1. Yini leyenta baseBhabhulona bamtsandza umphrofethi Danyela?

 UMPHROFETHI Danyela bekalijaha ngesikhatsi baseBhabhulona bamtfumba, bamsusa eveni lakubo. Kodvwa kusebaleni kutsi bamtsandza. Babona loko “lokubonakala ngephandle,” kutsi Danyela ‘akanasici, ubukeka kahle’ nekutsi uchamuka emndenini lobalulekile. (1 Sam. 16:7) Ngenca yaloko, bamcecesha kutsi abe ngumuntfu lobalulekile emmangweni.​—Dan. 1:3, 4, 6.

2. Jehova bekativa njani ngaDanyela? (Hezekeli 14:14)

² Jehova wamtsandza Danyela, hhayi ngenca yekubukeka kwakhe nobe sigaba lebekakuso, kodvwa ngenca yeluhlobo lwemuntfu lelijaha lelakhetsa kuba ngilo. Ecinisweni, kusenekwenteka Danyela bekaseminyakeni yabo-20 ngesikhatsi Jehova akhuluma kahle ngaye, ambala naNowa naJobe, emadvodza lacitsa iminyaka leminyenti atakhela ligama lelihle naNkulunkulu. (Gen. 5:32; 6:9, 10; Jobe 42:16, 17; fundza Hezekeli 14:14.) Jehova wachubeka amtsandza Danyela kuko konkhe kuphila kwakhe.​—Dan. 10:11, 19.

3. Sitawucoca ngani kulesihloko?

³ Kulesihloko, sitawucoca ngebuntfu lobenta Danyela waba ligugu kuJehova. Kwekucala, sitawucoca ngebuntfu ngabunye futsi sibone kutsi wabukhombisa njani. Sitawubese sicoca ngekutsi yini leyasita Danyela kutsi abe nalobuntfu. Kwekugcina, sitawucoca ngekutsi singamlingisa njani. Nanobe lesihloko sentelwe labasebasha, kodvwa sonkhe singafundza esibonelweni saDanyela.

4. Danyela wasikhombisa njani sibindzi? Niketa sibonelo.

⁴ Bantfu labanesibindzi bangahle besabe, kodvwa abakuvumeli  loko kubavimbele kutsi bente lokulungile. Danyela bekalijaha lelinesibindzi kakhulu. Cabanga ngetikhatsi letimbili lapho akhombisa khona sibindzi. Kusenekwenteka kwekucala kwenteka ngemuva kweminyaka lengaba mibili baseBhabhulona babhubhise iJerusalema. INkhosi Nebukhadnezari yaseBhabhulona yaba neliphupho lelesabekako lelimayelana nesitfombe lesikhulu. Yasongela kubulala onkhe emadvodza lahlakaniphile, lokufaka ekhatsi Danyela, nangabe angayitjeli loko lebeyikubhudzile nenchazelo yako. (Dan. 2:3-5) Danyela bekufanele ente lokutsite ngekushesha, ngale kwaloko bekutawufa bantfu. “Waya enkhosini wayicela kutsi imnike sikhatsi kuze ayichazele leliphupho.” (Dan. 2:16) Loko bekudzinga sibindzi nekukholwa. Kute lasifundza khona kutsi Danyela wake wachaza emaphupho ngaphambili. Wacela bangani bakhe, boShadraki, Meshaki na-Abednego, lebesebaniketwe lamagama aseBhabhulona, kutsi “bathantaze kuNkulunkulu welizulu, bamcele kutsi abentele umusa futsi abembulele lemfihlo.” (Dan. 2:18) Jehova wayiphendvula lemithantazo. Ngekusitwa nguNkulunkulu, Danyela walichaza leliphupho laNebukhadnezari. Ngako Danyela nebangani bakhe abazange babulawe.

5. Ngusiphi lesinye sikhatsi lapho khona Danyela kwadzingeka akhombise sibindzi?

⁵ Ngemuva kwesikhatsi Danyela achaze leliphupho lelimayelana nesitfombe lesikhulu, kwadzingeka kutsi aphindze akhombise sibindzi. Nebukhadnezari waba nalelinye liphupho lelamhlupha. Leliphupho belimayelana nesihlahla lesikhulu kakhulu. Ngesibindzi, Danyela wachazela lenkhosi kutsi lisho kutsini leliphupho, wayitjela nesehlulelo lesitsi beyitawuhanjelwa yingcondvo nekutsi bekutawuphela sikhatsi ingasiyo inkhosi. (Dan. 4:25) Bekungaba melula ngenkhosi kutsi itsi Danyela uvukela umbuso futsi imbulale. Nanobe kunjalo, Danyela wakhombisa sibindzi futsi walichaza leliphupho.

6. Yini lokungenteka yasita Danyela kutsi abe nesibindzi?

⁶ Yini lokungenteka yasita Danyela kutsi abe nesibindzi kuko konkhe kuphila kwakhe? Ngesikhatsi asemncane, siyaciniseka kutsi wafundza esibonelweni samake wakhe nesababe wakhe. Kusebaleni kutsi bebatilalela ticondziso taJehova, lebekatinikete  batali labangema-Israyeli, futsi bamfundzisa uMtsetfo waNkulunkulu. (Dut. 6:6-9) Danyela bekangagcini nje ngekwati tintfo letisisekelo lebetishiwo nguMtsetfo, lokufaka ekhatsi iMitsetfo Lelishumi, kodvwa bekati lokunyenti lokumayelana nekutsi yini umIsrayeli lokufanele akudle nalokungakafaneli akudle. b (Lev. 11:4-8; Dan. 1:8, 11-13) Ngetulu kwaloko, Danyela wafundza ngemlandvo webantfu baNkulunkulu futsi bekakwati loko lokwenteka kubo ngesikhatsi bangaphili ngekuvumelana netimiso taJehova. (Dan. 9:10, 11) Tintfo letenteka kuko konkhe kuphila kwakhe tamenta wetsemba kutsi Jehova netingilosi takhe letinemandla bebamsekela.​—Dan. 2:19-24; 10:12, 18, 19.

7. Yini lenye leyasita Danyela kutsi abe nesibindzi? (Buka nesitfombe.)

⁷ Danyela wadadisha loko lebekubhalwe baphrofethi baNkulunkulu, lebekufaka ekhatsi tiphrofetho taJeremiya. Kuloko lakufundza, wabese uyabona kutsi lesikhatsi lesidze sekutfunjwa kwemaJuda eBhabhulona besitawuphela ngekushesha. (Dan. 9:2) Kubona letiphrofetho teliBhayibheli tigcwaliseka kwamenta wametsemba kakhulu Jehova, futsi labo labametsemba kakhulu Nkulunkulu nabo bangaba nesibindzi lesimangalisako. (Catsanisa naKubaseRoma 8:31, 32, 37-39.) Lokubaluleke kakhulu kutsi Danyela bekavame kuthantaza kuBabe wakhe wasezulwini. (Dan. 6:10) Bekavuma tono takhe kuJehova futsi amtjele indlela lativa ngayo. Bekamcela nekutsi amsite. (Dan. 9:4, 5, 19) Danyela bekangumuntfu njengatsi, ngako akatalwanga anesibindzi. Kunaloko, wafundza kuba naso ngekutsi adadishe, athantaze futsi ametsembe Jehova.

8. Yini lesingayenta kuze sibe nesibindzi?

⁸ Yini lesingayenta kuze sibe nesibindzi? Batali betfu bangahle basikhutsate kutsi sibe nesibindzi, kodvwa angeke basente sibe nesibindzi ngisho bona banaso. Kuba nesibindzi kufana nekufundza likhono lelisha. Lenye indlela yekuba nalelikhono kutsi ubukisise lokwentiwa ngulolokufundzisako futsi ulingise sibonelo sakhe. Ngendlela lefanako, siyafundza kuba nesibindzi ngekutsi sinakisise indlela labanye labasikhombisa ngayo futsi silingise sibonelo sabo. Ngako yini lesiyifundzile kuDanyela? Njengaye, kufanele silati kahle liVi laNkulunkulu. Kufanele sakhe bungani naJehova ngekutsi sikhulume naye tikhatsi letinyenti futsi sikhulume naye sikhululekile. Ngetulu kwaloko, kufanele simetsembe Jehova, siciniseke kutsi utasisekela. Nasenta loko, ngisho nobe kukholwa kwetfu kungavivinywa sitawuba nesibindzi.

9. Kusisita ngani kuba nesibindzi?

⁹ Kuba nesibindzi kusisita ngetindlela letinyenti. Cabanga ngaloko lokwenteka kuBen. Bekafundza esikolweni lesiseJalimane lapho khona bonkhe bebakholelwa kutsi tintfo tativelela futsi bebatsi indzaba yekudalwa kwetintfo iyinganekwane. Ngalelinye lilanga, Ben waniketwa litfuba lekutsi eme embikweliklasi achaze kutsi yini lementa akholelwe kutsi tintfo tadalwa. Ngesibindzi wabatjela ngaloko lakukholelwako. Waba yini umphumela? Ben utsi: “Thishela wami wangilalelisisa, futsi wenta emakhophi aloko lengakusebentisa kuze ngichaze tinkholelo tami futsi waniketa umfundzi ngamunye eklasini.” Benta njani labo lebekafundza nabo? Ben utsi: “Linyenti labo  langilalela futsi langihlonipha.” Njengobe sibona kuloko lokwenteka kuBen, bantfu labanesibindzi bavame kuhlonishwa ngulabanye. Bangaphindze basite nalabanye kutsi bati Jehova. Ngako sinetizatfu letinhle tekwetama kuba nesibindzi.

10. Kusho kutsini kuba cotfo?

¹⁰ EBhayibhelini, ligama lesiHebheru lelihunyushwe ngekutsi “kuba cotfo” nobe “lutsandvo lolucotfo,” lisho budlelwane lobuhle futsi livame kusetjentiswa nalichaza lutsandvo Nkulunkulu lanalo ngebantfu bakhe. Leligama liphindze lisetjentiswe nakuchazwa lutsandvo lolusemkhatsini webantfu baNkulunkulu. (2 Sam. 9:6, 7) Njengobe sikhatsi sichubeka, lingakhula lizinga letfu lekuba cotfo. Naka kutsi loku kwenteka njani kuDanyela.

11. Yini leyenteka kuDanyela leyavivinya kwetsembeka kwakhe ngesikhatsi sekakhulile? (Buka sitfombe lesisekhasini lekucala.)

¹¹ Kwetsembeka kwaDanyela kuJehova kwavivinywa kuko konkhe kuphila kwakhe. Kodvwa lokuhamba embili nguloko lokwenteka ngesikhatsi aseminyakeni yabo-90. Ngaleso sikhatsi, iBhabhulona beyincotjwe ngemaMede nemaPheresiya futsi beyibuswa yiNkhosi Dariyusi. Tiphatsimandla betimnyanya Danyela futsi betingamhloniphi Nkulunkulu wakhe. Ngako takha licebo lekumbulala. Takha licebo lebelitawuvivinya Danyela kutsi utawetsembeka kuNkulunkulu wakhe yini nobe enkhosini. Kuze Danyela akhombise kutsi wetsembekile enkhosini nekutsi ufana nabo bonkhe bantfu bekufanele angathantazi kuJehova emalanga langu-30. Danyela akazange avume kukwenta loko. Ngenca yaloko, wajikijelwa emgodzini wemabhubesi. Kodvwa Jehova wambusisa Danyela ngekwetsembeka kwakhe ngekutsi amsindzise emilonyeni yemabhubesi. (Dan. 6:12-15, 20-22) Yini lesingayenta kuze sihlale setsembekile kuJehova njengobe kwenta Danyela?

12. Yini Danyela layenta kuze ahlale acotfo kuJehova?

¹² Kuze sibe cotfo kuJehova kufanele simtsandze mbamba. Danyela wahlala etsembekile kuJehova ngenca yekutsi bekamtsandza kakhulu Babe wakhe wasezulwini. Siyaciniseka kutsi lolutsandvo walwakha  ngekutsi acabange ngebuntfu baJehova futsi acabange ngendlela labukhombise ngayo lobuntfu. (Dan. 9:4) Danyela waphindze wacabangisisa ngato tonkhe tintfo letinhle Jehova lebekamentele tona, yena kanye nebantfu bakhe, futsi bekabonga ngato.​—Dan. 2:20-23; 9:15, 16.

13. (a) Buvivinywa njani bucotfo bebantfu labasebasha? Niketa sibonelo. (Buka nesitfombe.) (b) Njengobe kuvetiwe kule-video, ungabaphendvula njani labanye nabakubuta kutsi boFakazi BaJehova bayabasekela yini bantfu labatitabani?

¹³ NjengaDanyela, labasebasha batungeletwe bantfu labangamhloniphi Jehova kanye netimiso takhe. Bangahle bangamtsandzi umuntfu lotsi utsandza Nkulunkulu. Labanye baze bacindzetele laba labasebasha kutsi bangetsembeki kuJehova. Sibonelo nje, naka naku lokwenteka kulomunye losemusha lokutsiwa nguGraeme, lohlala e-Australia. Wabhekana nesimo lesicindzetelako ngesikhatsi enta libanga leliphakeme. Thishela wabuta bafundzi kutsi bangenta njani nangabe lomunye umngani wabo angabatjela kutsi usitabani. Lothishela watsi bonkhe labo labangamsekela umngani wabo abeme kulolunye luhlangotsi; bese kutsi labo labangeke bamsekele beme kulolunye luhlangotsi. Graeme utsi: “Bonkhe bafundzi bema kulololunye luhlangotsi, ngaphandle kwami nalomunye Fakazi.” Lokwenteka ngemuva kwaloko kwakuvivinya mbamba kwetsembeka kwaGraeme kuJehova. Utsi: “Kulo lonkhe leli-awa laleliklasi, labafundzi lokufaka ekhatsi nathishela imbala bahlekisa ngatsi futsi basetfuka. Ngenta konkhe lobekusemandleni ami kuze ngimelele kukholwa kwami ngemoya lophasi nangendlela lebhadlile, kodvwa abazange bangilalele.” Kwaba namuphi umphumela lokuvivinywa kwebucotfo kwaGraeme? Utsi: “Bengingatsandzi ngesikhatsi labafundzi bangetfuka, kodvwa ngajabula kakhulu ngenca yekutsi ngahlala ngicotfo kuJehova futsi ngamelela kukholwa kwami.” c

14. Yini lenye lesingayenta kuze sihlale sicotfo kuJehova?

¹⁴ Singaba cotfo kuJehova nangabe simtsandza kakhulu njengaDanyela. Lolutsandvo singalwakha ngekutsi sifundze ngebuntfu baJehova. Sibonelo nje, singabukisisa tintfo latentile. (Rom. 1:20) Nangabe ufuna kumtsandza kakhulu Jehova futsi umhloniphe, ungafundza tihloko letiluchungechunge letitsi “Ingabe Kwaklanywa?” nobe ubukele ema-video. Ungafundza nalokutfolakala kubhukwana lotsi Kwaba Khona Njani Kuphila? nalotsi The Origin of Life—Five Questions Worth Asking. Naka naku lokwashiwo ngulomunye dzadze waseDenmark lokutsiwa ngu-Esther mayelana naletincwajana, utsi: “Lolokutfolakala kuletincwajana kunengcondvo. Atikutjeli kutsi yini lokufanele uyikholelwe; kunaloko tibeka emaciniso njengobe anjalo futsi tikuvumele kutsi utentele sincumo.” Ben lesikhulume ngaye utsi: “Letincwajana takucinisa kukholwa kwami. Tangenta ngabona kutsi nguNkulunkulu lodale tintfo.” Ngemuva kwekufundza letincwajana, kusenekwenteka utawuvumelana neliBhayibheli nalitsi: “Kukufanele Jehova Nkulunkulu wetfu kwemukela inkhatimulo, ludvumo nemandla, ngobe wadala tonkhe tintfo.”​—Semb. 4:11. d

15. Nguyiphi lenye indlela lesingakha ngayo bungani naJehova?

¹⁵ Lenye indlela lesingamtsandza ngayo kakhulu Jehova kutsi sidadishe ngekuphila kweNdvodzana yakhe, lenguJesu. Lomunye dzadze losemusha lokutsiwa nguSamira lohlala  eJalimane, wakwenta loku. Utsi: “Ngamati kancono Jehova ngekutsi ngifundze ngaJesu.” Ngesikhatsi asemncane, Samira bekakutfola kumatima kucondza kutsi Jehova unemiva. Kodvwa bekayicondza indlela Jesu lebekativa ngayo. Wengeta utsi: “Bengimtsandza Jesu ngobe bekanebungani futsi abatsandza bantfwana.” Nakachubeka afundza ngaJesu, wakha bungani naJehova. Kanjani? Utsi: “Kancane kancane ngacondza kutsi Jesu umlingisa ncamashi Babe wakhe. Kunyenti labafana ngako. Ngabona kutsi lesi ngulesinye sizatfu lesenta Jehova watfumela Jesu emhlabeni, kuze bantfu batawumati kancono Jehova.” (Joh. 14:9) Nangabe ufuna kukhulisa buhlobo bakho naJehova, kungaba njani utinike sikhatsi sekufundza ngaJesu? Nawenta njalo, itawukhula indlela lomtsandza ngayo Jehova kanye nekwetsembeka kwakho kuye.

16. Kubaluleke ngani kuhlala sicotfo? (Tihlabelelo 18:25; Mikha 6:8)

¹⁶ Bantfu labacotfo bavame kuba nebungani lobuhlala njalo nalabanye futsi lobucinile. (Rut. 1:14-17) Ngetulu kwaloko, bantfu labahlala bacotfo kuJehova baba nekuthula kwangekhatsi. Sisho ngani? Sisho ngobe Jehova wetsembisa kutsi utawuba cotfo kulabo labacotfo kuye. (Fundza Tihlabelelo 18:25; Mikha 6:8.) Cabanga nje, Somandla longuMdali uyafuna kwakha buhlobo lobuhle natsi! Nasinalobuhlobo lobucinile naJehova, kute inkinga, kuphikiswa, nobe kufa lokungacedza lobudlelwane lesinabo naJehova. (Dan. 12:13; Luk. 20:37, 38; Rom. 8:38, 39) Ngako kubaluleke kakhulu kutsi silingise Danyela futsi sihlale sicotfo kuJehova!

17-18. Yini lenye lesingayifundza kuDanyela?

¹⁷ Kulesihloko, sicoce ngebuntfu baDanyela. Kodvwa kusenalokunyenti lesingakufundza kuye. Sibonelo nje, Jehova waniketa Danyela imibono leminyenti nemaphupho lamanyenti, futsi wamniketa likhono lekuchaza imilayeto letiphrofetho. Linyenti laletiphrofetho setivele tigcwalisekile. Letinye tato tikhuluma ngaloko lokutawenteka esikhatsini lesitako lokutawutsintsa wonkhe umuntfu emhlabeni.

¹⁸ Esihlokweni lesilandzelako, sitawucoca ngetiphrofetho letimbili letabhalwa nguDanyela. Kuticondza kutasisita sonkhe, ngisho sibancane nobe sibadzala kutsi sente tincumo letihlakaniphile nyalo. Letiphrofetho tingaphindze tisente sibe nesibindzi kakhulu futsi sibe cotfo kakhulu, lokutawenta kutsi silungele luvivinyo lolutako.