1. Yini lengasisita sikujabulele kudadisha tiphrofetho teliBhayibheli?

 LOMUNYE umzalwane losemusha lokutsiwa nguBen utsi: “Ngiyakutsandza kudadisha tiphrofetho teliBhayibheli.” Uyakutsandza yini nawe? Nobe uva ngatsi tilukhuni? Kusenekwenteka akukuchazi kudadisha tiphrofetho teliBhayibheli. Nanobe kunjalo, nawufundza kabanti ngekutsi yini leyente Jehova watibhala eBhayibhelini ungahle ushintje ingcondvo.

2. Sitawucoca ngani kulesihloko?

² Kulesihloko, sitawucoca ngekutsi yini leyenta kubaluleke kutsi sifundze ngetiphrofetho teliBhayibheli nangekutsi singatidadisha njani. Sitawubese sicoca ngetiphrofetho letimbili letisencwadzini yaDanyela kuze sibone kutsi kungasisita njani nyalo kuticondza.

3. Yini lokufanele siyente nangabe sifuna kucondza tiphrofetho teliBhayibheli?

³ Kufanele sicele lusito kuze sicondze tiphrofetho teliBhayibheli. Cabanga nganasi sibonelo. Ase sitsi uvakasha endzaweni longayati kodvwa uhamba nemngani wakho loyati kahle lendzawo. Lomngani wakho uyati kutsi nikuphi nekutsi umgwaco ngamunye uya kuphi. Siyaciniseka kutsi ungajabula ngekutsi umngani wakho uvumile kuhamba nawe! Ngendlela lefanako, Jehova uyati kutsi sikuphi nesikhatsi, nekutsi umgwaco lesihamba ngawo uholela kuphi. Ngako kuze sicondze tiphrofetho teliBhayibheli, kufanele simcele kutsi asisite.​—Dan. 2:28; 2 Phet. 1:19, 20.

4. Yini leyabangela Jehova wabhala tiphrofetho eVini lakhe? (Jeremiya 29:11) (Buka nesitfombe.)

⁴ Njengabo bonkhe batali labakahle, Jehova ufuna bantfwana bakhe babe nelikusasa lelihle. (Fundza Jeremiya 29:11.)  Kodvwa ngalokungafani nemtali longumuntfu, Jehova uyakhona kusho tintfo letitawenteka esikhatsini lesitako futsi angashayi phansi. Wabangela kutsi kubhalwe tiphrofetho eVini lakhe kuze sati ngetintfo letibalulekile letitawenteka tisengakenteki. (Isa. 46:10) Tiphrofetho teliBhayibheli tisipho lesiveta lutsandvo lwaBabe wetfu wasezulwini. Kodvwa singaciniseka njani kutsi tiphrofetho teliBhayibheli titawugcwaliseka mbamba?

5. Yini losemusha langayifundza kulokwenteka kuMax?

⁵ Esikolweni, labasebasha bavame kuba nalabanye labangalihloniphi kangako liBhayibheli nobe labangalihloniphi sanhlobo. Tintfo labatishoko nendlela labatiphatsa ngayo kungenta losemusha longuFakazi acale kungabata. Naka naku lokwenteka kulomunye umzalwane lokutsiwa nguMax. Utsi: “Nangiseminyakeni yekutfomba, ngacala kungabata kutsi loko batali bami bebangifundzisa kona bekutimfundziso tenkholo yeliciniso, nekutsi liBhayibheli liphefumulelwe nguNkulunkulu.” Yini batali bakhe labayenta? Utsi: “Behlisa umoya nanobe bengati kutsi bakhatsatekile.” Batali baMax baphendvula imibuto yakhe basebentisa liBhayibheli. NaMax kunalokunye lakwenta. Utsi: “Ngadadisha tiphrofetho teliBhayibheli futsi ngacoca nalabanye labasebasha ngaloko bengikufundzile.” Waba yini umphumela? Max utsi: “Ngemuva kwaloko ngaciniseka kutsi liBhayibheli liphefumulelwe nguNkulunkulu!”

6. Yini lokufanele uyente nangabe ungabata, futsi leni?

⁶ Nangabe nawe, njengaMax, ungabata kutsi liBhayibheli liliciniso, akukafaneli utive unelicala. Kodvwa kukhona lokufanele ukwente. Kungabata kufana nekutfomba. Nakunganakwa, kungalimata intfo leligugu. Kuze ucedze kungabata lokungalimata kukholwa kwakho, kufanele utibute: ‘Ngiyakukholelwa yini loko lokushiwo liBhayibheli ngelikusasa?’ Nangabe ungaciniseki, kufanele udadishe tiphrofetho teliBhayibheli lesetigcwalisekile. Ungakwenta njani loko?

7. Ngusiphi sibonelo Danyela lasibekela sona endleleni yekudadisha tiphrofetho? (Danyela 12:10) (Buka nesitfombe.)

⁷ Danyela wasibekela sibonelo lesihle endleleni yekudadisha tiphrofetho. Wadadisha tiphrofetho ngobe bekanesizatfu lesikahle, bekafuna kwati liciniso. Bekatfobekile, bekati kutsi Jehova ubaniketa kucondza labo labamatiko nalabaphila ngekuvumelana netimiso takhe. (Dan. 2:27, 28; fundza Danyela 12:10.) Danyela wakhombisa kutsi utfobekile ngekutsi etsembele kuJehova kuze amsite. (Dan. 2:18) Bekadadisha ngekucophelela. Wacwaninga emiBhalweni lengcwele lebeyitfolakala ngaleso sikhatsi. (Jer. 25:11, 12; Dan. 9:2) Ungamlingisa njani Danyela?

8. Yini leyenta labanye bangafuni kwetsemba kutsi tiphrofetho teliBhayibheli tiyagcwaliseka, kodvwa yini lokufanele siyente?

⁸ Hlola tizatfu takho tekudadisha tiphrofetho. Udadisha tiphrofetho ngobe unesifiso lesikhulu sekwati liciniso yini? Nangabe kunjalo, Jehova utakusita. (Joh. 4:23, 24; 14:16, 17) Yini lenye lengenta umuntfu adadishe tiphrofetho? Labanye benta njalo ngobe bafuna  bufakazi bekutsi liBhayibheli alikaphefumulelwa nguNkulunkulu. Bacabanga kutsi nangabe liBhayibheli lingakaphefumulelwa nguNkulunkulu, loko kusho kutsi bangatincumela bona emkhatsini walokuhle nalokubi. Kodvwa kufanele sibe netizatfu letikahle tekudadisha. Ngetulu kwaloko, kunebuntfu lobubalulekile lokufanele sibe nabo kuze sicondze tiphrofetho teliBhayibheli.

9. Ngubuphi buntfu lobudzingekako kuze sicondze tiphrofetho teliBhayibheli? Chaza.

⁹ Tfobeka. Jehova wetsembisa kubasita labo labatfobekile. (Jak. 4:6) Ngako kufanele sithantaze, simcele asisite kuze sicondze tiphrofetho teliBhayibheli. Ngetulu kwaloko, kufanele sivume kutsi siyaludzinga lusito lwesisebenti lesetsembekile lesisetjentiswa nguJehova kuze sisinikete kudla ngesikhatsi lesifanele. (Luk. 12:42) Jehova unguNkulunkulu lohlelekile, ngako kunengcondvo kutsi asebentise indlela yinye kuze asisite sicondze emaciniso laseVini lakhe.​—1 Khor. 14:33; Ef. 4:4-6.

10. Yini loyifundza kulokwenteka ku-Esther?

¹⁰ Dadisha liBhayibheli ngekucophelela. Khetsa siphrofetho lositsandzako bese ucwaninga ngaso. Nguloko lokwentiwa ngulomunye dzadze lokutsiwa ngu-Esther. Bekatsandza kufundza ngetiphrofetho letimayelana nekuta kwaMesiya. Utsi: “Nangineminyaka lengu-15, ngacala kufuna bufakazi bekutsi vele letiphrofetho tabhalwa ngaphambi kwekutsi Jesu afike yini.” Loko lakutfola nakafundza iMiculu yaseLwandle Lolufile kwamcinisekisa. Utsi: “Letinye taletiphrofetho tabhalwa ngaphambi kwekutsi Khristu afike, ngako kufutile kube tibuya kuNkulunkulu.” Uchubeka utsi: “Bekudzingeka kutsi ngifundze tikhatsi letinyentana kuze ngiticondze.” Kodvwa uyajabula ngekutsi wenta lokutsite. Ngemuva kwekudadisha tiphrofetho letitsite ngekucophelela, utsi: “Ngatibonela kutsi loko lokushiwo liBhayibheli kuliciniso!”

11. Kusisita ngani kutifunela bufakazi bekutsi liBhayibheli liliciniso?

¹¹ Nasibona kutsi letinye tiphrofetho letiseVini laNkulunkulu setivele tigcwalisekile, loko kwenta simetsembe kakhulu Jehova kanye nendlela lasicondzisa ngayo. Ngetulu kwaloko, tiphrofetho teliBhayibheli tenta kutsi sihlale sinelitsemba lelihle ngelikusasa, ngisho nobe sibhekana natiphi tinkinga nyalo. Ase sicoce kafishane ngetiphrofetho letimbili letabhalwa nguDanyela letigcwalisekako lamuhla. Kucondza letiphrofetho kutasisita kutsi sente tincumo letihlakaniphile.

12. Timelelani tinyawo ‘tensimbi lehlanganiswe nelubumba lolutsambile’? (Danyela 2:41-43)

¹² Fundza Danyela 2:41-43. Kuleliphupho leNkhosi Nebukhadnezari lelachazwa nguDanyela, tinyawo talesitfombe lesabonwa ngulenkhosi ‘betitensimbi lehlanganiswe nelubumba lolutsambile.’ Nasicatsanisa lesiphrofetho naletinye letisencwadzini yaDanyela nakuSembulo, singaphetsa ngekutsi letinyawo timelela uMbuso wemaNgisi nemaMelika, lokungumbuso wemhlaba lamuhla. Nakakhuluma  ngalombuso wemhlaba, Danyela utsi “lenye incenye yalombuso itawucina, lenye ibe butsakatsaka.” Kwentiwa yini kutsi ibe butsakatsaka? Kwentiwa kutsi bantfu labamelelwa lubumba lolutsambile bawenta ubebete emandla lacine njengensimbi. b

13. Ngumaphi emaciniso labalulekile lesiwafundza kulesiphrofetho?

¹³ Sifundza nawa emaciniso labalulekile kulenchazelo yaDanyela yeliphupho lelimayelana nesitfombe kanye netinyawo taso. Kwekucala, uMbuso wemhlaba wemaNgisi nemaMelika ukhombisile kutsi unemandla ngetindlela letinyenti. Sibonelo nje, lamave bekasemkhatsini wemave lancoba ngeMphi Yelive Yekucala neMphi Yelive Yesibili. Nobe kunjalo, lombuso sewubutsakatsaka futsi utawuchubeka uba butsakatsaka ngenca yekutsi bantfu labangephansi kwawo balwa bodvwa baphindze balwe nahulumende. Kwesibili, lombuso nguwo umbuso wemhlaba wekugcina lotawubusa ngaphambi kwekutsi uMbuso waNkulunkulu ubhubhise yonkhe imibuso yebantfu. Nanobe letinye tive timelene nembuso wemaNgisi nemaMelika kodvwa angeke titsatse sikhala sawo. Loko sikusho ngobe “litje” lelimelela uMbuso waNkulunkulu litawuphihlita letinyawo, lokungulencenye lemelela umbuso wemaNgisi nemaMelika.​—Dan. 2:34, 35, 44, 45.

14. Kucondza siphrofetho lesimayelana netinyawo letiyinhlanganisela yensimbi nelubumba kungasisita njani sente tincumo letihlakaniphile?

¹⁴ Uyaciniseka yini kutsi siphrofetho saDanyela lesimayelana netinyawo letiyinhlanganisela yensimbi nelubumba siliciniso? Nangabe kunjalo, loko kutawutsintsa indlela lophila ngayo. Angeke unake kakhulu kwetama kuba nemali lenyenti nobe kuba netintfo letinyenti ngobe uyati kutsi lelive lelibi litawubhujiswa ngekushesha. (Luk. 12:16-21; 1 Joh. 2:15-17) Kucondza lesiphrofetho kutakusita ubone kutsi ubalulekile umsebenti wekushumayela newekufundzisa. (Mat. 6:33; 28:18-20) Ngemuva kwekudadisha lesiphrofetho, tibute: ‘Tincumo lengitentako tiyakhombisa yini kutsi ngiyaciniseka kutsi ngekushesha uMbuso waNkulunkulu utawubhubhisa bonkhe bohulumende bebantfu?’

15. Ngubani “inkhosi yasenyakatfo” lamuhla ‘nenkhosi yaseningizimu’? (Danyela 11:40)

¹⁵ Fundza Danyela 11:40. Danyela sehluko 11 ukhuluma ngemakhosi lamabili nobe bohulumende lababili lababambene ngetihlutfu balwela kubusa umhlaba. Nasicatsanisa lesiphrofetho naletinye tiphrofetho teliBhayibheli singatsi “inkhosi yasenyakatfo” yiRussia nemave layisekelako bese kutsi “inkhosi yaseningizimu” ngumbuso wemhlaba wemaNgisi nemaMelika. c

16. “Inkhosi yasenyakatfo” ibaphatsa njani bantfu baNkulunkulu?

¹⁶ Bantfu baNkulunkulu labaphila ngephansi kwembuso ‘wenkhosi yasenyakatfo’ babeketelela kuphatfwa kabi ngulenkhosi. Labanye boFakazi bashayiwe futsi bavalelwa emajele ngenca yekukholwa kwabo. Lokuphatfwa kabi ‘yinkhosi yasenyakatfo’ kucinise kukholwa kwebazalwane betfu, kunekutsi kubacedze emandla. Kwentiwa yini loko? Kungenca yekutsi bayati kutsi kuphatfwa kabi kwebantfu baNkulunkulu kugcwalisa siphrofetho lesashiwo nguDanyela. d (Dan. 11:41) Kukwati loko  kungacinisa litsemba letfu futsi kwente sihlale setsembekile kuNkulunkulu.

17. Nguyiphi inkinga bantfu baNkulunkulu labahlala ngephansi ‘kwenkhosi yaseningizimu’ lababhekene nayo?

¹⁷ Esikhatsini lesendlulile, ‘nenkhosi yaseningizimu’ beyibahlasela ngalokucondzile bantfu baJehova. Sibonelo nje, emkhatsini Wemphi Yelive Yekucala neYesibili, bazalwane labanyenti bavalelwa emajele ngenca yekungalutsatsi luhlangotsi kutepolitiki futsi bantfwana labanyenti baboFakazi bacoshwa etikolweni ngenca yesizatfu lesifanako. Kodvwa eminyakeni yakamuva, kwetsembeka kwebantfu baJehova labahlala emaveni enkhosi yaseningizimu kuvivinywe nangaletinye tindlela letibhacile. Nasi sibonelo, ngetikhatsi tekukhankasela lukhetfo, umKhristu angahle alingeke kutsi asekele licembu lelitsite lepolitiki nobe umholi lotsite. Angahle angayi kuyovota kodvwa atsatse luhlangotsi ngengcondvo nangenhlitiyo. Ngako kubaluleke kakhulu kutsi singalutsatsi luhlangotsi kutepolitiki hhayi nje kuphela ngalesikwentako, kodvwa nangaloko lesikucabangako nendlela lesitiva ngayo!​—Joh. 15:18, 19; 18:36.

18. Sitiva njani nasibona kulwa emkhatsini walamkhosi lamabili? (Buka nesitfombe.)

 ¹⁸ Labo labangasetsembi lesiphrofetho seliBhayibheli bangahle bakhatsateke kakhulu nababona “inkhosi yaseningizimu” ‘ibambene ngetimphondvo’ ‘nenkhosi yasenyakatfo.’ (Dan. 11:40, umbhalo longentasi) Omabili lamakhosi anetikhali temphi letinyenti futsi letinemandla kakhulu letingacotfula konkhe lokuphilako emhlabeni. Kodvwa siyati kutsi Jehova angeke akuvumele loko kutsi kwenteke. (Isa. 45:18) Ngako kunekutsi kusikhatsate lokulwa lokusemkhatsini ‘wenkhosi yasenyakatfo’ ‘nenkhosi yaseningizimu,’ kucinisa kukholwa kwetfu. Kusenta siciniseke kutsi kuphela kwalelive sekusondzele.

19. Nguliphi liciniso lokufanele silivume mayelana netiphrofetho teliBhayibheli?

¹⁹ Asati kutsi letinye tiphrofetho teliBhayibheli titawugcwaliseka nini. Nemphrofethi Danyela bekangakucondzi konkhe loko lakubhala. (Dan. 12:8, 9) Kodvwa ngenca yekutsi asicondzi ngalokuphelele kutsi letinye tiphrofetho titawugcwaliseka njani akusho kutsi angeke tigcwaliseke. Siyetsemba kutsi Jehova utasitjela loko lokufanele sikwati ngesikhatsi lesifanele, njengobe enta esikhatsini lesendulile.​—Amo. 3:7.

20. Ngutiphi tiphrofetho teliBhayibheli letitawugcwaliseka ngekushesha, futsi yini lokufanele sichubeke siyenta?

²⁰ Kutawuphuma simemetelo lesitsi “kuthula nekulondzeka.” (1 Thes. 5:3) Ngemuva kwaloko, bohulumende bemhlaba batawujikela inkholo yemanga futsi bayibhubhise. (Semb. 17:16, 17) Batawubese bahlasela bantfu baNkulunkulu. (Hez. 38:18, 19) Letintfo letitawenteka titawuholela emphini yekugcina ye-Amagedoni. (Semb. 16:14, 16) Singaciniseka kutsi letintfo titawenteka ngekushesha. Kuze kube nguleso sikhatsi, shengatsi singachubeka sikhombisa kutsi siyabonga kuBabe wetfu wasezulwini lositsandzako ngekutsi sinake tiphrofetho teliBhayibheli futsi sisite labanye bente lokufanako.