1. Jehova uvame kuyiphendvula njani imithantazo yetinceku takhe?

 BEWATI yini kutsi Jehova angakusebentisa kuze aphendvule umthantazo walotsite? Ungabasita labanye ngisho ungulomdzala welibandla, uyinceku lesebentako, ulihlahlandlela nobe ungummemeteli. Ungaphindze ubasite labanye ngisho umncane, umdzala nobe ungumzalwane nobe dzadze. Nangabe lotsite lotsandza Jehova acela lusito kuye, Nkulunkulu wetfu uvame kusebentisa labadzala belibandla kanye naletinye tinceku letetsembekile kuze tibe ‘yindvudvuto lenkhulu’ kuloyo muntfu. (Khol. 4:11) Sijabula kakhulu ngekukhonta Jehova ngaleyo ndlela nangekusita bazalwane betfu! Loko singakhona kukwenta nangabe kubhedvuke sifo, nakunesehlakalo nobe nasiphatfwa kabi.

2. Yini lengenta kube matima kusita labanye nakubhedvuke sifo?

² Kubhedvuka kwesifo kungenta kutsi kube matima kutsi sisitane. Sibonelo nje, singafisa kuvakashela bangani betfu kodvwa utfole kutsi akukaphephi kwenta kanjalo. Kungenteka sifune kumema labo labanemali lencane kutsi batokudla natsi emakhaya etfu, kodvwa timo tingavumi. Singahle sifune kusita labanye, kodvwa loko kungaba matima nangabe emalunga emindeni yetfu nawo aludzinga lusito. Nanobe kunjalo, siyafuna kubasita bazalwane betfu nabodzadze futsi Jehova uyajabula nasenta konkhe lesingakwenta kuze sibasite. (Taga 3:27; 19:17) Singabasita njani?

3. Yini lesiyifundzako esibonelweni salabadzala labasebandleni lakulo Desi? (Jeremiya 23:4)

³ Loko lokungentiwa ngulabadzala belibandla. Nangabe ungulomdzala welibandla, wati kahle umhlambi. (Fundza Jeremiya  23:4.) Desi, lesikhulume ngaye esihlokweni lesendlulile utsi: “Labadzala belibandla labasecenjini lengikulo, bebahlale basebenta nami kanye nalabanye emsebentini wekushumayela futsi bebabanatsi nasitijabulisa.” b Loku kwenta kwaba melula ngalabelusi kutsi basite Desi ngemuva kwekubhedvuka kwe-COVID-19 nangemuva kwekulahlekelwa ngulamanye emalunga emndeni wakhe ngenca yalomkhuhlane.

4. Yini leyasita labadzala belibandla kutsi basite Desi, futsi sifundzani?

⁴ Desi utsi: “Kwabamelula kutsi ngibatjele indlela lengitiva ngayo naloko lokungikhatsatako ngenca yekutsi lalabadzala belibandla besengibatsatsa njengebangani bami.” Yini lefundvwa ngulabadzala belibandla? Yelusani umhlambi ngaphambi kwekutsi kuvele timo letimatima. Bani ngumngani wabo. Nangabe kunesifo lesibhedvukile lesikuvimbela kutsi ungakhoni kubonana nebazalwane bakho nabodzadze, chumana nabo ngaletinye tindlela. Desi utsi: “Ngalesinye sikhatsi, labadzala belibandla labehlukene bebangitfumelela imilayeto nobe bangishayele lucingo ngelilanga linye. Imibhalo labangitjela yona yangitsintsa ngisho nobe bengiyati kahle.”

5. Labadzala belibandla bangati njani kutsi yini bazalwane babo nabodzadze labayidzingako kuze babasite?

⁵ Lenye indlela longati ngayo kutsi yini bazalwane bakho nabodzadze labayidzingako, kubabuta imibuto lengeke ibahlaze. (Taga 20:5) Banako yini kudla lokwenele, imitsi kanye naletinye tintfo? Basengotini yekuphelelwa ngumsebenti yini nobe yekulahlekelwa ngemakhaya abo? Bayaludzinga yini lusito kuze bacele lusito kuhulumende? Bazalwane nabodzadze basita Desi ngetintfo bekatidzinga. Kodvwa lutsandvo lalukhonjiswa ngulabadzala belibandla kanye nesikhutsato labamniketa sona lesivela eBhayibhelini kwamsita kakhulu. Utsi: “Labadzala belibandla bathantaza nami, ngisho nobe ngingasakhumbuli kutsi yini labayisho emthantazweni kodvwa ngiyayikhumbula indlela lengitiva ngayo. Bekungatsi Jehova utsi: ‘Awusiwedvwa.’”​—Isa. 41:10, 13.

6. Yini labanye ebandleni labangayenta kuze basite labanye? (Buka sitfombe.)

⁶ Loko lokungentiwa ngulabanye. Silindzele kutsi labadzala belibandla bahambe embili ekunakekeleni bazalwane nabo nabodzadze ebandleni. Kodvwa Jehova ufuna kutsi sonkhe sibakhutsate labanye futsi sibasite. (Gal. 6:10) Ngisho nobe singentela logulako  intfo lencane, loko kungasho lukhulwini kuye. Umntfwana angatfumelela umzalwane likhadi nobe amdvwebele sitfombe. Losemusha angacela kuyotsengela dzadze tintfo latidzingako etitolo nobe amsite ngalokunye. Labanye ebandleni bangaphekela lotsite logulako futsi bammikisele ekhaya lakhe. Kodvwa nangabe kunesifo lesandza ngekushesha, bonkhe ebandleni bayakudzinga kukhutsatwa. Mhlawumbe ungahlala sikhashana kuze ucoce nebazalwane nabodzadze ngemuva kwemhlangano, kungaba seHholweni leMbuso nobe ngetebuchwephesha. Labadzala belibandla nabo bayakudzinga kukhutsatwa. Labanye boFakazi batfumelele labadzala belibandla imilayeto yekubabonga njengobe bavame kuba matasa kakhulu nakubhedvuke sifo. Sijabula kakhulu ‘nasichubeka sikhutsatana futsi sakhana’!​—1 Thes. 5:11.

7. Nguyiphi inkinga lengabakhona nakuvele sehlakalo?

⁷ Sehlakalo singakushintja kuphila kwemuntfu ngekucwabita kweliso. Labanye bantfu bangalahlekelwa tintfo tabo, ngemakhaya abo, nobe bashonelwa bantfu lababatsandzako. Letintfo letibuhlungu tiyenteka nakubazalwane betfu nabodzadze. Yini lesingayenta kuze sibasite?

8. Yini labadzala belibandla netinhloko temindeni labangayenta ngaphambi kwekutsi kuvele sehlakalo?

⁸ Loko lokungentiwa ngulabadzala belibandla. Nine labadzala balibandla, sitani bazalwane benu nabodzadze kutsi bakulungele kuvela kwesehlakalo. Cinisekani kutsi bonkhe ebandleni bayati kutsi yini lokufanele bayente kuze bahlale baphephile nekutsi bangachumana kanjani nani. Margaret, lesikhulume ngaye esihlokweni lesendlulile utsi: “Labadzala belibandla balungiselela inkhulumo yetidzingo telibandla, basecwayisa ngekutsi solo asekhona ematfuba ekutsi kube nemlilo wesiganga. Batsi nangabe tiphatsimandla titsi kufanele sihambe lasihlala khona, nobe nasibona kutsi kuyingoti kuchubeka sihleti, kufanele sihambe ngekushesha.” Lesecwayiso sefika ngesikhatsi ngobe ngemuva kwemaviki lasihlanu kwaba nemlilo wesiganga. Ngesikhatsi sekukhonta kwemndeni, tinhloko temindeni kufanele ticoce ngekutsi yini lilunga ngalinye lemndeni lokufanele liyente. Nangabe wena nebantfwana bakho nitilungiselele, nitawukhona kuhlala nehlise umoya nakuvela sehlakalo.

9. Yini labadzala belibandla labangayenta ngaphambi kwekutsi kube nesehlakalo nangemuva kwaso?

⁹ Nangabe ungumbonisi welicembu, ungalindzi kuze kuvele sehlakalo ngaphambi kwekutsi ucele imininingwane yakamuva yabo bonkhe labasecenjini lokulo. Yakha luhla futsi uhlale uhlola kutsi lisesimeni lesikahle yini. Nakuvela sehlakalo, utawukhona kuchumana nemmemeteli ngamunye futsi ubone kutsi yini layidzingako. Tfumelela lemininingwane ngekushesha kumchumanisi wesigungu salabadzala, yena utawubese uchumana nembonisi wesigodzi. Nangabe labazalwane babambisene, bangakhona kufeza lokunyenti. Ngemuva kwalomlilo, umbonisi wesigodzi waboMargaret, akazange abutsi hlutfu kwaze kwaphela ema-awa langu-36. Bekamatasa ahlela umsebenti walabadzala ngesikhatsi bona betama kuchumana nebazalwane nabodzadze labangu-450 lebebashiye emakhaya abo futsi babanakekela. (2 Khor. 11:27) Ngako bonkhe labo bebadzinga indzawo yekuhlala bayitfola.

10. Yini leyenta kubaluleke kutsi labadzala belibandla beluse umhlambi? (Johane 21:15)

¹⁰ Labadzala belibandla banemsebenti wekuniketa bazalwane nabodzadze sikhutsato lesivela eBhayibhelini futsi basite nalabo labacindzetelekile. (1 Phet. 5:2) Nakunesehlakalo, kufanele baciniseke kutsi umzalwane nobe dzadze ngamunye uphephile, unekudla nekwekwembatsa kanye nendzawo yekufihla inhloko.  Kodvwa ngemuva kwetinyanga, labazalwane batawube solo basidzinga sikhutsato lesivela eBhayibhelini. (Fundza Johane 21:15.) Harold, lolilunga leKomidi Yeligatja, losekabonene nebazalwane nabodzadze labanyenti labehlelwe tehlakalo utsi: “Kutsatsa sikhatsi kutsi babuyele esimeni. Bangahle bacale kwemukela simo, kodvwa kungenteka bakhumbule labo lababatsandzako labashone kulesehlakalo, tintfo tabo letiligugu letibalahlekele nobe bakhumbule kutsi basindze ngekulambisa. Loko kungabenta baphindze beve buhlungu, futsi akusho kutsi bete kukholwa kodvwa kukhombisa kutsi babantfu.”

11. Yini lokungenteka imindeni ihlale iyidzinga?

¹¹ Labadzala belibandla bayasisebentisa seluleko lesitsi: “Nikhale nalabakhalako.” (Rom. 12:15) Labo labasindze nakube nesehlakalo bangahle badzinge kucinisekiswa ngekutsi Jehova usabatsandza nekutsi bazalwane babo nabodzadze nabo basabatsandza. Labadzala belibandla batawusita imindeni kutsi ichubeke neluhlelo lwayo lwekukhonta Nkulunkulu njengekuthantaza, kudadisha, kuya emihlanganweni kanye nekushumayela. Labadzala belibandla kutawudzingeka nekutsi bakhutsate batali kutsi basite bantfwana babo banake tintfo letingeke tiphele ngisho kunesehlakalo. Batali, khumbutani bantfwana benu kutsi Jehova utawuhlale anguMngani wabo nekutsi angeke abashiye. Bachazeleni kutsi batawuhlale banebazalwane nabodzadze emhlabeni wonkhe labahlale bakulungele kubasita.​—1 Phet. 2:17.

12. Yini labanye labangayenta kuze basite lapho bekunesehlakalo khona? (Buka sitfombe.)

¹² Loko lokungentiwa ngulabanye. Nangabe kuvela sehlakalo lawuhlala ngakhona, buta labadzala belibandla kutsi ungasita njani. Mhlawumbe ungavula likhaya lakho kuze kutohlala labo labehlelwe sehlakalo nobe labo labete kutawusita. Ungamikisela bamemeteli labadzinga lusito kudla kanye netintfo labatidzingako. Nangabe kuba nesehlakalo endzaweni lekhashane, usengakhona kusita. Kanjani? Ngekutsi ubathantazele labo labatsintsekile. (2 Khor. 1:8-11) Ungawusekela lomsebenti wekusita ngekutsi unikelele umsebenti wemhlaba wonkhe. (2 Khor. 8:2-5) Nangabe ungakhona kuya lapho kwenteke khona lesehlakalo, buta labadzala belibandla kutsi ungavolontiya yini. Nangabe ucelwa kutsi uyosita, kungenteka uceceshwe kuze ukhone kuyosita lawudzingeka khona.

13. Ngutiphi tinkinga bazalwane lababhekana nato emaveni lapho uvinjelwe khona umsebenti wetfu?

¹³ Emaveni lapho umsebenti wetfu uvinjelwe khona, kuphatfwa kabi kwenta kube matima kuphila. Bazalwane labakulawo mave nabo baba netinkinga tetimali, bayagula futsi bashonelwa bantfu lababatsandzako. Kodvwa ngenca yalokuvinjelwa, kusenekwenteka labadzala belibandla bangakhoni kubavakashela nobe kukhuluma nabo ngalokukhululekile labo labadzinga kukhutsatwa. Nguloko lokwenteka ku-Andrei, lesikhulume ngaye esihlokweni lesendlulile. Lomunye dzadze lebekanaye ecenjini lensimu bekanetinkinga tetimali. Ngemuva kwaloko lodzadze watfola ingoti yemoto. Kwadzingeka ahlindvwe, futsi bekangakhoni kusebenta. Nanobe umsebenti wetfu bewuvinjelwe futsi kunalomkhuhlane, bazalwane benta konkhe labangakwenta kuze bamsite, futsi Jehova bekabukile.

14. Labadzala belibandla bangasibekela njani sibonelo sekwetsembela kuJehova?

¹⁴ Loko lokungentiwa ngulabadzala belibandla. Andrei wathantaza futsi wenta konkhe lebekangakhona kukwenta. Yini Jehova layenta? Wasebentisa labanye ebandleni lebebangakhona kusita lodzadze. Labanye bammikisa esibhedlela. Labanye bamupha imali. Jehova wenta kutsi bente konkhe labangakhona kukwenta futsi wababusisa ngebunye babo nangesibindzi lebebasikhombisa. (Heb. 13:16) Nine labadzala belibandla, nangabe umsebenti wetfu uvinjelwe, celani labanye kutsi banisite. (Jer. 36:5, 6) Ngetulu kwaloko, tsembelani kuJehova. Anganisita kutsi ninakekele bazalwane betfu nabodzadze.

15. Yini lesingayenta kuze sihlale sinebunye nangabe umsebenti wetfu uvinjelwe?

¹⁵ Loko lokungentiwa ngulabanye. Nangabe umsebenti wetfu uvinjelwe, kungahle kudzingeke kutsi sibe ngemacembu lamancane. Ngako kubaluleke kakhulu kutsi sibe nekuthula nalabanye. Lwanini naSathane, ningalwi nodvwa. Yengcisani emaphutsa ebazalwane benu nabodzadze futsi nilungise kungevani ngekushesha. (Taga 19:11; Ef. 4:26) Hlalani nikulungele kusitana. (Thit. 3:14) Loko labanye labakwenta kuze basite lodzadze, kwalisita lelicembu. Lasondzelana laba ngumndeni.​—Hla. 133:1.

16. Ngekuvumelana nembhalo waKubaseKholose 4:3, 18, singabasita njani bazalwane betfu nabodzadze labaphatfwa kabi?

¹⁶ Tinkhulungwane tebazalwane betfu nabodzadze tikhonta Jehova ngisho nobe tivinjelwe  bohulumende. Labanye babo baboshiwe ngenca yekukholwa kwabo. Singabathantazela bona nemindeni yabo, sithantazele nalabo labatibeka engotini yekuboshwa kuze babasite ngetintfo letitawucinisa kukholwa kwabo, ngetintfo labatidzingako futsi babasekele nabasenkantolo. c (Fundza KubaseKholose 4:3, 18.) Ungakhohlwa kutsi imithantazo yakho ingabasita bonkhe labazalwane nabodzadze!​—2 Thes. 3:1, 2; 1 Thim. 2:1, 2.

17. Yini longayenta nyalo kuze ukulungele kuphatfwa kabi?

¹⁷ Wena nemndeni wakho ningakulungela nyalo kuphatfwa kabi. (Imis. 14:22) Ningetami kucabanga ngetintfo letimbi letingahle tenteke. Kunaloko, cinisa buhlobo bakho naJehova futsi usite bantfwana bakho kutsi nabo bente lokufanako. Nangabe utiva ukhatsateka, tjela Nkulunkulu indlela lotiva ngayo. (Hla. 62:7, 8) Cocani ngetizatfu letinenta nimetsembe Jehova. d Njengobe kubasita bantfwana bakho kulungiselela sehlakalo, kutawubasita nekulungiselela kuphatfwa kabi, batawuba nesibindzi futsi babe nekuthula ngenca yekutsi ubafundzisile kutsi betsembele kuJehova.

18. Nguliphi likusasa lelisembikwetfu?

¹⁸ Kuthula kwaNkulunkulu kusenta sitive sivikelekile. (Fil. 4:6, 7) Jehova usebentisa kona kuze sehlise umoya nakubhedvuka tifo, nakunetehlakalo nalapho siphatfwa kabi. Uphindze asebentise labadzala belibandla labasebenta kamatima kuze baseluse. Usinika nelitfuba lelihle lekutsi sisitane. Lokuthula lesinako nyalo kutasisita kutsi sikhone kubhekana netinkinga letiseta, lokufaka ekhatsi ‘kuhlupheka lokukhulu.’ (Mat. 24:21) Ngaleso sikhatsi, kutawudzingeka kutsi sihlale sinekuthula, futsi sisite labanye kutsi nabo bente lokufanako. Ngemuva kwaloko, angeke siphindze sibe netinkinga letitawusenta sikhatsateke. Sitawuba nekuthula mbamba lokutawuhlala kuze kube phakadze, njengobe nguloko Jehova bekasolo asifunela kona.​—Isa. 26:3, 4.