SIYACINISEKA kutsi uyatijabulela tipho letehlukene letivela kuJehova, lokufaka ekhatsi inkhululeko yekutikhetsela kutsi utijabulela njani letipho. LiBhayibheli litsi liwayini lisipho lesivela kuNkulunkulu, lize litsi: “Kudla kwenta umuntfu ahleke, neliwayini lenta kuphila kube mnandzi.” (Shu. 10:19; Hla. 104:15) Kodvwa kungenteka ubonile kutsi labanye bantfu banenkinga yetjwala. Ngetulu kwaloko, bantfu labanemasiko langafani labasemhlabeni wonkhe banembono longafani netimiso letingafani ngetjwala. Yini lengasita emaKhristu kutsi ente sincumo lesihlakaniphile mayelana netjwala?

Ngisho nobe sihlala kuphi nobe sikhuliswe ngamaphi emasiko, kuvumela umbono waNkulunkulu kutsi ucondzise indlela lesicabanga ngayo netincumo lesitentako kutasisita futsi kusente sijabule.

Mhlawumbe unakile kutsi bantfu labanyenti bavame kunatsa, futsi banatse kakhulu. Labanye bayanatsa nabatiphumulele. Labanye banatsa kuze bakhone kubhekana netinkinga. Kuletinye tindzawo, labanye banatsa kakhulu kuze babonakale bancono nobe bangemadvodza sibili.

Nobe kunjalo, emaKhristu anesicondziso lesihlakaniphile lesivela kuMdali wawo lonelutsandvo. Sibonelo nje, uyasitjela ngemiphumela lebuhlungu yekunatsa kakhulu. Kungenteka uke watifundza Taga 23:29-35 letichaza umuntfu losidzakwa kanye naletinye tinkinga laba nato. a Daniel, longulomdzala welibandla eYurophu ukhumbula indlela lebekaphila ngayo ngaphambi kwekutsi abe ngumKhristu weliciniso, utsi: “Kunatsa kakhulu kwente ngenta tincumo letimbi futsi kwenteka tintfo letibuhlungu ekuphileni kwami letingishiye ngilimele emoyeni.”

UmKhristu angayisebentisa njani inkhululeko yekutikhetsela futsi agweme tinkinga letingumphumela wekunatsa kakhulu tjwala? Kufanele sivumele umbono waNkulunkulu ucondzise indlela lesicabanga ngayo nalesenta ngayo.

Ase sicoce ngekutsi litsini liBhayibheli ngetjwala nekutsi ngutiphi letinye tizatfu letenta labanye banatse.

LiVi laNkulunkulu alikulahli kunatsa tjwala ngalokusesilinganisweni. Ecinisweni, liBhayibheli liyavuma kutsi kunatsa liwayini kungamjabulisa umuntfu. Litsi: “Hamba uyodla ujabulile futsi unatse liwayini ngenhlitiyo lejabulile.” (Shu. 9:7) Jesu bekahle alinatsa liwayini, futsi naletinye tikhonti taJehova letetsembekile nato betihle tilinatsa.​—Mat. 26:27-29; Luk. 7:34; 1 Thim. 5:23.

Nobe kunjalo, liVi laNkulunkulu liwenta ucace umehluko emkhatsini wekunatsa tjwala nekudzakwa. Litsi: “Ningadzakwa liwayini.” (Ef. 5:18) Lize litsi ‘tidzakwa ngeke tilidle lifa leMbuso waNkulunkulu.’ (1 Khor. 6:10) Jehova ukulahla mbamba kunatsa kakhulu kanye nekudzakwa. Kunekutsi silandzele lisiko letfu, silalela umbono waNkulunkulu.

Labanye batsi banganatsa kakhulu tjwala kodvwa bangadzakwa. Nobe kunjalo, loko kuyingoti kakhulu. ImiBhalo ikwenta kucace kutsi ‘kutitika ngeliwayini lelinyenti’ kungenta indvodza (nobe umfati) alimate buhlobo bakhe naJehova. (Thit. 2:3; Taga 20:1) Jesu waze wecwayisa ngekutsi ‘kudzakwa’ kungenta umuntfu angangeni eveni lelisha laNkulunkulu. (Luk. 21:34-36) Ngako yini lengasita umKhristu kutsi agweme tinkinga letibangelwa kunatsa tjwala?

Kuyingoti kuvumela lisiko lokhule ngalo kutsi lilawule umbono wakho ngekunatsa. EmaKhristu lahlakaniphile enta lokujabulisa Jehova nakutiwa endzabeni yekudla nekunatsa. LiBhayibheli liyasikhumbuta litsi: “Ngisho nobe nidla, nobe ninatsa, nalapho nenta nobe yini lenye, tonkhe tintfo tenteleni kukhatimulisa Nkulunkulu.” (1 Khor. 10:31) Nayi leminye imibuto netimiso teliBhayibheli longacabanga ngato:

Nginatsa tjwala kuze ngemukelwe ngulabanye yini? Eksodusi 23:2 utsi: “Ungalilandzeli linyenti.” Jehova bekecwayisa ema-Israyeli kutsi angabalingisi bantfu lebebangamjabulisi. Lesecwayiso sisasebenta nakumaKhristu lamuhla. Nasivumela labanye bantfu balawule indlela lesicabanga ngayo nalesenta ngayo tincumo letimayelana netjwala, singatikhweshisa kuJehova nasetimisweni takhe.​—Rom. 12:2.

Nginatsa tjwala kuze ngikhombise labanye kutsi kute lokungangehlula yini? Kuhlale unatsa nekunatsa kakhulu tjwala kuvamile futsi kuyemukeleka kulamanye emasiko. (1 Phet. 4:3) Kodvwa naka nawa emavi lahlakaniphile laku-1 KubaseKhorinte 16:13 latsi: “Hlalani niphapheme, nicine ekukholweni, nibe nesibindzi futsi nibe nemandla.” Tjwala bungamenta yini umuntfu abe nemandla? Cha. Tjwala bungenta umuntfu angakhoni kucabanga kahle nekwenta tincumo letinhle. Ngako kunatsa kakhulu tjwala akusilo luphawu lwekuba nemandla, kuluphawu lwekuba butsakatsaka. Isaya 28:7 uchaza umuntfu lophambukako ngenca yetjwala kutsi uyayendza futsi awe.

Emandla mbamba avela kuJehova futsi adzinga kutsi sihlale siphapheme futsi sime sicinile ekukholweni. (Hla. 18:32) UmKhristu mbamba angakwenta loku ngekutsi ahlale aphapheme futsi ente tincumo letitawuvikela buhlobo bakhe naJehova. Jesu wakhombisa kutsi unalamandla ngesikhatsi alamhlabeni, futsi bantfu labanyenti bebamhlonipha ngobe bekanesibindzi futsi enta lokulungile.

Nginatsa tjwala kuze ngibalekele tinkinga tami yini? Umhlabeleli waphefumulelwa kutsi abhale atsi: “Ngesikhatsi ngikhatsateke kakhulu,  wangidvudvuta futsi wangenta ngajabula.” (Hla. 94:19) Nangabe ucindzetelwa tinkinga, yetsembela kuJehova kuze akusite, hhayi etjwaleni. Indlela lephumelelako yekukwenta loko kutsi uhlale uthantaza kuJehova. Ngetulu kwaloko, labanyenti bakutfole kulusito kucela seluleko kumngani lovutsiwe ebandleni. Ecinisweni, kunatsa tjwala kuze ubalekele tinkinga kungenta umuntfu kutsi angasatimiseli kakhulu kwenta lokulungile. (Hos. 4:11) Daniel, lesike sakhuluma ngaye utsi: “Bengihlale ngikhatsateke kakhulu futsi ngitiva nginelicala. Benginatsa kuze ngibeketelele lesimo, kodvwa tinkinga tami betandza futsi ngalahlekelwa bangani, nami ngangasatihloniphi.” Yini leyagcine isite Daniel? Utsi: “Ngabona kutsi bengidzinga kwetsembela kuJehova, hhayi etjwaleni. Ekugcineni, ngakhona kubhekana netinkinga tami futsi ngatincoba.” Liciniso likutsi Jehova uhlale akhona kuze asisite, ngisho nalapho simo setfu sibonakala ngatsi ngeke silunge.​—Fil. 4:6, 7; 1 Phet. 5:7.

Nangabe unatsa, ungatibuta nayi imibuto kuze uhlole indlela lonatsa ngayo: ‘Lilunga lemndeni nobe umngani lengisondzelene naye uke waveta yini kukhutsateka ngendlela lenginatsa ngayo?’ Nangabe kunjalo, loko kuluphawu lwekutsi sewucala kuba nenkinga longayiboni. ‘Senginatsa kakhulu yini kunakucala?’ Loko kungakhombisa kutsi usengakangeni shi etjwaleni, kodvwa sewuya ngakhona. ‘Ngikutfola kumatima yini kutsi kuphele emalanga lambalwa ngingakanatsi?’ Nangabe kunjalo, kungenteka kutsi sewungene shi etjwaleni. Loko kungasho kutsi udzinga lusito lwabodokotela kuze uncobe lenkinga.

Ngenca yekutsi kunatsa kungabanga tingoti nobe tinkinga, lamanye emaKhristu akhetse kungabunatsi tjwala. Lamanye angahle akhetse kunganatsi ngenca yekutsi awabutsandzi. Nangabe umngani wakho ente lesincumo, ungakhombisa kutsi unemusa ngekutsi uhloniphe sincumo sakhe futsi ungamsoli ngaso.

Nobe kungenteka ubonile kutsi kukuhlakanipha kutishayela umtsetfo. UmKhristu angahle atishayele umtsetfo wekutsi utawunatsa kanganani. Nobe angatishayela umtsetfo wekutsi utawunatsa kangakhi evikini, mhlawumbe utawunatsa  kanye ngeliviki nobe anatse ngalokusesilinganisweni nakadla. Labanye batishayele umtsetfo wekutsi nguluphi luhlobo lwetjwala labatalunatsa, lobunjengeliwayini nobe bhiya ngalokusesilinganisweni kodvwa bangabunatsi tjwala lobusheshe budzakane, futsi ababudidiyeli ngisho naletinye tinatfo. Nangabe umuntfu atishayele imitsetfo lecacile ngakunatsa, kutawuba melula kutsi anamatsele kuyo. Kute sidzingo sekutsi umKhristu lovutsiwe ative anemahloni nangabe atentele lesincumo futsi abambelele kuso.

Nangabe senta sincumo mayelana netjwala, kufanele sicabange ngekutsi labanye batawutiva njani. Umbhalo waKubaseRoma 14:21 utsi: “Kuncono kutsi ungayidli inyama, ungalinatsi neliwayini futsi ungenti nobe yini lekhuba umzalwane wakho.” Ungasisebentisa njani leseluleko? Ngekutsi ukhombise kutsi uyabatsandza labanye. Nangabe ubona kutsi kunatsa tjwala kutamkhuba lomunye, utawube ukhombisa lutsandvo nawukhetsa kungabunatsi ngaleso sikhatsi. Nawenta njalo utawube ukhombisa kutsi uyabakhatsalela labanye futsi uyabahlonipha, ngaleyondlela utawube awutifuneli lokujabulisa wena, kodvwa ufuna lokujabulisa labanye.​—1 Khor. 10:24.

Ngetulu kwaloko hulumende angahle abe nemitsetfo lokufanele icondzise umKhristu nakenta sincumo. Lemitsetfo ingahle isho kutsi kufanele kunatse umuntfu longanani nobe ivimbele umuntfu kutsi anatse bese uyashayela nobe asebentise umshini lotsite.​—Rom. 13:1-5.

Jehova usihloniphile ngekusinika inkhululeko yekujabulela tipho letinyenti lasiphe tona. Loko kufaka ekhatsi sipho sekutikhetsela kutsi sitawudlani futsi sinatseni. Shengatsi tincumo tetfu tingakhombisa kutsi iligugu kitsi lenkhululeko ngekutsi siyisebentisele kujabulisa Babe wetfu wasezulwini.