1. Kusisita ngani kucabangisisa ngesetsembiso saJehova sekuphila phakadze?

 JEHOVA wetsembisa kutsi labo labamlalelako ‘batawuphila phakadze.’ (Rom. 6:23) Nasicabangisisa ngaloku lasetsembisa kona, simtsandza kakhulu. Cabanga nje: Babe wetfu wasezulwini usitsandza kakhulu kangangekutsi angeke sehlukaniswe naye.

2. Sisisita njani setsembiso sekuphila phakadze?

² Setsembiso saNkulunkulu sekuphila phakadze sisisita kutsi sibeketelele tinkinga tetfu. Ngisho titsa tetfu tisisongela ngekufa, loko akusenti siyekele kukhonta Jehova. Leni? Lesinye sizatfu kutsi siyati kutsi nasifa setsembekile kuJehova, utasivusa ekufeni futsi sibe nelitsemba lekuphila phakadze. (Joh. 5:28, 29; 1 Khor. 15:55-58; Heb. 2:15) Yini lesenta siciniseke kutsi singaphila kuze kube phakadze? Cabanga nganati tizatfu letilandzelako.

3. Yini lesenta siciniseke kutsi Jehova angakhona kusenta siphile kuze kube phakadze? (Tihlabelelo 102:12, 24, 27)

³ Siyati kutsi Jehova angakhona kusenta siphile kuze kube phakadze ngobe unguMtfombo wekuphila futsi uphila kuze kube phakadze. (Hla. 36:9) Nawa lamanye emavesi lafakazela kutsi Jehova bekasolo akhona nekutsi utawuhlala akhona. Tihlabelelo 90:2 titsi Jehova ‘akanasicalo futsi akanasiphetfo.’ Tihlabelelo 102 nato tisho lokufanako. (Fundza Tihlabelelo 102:12, 24, 27.) Ngetulu kwaloko, umphrofethi Habakhuki wabhala ngaBabe wetfu wasezulwini watsi: “Awu Jehova, wena bewusolo ungekho yini kusukela endvulo? Awu Nkulunkulu wami, wena Longcwele wami, wena awufi.”​—Hab. 1:12.

4. Kufanele sikhatsateke yini nangabe singacondzi kutsi Jehova bekasolo akhona? Chaza.

 ⁴ Ukutfola kumatima yini kucondza kutsi Jehova bekasolo akhona “kuze kube phakadze”? (Isa. 40:28) Bantfu labanyenti bakutfola kumatima kukucondza loku. Naku Elihu lakusho ngaNkulunkulu: ‘Iminyaka yakhe angeke siyicondze.’ (Jobe 36:26) Kodvwa kungacondzi intfo letsite akusho kutsi ingemanga. Sibonelo nje, kusenekwenteka asicondzi kutsi kubakhona njani kukhanya, kodvwa loko kusho kutsi kute yini kukhanya? Cha! Ngendlela lefanako, kusenekwenteka tsine bantfu singacondzi kutsi kwenteka njani kutsi Jehova abekhona phakadze futsi achubeke akhona kuze kube phakadze. Kodvwa loko akusho kutsi Nkulunkulu akaphili kuze kube phakadze. Liciniso lelimayelana neMdali aliyi ngaloko lesikucondzako nobe lesingakucondzi. (Rom. 11:33-36) Ngetulu kwaloko, waba khona ngaphambi kwekutsi tibe khona letinye tintfo, lokufaka ekhatsi imitfombo yekukhanya, njengelilanga. Jehova uyasicinisekisa kutsi “wadala umhlaba ngemandla akhe,” nekutsi waba khona ngaphambi kwekutsi ‘endlale emazulu.’ (Jer. 51:15; Imis. 17:24) Ngusiphi lesinye sizatfu lesisenta siciniseke kutsi singaphila kuze kube phakadze?

5. Nguliphi litsemba bo-Adamu na-Eva bebanalo?

⁵ Tonkhe tintfo letiphilako letadalwa nguJehova emhlabeni betitawugcine tifile, ngaphandle kwebantfu. Wabanika litsemba lelihle lekungafi. Nobe kunjalo, Jehova wecwayisa Adamu watsi: “Ungasidli sitselo sesihlahla sekwati lokuhle nalokubi, ngobe mhlazana usidla, uyawukufa nekufa.” (Gen. 2:17) Kube bo-Adamu na-Eva balalela Jehova, bebangeke bafe. Kunengcondvo kucabanga kutsi ngekuhamba kwesikhatsi Jehova bekatawubavumela kutsi badle “esihlahleni sekuphila.” Loko bekutawubanika sicinisekiso sekutsi ‘batawuphila phakadze.’ b—Gen. 3:22.

6-7. (a) Yini lenye lekhombisa kutsi bantfu bebangakadalelwa kutsi bafe? (b) Yini intfo loyitsandzako lolangatelela kuyenta? (Buka titfombe.)

⁶ Labanye bososayensi batfole bufakazi bekutsi tingcondvo tetfu tingagcina imininingwane leminyenti kunaleyo leseyivele ikhona engcondvweni. Loko kumangalisa kakhulu! Nga-2010, lesinye sihloko lebesikulenye incwadzi letsi Scientific American Mind, satsi kulinganiselwa kutsi tingcondvo tetfu tingagcina imininingwane lengaba tigidzi letingu-2.5 tema-gigabytes, loku kulingana nemininingwane letfolakala eluhlelweni lwe-TV  lolurekhodiwe lolungatsatsa ema-awa latigidzi letingu-3 (ngetulu kweminyaka lengu-300). Kusenekwenteka kutsi tingcondvo tetfu tingagcina imininingwane lengetulu kwalena lelinganiselwako. Loku kukhombisa kutsi Jehova wenta tingcondvo tetfu kutsi tigcine imininingwane lengetulu kwaleyo lesiyitfola ngeminyaka lengu-70 nobe lengu-80.​—Hla. 90:10.

⁷ Jehova waphindze wadala bantfu baba nesifiso lesikhulu sikuchubeka baphila. LiBhayibheli nalikhuluma ngebantfu litsi Nkulunkulu “ufake . . . nebuphakadze etinhlitiyweni tabo.” (Shu. 3:11) Lesi ngulesinye sizatfu lesenta kufa kube sitsa setfu. (1 Khor. 15:26) Nasigula, sivele semukele lesimo yini futsi singenti lutfo? Cha. Sivame kuya kubodokotela futsi ngalesinye sikhatsi sinatse imitsi kuze selaphe lokugula. Ecinisweni, senta konkhe lesingakhona kukwenta kuze singafi. Ngetulu kwaloko, nakwenteka umuntfu lesimtsandzako ashona, ngisho amncane nobe amdzala, siva buhlungu lobukhulu futsi lobungasheshi kuphela. (Joh. 11:32, 33) Kusebaleni kutsi uMdali wetfu lositsandzako bekangeke asinike sifiso kanye nendlela yekuchubeka siphila kube bekungasiyo injongo yakhe kutsi bantfu baphile kuze kube phakadze. Kodvwa kunaletinye tizatfu letisenta setsembe kutsi singaphila kuze kube phakadze. Ase sicoce ngetintfo Jehova latenta esikhatsini lesendlulile nalatentako nyalo letikhombisa kutsi injongo yakhe yasekucaleni ayikashintji.

8. Ngusiphi sicinisekiso lesisitfola ku-Isaya 55:11 mayelana nenjongo yaJehova ngatsi?

⁸ Nanobe bo-Adamu na-Eva bona futsi baletsela bantfwana babo kufa, kodvwa Jehova  akazange ayishintje ingcondvo mayelana nenjongo yakhe. (Fundza Isaya 55:11.) Solo injongo yakhe ikutsi bantfu labetsembekile batfole kuphila lokuphakadze. Bufakazi baloko sibubona kuloko Jehova lakusho nalakwenta kuze afeze lenjongo yakhe.

9. Yini Nkulunkulu layetsembisile? (Danyela 12:2, 13)

⁹ Jehova wetsembisa kutsi utawuvusa labafile futsi abente baphile kuze kube phakadze. (Imis. 24:15; Thit. 1:1, 2) Jobe lebekayindvodza leyetsembekile bekaciniseka kutsi Jehova uyakulangatelela kuvusa labafile. (Jobe 14:14, 15) Umphrofethi Danyela bekati kutsi bantfu batawuvuswa ekufeni banelitsemba lekuphila kuze kube phakadze. (Hla. 37:29; fundza Danyela 12:2, 13.) EmaJuda lebekaphila ngesikhatsi saJesu nawo bekati kutsi Jehova utawunika bantfu bakhe labetsembekile “kuphila lokuphakadze.” (Luk. 10:25; 18:18) Jesu wakhuluma ngalesetsembiso tikhatsi letinyenti, futsi kwanaye wavuswa ekufeni nguBabe wakhe.—Mat. 19:29; 22:31, 32; Luk. 18:30; Joh. 11:25.

10. Kuvuswa kwebantfu ekufeni esikhatsini lesendlulile kufakazelani? (Buka sitfombe.)

¹⁰ Jehova unguMnikikuphila, futsi unemandla ekwenta bantfu kutsi baphindze baphile. Wanika umphrofethi Elija emandla ekuvusa indvodzana yemfelokati waseSarefathi. (1 Khos. 17:21-23) Ngekuhamba kwesikhatsi, asitwa nguNkulunkulu, umphrofethi Elisha wavusa indvodzana yemfati longumShunemu. (2 Khos. 4:18-20, 34-37) Loku kanye nalabanye labavuswa kuyakhombisa kutsi Jehova unemandla ekuvusa bantfu ekufeni. Ngesikhatsi Jesu alamhlabeni, wakhombisa kutsi Babe wakhe umnikete emandla ekukwenta loko. (Joh. 11:23-25, 43, 44) Nyalo Jesu usezulwini futsi unikwe “lonkhe ligunya ezulwini nasemhlabeni.” Ngako angakhona kufeza setsembiso sekutsi “bonkhe labasemathuneni” batawuvuswa ekufeni futsi babe nelitsemba lekuphila kuze kube phakadze.—Mat. 28:18; Joh. 5:25-29.

11. Inhlawulo yasivulela njani litfuba lekutfola kuphila lokuphakadze?

¹¹ Yini leyenta Jehova wavumela iNdvodzana yakhe layitsandzako kutsi ife kabuhlungu? Jesu waphendvula lombuto ngesikhatsi atsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Joh. 3:16) Ngesikhatsi anikela ngeNdvodzana yakhe kutsi ihlawulele kuphila kwetfu, Nkulunkulu wavula litfuba lekutsi sitfole kuphila lokuphakadze. (Mat. 20:28) Umphostoli Pawula wachaza lencenye lebalulekile yenjongo yaNkulunkulu ngesikhatsi abhala atsi: “Njengobe kufa kwavela ngemuntfu, nekuvuswa kwalabafile nako kuvela ngemuntfu. Njengobe ku-Adamu bonkhe bayafa, nakuKhristu bonkhe batawutfola kuphila.”—1 Khor. 15:21, 22.

12. UMbuso utayifeza njani injongo yaJehova ngatsi?

¹² Jesu wafundzisa balandzeli bakhe kutsi bathantazele uMbuso waNkulunkulu kutsi ute nekutsi intsandvo yaNkulunkulu yentiwe emhlabeni. (Mat. 6:9, 10) Incenye yenjongo yaNkulunkulu kutsi bantfu baphile emhlabeni kuze kube phakadze. Kuze ayifeze, Jehova ubeke iNdvodzana yakhe kutsi ibe yiNkhosi yeMbuso waMesiya. Nkulunkulu bekasolo ahlanganisa bantfu labavela emhlabeni labangu-144 000 labatawusebenta naJesu kuze bafeze injongo yakhe.​—Semb. 5:9, 10.

13. Yini Jehova layentako nyalo, futsi yini lokufanele uyente?

¹³ Nyalo Jehova uhlanganisa ndzawonye “sicumbi lesikhulu” sebantfu futsi uyasicecesha  kuze sikhone kuphila ngephansi kwekubusa kweMbuso wakhe. (Semb. 7:9, 10; Jak. 2:8) Nanobe lamuhla siphila eveni lelehlukaniswe kwesaba nemphi, kodvwa labantfu betama kamatima kucedza inzondo lokungenteka banayo. Bakhombisa ngetento kutsi bagucule tinkemba tabo batenta emakhuba. (Mik. 4:3) Kunekutsi labantfu baye etimphini letibulala bantfu labanyenti, basita bantfu kutsi batfole “kuphila lokungukonakona” ngekubafundzisa ngaNkulunkulu weliciniso nangetinjongo takhe. (1 Thim. 6:19) Emalunga emindeni yabo angahle abaphikise nobe babe netinkinga tetimali ngenca yekutsi basekela uMbuso waNkulunkulu, kodvwa Jehova uyabanika loko labakudzingako. (Mat. 6:25, 30-33; Luk. 18:29, 30) Loko kuyasicinisekisa kutsi uMbuso waNkulunkulu uyintfo mbamba nekutsi utawuchubeka ufeza injongo yaJehova.

14-15. Sitawugcwaliseka njani setsembiso saJehova sekucedza kufa?

¹⁴ Nyalo Jesu uyiNkhosi yeMbuso waNkulunkulu ezulwini futsi utatifeza tonkhe tetsembiso letentiwe nguJehova. (2 Khor. 1:20) Kusukela nga-1914, Jesu bekasolo ancoba titsa takhe. (Hla. 110:1, 2) Ngekushesha Jesu kanye nalabo latawubusa nabo batawucedzela lokuncoba futsi batawubhubhisa bonkhe bantfu lababi.—Semb. 6:2.

 ¹⁵ Ngesikhatsi Sekubusa KwaJesu Kweminyaka Leyinkhulungwane, bantfu labafile batawuvuswa futsi labalalelako batawentiwa babe bete sono. Ngemuva kweluvivinyo lwekugcina, labo Jehova latabatfola balungile “batawudla lifa lemhlaba, futsi bahlale kuwo kuze kube phakadze.” (Hla. 37:10, 11, 29) Sijabula kakhulu ngekutsi “sitsa sekugcina lesitawucedvwa, kufa.”​—1 Khor. 15:26.

16. Ngusiphi sizatfu lesihamba embili lokufanele sisente sifune kukhonta Jehova?

¹⁶ Njengobe sesibonile, litsemba letfu lekuphila phakadze lisekelwe eVini laNkulunkulu. Lelitsemba lingasisita kutsi sihlale setsembekile kulamalanga ekugcina lamatima. Kodvwa akusiso nje kuphela sifiso sekuphila phakadze lesisenta sifune kujabulisa Jehova. Sizatfu lesihamba embili sekuhlala setsembekile kuJehova nakuJesu kutsi sibatsandza kakhulu. (2 Khor. 5:14, 15) Lolutsandvo lusenta sibalingise futsi sicocele labanye ngelitsemba lesinalo. (Rom. 10:13-15) Njengobe sichubeka singaticabangeli tsine futsi sephane, Jehova utawufuna kuba bangani betfu kuze kube phakadze.​—Heb. 13:16.

17. Yini ngamunye wetfu lokufanela ayente? (Matewu 7:13, 14)

¹⁷ Sitawuba semkhatsini walabo labatawuphila kuze kube phakadze yini? Jehova usivulele lelo tfuba. Kukitsi kutsi sitawuchubeka yini sihamba ngendlela leya ekuphileni. (Fundza Matewu 7:13, 14.) Kutawuba njani kuphila nasesiphila phakadze? Esihlokweni lesilandzelako sitawucoca ngemphendvulo yalombuto.