1-2. (a) Jehova utiva njani ngalabo labachubeka benta sono? (b) Jehova ufuna kutsi labo labonile benteni?

 JEHOVA akasuye Nkulunkulu loyekelelako, uyasenyanya sono. (Hla. 5:4-6) Ulindzele kutsi sitihloniphe timiso takhe letilungile lasibhalele tona eVini lakhe. Kuliciniso kutsi Jehova akakalindzeli kutsi singawenti emaphutsa. (Hla. 130:3, 4) Ngesikhatsi lesifanako, akababeketeleli bantfu “labangamhloniphi . . . labagucula umusa wakhe lomkhulu bawente saba sekwenta tono letihambisana nekwedzelela.” (Juda 4) Kuliciniso kutsi liBhayibheli likhuluma ‘ngekubhujiswa kwebantfu labangamesabi Nkulunkulu’ emphini yakhe ye-Amagedoni.​—2 Phet. 3:7; Semb. 16:16.

² Nobe kunjalo, Jehova akafuni kutsi kubhubhe ngisho namunye. Njengobe kuvetiwe etihlokweni letendlulile, liBhayibheli likwenta kucace kutsi “ufisa kutsi bonkhe bantfu baphendvuke.” (2 Phet. 3:9) Labadzala belibandla balingisa Jehova njengobe betama kubasita ngesineke labo labente bubi kutsi bashintje tindlela tabo futsi baphindze bemukelwe nguJehova. Nobe kunjalo, akusibo bonkhe labenta bubi labaphendvukako. (Isa. 6:9) Labanye bayachubeka nekwenta bubi ngisho nobe labadzala belibandla betame kanyenti kubasita kutsi baphendvuke. Yini lokufanele yentiwe esimeni lesinjalo?

“MSUSENI UMUNTFU LOMUBI”

3. (a) LiBhayibheli litsi yini lokufanele yentiwe kulabo labonile labangaphendvuki? (b) Sisho ngani kutsi ngandlela tsite lona lowente bubi usuke atikhetsela kususwa ebandleni?

³ Nangabe umuntfu lowente bubi angaphendvuki, labadzala  belibandla kufanele balandzele loko lokushiwo ngumbhalo wa-1 KubaseKhorinte 5:13 lotsi: “Msuseni umuntfu lomubi emkhatsini wenu.” Lona lowente bubi uyati kutsi nakangaphendvuki utawususwa ebandleni, ngako ngandlela tsite usuke atikhetsela kususwa ebandleni. (Gal. 6:7) Yini lesenta sisho njalo? Kungenca yekutsi walile kushintja ngisho nangemuva kwekutsi labadzala belibandla betame kanyenti kumsita kutsi aphendvuke. (2 Khos. 17:12-15) Tento takhe tikhombisa kutsi ukhetse kungayilaleli imitsetfo yaJehova.​—Dut. 30:19, 20.

4. Ngusiphi sizatfu lesenta kwentiwe simemetelo nangabe lowente bubi longaphendvuki asuswa ebandleni?

⁴ Nangabe lowente bubi longaphendvuki asuswa ebandleni, kwentiwa simemetelo kuze kwatiswe libandla kutsi akasasuye Fakazi waJehova. a Injongo yalesimemetelo akusiko kumhlaza. Kunaloko, lesimemetelo siyentiwa kuze libandla lilandzele sicondziso lesiseBhayibhelini lesitsi ‘aliyekele kutihlanganisa’ naloyo muntfu ‘lingadli ngisho nekudla naye.’ (1 Khor. 5:9-11) Kunetizatfu letinhle tekutsi kuniketwe lesicondziso. Umphostoli Pawula wabhala watsi: “Imvubelo lencane iyibilisa yonkhe inhlama.” (1 Khor. 5:6) Umuntfu lowenta bubi longaphendvuki, angabacedza emandla labo labetama kamatima kuphila ngekuvumelana netimiso taJehova letilungile.​—Taga 13:20; 1 Khor. 15:33.

5. Kufanele sitive njani ngemuntfu losusiwe ebandleni, futsi ngasiphi sizatfu?

⁵ Kufanele sitive njani ngemzalwane nobe dzadze losusiwe ebandleni? Nanobe singeke sibe naye nasinesikhatsi lesimnandzi, kufanele simbuke njengemvu lelahlekile, kunekutsi sititjele kutsi angeke asabuya ebandleni. Imvu lelahlekelene nemhlambi isengabuya. Khumbula kutsi lemvu lelahlekile yatinikela kuJehova. Lokubuhlungu kutsi kwanyalo ayiphili ngekuvumelana nekutinikela kwayo, futsi loko kuyenta ibe sengotini. (Hez. 18:31) Nobe kunjalo, nangabe nje umusa waJehova usekhona, lisekhona litsemba lekutsi lomuntfu angabuya ebandleni. Labadzala belibandla bangalikhombisa njani lelitsemba endleleni labaphatsa ngayo lona lowente bubi losasusiwe ebandleni?

LABADZALA BELIBANDLA BANGABASITA NJANI LABO LABASUSIWE EBANDLENI?

6. Yini labadzala belibandla labatayenta kuze basite umuntfu losusiwe ebandleni?

⁶ Loyo losusiwe ebandleni uvele ashiywe kanjalo yini, asale atibonela kutsi ubuyela njani kuJehova? Cha! Ikomidi yalabadzala belibandla nayimtjela kutsi utawususwa ebandleni, kufanele imchazele kutsi yini langayenta kuze abuyele. Kodvwa labazalwane batawenta lokungetulu kwaloko. Etikhatsini letinyenti, batamtjela kutsi bangatsandza kuphindze bahlangane naye ngemuva kwetinyanga letimbalwa kuze babone kutsi sewushintjile yini. Nangabe avuma kuhlangana nabo, lalabadzala belibandla batamkhutsata ngemusa kulowo mhlangano kutsi aphendvuke futsi abuyele ebandleni. Ngisho nobe angaphendvuki ngaleso sikhatsi, labadzala batawuphindze bahlele kuchubeka bahlangana naye etikhatsini letitako kuze bamkhutsate kutsi aphendvuke.

7. Labadzala belibandla bakhombisa njani kutsi banesihawu njengaJehova nabasita umuntfu losusiwe ebandleni? (Jeremiya 3:12)

⁷ Labadzala belibandla benta konkhe labangakwenta kuze bakhombise kutsi banesihawu njengaJehova nabasita loyo losusiwe ebandleni. Sibonelo nje, Jehova  akalindzelanga kutsi kube bantfu bakhe labangalaleli labetama kubuyela kuye kucala. Kunaloko, nguye lowenta lokutsite kucala, watfumela baphrofethi bakhe kubo, ngisho nangaphambi kwekutsi bakhombise timphawu tekutsi baphendvukile. Njengobe sibonile esihlokweni sesibili salomagazini, Jehova wakhombisa kutsi unesihawu ngekutsi atjele umphrofethi Hoseya kutsi ayocela umkakhe kutsi babuyisane ngisho nobe bekasolo enta sono. (Hos. 3:1; Mal. 3:7) Labadzala belibandla balingisa Jehova ngekutsi bakhombise kutsi banesifiso lesikhulu sekutsi lona lowente bubi abuyele ebandleni, futsi loko abakwenti kube lukhuni kuye.​—Fundza Jeremiya 3:12.

8. Umfanekiso waJesu lomayelana nendvodzana leyahamba ekhaya ukhombisa njani kutsi Jehova unesihawu nemusa? (Lukha 15:7)

⁸ Khumbula umfanekiso waJesu lomayelana nendvodzana leyahamba ekhaya, lokukhulunywe ngawo esihlokweni sesibili salomagazini. Ngesikhatsi babe wayo ayibona isesekhashane ibuya ekhaya, “wagijima wefika wayigaca futsi wayanga.” (Luk. 15:20) Naka kutsi lobabe akazange alindzele lendvodzana kutsi imncenge kutsi ayicolele. Kunaloko, lobabe wenta lokutsite kucala, njengobe bekungenta nobe ngabe ngumuphi babe lonelutsandvo. Labadzala belibandla betama kukhombisa simo sengcondvo lesifanako kulabo labashiye libandla. Bafuna letimvu letilahlekile kutsi tibuye ekhaya. (Luk. 15:22-24, 32) Kuba nenjabulo lenkhulu ezulwini nasemhlabeni nangabe loyo lowonile abuyela ebandleni!​—Fundza Lukha 15:7.

9. Jehova uncenga labo labonile kutsi benteni?

⁹ Kuloko lesesifundze ngako, kusebaleni kutsi Jehova akavumi kutsi labo labente bubi futsi bangaphendvuki bachubeke basebandleni. Nobe kunjalo, akabalahli. Ufuna babuye. Indlela lativa ngayo ngabo ivetwe kahle kuHoseya 14:4 lotsi: “Mine ngitabelapha, futsi angeke baphindze bangetsembeki kimi. Ngitabatsandza ngalokusuka enhlitiyweni, ngobe sengiyekele kubatfukutselela.” Kwati indlela Jehova lativa ngayo kwenta labadzala belibandla babuke nobe ngabe nguluphi lushintjo umuntfu lacala kulukhombisa lwekutsi uyaphendvuka. Ngetulu kwaloko, lamavi kufanele abe sikhutsato lesinemandla kubo bonkhe labashiye Jehova kutsi babuyele kuye bangatibambaleli.

10-11. Yini labadzala belibandla labatayenta kuze betame kusita labo labasuswa ebandleni esikhatsini lesendlulile?

¹⁰ Kutsiwani ngalabo labasuswa ebandleni esikhatsini lesendlulile, mhlawumbe eminyakeni leminyenti leyendlulile? Kungenteka abasasenti lesono labasuselwa sona. Kuletinye timo, kungenteka abasakhumbuli nekutsi basuselwani. Kunobe ngukuphi, labadzala belibandla batawetama kubafuna futsi babavakashele. Nasebabavakashele, batawuthantaza nabo futsi babacele ngemusa kutsi babuyele ebandleni. Kuliciniso kutsi nangabe sekuphele iminyaka leminyenti umuntfu akhweshelene nelibandla, nakanjani utawube sekabutsakatsaka ebuhlotjeni bakhe naNkulunkulu. Ngako nangabe akhombisa kutsi uyafuna kubuyela ebandleni, labadzala bangahlela kutsi lotsite adadishe naye liBhayibheli, ngisho nobe asengakabuyiselwa. Kuto tonkhe timo, ngulabadzala belibandla labatawuhlela kutsi lotsite adadishe naye liBhayibheli.

¹¹ Labadzala belibandla betama kuba nesihawu njengaJehova, ngako labazalwane batawufuna bonkhe labashiye Jehova futsi babakhutsate kutsi babuyele kuye. Nangabe lona lowonile akhombisa kutsi uphendvukile futsi ashiye lokubi lebekakwenta, angabuyiselwa ngaphandle kwekucitsa sikhatsi.​—2 Khor. 2:6-8.

12. (a) Ngutiphi timo labadzala belibandla lokudzingeka batinake kakhulu? (b) Kubaluleke ngani kungacabangi kutsi bantfu labenta tono letitsite abayuze bawutfole umusa waJehova? (Buka nembhalo longentasi.)

 ¹² Kuletinye timo, labadzala belibandla kufanele banakisise ngaphambi kwekutsi babuyisele lotsite. Sibonelo nje, nangabe umuntfu wahlukubeta umntfwana nobe bekasihlubuki nobe wahlela kucedza umshado ngebucili, labadzala batawufuna kuciniseka kutsi uphendvuke mbamba yini. (Mal. 2:14; 2 Thim. 3:6) Kufanele bawuvikele umhlambi. Ngesikhatsi lesifanako, kufanele sikhumbule kutsi Jehova utawemukela nobe ngumuphi umuntfu lowenta bubi kutsi abuye nangabe akhombisa kutsi uphendvuke mbamba futsi akuyekela lokubi lebekakwenta. Ngako nanobe labadzala belibandla batawunakisisa nangabe lomuntfu bekakhohlise labanye, akukafaneli bacabange kutsi bantfu labenta  tono letitsite abayuze bawutfole umusa waJehova. b​—1 Phet. 2:10.

LOKO LIBANDLA LELINGAKWENTA

13. Ngumuphi umehluko lokhona endleleni lesiphatsa ngayo umuntfu losoliwe nasendleleni lesiphatsa ngayo umuntfu losusiwe ebandleni?

¹³ Njengobe kuvetiwe esihlokweni lesendlulile, ngaletinye tikhatsi kwentiwa simemetelo lesitsi lotsite usoliwe. Kuleso simo, singachubeka sitihlanganisa naye ngobe siyati kutsi uphendvukile futsi wakuyekela lokubi lebekakwenta. (1 Thim. 5:20) Useyincenye yelibandla futsi uyakudzinga kukhutsatwa bazalwane bakhe nabodzadze. (Heb. 10:24, 25) Nobe kunjalo, lesimo siyehluka nangabe lomuntfu asusiwe ebandleni. ‘Siyayekela kutihlanganisa’ naloyo muntfu, ‘asidli ngisho nekudla’ naye.​—1 Khor. 5:11.

14. EmaKhristu angawusebentisa njani nembeza wawo loceceshwe liBhayibheli endleleni laphatsa ngayo umuntfu losusiwe ebandleni? (Buka nesitfombe.)

¹⁴ Loku lesicoce ngako kusho kutsi angeke sisamnaka ngalokuphelele yini umuntfu losusiwe ebandleni? Cha. Kuliciniso kutsi angeke sibe naye nasinesikhatsi lesimnandzi. Kodvwa emaKhristu angasebentisa nembeza loceceshwe ngeliBhayibheli kuze ancume kutsi atammema yini lomuntfu emihlanganweni yelibandla, lokungenteka kutsi usihlobo nobe bekangumngani losedvute. Sitawenta njani nakaba khona emihlanganweni? Esikhatsini lesendlulile besingambingeleli. Nakuloku, umKhristu ngamunye kufanele asebentise nembeza wakhe loceceshwe liBhayibheli kulendzaba. Labanye ngeke babe nenkinga nekumbingelela nobe kumemukela emihlanganweni yetfu. Nobe kunjalo, angeke sicoce naye sikhatsi lesidze nobe sibe naye nasinesikhatsi lesimnandzi.

15. Bantfu labenta tiphi tono lokukhulunywa ngabo ku-2 Johane 9-11? (Buka nelibhokisi lelitsi “ BoJohane NaPawula Bebakhuluma Ngesono Lesifanako Yini?”)

¹⁵ Labanye bangahle batibute: ‘LiBhayibheli alisho yini kutsi umKhristu lobingelela umuntfu losusiwe ebandleni uhlanganyela naye ebubini bakhe?’ (Fundza 2 Johane 9-11.) Nawubuka lendzaba iyonkhe, iyakhombisa  kutsi lesicondziso sisho labo labatihlubuki nalabo labakhutsata labanye kutsi bente lokubi. (Semb. 2:20) Ngako nangabe umuntfu akhutsata timfundziso tetihlubuki nobe akhutsata labanye kutsi bente bubi, labadzala belibandla angeke bahlele kuyomvakashela. Nobe kunjalo, litawuhlale likhona litsemba lekutsi utawusanguluka. Kodvwa kusengakenteki loko, angeke simbingelele umuntfu lonjalo nobe simmeme kutsi abe khona emihlanganweni yelibandla.

KULINGISA SIHAWU SAJEHOVA KANYE NEMUSA

16-17. (a) Jehova ufuna kutsi labo labonile benteni? (Hezekeli 18:32) (b) Labadzala belibandla bangakhombisa njani kutsi batisebenti letikanye naJehova nabetama kusita labo labente bubi?

¹⁶ Yini lesiyifundzile kuletihloko letisihlanu? Jehova akafuni kutsi kubhubhe ngisho namunye! (Fundza Hezekeli 18:32.) Ufuna kutsi labonile babuyisane naye. (2 Khor. 5:20) Kungako kusukela kadzeni, Jehova bekasolo abacela tikhatsi letinyenti bantfu bakhe labangalaleli kutsi baphendvuke futsi babuyele kuye, loku bekakwenta ngisho nakumuntfu ngamunye. Labadzala belibandla basebenta kanye naJehova kuze basite labo labente tono letinkhulu kutsi baphendvuke.​—Rom. 2:4; 1 Khor. 3:9.

¹⁷ Cabanga nje kutsi iba ngakanani injabulo ezulwini nangabe labo labonile baphendvuka! Babe wetfu losezulwini Jehova ujabula kakhulu njalo nje nangabe yinye yetimvu takhe letilahlekile ibuyela ebandleni. Simtsandza kakhulu Jehova nasichubeka sicabangisisa ngelutsandvo lwakhe, sihawu sakhe nemusa wakhe lomkhulu.​—Luk. 1:78.