Ukulungele Yini ‘Kudla Lifa Lemhlaba’?
SONKHE sikubuke ngalabovu kugcwaliseka kwesetsembiso saJesu lesitsi: “Bayajabula labo labanemoya lophansi, ngobe batawudla lifa lemhlaba.” (Mat. 5:5) Labagcotjiwe batawudla lifa lemhlaba ngekubusa naJesu ezulwini. (Semb. 5:10; 20:6) EmaKhristu eliciniso lamanyenti ayakulangatelela kudla lifa lemhlaba futsi ahlale kuwo kuze kube phakadze sekete sono, ahlale ngekuthula futsi ajabulile. Kuze loko kwenteke, kufanele ente nati tintfo letibalulekile. Cabanga nganaku lokutsatfu: batawenta umhlaba ube lipharadisi, baciniseke kutsi labo labavusiwe banaloko labakudzingako futsi babafundzise. Cabanga ngekutsi yini longayenta kwanyalo kuze ukhombise kutsi uyafuna kutenta letintfo eveni lelisha.
UKULUNGELE YINI KWENTA LOMHLABA UBE LIPHARADISI?
Ngesikhatsi Jehova ayala bantfu kutsi ‘bagcwale emhlabeni futsi bawuncobe,’ bekaveta kutsi umhlaba utawugcine ulipharadisi. (Gen. 1:28) Labo labatawuphila phakadze kufanele bawulalele lomyalo. Lomhlaba utawube ungasilo lipharadisi ngobe sekute insimu yase-Edeni. Kutawuba nemsebenti lomnyenti wekuhlanta tindzawo letonakele nyalo. Lona kutawuba ngumsebenti lomkhulu kakhulu!
Loku kusikhumbuta ngemsebenti lebekufanele wentiwe ngema-Israyeli nakabuya eBhabhulona. Besekuphele iminyaka lengu-70 kungahlali muntfu eveni lawo. Kodvwa Isaya watsi Jehova bekatawasita kuze aphindze alivusetele. Lesiphrofetho satsi: “Utakwenta lihlane layo lifanane ne-Edeni lugwadvule lwayo lube njengengadze yaJehova.” (Isa. 51:3) Ema-Israyeli aphumelela kukwenta loku. Ngendlela lefanako, ngekusitwa nguJehova, labo labatawudla lifa lemhlaba batawukhona kuwenta ube lipharadisi. Kwanyalo ungakhombisa kutsi uyafisa kuwenta lomsebenti.
Lenye indlela longakwenta ngayo loko kutsi ugcine likhaya lakho lihlantekile futsi lihlelekile. Loku ungakwenta ngisho nobe bomakhelwane bakho bangakwenti. Ungasita nasekuhlanteni liHholwa leMbuso neliHholwa leMhlangano futsi ukugcine kusesimeni lesikahle. Nangabe timo takho tikuvumela, ungafaka lifomu lekuvolontiya kuze usite nakuvele tehlakalo. Nawenta njalo, utawube uyakhombisa kutsi ukulungele kusita nakuvela sidzingo. Tibute: ‘Ngingalifundza yini likhono lengingalisebentisa nangabe Jehova atangivumela kutsi ngiphile phakadze emhlabeni?’
UKULUNGELE YINI KUSITA LABO LABATAWUVUSWA?
Ngekushesha nje ngemuva kwekutsi Jesu sekavuse indvodzakati yaJayiru, watsi ayinikwe kudla. (Mak. 5:42, 43) Kungenteka bekungasiwo umsebenti lomatima kunakekela lentfombatanyana lebeyineminyaka lengu-12. Kodvwa cabanga ngemsebenti lokufanele wentiwe ngemuva kwekutsi Jesu sekafeze setsembiso sakhe lesitsi: “Bonkhe labasemathuneni batawuliva livi layo futsi baphume.” (Joh. 5:28, 29) Nanobe liBhayibheli lingasitjeli imininingwane leminyenti ngalendzaba, kusebaleni kutsi labo labatawuvuswa batawudzinga lusito kuze batfole kudla, indzawo yekuhlala nekwekwembatsa. Ungakhombisa yini kwanyalo kutsi uyafuna kusita? Nayi imibuto lokufanele sitibute yona.
Yini longayenta nyalo kuze ukhombise kutsi ukulungele kudla lifa lemhlaba?
Nakwentiwa simemetelo ebandleni lokulo sekutsi nitawuvakashelwa ngumbonisi wesigodzi, uyammema yini kutsi atodla nani ekhaya? Nangabe tisebenti taseBethel tinikwa sabelo lesisha sekuya ensimini, nobe nangabe umbonisi wesigodzi ayekela umsebenti wakhe, ungabasita yini kutsi batfole indzawo yekuhlala? Nangabe endzaweni yangakini kutawuba nemhlangano wesifundza nobe lokhetsekile, ungavolontiya yini kusebenta ngaphambi kwemhlangano nobe ngemuva kwawo nobe ngekwemukela tivakashi letitawube tikulomhlangano letibuya kulamanye emave?
UKULUNGELE YINI KUFUNDZISA LABO LABATAWUVUSWA?
Ngekuvumelana neMisebenti 24:15, silindzele kutsi kuvuswe tigidzigidzi tebantfu. Labanyenti babo kutawuba ngulabo labangazange balitfole litfuba lekufundza ngaJehova. Ngako batalitfola lelitfuba lekufundza ngaye nasebavusiwe. a Bantfu baJehova labetsembekile batawenta lomsebenti. (Isa. 11:9) Charlotte, loke washumayela eYurophu, eSouth America nase-Africa, ukubuke ngalabovu kwenta lomsebenti. Utsi: “Ngiyakulangatelela kufundzisa bantfu labavusiwe. Nangifundza ngalotsite lobekaphila esikhatsini lesendlulile, ngivame kucabanga ngitsi: ‘Kube lomuntfu bekamati Jehova, kuphila kwakhe ngabe kwehluka kakhulu.’ Ngikujakile kutjela labo labatawuvuswa ngaJehova nekutsi kuphila kwabo kungaba ncono kangakanani nabangamkhonta.”
Ngisho nebantfu baJehova labetsembekile labaphila ngaphambi kwekutsi Jesu ete emhlabeni kutawudzingeka bafundze lokunyenti. Cabanga nje kutsi kutawujabulisa kangakanani kuchazela Danyela ngekugcwaliseka kwetiphrofetho latibhala kodvwa lebekangaticondzi. (Dan. 12:8) Kutawujabulisa nekufundzisa Ruthe naNawomi kutsi umndeni wabo bewuseluhlwini lwekutalwa kwaMesiya. Kutawuba mnandzi kwenta lomsebenti wekufundzisa lotawentiwa emhlabeni wonkhe, sekute kucindzetelwa ngulelive lelibi nekuphazanyiswa ngilo!
Yini longayenta kuze ukhombise kutsi ukulungele kwenta lomsebenti wekufundzisa? Lenye indlela kutsi wetame kutfutfukisa emakhono akho ekufundzisa nekutsi uwente njalo lomsebenti wekushumayela. (Mat. 24:14) Ngisho nobe ungakhoni kwenta loko lofisa kukwenta nyalo ngenca yeminyaka yakho nobe ngenca yaletinye tizatfu, imetamo yakho ingakhombisa kutsi ukulungele kufundzisa labo labatawuvuswa.
Kuhle kucabanga nganayi imibuto lebalulekile: Ukubuke ngalabovu yini kudla lifa lemhlaba? Uyajabula yini nawucabanga kutsi kungenteka usifake sandla ekwenteni lomhlaba ube lipharadisi, usite labatawuvuswa kutsi batfole tintfo labatatidzinga futsi ubafundzise? Ungakhombisa kutsi ukulungele kukwenta loko ngekutsi wente imisebenti lefana naleyo lotawuyenta nasewudla lifa lemhlaba!
a Buka sihloko lesitsi, ‘Basita Bantfu Labanyenti Kutsi Babe Ngulabalungile’ ku-Sicongosekulindza saSeptember 2022.
