Umphostoli Pawula wabhalela emaKhristu aseThesalonika watsi: “Nangabe kukhona longakulaleli loko lesikusho kulencwadzi, mcapheleni loyo muntfu.” (2 Thes. 3:14) Esikhatsini lesendlulile, besitsi lesicondziso sinikwa labadzala belibandla. Nangabe lotsite achubeka angatilaleli timiso teliBhayibheli ngisho nobe elulekwe kanyenti, labadzala belibandla bebangabeka inkhulumo yekucaphelisa libandla. Ngemuva kwaloko, ummemeteli ngamunye bekangeke asatihlanganisa nalona lokufanele acashelwe nakanesikhatsi lesimnandzi.

Nobe kunjalo, kudzingeke kwentiwe lushintjo. Nyalo sesiyacondza kutsi leseluleko saPawula sisho sincumo ummemeteli ngamunye ebandleni lokufanele asente kuye ngetimo letitsite. Ngako sekute sidzingo sekutsi labadzala babeke inkhulumo yekucaphelisa libandla. Lwentiwe leni lolushintjo? Ase sicoce kabanti ngaleseluleko saPawula.

Pawula wanaka kutsi labanye kulelibandla ‘bebaphila ngendlela lengakafaneli.’ Bebangasinaki seluleko lesiphefumulelwe. Naku labatjela kona ngesikhatsi abavakashele: “Nangabe umuntfu angafuni kusebenta, akangadli.” Nobe kunjalo, labanye bebachubeka bangafuni kusebenta kuze batinakekele, nanobe bebangakhona kwenta njalo. Ngetulu kwaloko, bebangena tindzaba tebantfu. EmaKhristu bekufanele abaphatse njani labantfu labaphila ngendlela lengakafaneli?​—2 Thes. 3:6, 10-12.

Pawula watsi: “Mcapheleni loyo muntfu.” Leligama lesiGriki lisho kunakisisa lomuntfu. Pawula bekaniketa lonkhe libandla leseluleko, hhayi nje labadzala belibandla kuphela. (2 Thes. 1:1; 3:6) Ngako umKhristu ngamunye nakwenteka abona umzalwane nobe dzadze angasinaki seluleko lesiphefumulelwe, bekangakhetsa ‘kuyekela kutihlanganisa’ naloyo lohamba ngendlela lengakafaneli.

Loku kusho kutsi lomuntfu bekufanele aphatfwe njengemuntfu losusiwe yini ebandleni? Cha, ngobe Pawula wengeta watsi: “Chubekani nimyala njengemzalwane.” Ngako emaKhristu bekatawuchubeka atihlanganisa nalona locaphelwako nakasemihlanganweni yelibandla nobe emsebentini wekushumayela, kodvwa bekatawukhetsa kungatihlanganisi naye nakanesikhatsi lesimnandzi nobe nakatijabulisa. Ngasiphi sizatfu? Pawula watsi: “Kuze abe nemahloni.” Loko bekungenta kutsi lomKhristu lophila ngendlela lengakafaneli atisole futsi ashintje tindlela takhe.​—2 Thes. 3:14, 15.

EmaKhristu angasisebentisa njani leseluleko lamuhla? Sifuna kucale siciniseke kutsi vele lomuntfu uphila “ngendlela lengakafaneli” yini njengobe Pawula achaza. Bekangakhulumi ngalabo labenta tintfo ngendlela leyehlukile kuneyetfu ngenca yanembeza nobe loko umuntfu latikhetsela kona. Bekangakakhulumi nangalabo labasivise buhlungu. Kunaloko, bekakhuluma ngalabo labakhetse kungasilaleli ngemabomu seluleko saNkulunkulu lesicacile.

Lamuhla, nangabe sibona kutsi umzalwane nobe dzadze uhamba ngendlela lengakafaneli, a sitatentela sincumo sekungatihlanganisi naye nasinesikhatsi lesimnandzi nalabanye nobe nasitijabulisa. Njengobe loku kusincumo semuntfu ngamunye, ngeke sikhulume ngako nalabo labangasiwo emalunga emindeni yetfu. Ngetulu kwaloko, sitawuchubeka sitihlanganisa naye emihlanganweni yelibandla nobe nasishumayela. Nasekakuyekele loko bekakwenta, sitawuphindze sitihlanganise naye nasinesikhatsi lesimnandzi nobe nasitijabulisa.