1. Kuyini “kuthula kwaNkulunkulu,” futsi kusisita ngani? (KubaseFiliphi 4:6, 7)

 KUNELUHLOBO lwekuthula bantfu balelive labangalwati. “Kuthula kwaNkulunkulu,” lokukuthula lesibanako nasinebuhlobo lobuhle naBabe wetfu wasezulwini. Nasinekuthula kwaNkulunkulu, sitiva sivikelekile. (Fundza KubaseFiliphi 4:6, 7.) Siba nebuhlobo lobuhle nalabo labamtsandzako. Ngetulu kwaloko, siba nebuhlobo lobuhle ‘naNkulunkulu wekuthula.’ (1 Thes. 5:23) Nasimati Babe wetfu, simetsemba futsi simlalela, kuthula kwaNkulunkulu kungasenta singakhatsateki kakhulu nasibhekene nesimo lesimatima.

2. Yini lesenta siciniseke kutsi singaba nekuthula kwaNkulunkulu?

² Kungenteka yini vele kutsi sibe nekuthula kwaNkulunkulu nasibhekene netinkinga, njenganakubhedvuka sifo, nakunesehlakalo, nakunebudlwangudlwangu nobe nasiphatfwa kabi? Letinkinga tingasenta sesabe. Nobe kunjalo, Jesu wayala balandzeli bakhe watsi: “Tinhlitiyo tenu atingakhatsateki futsi ningesabi.” (Joh. 14:27) Siyajabula ngekutsi bazalwane betfu nabodzadze basilalele leseluleko saJesu. Basitwa nguJehova, bakhonile kuba nekuthula lokuvela kuye nababeketelela tinkinga letimatima.

3. Kubhedvuka kwesifo kungakuphatamisa njani kuthula kwetfu?

³ Kubhedvuka kwesifo kungashintja kuphila kwetfu ngekucwabita kweliso. Cabanga ngendlela i-COVID-19 leyabatsintsa ngayo labanyenti. Lolunye luhlolo lutsi bantfu labanyenti bebangasakhoni kulala ngesikhatsi kunalesifo. Ngenca yekubhedvuka kwalesifo, labanye bahlaselwa kukhatsateka kakhulu, kucindzeteleka, basebentisa kabi tjwala netidzakamiva, kwaba nekuhlukumeteka emakhaya kantsi labanye betama kutibulala. Nakwenteka kubhedvuka sifo lawuhlala khona, yini longayenta  kuze ungakhatsateki kakhulu futsi ube nekuthula kwaNkulunkulu?

4. Kwati siphrofetho saJesu lesimayelana nemalanga ekugcina kusisita njani kutsi sibe nekuthula?

⁴ Jesu watsi ngemalanga ekugcina kutawuba netifo letingumshayabhuce, nobe tifo letitsatselwanako “etindzaweni letehlukahlukene.” (Luk. 21:11) Kukwati loko kusisita njani kutsi sibe nekuthula? Asimangali nasibona kubhedvuka tifo. Siyabona kutsi kwenteka kona kanye loko Jesu latsi kutawenteka. Ngako sitawulalela seluleko Jesu lasinika labo labaphila emalangeni ekugcina lesitsi: “Akukafaneli nesabe.”—Mat. 24:6.

5. (a) Ngekuvumelana nembhalo waKubaseFiliphi 4:8, 9, yini lokufanele siyithantazele nakubhedvuka sifo? (b) Kungakusita njani kulalela kufundvwa kweliBhayibheli lokurekhodiwe?

⁵ Kubhedvuka kwesifo kungasenta kutsi sikhatsateke kakhulu futsi sesabe. Nguloko lokwenteka kulomunye dzadze lokutsiwa nguDesi. b Ngemuva kwekutsi malume wakhe, umzala wakhe nadokotela wakhe babulawe yi-COVID-19, bekesaba kutsi naye angahle awutfole lomkhuhlane futsi awutselele make wakhe losakhulile. Bekangahle aphelelwe ngumsebenti ngenca yalomkhuhlane, ngako bekavame kukhatsateka ngekutsi utakutsenga ngani kudla nekutsi utayibhadala ngani i-rent. Bekakhatsateke kakhulu kangangekutsi bekangasakhoni ngisho nekulala. Kodvwa Desi waphindze waba nekuthula. Yini leyamsita? Wathantaza ngalokucondzile kutsi Jehova amsite ehlise umoya futsi acabange tintfo letikahle. (Fundza KubaseFiliphi 4:8, 9.) Walalela Jehova ‘nakakhuluma’ naye ngekutsi alalele kufundvwa kweliBhayibheli lokurekhodiwe. Utsi: “Emavi lapholile alabo labafundza liBhayibheli angenta ngangasakhatsateki kakhulu futsi angikhumbuta kutsi Jehova unemusa.”​—Hla. 94:19.

6. Kungakusita njani kutidadishela liBhayibheli nekuba khona emihlanganweni yelibandla?

⁶ Kungenteka kubhedvuka kwesifo kwente ungasakhoni kutenta kahle tonkhe letinye tintfo bewutenta, kodvwa ungakuvumeli kuphatamise luhlelo lwakho lwekutidadishela liBhayibheli nobe lwekubakhona emihlanganweni yelibandla. Tindzaba letenteke mbamba letitfolakala etincwadzini tetfu nakuma-video titakukhumbuta kutsi bazalwane bakho nabodzadze bayachubeka bakhonta Jehova ngekwetsembeka ngisho babhekene netimo letifana netakho. (1 Phet. 5:9) Imihlangano yelibandla itakusita kutsi ucabange tintfo letakhako letisekelwe eBhayibhelini. Itawuphindze ikunike litfuba lekukhutsata labanye nelekutsi nawe ukhutsatwe. (Rom. 1:11, 12) Nawucabanga ngendlela Jehova  labasite ngayo bantfu bakhe nabagula, nabesaba nobe nabativa babodvwa, kukholwa kwakho kutawucina futsi utawuciniseka kutsi nawe utakusita.

7. Ngusiphi sifundvo longasifundza kumphostoli Johane?

⁷ Yetama kukhuluma nebazalwane bakho nabodzadze. Kubhedvuka kwesifo kungahle kudzinge kutsi ukhweshelane nalabanye libanga lelitsite, ngisho unebazalwane bakho nabodzadze. Esimeni lesikanjalo, ungahle utive ngendlela umphostoli Johane lativa ngayo. Bekafuna kubona umngani wakhe Gayusi buso nebuso. (3 Joh. 13, 14) Kodvwa Johane wabona kutsi bekutawuphela sikhatsi lesitsite angakhoni kumbona. Ngako wenta lebekangakhona kukwenta; wabhalela Gayusi incwadzi. Nangabe ungakhoni kuvakashela bazalwane bakho nabodzadze, yetama kubashayela lucingo, kucoca nabo nge-video nobe kubatfumelela umlayeto ngelucingo. Nawuchumana nebazalwane bakho nabodzadze, utawutiva ungasiwedvwa futsi unekuthula. Nawukhatsatekile, khuluma nalabadzala belibandla futsi uvume bakukhutsate.​—Isa. 32:1, 2.

8. Sehlakalo singakuphazamisa njani kuthula kwakho?

⁸ Nangabe uke wabhekana nesikhukhula, kutamatama kwemhlaba nobe umlilo, kungenteka kwaphela sikhatsi lesidze ukhatsatekile ngemuva kwalesehlakalo. Nangabe washonelwa bantfu lobatsandzako nobe walahlekelwa tintfo takho, kusenekwenteka weva buhlungu lobukhulu, wativa ute litsemba nobe utfukutsele. Loku akusho kutsi utsandza kakhulu tintfo nobe ute kukholwa. Wabhekana nenkinga lematima, futsi kusenekwenteka labanye bebalindzele kutsi ube nemicabango lemibi. (Jobe 1:11) Kodvwa ngisho ubhekene nesimo lesicindzetelako, ungaba nekuthula. Kanjani?

9. Yini Jesu layisho kuze silungele kubhekana netehlakalo?

⁹ Khumbula siphrofetho saJesu. Ngalokungafani nebantfu bakulelive labangacabangi kutsi bangahle behlelwe tehlakalo, tsine silindzele kutsi tehlakalo tiye ngekwandza futsi letinye titasitsintsa. Jesu watjela balandzeli bakhe kutsi kutawuba ‘nekutamatama lokukhulu kwemhlaba,’ kanye naletinye tehlakalo ngaphambi kwekutsi kufike kuphela. (Luk. 21:11) Waphindze wakhuluma ngekutsi ‘kutawandza bubi,’ futsi loko kuyenteka njengobe sibona bugebengu, budlova kanye nekuhlasela kwetidlamlilo. (Mat. 24:12) Jesu akazange atsi letintfo titawehlela kuphela labo labashiywe nguJehova. Ecinisweni, linyenti lebantfu baJehova labetsembekile libhekene netehlakalo. (Isa. 57:1; 2 Khor. 11:25) Jehova angeke asivikele ngalokusimangaliso kuto tonkhe tehlakalo, kodvwa utasinika nobe yini lesiyidzingako kuze sihlale sehlise umoya futsi sinekuthula.

10. Sisho ngani kutsi sikhombisa kutsi sinekukholwa nasitilungiselela sehlakalo sisengakenteki? (Taga 22:3)

¹⁰ Sitakutfola kumelula kuhlale sehlise umoya nakuvela simo lesiphutfumako nangabe sitilungiselele kusenesikhatsi ngaphambi kwekutsi senteke. Kutilungiselela sehlakalo kusho kutsi asimetsembi yini Jehova? Cha. Ecinisweni, kutilungiselela sehlakalo kukhombisa kutsi siyetsemba kutsi Jehova utasinakekela. Kanjani? LiVi laNkulunkulu lisikhutsata kutsi sitilungiselele tehlakalo letingahle tenteke. (Fundza Taga 22:3.) Inhlangano yaNkulunkulu isikhutsata tikhatsi letinyenti isebentisa bomagazini, imihlangano yelibandla kanye netimemetelo letifika ngesikhatsi kutsi sitilungiselele timo letiphutfumako. c Siyametsemba yini Jehova? Nangabe simetsemba, sitasilalela  nyalo seluleko, ngaphambi kwekutsi kugadle sehlakalo.

11. Yini loyifundza esibonelweni saMargaret?

¹¹ Cabanga ngalokwenteka kulomunye dzadze lokutsiwa nguMargaret. Tiphatsimandla tamtjela kutsi abaleke ekhaya lakhe ngobe bekunemlilo kulendzawo. Ngenca yekutsi bebabanyenti bantfu lebebabaleka ngasikhatsi sinye, umgwaco wavaleka futsi timoto tema. Besekugcwele intfutfu esibhakabhakeni, futsi Margaret bekasolo asemotweni yakhe. Nobe kunjalo, wasindza ngobe bekatilungiselele. Esikhwameni sakhe bekunelibalave langalisebentisa kuze atfole lomunye umgwaco langahamba ngawo. Bekake wahamba ngawo kuze kube melula kuhamba ngawo nakuvela simo lesiphutfumako. Margaret wasindza ngenca yekutsi bekatilungiselele.

12. Yini leyenta silalele ticondziso letimayelana nekuphepha?

¹² Kuze tiphatsimandla tisivikele futsi tente kube nekuhleleka, tingahle tisicele kutsi silalele imitsetfo yekutsi singahambi ngesikhatsi lesitsite nobe sibaleke emakhaya etfu nobe silalele leminye imitsetfo. Labanye bantfu bayephuta kulalela nobe bahudvule tinyawo ngenca yekutsi abafuni kushiya tintfo tabo. Enta njani emaKhristu? LiBhayibheli litsi: “Ngenca yeNkhosi, titfobeni kubo bonkhe labasetikhundleni, kungaba senkhosini njengobe iphakeme, nobe kubabusi njengobe ibatfumile.” (1 Phet. 2:13, 14) Ngetulu kwaloko, inhlangano yaNkulunkulu isiniketa ticondziso kuze isivikele. Sihlale sikhunjutwa kutsi sinike labadzala belibandla imininingwane yetfu yakamuva kuze batawukhona kuchumana natsi nakuvela simo lesiphutfumako. Sewukwentile yini loko? Singahle sitfole sicondziso mayelana nekuhlala emakhaya singaphumi, nekubaleka emakhaya etfu, nangendlela yekutfola tintfo lesitidzingako nobe letimayelana nekutsi singabasita njani labanye nekutsi nini. Nangabe singalaleli, singabeka kuphila kwetfu nekwalabadzala belibandla engotini. Khumbula kutsi lamadvodza letsembekile ayasinakekela. (Heb. 13:17) Margaret utsi: “Ngabona kutsi kulalela sicondziso salabadzala belibandla nalesisinikwa yinhlangano kwasindzisa kuphila kwami.”

13. Yini leyenta emaKhristu lamanyenti lashiye emakhaya awo kutsi ajabule futsi abe nekuthula?

¹³ Bazalwane labanyenti nabodzadze labashiye emakhaya abo ngenca yesahlakalo nobe imphi nobe budlwangudlwangu, bente  konkhe labangakhona kukwenta kuze bavumelane nesimo lesisha futsi benta umsebenti waNkulunkulu bangaphotisi maseko. NjengemaKhristu ekucala lahlakateka etindzaweni letehlukahlukene ngenca yekuphatfwa kabi, nabo “bashumayela tindzaba letimnandzi telivi laNkulunkulu.” (Imis. 8:4) Kushumayela kubasita kutsi bahlale banake uMbuso kunekunaka timo letimatima lababhekene nato. Ngenca yaloko, bahlala bajabulile futsi banekuthula.

14. Kuphatfwa kabi kungakuphazamisa njani kuthula kwetfu?

¹⁴ Nasiphatfwa kabi, singalahlekelwa tintfo letinyenti letisenta sibe nekuthula. Siyajabula futsi sitive senetisekile nasihlangana ndzawonye ngekukhululeka, nasishumayela, nalapho senta tintfo lesivame kutenta sibe singesabi kutsi sitawuboshwa. Nasingakhoni kutenta letintfo, singahle sikhatsateke, sesabe kutsi kutawentekani kitsi. Kuvamile kutiva ngalendlela. Nobe kunjalo, kufanele sicaphele. Jesu washo kutsi kuphatfwa kabi kungenta balandzeli bakhe baphelelwe kukholwa. (Joh. 16:1, 2) Ngako yini lesingayenta kuze sihlale sinekuthula ngisho siphatfwa kabi?

15. Yini leyenta kungadzingeki kutsi sikwesabe kuphatfwa kabi? (Johane 15:20; 16:33)

¹⁵ LiVi laNkulunkulu litsi: “Bonkhe labafuna kuphila ngekutinikela kuNkulunkulu ebunyeni naKhristu Jesu, nabo batawuphatfwa kabi.” (2 Thim. 3:12) Lomunye umzalwane lokutsiwa ngu-Andrei wakutfola kumatima kwetsemba kutsi bantfu baJehova bebatawuphatfwa kabi ngemuva kwekutsi umsebenti wabo sewuvinjelwe eveni lakubo. Bekatitjela atsi: ‘Banyenti boFakazi kulelive. Tiphatsimandla tingasibopha njani nje sonkhe?’ Kunekutsi lemicabango imente abe nekuthula, beyimenta kutsi akhatsateke kakhulu. Labanye bazalwane bebashiyele konkhe kuJehova, abazange bacabange kutsi bangakugwema kungaboshwa. Bebati kutsi kusenekwenteka baboshwe, kodvwa bebangakakhatsateki njenga-Andrei. Ngako wancuma kulingisa sibonelo sabo futsi wetsembela kuNkulunkulu. Ngemuva kwaloko wativa anekuthula futsi nyalo uyajabula nanobe kunetinkinga. Kungenteka lokufanako nakitsi. Nanobe Jesu asitjela kutsi silindzele kuphatfwa kabi, waphindze wasicinisekisa kutsi singahlala  setsembekile.​—Fundza Johane 15:20; 16:33.

16. Ngusiphi sicondziso lokufanele sisilalele nasiphatfwa kabi?

¹⁶ Nangabe umsebenti wetfu uvinjelwe, singahle sitfole ticondziso letivela ehhovisi leligatja nobe kulabadzala belibandla. Leticondziso tentelwe kuvikela tsine nekutsi sichubeke sitfola imfundvo levela kuNkulunkulu siphindze sichubeke nemsebenti wekushumayela ngelizinga lesingakhona ngalo. Yenta konkhe lokusemandleni akho kuze ulalele sicondziso lositfolako ngisho ungacondzi kahle kutsi siniketwe leni. (Jak. 3:17) Ngetulu kwaloko, ungabatjeli labanye imininingwane lemayelana nebazalwane betfu nabodzadze lokungakafaneli bayati, nobe ngendlela libandla lelisebenta ngayo.​—Shu. 3:7.

17. Njengebaphostoli, yini lesitimisele kuyenta?

¹⁷ Lesinye sizatfu lesihamba embili lesenta Sathane alwe nebantfu baNkulunkulu kutsi ‘banemsebenti wekufakaza ngaJesu.’ (Semb. 12:17) Ungamvumeli Sathane nalelive lakhe kutsi bakwesabise. Siyajabula futsi sitive sinekuthula nasishumayela nalapho sifundzisa labanye ngisho nobe siphikiswa. Ngesikhatsi semaKhristu ekucala, baholi bemaJuda batjela baphostoli kutsi bayekele kushumayela, lamadvodza letsembekile akhetsa kulalela Nkulunkulu. Bachubeka bashumayela, futsi lomsebenti bewubajabulisa. (Imis. 5:27-29, 41, 42) Kuliciniso kutsi kufanele sicaphele nasishumayela nangabe umsebenti wetfu uvinjelwe. (Mat. 10:16) Kodvwa nasenta konkhe lokusemandleni etfu, sitawuba nekuthula ngenca yekutsi sitawube sijabulisa Jehova futsi sicocela labanye umlayeto losindzisa kuphila.

18. Singakutfola kubani kuthula mbamba?

¹⁸ Singaciniseka kutsi singaba nekuthula ngisho sibhekene netimo letimatima. Etikhatsini letinjalo, kufanele sikhumbule kutsi sidzinga kuthula kwaNkulunkulu, lokukuthula lesingakunikwa nguJehova kuphela. Yetsembela kuye nakubhedvuka sifo, nakunesehlakalo nobe nawuphatfwa kabi. Hlale usondzelene nenhlangano yakhe. Hlale ulibuke ngalabovu likusasa lelihle lelikumele. Nawenta njalo, ‘Nkulunkulu wekuthula utawuba nawe.’ (Fil. 4:9) Esihlokweni lesilandzelako, sitawucoca ngekutsi singabasita njani bazalwane nabodzadze nababhekene netinkinga kutsi babe nekuthula kwaNkulunkulu.