1. Yini leyenta Jesu wacela Jehova kutsi avikele balandzeli bakhe?

 NGEBUSUKU lobungaphambi kwekufa kwakhe, Jesu wacela lokutsite lokubalulekile kuBabe wakhe wasezulwini. Wacela Jehova kutsi avikele balandzeli bakhe. (Joh. 17:15, 20) Kuliciniso kutsi Jehova bekasolo abanaka bantfu bakhe, abanakekela futsi abavikela. Nanobe kunjalo, Jesu bekati kutsi Sathane bekatawubaphatsa kabi kakhulu balandzeli bakhe. Jesu bekati nekutsi bebatawudzinga kusitwa nguJehova kuze bamelane nekuhlaselwa nguDeveli.

2. Ngekusho kweTihlabelelo 33:18-20, ngusiphi sizatfu lesinaso sekungesabi nasibhekene netinkinga?

² Lelive laSathane liwacindzetela kakhulu emaKhristu eliciniso lamuhla. Sibhekana netinkinga letingasicedza emandla futsi tivivinye kwetsembeka kwetfu kuJehova. Kodvwa sitawubona kulesihloko kutsi kufanele singesabi. Jehova usinakile, uyatibona tinkinga lesibhekana nato futsi uhlale akulungele kusisita. Asesicoce ngetibonelo letimbili letiseBhayibhelini letikhombisa kutsi liso laJehova “libuke labo labamesabako.”​—Fundza Tihlabelelo 33:18-20.

3. Kunini lapho singahle sitive sisodvwa khona?

³ Nanobe sinebazalwane nabodzadze labanyenti, ngalesinye sikhatsi singahle sitive sisodvwa. Sibonelo nje, labasebasha bangahle bative babodvwa nabachazela labafundza nabo ngetinkholelo tabo nobe nabatfutsela ebandleni lelisha. Labanye betfu bangeva buhlungu futsi bacindzeteleke, bacabange kutsi kufanele babhekane nalesimo babodvwa. Singahle sesabe kukhuluma nalabanye ngobe sicabanga kutsi angeke bayicondze indlela lesitiva ngayo. Ngaletinye tikhatsi singahle sitibute kutsi  ukhona yini vele lonendzaba natsi. Kunobe ngusiphi sizatfu lesingasenta sitive sisodvwa, ngalesinye sikhatsi singativa site emandla futsi sikhatsatekile. Jehova akafuni sitive kanjalo. Sisho ngani?

4. Yini leyenta umphrofethi Elija watsi: “Ngimi kuphela losasele”?

⁴ Cabanga ngesibonelo sa-Elija, lebekayindvodza leyetsembekile. Jezebeli bekafunge wagomela kutsi utambulala, ngako besekuphele emalanga langetulu kwalangu-40 abaleka. (1 Khos. 19:1-9) Ekugcineni, wakhala kuJehova asemhumeni watsi: “Ngimi kuphela [umphrofethi] losasele.” (1 Khos. 19:10) Bebakhona labanye baphrofethi kulelive; Obadiya bekasite baphrofethi labangu-100 kutsi bangabulawa nguJezebeli. (1 Khos. 18:7, 13) Yini-ke leyenta Elija wativa ayedvwa? Bekacabanga kutsi labaphrofethi labasitwa ngu-Obadiya bafe bonkhe yini? Nobe kungenteka yini wativa ayedvwa ngenca yekutsi kute lowakhonta Jehova kanye naye ngemuva kwekutsi Jehova akhombisile kutsi unguNkulunkulu weliciniso eNtsabeni iKhameli? Kungenteka yini bekacabanga kutsi kute lowatiko kutsi usengotini lengakanani, nobe kungenteka bekatibuta kutsi ukhona yini lonendzaba naye? Lendzaba ayisitjeli konkhe mayelana nendlela lebekativa ngayo. Kodvwa lesiciniseka ngako kutsi Jehova bekati kutsi yini lebeyenta Elija ative ayedvwa futsi bekati kutsi angamsita njani.

5. Jehova wamcinisekisa njani Elija kutsi akasiyedvwa?

⁵ Jehova wasita Elija ngetindlela letinyenti. Wamkhutsata kutsi asho indlela lativa ngayo. Wabuta Elija kabili watsi: “Wentani lapha?” (1 Khos. 19:9, 13) Kuto totimbili letikhatsi, bekatsi nakamtjela indlela lativa ngayo Jehova alalele. Jehova bekamphendvula ngekutsi amkhombise kutsi unaye nekutsi unemandla lamakhulu. Waphindze wamcinisekisa kutsi bekunalamanye ema-Israyeli lebekamkhonta. (1 Khos. 19:11, 12, 18) Siyaciniseka kutsi Elija wativa ancono ngemuva kwekutjela Jehova indlela lativa ngayo kanye nekuva imphendvulo yakhe. Jehova wanika Elija imisebenti lebalulekile leminyentana. Wamcela kutsi agcobe Hazayeli abe yinkhosi yaseSiriya, agcobe Jehu kutsi abe  yinkhosi yaka-Israyeli, nekutsi agcobe Elisha abe ngumphrofethi. (1 Khos. 19:15, 16) Ngenca yekutsi Jehova wamniketa lemisebenti, loko kwamsita kutsi anake tintfo letinhle. Nkulunkulu waphindze wamniketa umuntfu lebekatawuba naye, lokungu-Elisha. Ungalutfola njani lusito loluvela kuJehova nangabe utiva uwedvwa?

6. Yini longayisho emthantazweni wakho nawutiva uwedvwa? (Tihlabelelo 62:8)

⁶ Jehova ukucela kutsi uthantaze kuye. Uyatibona tinkinga lonato, futsi uyakucinisekisa kutsi utayilalela imithantazo yakho nobe nini nawuthantaza kuye. (1 Thes. 5:17) Uyakujabulela kulalela tikhonti takhe. (Taga 15:8) Yini longayisho emthantazweni wakho nawutiva uwedvwa? Tjela Jehova indlela lotiva ngayo, njengobe kwenta Elija. (Fundza Tihlabelelo 62:8.) Mtjele ngetintfo letikukhatsatako nekutsi tikwenta utive njani. Mcele akusite ukhone kubhekana nalendlela lotiva ngayo. Sibonelo nje, nangabe utiva uwedvwa futsi wesaba kushumayela esikolweni, cela Jehova akusite akuphe sibindzi sekukhuluma. Ungamcela nekutsi akuphe kuhlakanipha kuze ukhone kutichaza kahle tinkholelo takho. (Luk. 21:14, 15) Nangabe utiva ucindzetelekile nobe udvumatekile, cela Jehova akusite ukhone kukhuluma nemKhristu lovutsiwe. Ungacela Jehova kutsi asite lona lotawube ukhuluma naye kutsi akulalelisise futsi ayicondze indlela lotiva ngayo. Tjela Jehova indlela lotiva ngayo, ubone nendlela layiphendvula ngayo imithantazo yakho futsi wemukele lusito loluvela kulabanye. Nawenta njalo, utawutiva uncono.

7. Yini loyifundzako esibonelweni saMauricio?

⁷ Jehova usinike sonkhe umsebenti lobalulekile kutsi siwente. Ungaciniseka kutsi uyakubona konkhe lokwentako kuze ufeze tabelo takho ebandleni nalokwentako emsebentini wekushumayela futsi uyajabula ngako. (Hla. 110:3) Kuhlala umatasa kulomsebenti kungakusita njani nawutiva uwedvwa? Cabanga ngesibonelo salomunye umzalwane losemusha lokutsiwa nguMauricio. * Ngemuva nje kwekubhajatiswa, lomunye umngani wakhe lomkhulu wacala kushiya liciniso kancane kancane. Mauricio utsi: “Kumbona ashiya Jehova, kwangenta ngangasatetsembi. Kwangenta ngatibuta kutsi ngitawukhona yini kufeza setsembiso sami sekukhonta Jehova futsi ngichubeke ngililunga lemndeni wakhe. Ngativa ngingedvwa futsi bengicabanga kutsi kute lebekatayicondza indlela lebengitiva ngayo.” Yini leyasita Mauricio? Utsi: “Ngenta lokunyenti emsebentini wekushumayela. Loko kwangisita ngakhona kuyekela kuhlale ngicabanga ngendlela lebengitiva ngayo. Bengijabulile futsi bengitiva ngincono njengobe bengisebenta nalabanye emsebentini wekushumayela.” Ngisho nobe sishumayela nebazalwane betfu singabonani, kodvwa kuyasikhutsata  kushumayela nabo ngekubhala tincwadzi nangekushumayela ngelucingo. Yini lenye leyasita Mauricio? Uchubeka utsi: “Bengenta imisebenti leminyenti ebandleni. Bengitimisela nangilungiselela nalapho ngibeka tinkhulumo tebafundzi emhlanganweni welibandla. Lemisebenti beyingenta ngitive ngitsandvwa nguJehova futsi ngitsandvwa nangulabanye.”

8. Tinkinga letimatima tingasenta sitive njani?

⁸ Kulamalanga ekugcina, silindzele kutsi sibhekane netinkinga. (2 Thim. 3:1) Singabhekana netinkinga lesingakatilindzeli nobe tifike ngesikhatsi lesingakatilindzeli ngaso. Singabhekana netinkinga tetimali singakatilindzeli, nobe dokotela asitjele kutsi sinesifo lesimatima nobe sishonelwe ngumuntfu lesimtsandzako. Etikhatsini letinjalo, singacindzeteleka, ikakhulukati nangabe sibhekana netinkinga ngekulandzelana nobe tibe tinyenti ngesikhatsi sinye. Kodvwa khumbula kutsi Jehova usinakile futsi ngekusitwa nguye singakhona kubhekana nanobe nguyiphi inkinga ngesibindzi.

9. Chaza letinye tinkinga Jobe labhekana nato.

⁹ Cabanga ngendlela Jehova lamsita ngayo Jobe, lebekayindvodza leyetsembekile. Wabhekana netinkinga letinyenti ngekulandzelana. Ngelilanga linye, Jobe watjelwa kutsi lenye imfuyo yakhe yetjiwe kantsi lenye ifile. Watjelwa nekutsi tisebenti takhe kanye nebantfwana bakhe labatsandzako bashonile. (Jobe 1:13-19) Ngekushesha nje ngemuva kwaloko, ngesikhatsi aselusizini, Jobe waphatfwa sifo lesibuhlungu kakhulu nalesimatima. (Jobe 2:7) Lesimo besimatima kakhulu kangangekutsi Jobe waze watsi: “Ngiyakwenyanya kuphila kwami; angisakufuni kuphila.”​—Jobe 7:16.

10. Jehova wamsita njani Jobe kuze akhone kubhekana netinkinga takhe? (Buka sitfombe lesisekhasini lekucala.)

¹⁰ Jehova bekamnakile Jobe. Ngenca yekutsi Jehova bekamtsandza Jobe, wamniketa loko lebekakudzinga kuze akhone kubeketelela tinkinga takhe. Jehova wakhuluma naJobe, wamkhumbuta ngekuhlakanipha kwakhe lokukhulu nangendlela latinakekela ngayo ngelutsandvo tintfo latidalile. Wakhuluma nangetilwane letinyenti letimangalisako. (Jobe 38:1, 2; 39:9, 13, 19, 27; 40:15; 41:1, 2) Jehova waphindze wasebentisa lelinye lijaha lebeletsembekile lokutsiwa ngu-Elihu kuze limcinise futsi limdvudvute. Elihu wamcinisekisa ngekutsi Jehova utiniketa umvuzo tinceku takhe nangabe ticinisela. Jehova waphindze wenta Elihu kutsi anikete Jobe seluleko lesikahle. Elihu wasita Jobe kutsi ayekele kucabanga kakhulu ngetinkinga takhe ngekutsi amkhumbute kutsi sibancane kakhulu nasicatsaniswa naJehova, longuMdali wako konkhe. (Jobe 37:14) Jehova waphindze waniketa Jobe umsebenti wekuthantazela bangani bakhe labatsatfu lebebonile. (Jobe 42:8-10) Jehova usisita njani lamuhla nasibhekene netinkinga letimatima?

11. LiBhayibheli lisisita njani nasibhekene netinkinga?

¹¹ Jehova akakhulumi natsi ngalokucondzile, ngendlela lakhuluma ngayo naJobe, kodvwa ukhuluma natsi asebentisa liVi lakhe liBhayibheli. (Rom. 15:4) Uyasidvudvuta ngekutsi asinikete litsemba ngelikusasa. Cabanga nganaku lokushiwo liBhayibheli lokungasidvudvuta nasibhekene netinkinga. EmiBhalweni, Jehova uyasicinisekisa kutsi kute ‘lokungasehlukanisa nelutsandvo lwakhe,’ ngisho netinkinga letimatima imbala. (Rom. 8:38, 39) Uphindze asicinisekise kutsi ‘usedvute nabo bonkhe labambita’ ngemthantazo. (Hla. 145:18) Jehova usitjela kutsi nasetsembela kuye, sitawukhona kubeketelela nobe ngabe nguyiphi inkinga futsi sijabule. (1 Khor. 10:13; Jak. 1:2, 12) LiVi laNkulunkulu liphindze lisikhumbute kutsi tinkinga lesibhekana nato tesikhashana naticatsaniswa netibusiso lesitatitfola  kuze kube phakadze. (2 Khor. 4:16-18) Jehova uyasicinisekisa kutsi utawususa loku lokusibangela letinkinga, lokunguSathane Develi nalabo lababi njengaye. (Hla. 37:10) Akhona yini emavesi ladvudvutako laseBhayibhelini lowabambe ngenhloko latakusita ukhone kubhekana netinkinga esikhatsini lesitako?

12. Yini Jehova layilindzele kitsi nangabe sifuna liVi lakhe lisisite?

¹² Jehova ulindzele kutsi sitinikete sikhatsi sekulifundza njalo liBhayibheli futsi sicabangisise ngaloko lesikufundzako. Nasikusebentisa loko lesikufundzako, kukholwa kwetfu kuyacina futsi sisondzelana kakhulu naBabe wetfu wasezulwini. Loko kuyasicinisa, kusente sikhone kubhekana netinkinga. Jehova uphindze abanikete umoya wakhe longcwele labo labetsembela eVini lakhe liBhayibheli. Lomoya ungasinika “emandla lamakhulu kakhulu” kuze sikhone kubhekana nanobe nguyiphi inkinga.​—2 Khor. 4:7-10.

13. Imfundvo levela kuNkulunkulu lesiyilungiselwa ‘sisebenti lesetsembekile nalesihlakaniphile’ isisita njani kuze sikhone kucinisela?

¹³ Sisitwa nguJehova, ‘sisebenti lesetsembekile nalesihlakaniphile’ sisilungiselela tihloko letinyenti, ema-video nemculo lokusisita sibe nekukholwa lokucinile futsi sihlale sisondzelene naJehova. (Mat. 24:45) Kufanele sitisebentise letintfo. Lomunye dzadze lohlala eMelika waveta indlela labonga ngayo ngalemfundvo levela kuNkulunkulu. Watsi: “Kuleminyaka lengu-40 ngikhonta Jehova, bucotfo bami buvivinywe tikhatsi letinyenti.” Wabhekana netinkinga letimatima, mkhulu wakhe wabulawa yimoto lebeyishayelwa ngumuntfu adzakiwe, batali bakhe bagula futsi bashona, kantsi yena wahlaselwa ngumdlavuza tikhatsi letimbili. Yini leyamsita kutsi acinisele? Utsi: “Jehova bekasolo anginakekela. Lemfundvo lesiyinikwa nguye asebentisa sisebenti lesetsembekile nalesihlakaniphile ingisite kutsi ngicinisele. Ngenca yekusitwa ngiyo, ngitiva ngendlela Jobe lebekativa ngayo nakatsi: ‘Ngitawuze ngife solo ngingakabulahli bucotfo bami!’”​—Jobe 27:5.

14. Jehova ubasebentisa njani bazalwane betfu nabodzadze kuze basisite nasibhekene netinkinga? (1 KubaseThesalonika 4:9)

¹⁴ Jehova uceceshe bantfu bakhe kutsi batsandzane futsi badvudvutane nababhekene netikhatsi leticindzetelako. (2 Khor. 1:3, 4; fundza 1 KubaseThesalonika 4:9.) Njenga-Elihu, bazalwane betfu nabodzadze bayafuna kusisita kutsi sihlale setsembekile nasibhekene netimo letimatima. (Imis. 14:22) Nasi sibonelo, cabanga ngendlela libandla lelamkhutsata  ngayo Diane nalelamsita ngayo kuze ahlale asondzelene naJehova ngesikhatsi indvodza yakhe igula kakhulu. Watsi: “Bekumatima. Kodvwa seva shengatsi Jehova usibambe ngetandla takhe letinelutsandvo futsi letinemandla kuleso sikhatsi lesimatima. Emalunga elibandla asentela tintfo letinyenti kuze asisite. Asivakashela, asishayela lucingo futsi asinika nema-hug, lebekutintfo lebesitidzinga kuze sicinisele. Njengobe ngingakwati kushayela, bazalwane nabodzadze bebangisita kuze ngibe khona emihlanganweni yelibandla nasemsebentini wekushumayela.” Sijabula kakhulu ngekuba yincenye yemndeni waNkulunkulu lonelutsandvo lolungaka!

15. Yini lesenta siciniseke kutsi singakhona kubhekana netinkinga?

¹⁵ Sonkhe sitawubhekana netinkinga. Kodvwa njengobe sesibonile, angeke sibhekane nato sisodvwa. Njengababe lonelutsandvo, Jehova uhlale asinakile. Uhlale anatsi, futsi uhlale akulungele kusilalela nasicela lusito, ngetulu kwaloko ufuna mbamba kusisita. (Isa. 43:2) Siyaciniseka kutsi singakhona kubhekana netinkinga ngobe Jehova usinike konkhe lesikudzingako kuze sikhone kucinisela. Usiphe sipho lesingumthantazo, liBhayibheli, imfundvo lenyenti levela kuye kanye nebazalwane nabodzadze labasitsandzako kutsi basisite nasibhekene netimo letimatima.

16. Yini lesingayenta kuze Jehova ahlale asinakekela kuze kube phakadze?

¹⁶ Sibonga kakhulu ngekuba naBabe wasezulwini lohlale asinakile! “Tinhlitiyo tetfu tiyajabula ngaye.” (Hla. 33:21) Singakhombisa kutsi siyabonga ngendlela lasinakekela ngayo ngelutsandvo ngekutsi sitisebentise tonkhe tintfo lasinika tona kuze asisite. Natsi kufanele sidlale indzima yetfu kuze Jehova ahlale asinakekela. Ngalamanye emavi, nangabe sichubeka senta konkhe lesingakwenta kuze simlalele futsi sente lokulungile, utawuhlale asinakile kuze kube phakadze!​—1 Phet. 3:12.