• “Bengiva ngatsi indvodza yami iphinge tikhatsi letinyenti.”

• “Ngativa ngihlazekile, ngingasimuhle futsi ngiyintfo lengenamsebenti.”

• “Bengingakhoni kukhuluma nalotsite ngalendzaba. Bengisha ngedvwa.”

• “Ngeva shengatsi Jehova akanendzaba nami.”

Lamavi langenhla aveta indlela umfati lativa ngayo nangabe umyeni wakhe abuka titfombe letikhombisa kungcola. Nangabe sekuphele tinyanga nobe iminyaka solo atibuka emasitseleni, lomfati angahle eve shengatsi akayophindze ayetsembe. Lomunye umfati watsi: “Bengitibuta: ‘Ngubani lona? Tikhona yini letinye tintfo langifihlela tona?’”

Lesihloko sentelwe umfati lonemyeni lobuka titfombe letikhombisa kungcola. a Sitawucoca ngetimiso teliBhayibheli letitamdvudvuta, timcinisekise kutsi Jehova utamsekela futsi timsite abe nekuthula futsi asondzelane naye. b

Nanobe ungeke ukhone kukulawula konkhe lokwentiwa yindvodza yakho, tikhona letinye tintfo longatenta kuze ube nekuthula kakhudlwana. Naka naku lokulandzelako.

Kugweme kutisola. Umfati angahle acabange kutsi ngandlela tsite kuliphutsa lakhe kutsi indvodza yakhe ibuka titfombe letikhombisa kungcola. Danielle c utsi: “Bengibona ngatsi kutfukutsela kwami ngiko lebekubulala umshado wami.” Alice bekeva ngatsi kukhona lashoda ngako. Bekatibuta: ‘Yini leyenta indvodza yami ikhetse kubuka labanye bosisi esikhundleni sami?’

Nangabe utiva ngendlela lefanako, yati kutsi Jehova akakubeki licala ngalokwentiwa yindvodza yakho. Jakobe 1:14 utsi: “Nguloyo naloyo ulingwa ngekuhungwa sifiso sakhe nangekuyengwa ngiso.” (Rom. 14:12; Fil. 2:12) Kunekutsi Jehova akusole, ukutsatsa njengalokuligugu kwetsembeka kwakho.​—2 Khr. 16:9.

 Kungakusita nekucondza kutsi nangabe indvodza yakho ibuka titfombe letikhombisa kungcola, loko akusho kutsi kukhona loshoda ngako. Bantfu labati kancono ngalendzaba batsi kubuka titfombe letikhombisa kungcola kuvusa sifiso sekuya ecansini lesingeke senetiswe ngunobe ngumuphi umuntfu wesifazane.

Gwema kukhatsateka ngalokwecile. Catherine utsi kuhlale acabanga ngenkinga yendvodza yakhe yekubuka titfombe letikhombisa kungcola bekumkhatsata kuphila kwakhe konkhe. Frances utsi: “Ngaso sonkhe sikhatsi nangingati kutsi indvodza yami ikuphi, bengesaba. Bangishaywa luvalo lilanga lonkhe.” Labanye bafati bavetile kutsi bativa banemahloni kakhulu nabanalamanye emaKhristu lokungenteka ayati ngalenkinga yemadvodza abo. Labanye batsi bativa babodvwa ngobe bacabanga kutsi kute lowati ngesimo labakuso.

Kuvamile kutiva ngalendlela. Kodvwa kuhlale ucabanga ngako kungakwenta ukhatsateke kakhulu. Yetama kucinisa buhlobo bakho naJehova, kwenta njalo kutakusita kutsi ucinisele.​—Hla. 62:2; Ef. 6:10.

Kungakusita kufundza nekucabangisisa ngetindzaba letiseBhayibhelini letimayelana nebafati lebebacindzetelekile labadvudvutwa kuthantaza kuJehova. Bekangahlali asishintja simo sabo, kodvwa wabaniketa kuthula. Sibonelo nje, Hana bekacindzeteleke kakhulu ngesimo lebekakuso. Kepha ngemuva ‘kwekuthantaza sikhatsi lesidze embikwaJehova,’ waba nekuthula nanobe bekangati kutsi kutawentekani.​—1 Sam. 1:10, 12, 18; 2 Khor. 1:3, 4.

Cela labadzala belibandla kutsi bakusite. ‘Bangaba njengendzawo yekukhosela nakunemoya, indzawo yekukhosela nakunemvula lenesiphepho.’ (Isa. 32:2) Bangahle bakubonise kutsi ngubani dzadze longakhuluma naye futsi akudvudvute.​—Taga 17:17.

Ungakhona yini kusita indvodza yakho kutsi iyekele umkhuba wekubuka titfombe letikhombisa kungcola? Mhlawumbe. LiBhayibheli nalikhuluma ngekucatulula inkinga nobe ngekuncoba sitsa lesinemandla, litsi “bantfu lababili bancono kunamunye.” (Shu. 4:9-12) Lucwaningo luveta kutsi kuvama kuba nemiphumela lemihle nangabe  labashadene babambisana ekuncobeni umkhuba wekubuka titfombe letikhombisa kungcola futsi betame kuphindze betsembane.

Kuliciniso kutsi kutawuya ngekutsi lendvodza itimisele yini kuyekela lomkhuba wekubuka titfombe letikhombisa kungcola. Imncengile yini Jehova kutsi ayinikete emandla futsi yacela nalabadzala belibandla kutsi bayisite? (2 Khor. 4:7; Jak. 5:14, 15) Inato yini tindlela letitayisita kutsi igweme lesilingo, sibonelo nje kutibekela imincele endleleni lesebentisa ngayo tebucwephesha kanye nekugwema timo letingayibeka ematfubeni ekutsi ilingeke? (Taga 27:12) Ikulungele yini kwemukela lusito lwakho futsi ikutjela liciniso yini? Nangabe kunjalo, ungahle ukhone kuyisita.

Ungayisita njani? Cabanga nganasi sibonelo. Felicia ushade na-Ethan, lowangena shi ekubukeni titfombe letikhombisa kungcola kusukela asemncane. Felicia wenta kube melula ngendvodza yakhe kutsi ikhulume naye nayinesifiso sekubuka titfombe letikhombisa kungcola. Ethan utsi: “Ngimtjela konkhe umkami. Uyangisita kutsi ngitibekele imincele futsi uhlale angihlola. Uphindze angisite kutsi nginciphise lizinga lengingena ngalo ku-Internet.” Felicia uva buhlungu ngekutsi Ethan uba nesifiso sekubuka titfombe letikhombisa kungcola. Utsi: “Kodvwa intfukutselo lengiba nayo nebuhlungu lengibuvako akumsiti kutsi awuyekele lomkhuba. Ngemuva kwekutsi sesicocile ngenkinga yakhe, ubese uyangisita ngibeketelele buhlungu bami.”

Kucocisana lokunjengaloku akugcini nje ngekusita indvodza kutsi ingasatibuki titfombe letikhombisa kungcola kodvwa kusita nemkayo kutsi aphindze ayetsembe. Ngetulu kwako konkhe, nangabe indvodza ikulungele kutjela umkayo loko lekwentako ngalelo langa nekutsi ikuphi, loko kwenta kube bete timfihlo.

Ucabanga kutsi ungayisita yini indvodza yakho ngendlela lefanako? Nangabe kunjalo, kungaba njani nifundze kanye kanye lesihloko futsi nicoce ngaso? Umgomo wakhe kutawuba kuyekela kubuka titfombe letikhombisa kungcola nekutsi akwente ube nesizatfu sekuphindze umetsembe. Kunekutsi akutfukutselele, kufanele etame kucondza kutsi lenkinga yakhe ikwenta utive njani. Umgomo wakho kutawuba kumsita kutsi awuyekele lomkhuba nekumniketa litfuba lekutsi akwente uphindze umetsembe. Kutawudzingeka nifundze nobabili kutsi yini leyenta bantfu babuke titfombe letikhombisa kungcola nekutsi kungancotjwa njani. d

 Nangabe ubona ngatsi kutawuba nemsindvo nanisakhuluma, ungakucabangela kucela lomdzala welibandla nobabili lenitawutiva nikhululekile kukhuluma embikwakhe ngalenkinga yenu. Khumbula kutsi ngisho nangemuva kwekutsi loshade naye sekayincobile lenkinga yakhe, kungahle kutsatse sikhatsi ngaphambi kwekutsi uphindze umetsembe. Ungapheli emandla. Buka tintfo letincane letikhombisa kutsi ikhona intfutfuko emshadweni wenu. Yetsemba kutsi nangabe nobabili ninesineke, umshado wenu utawuphindze ucine.​—Shu. 7:8; 1 Khor. 13:4.

Nangabe indvodza yakho iphindze ibuka titfombe letikhombisa kungcola, loko kusho kutsi ayikaphendvuki yini nobe kusho kutsi lesimo ngeke silunge? Cha. Kungahle kudzingeke ilwisane nalenkinga kuphila kwayo konkhe ikakhulukati nangabe kungumkhuba lokulukhuni kuwuyekela. Ngisho nobe sekuphele iminyaka iwuyekele lomkhuba, ingahle ibuyele. Kuze ikugweme loko, kutawudzingeka itimisele kakhulu kutsi ikugweme kulingeka, loko kungafaka ekhatsi kuba nendlela letsite yekugwema simo lesingayenta ilingeke nanobe kungabonakala ngatsi lenkinga seyiyincobile. (Taga 28:14; Mat. 5:29; 1 Khor. 10:12) Kutawudzingeka nekutsi ishintje indlela ‘lecabanga ngayo’ kuze ifundze ‘kwenyanya lokubi,’ lokufaka ekhatsi kubuka titfombe letikhombisa kungcola kanye nemikhuba lemibi lehambisana nako lefaka ekhatsi kushaya indlwaphu. (Ef. 4:23; Hla. 97:10; Rom. 12:9) Itimisele yini kukwenta loko? Nangabe kunjalo, lisekhona litsemba. e

Kodvwa kutsiwani nangabe indvodza yakho ite sifiso sekulwisana nalenkinga? Siyacondza kutsi ungahle utive udvumele, utfukutsele futsi ukhohlisiwe. Lahlela konkhe kukhatsateka kwakho kuJehova futsi loko kungakwenta ube nekuthula. (1 Phet. 5:7) Chubeka usondzelana naJehova ngekutsi udadishe, uthantaze futsi ucabangisise ngalokufundzile. Nawenta njalo, ungaciniseka kutsi naye utawusondzelana nawe. Isaya 57:15 utsi Jehova uhlala nalabo “labephukile nalabanemoya lophansi,” kuze abasite baphindze bajabule. Timisele kuba ngumKhristu loncono. Cela lusito kulabadzala belibandla. Ngetulu kwaloko, ungalilahli litsemba lekutsi ngalelinye lilanga indvodza yakho itawushintja.​—Rom. 2:4; 2 Phet. 3:9.