 3:1.

3. Wagcwaliseka njani kwekucala umbhalo wa-Isaya sehluko 65?

³ Asebentisa umphrofethi Isaya, Jehova wachaza kutsi bekutawuba njani kuphila kulabo lebebatawuhlala epharadisi lelingumfanekiso. Lenchazelo ungayitfola ku-Isaya sehluko  65, lowagcwaliseka kwekucala nga-537 B.C.E. Ngaleso sikhatsi, emaJuda lebekaphendvukile akhululwa eBhabhulona labekatfunjwe khona futsi abuyela eveni lawo. Jehova wababusisa bantfu bakhe futsi wabasita kutsi balungise iJerusalema njengobe beyibhujisiwe, kuze iphindze ibe yinhle futsi kwakhiwe kabusha lithempeli kuze ema-Israyeli aphindze amkhontele kulo.​—Isa. 51:11; Zak. 8:3.

4. Umbhalo wa-Isaya sehluko 65 ugcwaliseke njani emalangeni etfu?

⁴ Siphrofetho lesiku-Isaya saphindze sacala kugcwaliseka nga-1919 C.E. ngesikhatsi bantfu baJehova basesikhatsini salamuhla bakhululwa ekutfunjweni yiBhabhulona Lenkhulu. Ngemuva kwaloko, lipharadisi lelingumfanekiso lacala kwandza kancane kancane emhlabeni. Bamemeteli beMbuso labakhutsele basungula emabandla lamanyenti futsi baba nebuntfu bebuKhristu. Emadvodza nebafati lebebanebudlova futsi banebuntfu lobufana nebetilwane, ‘bagcoka buntfu lobusha lobentiwe ngentsandvo yaNkulunkulu.’ (Ef. 4:24) Kuliciniso kutsi letibusiso letichazwe embhalweni wa-Isaya titawugcwaliseka ngalokuphelele emhlabeni lomusha. Nobe kunjalo, ngisho nanyalo sisitakala kakhulu ngekuba kulelipharadisi. Asesicoce ngekutsi kusisita njani kuba kulendzawo nekutsi kubaluleke ngani kutsi singacali siyishiye.

BATIVA NJANI LABO LABASEPHARADISI LELINGUMFANEKISO?

5. Njengobe kwetsembisa umbhalo wa-Isaya 65:13, yini lesiyijabulelako epharadisi lelingumfanekiso?

⁵ Ngendlela lengumfanekiso, badla kahle futsi bacabulekile. Siphrofetho sa-Isaya siveta umehluko lomkhulu emkhatsini walabo labasepharadisi lelingumfanekiso nalabo labangekho kulo. (Fundza Isaya 65:13.) Jehova upha bantfu bakhe konkhe labakudzingako kuze bahlale basondzelene naye. Usiphe umoya wakhe longcwele, liVi lakhe kanye netintfo letinyenti letisekelwe eBhayibhelini, kangangekutsi ‘siyadla, . . . sinatse, . . . [futsi] sijabule.’ (Catsanisa neSembulo 22:17.) Kodvwa simo sehluke kakhulu kulabo labangekho kulelipharadisi ngobe ‘bayalamba . . . , bome . . . , [futsi] bahlazeke.’ Bete buhlobo lobuhle naNkulunkulu.​—Amo. 8:11.

6. Umbhalo waJoweli 2:21-24 uyichaza njani imfundvo levela eBhayibhelini, futsi ingasisita njani?

⁶ Esiphrofethweni sakhe, Joweli wasebentisa tintfo letenta umuntfu aphile, lokufaka ekhatsi lokutinhlavu, liwayini kanye nemafutsa kuze akhombise kutsi Jehova ubapha ngesandla lesivulekile bantfu bakhe loko labakudzingako, lokufaka ekhatsi imfundvo levela eBhayibhelini. (Jow. 2:21-24) Loko ukwenta asebentisa liBhayibheli kanye netintfo letisekelwe kulo, i-website yetfu, kanye nemihlangano yelibandla, yesifundza neyesigodzi. Singatisebentisa onkhe malanga letintfo, futsi nasenta njalo sitawutiva sondleke kahle futsi sicabulekile.

7. Yini leyenta sibe ‘netinhlitiyo letijabulile’? (Isaya 65:14)

⁷ Sijabulile futsi senetisekile. Bantfu baNkulunkulu ‘bamemeta ngenjabulo’ ngenca yetinhlitiyo letiphuphuma kubonga. (Fundza Isaya 65:14.) Emaciniso lakhako netetsembiso letiseVini laNkulunkulu letidvudvutako kanye nelitsemba letfu lelicinile lelisekelwe enhlawulweni yaKhristu kwenta sibe ‘netinhlitiyo letijabulile.’ Kucoca nebazalwane betfu nabodzadze ngaletintfo kwenta kutsi sijabule kakhulu!​—Hla. 34:8; 133:1-3.

8. Ngutiphi tintfo letimbili letibalulekile letitfolakala epharadisi lelingumfanekiso?

⁸ Tintfo letimbili letibaluleke kakhulu letitfolakala epharadisi lelingumfanekiso lutsandvo nebunye lobusemkhatsini webantfu baJehova. ‘Lesibopho sebunye’ sisinika sitfombe sekutsi kutawuba njani kuphila emhlabeni  lomusha lapho khona bantfu baJehova batawutsandzana kakhulu futsi babe nebunye lobukhulu kwendlula nyalo. (Khol. 3:14) Lomunye dzadze usho loko lakunaka nakacala kubona bantfu baJehova, utsi: “Bengingakwati kutsi kunjani kujabula, bengingakwati ngisho nasemndenini wami. Kucala kwami kubona bantfu bakhombisana lutsandvo sibili kwaba ngulesikhatsi ngihlangana naBoFakazi BaJehova.” Nobe ngubani lofuna kujabula mbamba futsi enetiseke mbamba kufanele abe sepharadisi lelingumfanekiso. Ngisho nobe bantfu balelive bacabangani ngebantfu baJehova, kodvwa baneligama nobe lidvumela lelihloniphekile naJehova nabo bonkhe labamkhontako.​—Isa. 65:15.

9. Umbhalo wa-Isaya 65:16, 17 usetsembisani mayelana netintfo letisibangele buhlungu nekuhlupheka?

⁹ Asikhatsateki futsi sehlise umoya. Isaya 65:14 utsi labo labakhetsa kungabi sepharadisi lelingumfanekiso ‘bayakhala ngenca yebuhlungu benhlitiyo futsi bayalila ngenca yemoya lowephukile.’ Kodvwa kutsiwani ngato tonkhe tintfo letibangele bantfu baNkulunkulu buhlungu futsi tabenta bahlupheka? Ekugcineni, letintfo angeke ‘tisakhunjulwa futsi [Nkulunkulu] ngeke aphindze atibone.’ (Fundza Isaya 65:16, 17.) Jehova utawutisusa tonkhe tinkinga tetfu futsi ngekuhamba kwesikhatsi angeke sisatikhumbula sanhlobo tintfo letisivise buhlungu.

10. Yini lekwenta ubone ngatsi kusibusiso kutihlanganisa nebazalwane bakho nabodzadze? (Buka nesitfombe.)

¹⁰ Ngisho nanyalo, kusijabulisa kakhulu kuba semihlanganweni yelibandla ngobe sitiva sikhululekile futsi sitikhohlwa kwesikhashana tinkinga talelive lelibi. Senta kutsi bazalwane betfu nabodzadze bative bakhululekile nasikhombisa lutsandvo, injabulo, kuthula, umusa nemoya lophansi, lokutitselo temoya waNkulunkulu. (Gal. 5:22, 23) Sikutsatsa njengesibusiso lesikhulu kuba yincenye yenhlangano yaNkulunkulu! Labo labachubeka bahleti epharadisi lelingumfanekiso batasibona sigcwaliseka ngalokuphelele setsembiso saNkulunkulu ‘semazulu lamasha nemhlaba lomusha.’

11. Ngekusho kwa-Isaya 65:18, 19, kufanele sitive njani ngelipharadisi lelingumfanekiso lelentiwe nguJehova?

¹¹ Siyabonga futsi sijabulile. Isaya ubese uchaza kutsi yini lesenta sibe netizatfu letivakalako ‘tekujabula nekutfokota’ ngelipharadisi lelingumfanekiso. Lendzawo lengumfanekiso yentiwe nguJehova. (Fundza Isaya 65:18, 19.) Kungako kungasimangalisi kutsi Jehova usebentisa tsine kuze asite bantfu kutsi bashiye tinhlangano talelive letingabafundzisi liciniso ngaye futsi sibasite kutsi babe yincenye yalelipharadisi  lelihle lelingumfanekiso! Sijabula kakhulu ngetibusiso lesititfolako ngenca yekuba secinisweni, futsi loko kusenta sibe nesifiso lesikhulu sekucocela labanye ngato.​—Jer. 31:12.

12. Utiva njani ngetetsembiso letiku-Isaya 65:20-24, futsi yini lekwenta utive kanjalo?

¹² Siphindze sibonge kakhulu futsi sijabule kakhulu ngenca yelitsemba lesinalo tsine lesihlala epharadisi lelingumfanekiso. Cabanga nje ngato tonkhe tintfo lesitawutibona futsi sitente emhlabeni lomusha waNkulunkulu! Naku liBhayibheli lelikwetsembisako: “Angeke kuphindze kube neluswane loluyawuphila emalanga lambalwa nje, futsi angeke kuphindze kube nemuntfu lomdzala longeke aphile sikhatsi lesidze.” ‘Siyawukwakha tindlu sihlale kuto, futsi siyawuhlanyela emasimu emagilebisi, sidle titselo tawo.’ ‘Angeke sisebentele lite’ ngobe sitawube ‘sibusiswe nguJehova.’ Nkulunkulu wetsembisa kutsi sitawuvikeleka, sibe nemphilo leyenetisako futsi lenenjongo sibili. ‘Kuyawutsi basengakambiti,’ utawube sekavele atati tidzingo temuntfu ngamunye futsi ‘utawunika tonkhe tintfo letiphilako loko letikufisako.’​—Isa. 65:20-24; Hla. 145:16.

13. Umbhalo wa-Isaya 65:25 uluchaza njani lushintjo lolwentiwa bantfu nabacala kukhonta Jehova?

¹³ Sinekuthula futsi sivikelekile. Ngekusitwa ngumoya waNkulunkulu, bantfu labanyenti lebebanesimo sebulwane bente lushintjo lolukhulu ekuphileni kwabo. (Fundza Isaya 65:25.) Basebente kamatima kuze bayekele kuba nebuntfu lobubi. (Rom. 12:2; Ef. 4:22-24) Kuliciniso kutsi bantfu baNkulunkulu solo banesono, ngako sitawuchubeka senta emaphutsa. Nobe kunjalo, Jehova uhlanganise “tonkhe tinhlobo tebantfu” labamtsandzako futsi labatsandzanako, lokwenta kutsi babe nekuthula mbamba nebunye. (Thit. 2:11) Lesi simangaliso lesingentiwa nguNkulunkulu Somandla kuphela!

14. Kuba liciniso kwa-Isaya 65:25 kwabonakala njani kulomunye umzalwane?

¹⁴ Bantfu bangabushintja yini vele buntfu babo? Cabanga nganaku lokwenteka. Lelinye lijaha bese liboshwe tikhatsi letinyenti nalineminyaka lengu-20, litiphatsa kabi futsi lisidlova. Beliboshelwe kweba timoto, kugcekeza nalamanye emacala lamakhulu. Belihlala likulungele kulwa. Nalicala kuva liciniso leliseBhayibhelini futsi licala kuya emihlanganweni yaBoFakazi BaJehova, laciniseka kutsi seliyitfolile injongo yekuphila, lokukukhonta Jehova epharadisi lelingumfanekiso. Ngemuva kwekubhajatiswa, belivame kucabanga ngendlela Isaya 65:25 losebenta ngayo kulo. Lelijaha lakuyekela kuba sidlova kuhle kwelibhubesi, futsi labanekuthula kuhle kwemvu.

15. Yini lesenta sifune kumema labanye bantfu babe kanye natsi epharadisi lelingumfanekiso, futsi singakwenta njani loko?

¹⁵ Isaya 65:13 ucala ngemavi latsi: “INkhosi Lephakeme Jehova itsi.” Vesi 25 wephetsa ngemavi latsi “kusho Jehova.” Loko lakushoko kuhlale kufezeka. (Isa. 55:10, 11) Lipharadisi lelingumfanekiso selivele likhona. Jehova wente umndeni wetikhonti takhe lowehluke ngendlela lemangalisako. Ngenca yekutsi siyincenye yalomndeni, sinekuthula futsi sitiva sivikelekile kulelive lelinebudlova. (Hla. 72:7) Ngenca yaloku, sifuna kusita bantfu labanyenti kutsi babe yincenye yalomndeni wetfu. Loko singakwenta ngekutsi sinake umsebenti wekwenta bafundzi.​—Mat. 28:19, 20.

INDLELA LESINGENTA NGAYO LABANYE BAKHANGWE LIPHARADISI LELINGUMFANEKISO

16. Yini lengenta bantfu bafune kuba kanye natsi epharadisi lelingumfanekiso?

¹⁶ Ngamunye wetfu angenta lokutsite kuze ente lelipharadisi likhange kulabanye. Kuze sikwente loko, kufanele silingise Jehova.  Akaphoceleli muntfu kutsi angene ngenkhani enhlanganweni yakhe. Kunaloko, ngemusa ‘ubadvonsela’ kuye. (Joh. 6:44; Jer. 31:3) Bantfu labanetinhlitiyo leticotfo labafundza ngelutsandvo lwaJehova nangalobunye buntfu bakhe lobuhle bavele nje badvonseleke kuye. Buntfu betfu lobuhle nekutiphatsa kahle kungabadvonsela njani bantfu epharadisi lelingumfanekiso?

17. Yini lesingayenta kuze sente labanye bakhangwe lipharadisi lelingumfanekiso?

¹⁷ Lokunye lesingakwenta kuze sente labanye bakhangwe lipharadisi lelingumfanekiso kutsi siphatse bazalwane betfu nabodzadze ngendlela lekhombisa lutsandvo nemusa. Nangabe lotsite acala kuta emihlanganweni yetfu yelibandla, sifuna ative ngendlela labanye labangasiwo emaKhristu lokungenteka bativa ngayo ngesikhatsi baye emihlanganweni yelibandla eKhorinte. Batsi: “Nembala Nkulunkulu unani.” (1 Khor. 14:24, 25; Zak. 8:23) Ngako sifuna kuchubeka sisilalela seluleko lesitsi: “Hlalisanani ngekuthula.”​—1 Thes. 5:13.

18. Yini lengenta bantfu bakhangwe lipharadisi lelingumfanekiso?

¹⁸ Kufanele sihlale sibuka bazalwane betfu nabodzadze ngendlela Jehova lababuka ngayo. Loko singakwenta ngekutsi sibuke buntfu babo lobuhle kunekutsi sinake emaphutsa abo, nawo labatawugcine bangasawenti. Singalungisa kungevani emkhatsini wetfu ngelutsandvo ngekutsi sihlale ‘siphatsana ngemusa, sibe nesihawu, sitsetselelane ngekukhululeka.’ (Ef. 4:32) Nasenta njalo, lelipharadisi lelingumfanekiso litawubakhanga bantfu labafuna kuphatfwa ngalendlela. b

 UNGAPHUMI EPHARADISI LELINGUMFANEKISO

19. (a) Njengobe kuvetiwe ebhokisini lelitsi “ Bahamba Baphindze Babuya,” yini labanye labayishoko ngemuva kwekubuyela epharadisi lelingumfanekiso? (b) Yini lokufanele sitimisele kuyenta? (Buka nesitfombe.)

¹⁹ Sibonga kakhulu ngekuba nalelipharadisi lelingumfanekiso! Nyalo selihle kakhulu kunakucala futsi kulo kuhlala bantfu labanyenti labadvumisa Jehova kunasesikhatsini lesendlulile. Shengatsi singahlale sibonga kakhulu ngalelipharadisi Jehova lasentele lona. Nobe ngubani lofuna kucabuleka, ative enetisekile, ahlale ehlise umoya futsi ative avikelekile, kufanele ete kulelipharadisi futsi angacali aphume kulo! Kodvwa ubohlale ugadzile ngobe Sathane wenta konkhe langakwenta kuze etame kusikhipha kulo. (1 Phet. 5:8; Semb. 12:9) Akukafaneli simvumele kutsi aphumelele. Shengatsi singenta konkhe lokusemandleni etfu kuze sivikele buhle, kuhlanteka kanye nekuthula kwelipharadisi lelingumfanekiso.