Utifundze ngekucophelela yini tihloko letiku-Sicongosekulindza salomnyaka? Buka kutsi ungakhona yini kuphendvula lemibuto lelandzelako:

Kutasisita ngani kukhuluma naJehova, kumlalela nekucabanga ngaye?

Sitawenta tincumo letikahle, sibe bafundzisi labancono, sibe nekukholwa lokucinile futsi simtsandze kakhulu Jehova.​—w22.01, emakh. 30-31.

Kutasisita ngani kwetsemba Jehova nalabo labammelelako?

Nyalo sikhatsi sekwetsemba indlela Nkulunkulu lenta ngayo tintfo ngekutsi singatingabati ticondziso lesitinikwa ngulabadzala belibandla nobe tincumo labatentako. Nakufika kuhlupheka lokukhulu, sitawukhona kulalela ngisho sitfola ticondziso lesingaticondzi kahle nobe lesibona ngatsi atisikahle.​—w22.02, emakh. 4-6.

Beliyini liphuzu lengilosi ngesikhatsi itjela Zakhariya kutsi ‘[uMbusi] Zerubhabheli uphetse intsambo yekucondzisa’? (Zak. 4:8-10)

Lombono wacinisekisa bantfu baNkulunkulu kutsi lithempeli belitawucedvwa kwakhiwa futsi Nkulunkulu bekatalemukela.​—w22.03, emakh. 16-17.

Yini lesingayenta kuze sikhombise kutsi ‘sisibonelo ngendlela lesikhuluma ngayo’? (1 Thim. 4:12)

Sikhuluma ngemusa nasenta umsebenti wekushumayela nangendlela lenehlonipho, futsi sihlabela ngalokusuka enhlitiyweni siphindze siphendvule nasisemihlanganweni yelibandla, ngetulu kwaloko sikhuluma liciniso kulabanye siphindze sibakhe, sikugweme nekusebentisa inkhulumo lehlabako.​—w22.04, emakh. 6-9.

Kwentiwa yini kutsi tintfo letichaza tilwane tesiganga letine (imibuso) lokukhulunywa ngato kuDanyela sehluko 7 tihlanganiswe taba sesilwaneni sinye sesiganga encwadzini yeSembulo 13:1, 2?

Silwane sesiganga lokukhulunywa ngaso kuSembulo 13 asimeleli umbuso munye, njengeRoma. Kunaloko, simelela yonkhe imibuso yemhlaba lebuse bantfu.​—w22.05, likh. 9.

Nguyiphi indlela lehamba embili lesingakhombisa ngayo kutsi siyayetsemba indlela Nkulunkulu lehlulela ngayo?

Nangabe lotsite asetfukile, wasiphatsa kabi nobe wasona, setama kungahlali simtfukutselele nobe simbambele emagcubu, kunaloko sishiyela konkhe kuJehova. Utawucedza wonkhe umonakalo lobangelwa sono.​—w22.06, emakh. 10-11.

Yini lokufanele ikhunjulwe ngumzalwane nakathantaza emihlanganweni yelibandla?

Umthantazo awusiwo wekweluleka libandla nobe kukhipha simemetelo. Akudzingeki kutsi ‘akhulume tintfo letinyenti,’ ikakhulukati nakucala imihlangano. (Mat. 6:7)​—w22.07, emakh. 24-25.

Kushiwo ngamuphi umcondvo kutsi ‘labo labente lokubi batawuvuselwa ekwehlulelweni’? (Joh. 5:29)

Ngeke behlulelwe ngekutsi bafanelwe kufa ngenca yaloko labakwenta basengakafi. Batawuhlolwa kutsi injani indlela labacabanga ngayo nendlela labatiphatsa ngayo nasebavusiwe.​—w22.09, likh. 18.

Ngumuphi umlayeto lonemandla lowashiwo nguJ. F. Rutherford emhlanganweni wesifundza lebewungaSeptember 1922?

Emhlanganweni wesifundza lebewuseCedar Point, e-Ohio, eMelika, watsi: “INkhosi iyabusa! Ninikwe umsebenti wekutsi nitjele labanye ngaloku. Ngako memetelani, memetelani, memetelani, iNkhosi neMbuso wayo!”​—w22.10, emakh. 3-5.

Ngutiphi tindlela letintsatfu Nkulunkulu lasisita ngato kutsi sicinisele lokukhulunywa ngato ku-Isaya sehluko 30?

Lesehluko sikhombisa kutsi (1) uyasilalela futsi aphendvule imithantazo yetfu, (2) usinika sicondziso, futsi (3) uyasibusisa nyalo, utasibusisa nasesikhatsini lesitako.​—w22.11, likh. 9.

Yini lesenta sitsi emavi lakuTihlabelelo 37:10, 11, 29 agcwaliseka esikhatsini lesendlulile futsi atawugcwaliseka esikhatsini lesitako?

Emavi aDavide achaza simo lesihle lebesikhona ka-Israyeli, njengalapho kubusa Solomoni. Jesu wakhuluma ngelipharadisi lelitako futsi wacaphuna vesi 11. (Mat. 5:5; Luk. 23:43)​—w22.12, emakh. 8-10, 14.