1. Yini lengenteka nangabe lotsite ente sono lesikhulu?

 ESIHLOKWENI lesendlulile, sifundze ngaloko Pawula latjela libandla laseKhorinte kutsi likwente ngesikhatsi lenye indvodza yente bubi lobukhulu. Lolowonile bekangaphendvuki futsi kwadzingeka kutsi asuswe ebandleni. Kodvwa njengobe umbhalo lokusekelwe kuwo lesihloko ukhombisa, labanye labente sono lesikhulu bangasitakala. Nkulunkulu angabasita kutsi baphendvuke. (Rom. 2:4) Ubasebentisa njani labadzala belibandla kuze basite umuntfu kutsi aphendvuke?

2-3. Yini lokufanele siyente nasati kutsi umzalwane nobe dzadze wente sono lesikhulu, futsi ngasiphi sizatfu?

² Kuze labadzala belibandla basite, kufanele bati ngalendzaba. Ngako yini lokufanele siyente nasati kutsi umzalwane nobe dzadze wente sono lesikhulu, lokuyintfo lengenta kutsi asuswe ebandleni? Kufanele simkhutsate kutsi ayocela lusito kulabadzala belibandla.​—Isa. 1:18; Imis. 20:28; 1 Phet. 5:2.

³ Kodvwa yini lesingayenta nangabe lona lowonile ala kuyokhuluma nalabadzala belibandla? Sitawuhamba siyokhuluma nabo kuze siciniseke kutsi lomzalwane nobe dzadze uyalutfola lusito laludzingako. Nasenta njalo, sitawube sikhombisa kutsi siyamtsandza ngobe siyati kutsi labadzala belibandla bangamsita. Nangabe lomuntfu achubeka nekwenta lesono,  loko kungenta kutsi buhlobo bakhe naJehova bulimale kakhulu. Angaphindze one lidvumela lelibandla. Ngako, ngesibindzi sitawenta lokutsite ngobe simtsandza Jehova futsi simtsandza nalolowonile.​—Hla. 27:14.

INDLELA LABADZALA BELIBANDLA LABABASITA NGAYO LABO LABENTE SONO LESIKHULU

4. Uyini umgomo wekomidi yalabadzala belibandla nayihlangene nalotsite lowente sono lesikhulu?

⁴ Nangabe lotsite ebandleni enta sono lesikhulu, sigungu salabadzala sikhetsa bazalwane labatsatfu kutsi bakhe ikomidi. a Laba kufanele kube bazalwane labatfobekile. Nabasetama kusita lolowonile kutsi aphendvuke, kufanele bakhumbule kutsi angeke baze bamphocelele kutsi ashintje. (Dut. 30:19) Labazalwane bayati kutsi akusibo bonkhe labonile labatawuphendvuka, njengobe kwenta iNkhosi Davide. (2 Sam. 12:13) Labanye labente bubi bangakhetsa kungasilaleli seluleko saJehova. (Gen. 4:6-8) Nobe kunjalo, umgomo walabazalwane kusita lolowonile kutsi aphendvuke nangabe kungenteka. Ngutiphi timiso lokufanele bahlale batikhumbula nabahlangene nalolowente bubi?

5. Yini ikomidi yalabadzala belibandla lokufanele ihlale iyikhumbula nayihlangana nalowente bubi? (2 KuThimothi 2:24-26) (Buka nesitfombe.)

⁵ Lekomidi yalabadzala belibandla ibuka lolowonile njengemvu lelahlekile leligugu. (Luk. 15:4, 6) Ngako nayihlangene naye kufanele ingamkhahlabeti ngemagama nobe imphatse kabi futsi kufanele ibe nemusa. Ngetulu kwaloko, labazalwane angeke batikhiphe ecaleni nabahlangene naye ngekutsi kube shengatsi balandzela inchubo letsite lehleliwe, bamane nje bambute imibuto futsi batfole nemaciniso endzaba. Kunaloko, kufanele bakhombise buntfu lobutfolakala ku-2 KuThimothi 2:24-26. (Fundza.) Labazalwane kufanele bahlale banemoya lophansi, babe nesineke futsi babe nemusa njengobe betama kutsintsa inhlitiyo yalolowonile.

6. Bazalwane labakha ikomidi bangatilungisa njani tinhlitiyo tabo ngaphambi kwekutsi bahlangane nalowente bubi? (KubaseRoma 2:4)

⁶ Labazalwane labakha lekomidi balungisa tinhlitiyo tabo. Betama kulingisa Jehova ngasosonkhe sikhatsi nabahlangene nalolowonile, babe bakhumbula emavi aPawula latsi: “Ngalomusa wakhe, Nkulunkulu ufuna kukwenta uphendvuke.” (Fundza KubaseRoma 2:4.) Labazalwane kufanele bakhumbule kutsi babelusi nekutsi kufanele balandzele sicondziso saKhristu futsi balingise yena endleleni labanakekela ngayo libandla. (Isa.  11:3, 4; Mat. 18:18-20) Ngaphambi kwekutsi labazalwane labakha lekomidi bahlangane nalolowente bubi, kufanele bathantaze futsi bacabange ngemgomo wabo: lokukusita lolowente bubi kutsi aphendvuke. Batawucwaninga emiBhalweni nasetincwadzini tetfu baphindze bathantazele kucondza. Batawutibuta kutsi yini lokufanele bayati ngalomuntfu lokungenteka ifake sandla kuze acabange futsi ente loku lakwentile.​—Taga 20:5.

7-8. Labazalwane labakha lekomidi bangamlingisa njani Jehova ngekuba nesineke nabahlangana nalowente bubi?

⁷ Labazalwane labakha lekomidi balingisa Jehova ngekuba nesineke. Bahlale bakhumbula indlela Jehova lebekabaphatsa ngayo bantfu labenta bubi esikhatsini lesendlulile. Sibonelo nje, waba nesineke ngesikhatsi akhuluma naKhayini, amecwayisa ngemiphumela yesono futsi wametsembisa kutsi nangabe alalela utamemukela. (Gen. 4:6, 7) Jehova weluleka Davide asebentisa umphrofethi Nathani, lowasebentisa umfanekiso lowatsintsa inhlitiyo yalenkhosi. (2 Sam. 12:1-7) Ngetulu kwaloko, Jehova ‘bekahlale atfumela’ baphrofethi bakhe njalo nje esiveni saka-Israyeli lesingalaleli. (Jer. 7:24, 25) Akazange amele labantfu kutsi baphendvuke kucala kube ngukhatsi abasita. Kunaloko, kwacala yena wabacela kutsi baphendvuke.

⁸ Labadzala belibandla balingisa sibonelo saJehova nabetama kusita labo labente sono lesikhulu. ‘Bayababeketelela’ labo labonile njengobe kusho 2 KuThimothi 4:2. Ngako lomdzala welibandla kufanele ahlale ehlise umoya futsi abe nesineke kuze akhone kusita lowonile abe nesifiso sekwenta lokulungile. Nangabe lomdzala welibandla atfukutsela nobe acansuka, lomuntfu angahle angasilaleli seluleko sakhe nobe ale kuphendvuka.

9-10. Yini labazalwane labangayenta kuze basite lowonile kutsi acabange ngalakwentile?

⁹ Labazalwane labakha lekomidi betama kutfola kutsi ngutiphi timo letimholele kulesono. Sibonelo nje, lomKhristu ube butsakatsaka kancane kancane ngobe angasatidadisheli yini liBhayibheli nobe angasawenti umsebenti wekushumayela? Besekayekele yini kuthantaza njalo kuJehova nobe imithantazo yakhe beyingasasuki yini enhlitiyweni? Uvumele tifiso letimbi kutsi timlawule yini? Wente tincumo letingakahlakaniphi yini nakakhetsa latihlanganisa nabo nobe latijabulisa ngako? Letincumo takhe tiyitsintse njani inhlitiyo yakhe? Uyabona yini kutsi tincumo latentile naloko lakwentile kumtsintse njani Babe wakhe Jehova?

¹⁰ Labazalwane nababuta lolowente bubi imibuto lenengcondvo kodvwa babe bangamphenyi tindzaba takhe, ngemusa bangamsita kutsi akhone kukhuluma avete konkhe lokusenhlitiyweni yakhe, futsi bangamsita kutsi acabangisise ngaloko lakwentile. (Taga 20:5) Ngetulu kwaloko, bangasebentisa imifanekiso kuze bamsite acabange kahle futsi abone kutsi kubi ngani lalakwentile njengobe kwenta Nathani kuDavide. Mhlawumbe nabahlangene naye kwekucala, angabese utisola kakhulu ngaloko lakwentile futsi mhlawumbe angaze aphendvuke.

11. Jesu wakhuluma njani nalabo bebonile?

¹¹ Labazalwane labakha lekomidi betama kulingisa Jesu. Ngesikhatsi Jesu losavusiwe akhuluma naSawula waseThasusi wasebentisa umbuto lohlakaniphile, watsi: “Sawula, Sawula, ungihluphelani?” Ngalombuto, Jesu wamsita kutsi acabangisise ngaloku bekakwenta. (Imis. 9:3-6) Nakakhuluma ‘ngemfati lokutsiwa nguJezebeli,’ Jesu watsi: “Ngamnika  sikhatsi sekutsi aphendvuke.”​—Semb. 2:20, 21.

12-13. Labazalwane bangamnika njani sikhatsi sekutsi aphendvuke loyo lowente bubi? (Buka nesitfombe.)

¹² Labazalwane balingisa Jesu ngekutsi bangasheshi baphetse ngekutsi lolowonile angeke aphendvuke. Nanobe labanye bangaphendvuka kulomhlangano wabo wekucala nekomidi yalabadzala belibandla, kodvwa labanye bangahle badzinge sikhatsi lesinyenti. Ngako labazalwane bangahlela kuhlangana nalona lowonile tikhatsi letingetulu kwasinye. Mhlawumbe ngemuva kwalomhlangano wabo wekucala, lolowonile angacala kucabangisisa ngaloko latjelwe kona. Mhlawumbe angatitfoba athantaze kuJehova. (Hla. 32:5; 38:18) Ngako emhlanganweni lolandzelako lolowonile angahle abe nesimo sengcondvo lesishintjile kunaleso bekanaso kulomhlangano wekucala.

¹³ Labazalwane bakhombisa luvelo nemusa kuze basite lowonile kutsi aphendvuke. Bayetsemba kutsi Jehova utayibusisa imetamo yabo, baphindze bakuthantazele loko kanye nekutsi lomKhristu asanguluke futsi aphendvuke.​—2 Thim. 2:25, 26.

14. Ngubani lokufanele advunyiswe nangabe lowonile aphendvuka, futsi sisho ngani?

¹⁴ Nangabe lowonile aphendvuka, sijabula kakhulu! (Luk. 15:7, 10) Ngubani lokufanele advunyiswe? Ngulabadzala belibandla yini? Khumbula naku Pawula lakubhala mayelana nalabo labonile: “Nkulunkulu angahle abente baphendvuke.” (2 Thim. 2:25) Ngako akusuye umuntfu kodvwa nguJehova losita umKhristu kutsi ashintje indlela lacabanga ngayo. Pawula wachaza tintfo letentekako ngemuva kwekutsi umuntfu aphendvuke, lomuntfu angabese uba nelwati lolunyenti lolungulonalona lweliciniso, asanguluke futsi aphunyule etingibeni taSathane.​—2 Thim. 2:26.

15. Yini labazalwane labangachubeka bayenta kuze basite lowente bubi losaphendvukile?

¹⁵ Nangabe lolowente bubi aphendvuka, lekomidi itawuhlela kutsi achubeke avakashelwa  kuze atfole lusito laludzingako lwekulwisana netingibe taSathane futsi ente tindlela takhe ticondze. (Heb. 12:12, 13) Labazalwane labakha lekomidi angeke batjele muntfu ngaloko lokwentiwe ngulolowonile. Kodvwa yini libandla lelingatjelwa yona?

“BAKHALIMELE EMBIKWABO BONKHE LABABUKILE”

16. Ngekusho kwa-1 KuThimothi 5:20, bobani labantfu “lababukile” Pawula bekakhuluma ngabo?

¹⁶ Fundza 1 KuThimothi 5:20. Pawula wabhalela Thimothi lamavi naye lobekangulomdzala welibandla loko langakwenta nangabe lotsite ‘ente sono.’ Bekasho kutsini Pawula? Bekangasho kutsi labantfu “lababukile” ngilo lonkhe libandla. Kunaloko, bekakhuluma ngalabo labambalwa lokungenteka sebayati ngalesono lesentiwe. Kungenteka babofakazi bekutibonela nobe batjelwe ngulona lowonile. Labazalwane labakha lekomidi batawukhuluma nabo ngasense babatjele kutsi seyikhulunyiwe lendzaba futsi lolowonile sewusitiwe.

17. Nangabe labanyenti ebandleni bati ngesono lesikhulu lesentiwe nobe batawugcine bati ngekuhamba kwesikhatsi, ngusiphi simemetelo lokufanele sentiwe, futsi ngasiphi sizatfu?

¹⁷ Kuletinye timo, bubi lobentiwe bungahle batiwe ngulabanyenti ebandleni nobe kungenteka ngekuhamba kwesikhatsi bugcine sebatiwa. Esimeni lesinjalo, labantfu “lababukile” sengilo lonkhe libandla. Ngako lomdzala utawusho simemetelo ebandleni sekutsi umzalwane nobe dzadze lotsite usoliwe. Ngasiphi sizatfu? Pawula uyaphendvula: “Kuze kube secwayiso kulabanye” kutsi bangasenti sono.

18. Yini labadzala belibandla lokufanele bayente nangabe umntfwana lomncane lobhajatisiwe enta sono lesikhulu? (Buka nesitfombe.)

 ¹⁸ Kutsiwani nangabe umntfwana lobhajatisiwe loneminyaka lengephansi kwa-18 enta bubi lobukhulu? Sigungu salabadzala sitawuhlela kutsi labadzala belibandla lababili bahlangane naye kanye nebatali bakhe lababoFakazi. b Labazalwane batawubuta labatali kutsi ngutiphi tintfo labatentile kuze basite lomntfwana kutsi aphendvuke. Nangabe lomntfwana asilalela seluleko sebatali bakhe futsi ashintja indlela lacabanga ngayo nalenta ngayo, lalabadzala belibandla lababili bangahle bancume kuyekela labatali kutsi bachubeke basita umntfwana wabo. Ngetulu kwako konkhe, ngumsebenti walabatali labawuniketwe nguNkulunkulu kweluleka bantfwana babo ngelutsandvo. (Dut. 6:6, 7; Taga 6:20; 22:6; Ef. 6:2-4) Labazalwane batawuhle bakhuluma nalabatali kuze baciniseke kutsi lomntfwana uyalutfola lusito laludzingako. Kodvwa kutsiwani nangabe lomntfwana lobhajatisiwe achubeka nekwenta lobubi? Esimeni lesinjalo, ikomidi yalabadzala belibandla itawuhlangana naye kanye nebatali bakhe lababoFakazi.

“JEHOVA UNELUTSANDVO LOLUKHULU FUTSI UNEMUSA”

19. Labadzala labakha lekomidi betama njani kulingisa Jehova nabahlangana nalowente sono lesikhulu?

¹⁹ Labadzala belibandla labakha lekomidi banemsebenti labawunikwe nguJehova wekugcina libandla lihlobile. (1 Khor. 5:7) Ngetulu kwaloko, bafuna kusita labo labonile kutsi baphendvuke nakungenteka. Njengobe basasita lolowonile, bahlale banelitsemba lekutsi utawushintja. Ngasiphi sizatfu? Ngenca yekutsi bafuna kulingisa Jehova ‘lonelutsandvo lolukhulu kanye nemusa.’ (Jak. 5:11) Naka kutsi umphostoli Johane lobesakhulile wakukhombisa njani loko. Wabhala watsi: “Bantfwabami, nginibhalela letintfo kuze ningoni. Kepha nangabe lotsite ona, sinemsiti kuBabe, lokunguJesu Khristu lolungile.”​—1 Joh. 2:1.

20. Sitawucoca ngani esihlokweni sekugcina salomagazini?

²⁰ Lokubuhlungu kutsi kuyenteka umuntfu lowonile ale kuphendvuka. Nangabe loko kwenteka, kufanele asuswe ebandleni. Yini labadzala belibandla lokufanele bayente kulesimo? Sitawucoca ngaloko esihlokweni sekugcina salomagazini.