1. Bebahlelwe njani bantfu baJehova ngesikhatsi semaKhristu ekucala?

 JEHOVA nakaniketa bantfu bakhe umsebenti, ulindzele kutsi bawente ngendlela lehlelekile. (1 Khor. 14:33) Sibonelo nje, kuyintsandvo yaNkulunkulu kutsi tindzaba letimnandzi tishunyayelwe emhlabeni wonkhe. (Mat. 24:14) Jehova ubeke Jesu kutsi awucondzise lomsebenti. Jesu wente konkhe langakwenta kuze aciniseke kutsi lomsebenti wentiwa ngendlela lehlelekile. Ngesikhatsi semaKhristu ekucala, nakusungulwa emabandla etindzaweni letehlukahlukene, kwakhetfwa labadzala bemabandla kuze bawacondzise futsi bawahole. (Imis. 14:23) EJerusalema bekunesigungu salabadzala lebesakhiwa baphostoli nemadvodza lamadzala lebesenta tincumo lebekulindzeleke kutsi onkhe emabandla atilalele. (Imis. 15:2; 16:4) Ngenca yekutsi betilalelwa leticondziso, “kukholwa kwemabandla bekuchubeka kuciniswa, futsi bekandza malanga onkhe.”​—Imis. 16:5.

2. Kusukela nga-1919, yini Jehova layentile kuze acondzise bantfu bakhe futsi abanike ticondziso letivela eVini lakhe?

² Nalamuhla Jehova uyachubeka nekucondzisa bantfu bakhe. Kusukela nga-1919, Jesu bekasebentisa licembu lelincane lemadvodza lagcotjiwe kuze lihlele umsebenti wekushumayela futsi linikete balandzeli bakhe ticondziso letivela eVini laNkulunkulu ngesikhatsi lesifanele. a (Luk. 12:42) Kusebaleni kutsi Jehova  uyawubusisa lomsebenti walelicembu.​—Isa. 60:22; 65:13, 14.

3-4. (a) Shano sibonelo lesikhombisa kutsi kusisita njani kuhleleka. (b) Sitawucoca ngani kulesihloko?

³ Kube besingakahleleki, besingeke sikhone kuwenta lomsebenti lesawuniketwa nguJesu. (Mat. 28:19, 20) Sibonelo nje, kube bazalwane bebangahleli kutsi sishumayele yonkhe indzawo lesensimini yelibandla letfu, bonkhe ebandleni bebangashumayela labafuna khona. Letinye tindzawo betingashunyayelwa bamemeteli labehlukahlukene ngalokuphindzaphindziwe, bese kutsi letinye tingashunyayelwa sanhlobo. Tikhona yini letinye tindlela loticabangako lokusisita ngato kuhleleka?

⁴ Njengobe Jesu ahlela balandzeli bakhe ngesikhatsi alamhlabeni, nalamuhla uyachubeka nekuhlela bantfu baNkulunkulu. Kulesihloko, sitawucoca ngesibonelo Jesu lasibekela sona nekutsi inhlangano yetfu isilandzela njani. Sitawuphindze sicoce ngekutsi singakhombisa njani kutsi siyabonga ngenhlangano yaJehova.

INHLANGANO YETFU ILINGISA SIBONELO SAJESU

5. Nguyiphi lenye indlela lesilingisa ngayo sibonelo saJesu? (Johane 8:28)

⁵ Jesu wakufundza kuBabe wakhe wasezulwini loko lokufanele akwente nalokufanele akusho. Ilingisa sibonelo saJesu, inhlangano yaJehova isekela timfundziso tayo tekutiphatsa kanye neticondziso tayo eVini laNkulunkulu. (Fundza Johane 8:28; 2 Thim. 3:16, 17) Sihlale sitfola tikhumbuto tekutsi sifundze liVi laNkulunkulu futsi sikusebentise loko lesikufundza kulo. Kusisita njani kulalela leseluleko?

6. Nguyiphi lenye indlela lebalulekile lokusisita ngayo kudadisha liBhayibheli?

⁶ Sisitakala kakhulu nasidadisha liBhayibheli sisebentisa tincwadzi tetfu. Sibonelo nje, siyakhona kucatsanisa timfundziso teliBhayibheli kanye neticondziso lesititfola enhlanganweni. Nasibona kutsi sicondziso lesisitfolako sisekelwe emiBhalweni, iyakhula indlela lesiyetsemba ngayo inhlangano yaJehova.​—Rom. 12:2.

7. Jesu bekashumayela muphi umlayeto, futsi inhlangano yaJehova isilingisa njani sibonelo sakhe?

⁷ Jesu bekashumayela ‘tindzaba letimnandzi teMbuso waNkulunkulu.’ (Luk. 4:43, 44) Ngetulu kwaloko, watjela bafundzi bakhe kutsi bashumayele ngeMbuso. (Luk. 9:1, 2; 10:8, 9) Lamuhla, bonkhe labatihlanganisa nenhlangano yaJehova bashumayela umlayeto weMbuso ngisho nobe bahlala kuphi nobe ngisho banemisebenti leminyenti kangakanani enhlanganweni yaJehova.

8. Ngumuphi umsebenti loligugu lesiniketwe wona?

⁸ Kuligugu kitsi kucocela labanye liciniso lelimayelana neMbuso waNkulunkulu! Kodvwa lomsebenti awentiwa ngunobe ngubani. Sibonelo nje, ngesikhatsi Jesu alamhlabeni, akazange avume kutsi imimoya lemibi ifakaze ngaye. (Luk. 4:41) Lamuhla, ngaphambi kwekutsi umuntfu ente umsebenti wekushumayela nebantfu baJehova, kufanele aphile ngendlela lejabulisa Jehova. Sikhombisa kutsi siwutsatsa njengaloligugu lomsebenti ngekutsi sishumayele nobe ngukuphi nanganobe ngusiphi sikhatsi. NjengaJesu, umgomo wetfu kuhlanyela nekunisela inhlanyelo yeMbuso etinhlitiyweni tebantfu.​—Mat. 13:3, 23; 1 Khor. 3:6.

9. Inhlangano ilente njani latiwa libito laNkulunkulu?

⁹ Jesu wenta libito laNkulunkulu latiwa. Ngesikhatsi Jesu athantaza kuBabe wakhe wasezulwini, watsi: “Ngibafundzisile ngelibito lakho.” (Joh. 17:26) Ilingisa sibonelo saJesu, inhlangano yaJehova yenta konkhe lengakwenta kuze isite labanye balati libito laNkulunkulu. Lihumusho Lemhlaba Lomusha LemiBhalo Lengcwele lente umsebenti lobalulekile wekubuyisela ligama laNkulunkulu etindzaweni lokufanele livele kuto. Nyalo leliBhayibheli  litfolakala ngetilwimi letingetulu kwa-270 liphelele nobe liyincenye. KuSandzisanchazo A4 na-A5 lesikulelihumusho, utawutfola imininingwane lemayelana nekubuyiselwa kweligama laNkulunkulu eBhayibhelini. Sandzisanchazo C, lesitfolakala ku-Study Bible, siniketa bufakazi lobunyenti bekutsi libito laNkulunkulu kufanele livele tikhatsi letingu-237 emiBhalweni YemaKhristu YesiGriki.

10. Yini loyifundzako kulokwashiwo ngulomunye make lohlala eMyanmar?

¹⁰ NjengaJesu, sifuna kusita bantfu labanyenti kutsi balati ligama laNkulunkulu. Ngesikhatsi lomunye make waseMyanmar loneminyaka lengu-67 afundza kutsi Nkulunkulu unelibito, wakhala futsi watsi: “Kwekucala ngca emphilweni yami kuva kutsi ligama laNkulunkulu nguJehova. . . . Ningifundzise intfo lebaluleke kakhulu.” Njengobe lendzaba iveta, kufundza ligama laNkulunkulu kungaba nemiphumela lemihle kubantfu labanetinhlitiyo leticotfo.

CHUBEKA UKHOMBISA KUTSI UYETSEMBA KAKHULU INHLANGANO YETFU

11. Labadzala belibandla bangakhombisa njani kutsi bayayetsemba inhlangano yaJehova? (Buka nesitfombe.)

¹¹ Nguyiphi lenye indlela labadzala belibandla labangakhombisa ngayo kutsi bayayetsemba inhlangano yaNkulunkulu? Nabatfola sicondziso, kufanele basifundze ngekucophelela futsi bente konkhe labangakwenta kuze basisebentise. Sibonelo nje, batfola sicondziso sekutsi bangayichuba njani imihlangano yelibandla, bangathantaza njani nabamelele libandla nekutsi bangatelusa njani timvu taKhristu. Labadzala belibandla labalalela sicondziso senhlangano basita bazalwane babo nabodzadze kutsi bative bavikelekile futsi batsandvwa.

12. (a) Kubaluleke ngani kutsi sibambisane nalabo labaholako? (KumaHebheru 13:7, 17) (b) Kubaluleke ngani kutsi sinake buntfu lobuhle kulabo labaholako?

¹² Nasitfola sicondziso kulabadzala belibandla, kufanele sisilalele ngekutitsandzela. Nasenta njalo, sitawenta kutsi kube melula ngalabo labaholako kutsi bente umsebenti wabo. LiBhayibheli lisikhutsata kutsi sibalalele labo labaholako futsi sititfobe kubo. (Fundza KumaHebheru 13:7, 17.) Kodvwa ngaletinye tikhatsi loko kungaba lukhuni. Ngasiphi sizatfu? Ngenca yekutsi lamadvodza anesono. Nobe kunjalo, nangabe sinaka emaphutsa awo kunekutsi sinake tintfo letinhle latentako, ngandlela tsite sitawube sisita titsa tetfu. Ngayiphi indlela? Sitawucala kuyingabata inhlangano yaNkulunkulu, futsi nguloko kanye titsa tetfu letifuna sikwente. Yini lesingayenta kuze sibone emanga etitsa tetfu futsi siwagweme?

UNGABAVUMELI LABANYE BAKWENTE UYINGABATE INHLANGANO YETFU

13. Titsa taNkulunkulu tetama njani kwenta inhlangano yakhe ibonakale iyimbi?

¹³ Labo labaphikisa Nkulunkulu betama kwenta tintfo letinhle ngenhlangano yetfu tibonakale titimbi. Sibonelo nje, sifundzile emiBhalweni kutsi Jehova ulindzele kutsi labo labamkhontako bahlanteke emtimbeni, nasendleleni labatiphatsa ngayo futsi bamkhonte ngendlela yena layemukelako. Ufuna kutsi nobe ngubani lowenta tintfo letingcolile futsi longaphendvuki ayekeliswe kuba nguFakazi. (1 Khor. 5:11-13; 6:9, 10) Siyasilalela lesicondziso lesisekelwe emiBhalweni. Kodvwa labo labasiphikisako betama kusebentisa loko kuze basimangalele ngekutsi silukhuni, siyehlulelana futsi site lutsandvo.

14. Ngubani lowenta kutsi kube netindzaba letingemanga ngenhlangano?

¹⁴ Yati kutsi ngubani lolobangela lokuhlaselwa. NguSathane Develi losakata tindzaba letingemanga. ‘Ungubabe wemanga.’ (Joh. 8:44; Gen. 3:1-5) Ngako singalindzela kutsi Sathane asebentise labo labamsekelako kuze asakate tindzaba letingemanga ngenhlangano yaJehova.  Loko kwenteka ngesikhatsi semaKhristu ekucala.

15. Yini baholi benkholo labayenta kuJesu nakubalandzeli bakhe?

¹⁵ Ngesikhatsi semaKhristu ekucala, labo labasekela Sathane bakhuluma emanga lamanyenti ngeNdvodzana yaNkulunkulu lete sono futsi lebeyenta timangaliso. Sibonelo nje, baholi benkholo batjela bantfu kutsi Jesu bekawatsatsa ‘enkhosini yemadimoni’ emandla lebekawasebentisa kuze akhiphe emadimoni. (Mak. 3:22) Ngesikhatsi Jesu atekiswa licala, baholi benkholo bammangalela ngekutsi uyahlambalata futsi bagcugcutela bantfu kutsi batsi akabulawe. (Mat. 27:20) Ngekuhamba kwesikhatsi, njengobe balandzeli baKhristu bashumayela tindzaba letimnandzi, labo lababaphikisako ‘bafaka umoya lomubi kubantfu’ kuze babaphatse kabi. (Imis. 14:2, 19) Sikhuluma ngeMisebenti 14:2, Sicongosekulindza saDecember 1, 1998, satsi: “Baholi bemaJuda abagcinanga nje ngekungawemukeli umlayeto lebewushunyayelwa ngulamaKhristu, kodvwa basho tintfo letimbi ngawo kuze bantfu bangawalaleli futsi bawenyanye.”

16. Yini lokufanele siyikhumbule nasiva tindzaba letingemanga?

¹⁶ Sathane akayekelanga kukhuluma emanga ngesikhatsi semaKhristu ekucala. Lamuhla, solo uchubeka ‘udukisa umhlaba wonkhe.’ (Semb. 12:9) Nangabe uva tindzaba letingemanga ngenhlangano nobe mayelana nebazalwane labaholako, khumbula kutsi titsa taNkulunkulu tamphatsa njani Jesu nebafundzi bakhe. Lamuhla, bantfu baJehova baphatfwa kabi futsi bakhulunyelwa emanga njengobe nje liBhayibheli lasho. (Mat. 5:11, 12) Tindzaba letingemanga ngeke tisidukise nangabe siwati umtfombo wato futsi sitivikela kuto. Singativikela njani?

17. Singatigwema njani tindzaba letingemanga? (2 KuThimothi 1:13) (Buka nelibhokisi lelitsi “ Yini Lokufanele Uyente Nawuva Tindzaba Letingemanga?”)

 ¹⁷ Tigweme tindzaba letingemanga. Umphostoli Pawula washo ticondziso leticacile taloko lesingakwenta nasiva tindzaba letingemanga. Watjela Thimothi kutsi ‘ayale labatsite kutsi banganaki tindzaba letingemanga’ nekutsi ‘angatilaleli tindzaba letingemanga letedzelela Nkulunkulu.’ (1 Thim. 1:3, 4; 4:7) Ngenca yekungati, umntfwana angabutsa intfo phansi ayifake emlonyeni, kodvwa umuntfu lomdzala uyati kutsi kuyingoti kwenta njalo, ngako ngeke akwente loko. Natsi siyatigwema tindzaba letingemanga ngobe siyati kutsi ngubani umtfombo wato. Kunaloko silalela ‘emavi laphilile’ eliciniso.​—Fundza 2 KuThimothi 1:13.

18. Singakhombisa njani kutsi siyayetsemba inhlangano yaJehova?

¹⁸ Sicoce ngetindlela letintsatfu kuletinyenti tekutsi inhlangano yaNkulunkulu imlingisa njani Jesu. Njengobe udadisha liBhayibheli, yetama kutfola letinye tindlela inhlangano lesilingisa ngayo sibonelo saJesu. Sita labanye ebandleni kutsi bayetsembe kakhulu inhlangano. Ngetulu kwaloko, chubeka ukhombisa kubonga kwakho ngekutsi uchubeke ukhonta Jehova ngekwetsembeka futsi unamatsele kulenhlangano layisebentisako kuze afeze intsandvo yakhe. (Hla. 37:28) Shengatsi singachubeka silitsatsa njengaleliligugu litfuba lelihle lekuba yincenye yebantfu baJehova labanelutsandvo futsi labetsembekile.