1. Sisho ngani kutsi litsemba la-Abrahama belingasilo lite?

 JEHOVA wetsembisa umngani wakhe Abrahama kutsi tonkhe tive temhlaba betitawubusiswa ngentalelwane yakhe. (Gen. 15:5; 22:18) Ngenca yekutsi Abrahama bekanekukholwa lokucinile kuNkulunkulu, bekaciniseka kutsi setsembiso saNkulunkulu sitawufezeka. Ngisho nangesikhatsi Abrahama aneminyaka lengu-100 futsi umkakhe analengu-90, bebasolo bete indvodzana. (Gen. 21:1-7) Nobe kunjalo, liBhayibheli litsi: “Abrahama wetsemba . . . , wakholwa kutsi utawuba ngubabe wetive letinyenti njengobe kwakushiwo.” (Rom. 4:18) Uyati kutsi lesetsembiso lebekanikwe sona Abrahama safezeka. Waba ngubabe walendvodzana lebekasolo ayilindzile, lokungu-Isaka. Yini lebeyenta Abrahama aciniseke kutsi Jehova utasigcina lesetsembiso?

2. Yini lebeyenta Abrahama aciniseke kutsi setsembiso saJehova sitawufezeka?

² Ngenca yekutsi Abrahama bekanebuhlobo lobuhle naJehova, “bekaciniseka kutsi loko Nkulunkulu bekametsembise kona utawukhona kukwenta.” (Rom. 4:21) Jehova bekamemukela Abrahama, futsi watsi ulungile ngenca yekukholwa kwakhe. (Jak. 2:23) Njengobe kuvetiwe KubaseRoma 4:18, kukholwa kwa-Abrahama bekuhlobene nelitsemba lakhe. Ase sibone kutsi yini umphostoli Pawula layisho ngelitsemba njengobe kubhalwe KubaseRoma sehluko 5.

3. Yini Pawula lasichazela yona ngelitsemba?

 ³ Pawula uyachaza kutsi yini lengasenta siciniseke kutsi “litsemba alisidvumati.” (Rom. 5:5) Uphindze asisite sicondze kutsi litsemba letfu njengobe singemaKhristu lingacina njani. Njengobe sifundza ngaloko lokwashiwo nguPawula KubaseRoma 5:1-5, cabanga ngaloko lokwenteke kuwe. Nawenta njalo, kusenekwenteka utawubona kutsi njengobe sikhatsi besichubeka, litsemba lakho belisolo licina. Loko lesitawufundza ngako kutawuphindze kuvete loko longakwenta kuze litsemba lakho lichubeke licina kakhulu kunaloko lelingiko nyalo. Ase sicale sicoce ngelitsemba lelihle Pawula latsi angeke lisidvumate.

4. Yini lokukhulunywa ngayo KubaseRoma 5:1, 2?

⁴ Fundza KubaseRoma 5:1, 2. Pawula wabhalela libandla laseRoma lamavi. Bazalwane nabodzadze kulelibandla bebafundzile ngaJehova naJesu, baba nekukholwa futsi baba ngemaKhristu. Ngako Nkulunkulu ‘watsi balungile ngenca yekukholwa,’ futsi wabagcoba ngemoya longcwele. Baba nelitsemba lelihle.

5. Nguliphi litsemba labagcotjiwe labanalo?

⁵ Ngekuhamba kwesikhatsi, Pawula wabhalela emaKhristu lagcotjiwe ase-Efesu ngalelitsemba lebekanalo. Lelitsemba belifaka ekhatsi kutfola ‘lifa lalabangcwele.’ (Ef. 1:18) Pawula watjela nebaseKholose kutsi lelitsemba labo belitawufezeka kuphi. Walibita ngekutsi “litsemba lenibekelwe lona ezulwini.” (Khol. 1:4, 5) Ngako litsemba lemaKhristu lagcotjiwe lekuvuselwa ezulwini aphile phakadze futsi abuse naKhristu.​—1 Thes. 4:13-17; Semb. 20:6.

6. Yini lomunye umzalwane logcotjiwe layisho ngelitsemba lakhe?

⁶ Liligugu kakhulu lelitsemba kumaKhristu lagcotjiwe. Lomunye wawo, lokunguMzalwane Frederick Franz, washo emavi lasuka enhlitiyweni watsi: “Litsemba letfu liyintfo sibili, litawufezeka kubo bonkhe  laba labangu-144 000 ngendlela lemangalisa kakhulu kunaleyo lesiyicabangako.” Ngemuva kwekukhonta Nkulunkulu ngekwetsembeka iminyaka leminyenti, nga-1991 uMzalwane Franz watsi: “Solo liligugu [kitsi] lelitsemba. . . . Lichubeka liba ligugu kakhulu njengobe kuphela sikhatsi lesidze solo sililindzile. Asitisoli nakancane ngekuchubeka sililindzile, nobe bekungatsiwa sililindza iminyaka letigidzi. Nyalo liligugu kakhulu kimi lelitsemba letfu kunasesikhatsini lesendlulile.”

7-8. Nguliphi litsemba labanyenti labanalo? (KubaseRoma 8:20, 21)

⁷ Linyenti lalabo labakhonta Jehova lamuhla linelitsemba lelehlukile. Litsemba Abrahama lebekanalo, lekuphila phakadze emhlabeni ngaphansi kweMbuso waNkulunkulu. (Heb. 11:8-10, 13) Pawula wabhala ngetintfo letinhle letilindze labo labanalelitsemba. (Fundza KubaseRoma 8:20, 21.) Ngesikhatsi ucala kufundza setsembiso seliBhayibheli mayelana nelikusasa, yini lowayitfola ijabulisa kakhulu? Bekukutsi ngalelinye lilanga utawuba bete yini sono? Nobe wajabula kakhulu yini nawufundza kutsi bantfu lobatsandzako labashona batawuphindze baphile emhlabeni lolipharadisi? Loko kwakwenta kutsi usibuke ngalabovu leso sikhatsi.

⁸ Ngisho nobe silindzele kuphila phakadze ezulwini nobe emhlabeni, sinelitsemba lelihle lelisenta sijabule. Lelitsemba lingachubeka likhula kakhulu. Emavi aPawula lalandzelako ayachaza kutsi kungenteka njani loko. Ase sicoce ngaloko lakubhala mayelana nelitsemba letfu. Kwenta njalo kutasenta siciniseke kakhulu kutsi litsemba letfu litawuchubeka licina nekutsi aliyoze lisidvumate.

9-10. Sibonelo saPawula sikhombisa kutsi yini emaKhristu langayilindzela? (KubaseRoma 5:3) (Buka netitfombe.)

⁹ Fundza KubaseRoma 5:3. Naka kutsi tinkinga tingalenta litsemba kutsi licine. Loko kungasimangalisa. Liciniso likutsi bonkhe balandzeli baKhristu kufanele batilindzele tinkinga. Cabanga ngaloko lokwenteka kuPawula.  Watjela baseThesalonika watsi: “Ngesikhatsi sisenani, besinitjela kutsi sitawuhlupheka, futsi nguloko vele lokwentekile.” (1 Thes. 3:4) Wabhalela nebaseKhorinte watsi: “Asifisi bazalwane kutsi ningati ngekuhlupheka lesahlangabetana nako . . . Besesingetsembi nekutsi sitawusindza.”​—2 Khor. 1:8; 11:23-27.

¹⁰ Lamuhla emaKhristu angatilindzela tinkinga. (2 Thim. 3:12) Kutsiwani ngawe? Njengobe ukholwa kuJesu futsi umlandzela, ukile yini waba netinkinga? Kungenteka tihlobo nebangani bakho bahlekise ngawe. Kungenteka futsi bakuphatse kabi. Kutimisela kwakho kutsi wetsembeke kuto tonkhe tintfo kukubangele tinkinga yini emsebentini? (Heb. 13:18) Ukile yini waphikiswa nguhulumende ngenca yekutsi ucocela labanye ngelitsemba lakho? Kodvwa ngisho sibhekene natiphi tinkinga, Pawula utsi kufanele sijabule. Ngasiphi sizatfu?

11. Yini leyenta kudzingeke sitimisele kucinisela nasibhekene nanobe nguyiphi inkinga?

¹¹ Singajabula nasinetinkinga ngenca yemiphumela lesitayitfola. Umbhalo waKubaseRoma 5:3 utsi “kuhlupheka kuveta kucinisela.” Onkhe emaKhristu atawuba nato tinkinga, ngako onkhe kufanele acinisele. Kufanele sitimisele kucinisela ngisho nobe singabhekana natiphi tinkinga. Nasenta njalo, sitawutfola umvuzo welitsemba letfu. Asifuni kufana nalabo Jesu lebekacabanga ngabo ngesikhatsi akhuluma ngenhlanyelo leyawela emadvwaleni. Bacale balemukela ngenjabulo livi, kodvwa “nakufika kuhlupheka nobe kuphatfwa kabi,” bawa ekukholweni. (Mat. 13:5, 6, 20, 21) Kuliciniso kutsi akusimnandzi kuphikiswa nobe kuba netinkinga, kodvwa kucinisela kuletsa imiphumela lemihle. Kanjani?

12. Kusisita njani kucinisela nasinetinkinga?

¹² Umfundzi Jakobe washo leminye imiphumela lesiyitfolako nasicinisela nasinetinkinga. Wabhala watsi: “Vumelani kucinisela kucedzele umsebenti wako, kuze niphelele, niphile kuto tonkhe tintfo, futsi ningesweli lutfo.” (Jak. 1:2-4) Jakobe uchaza kucinisela ngatsi kunemsebenti lokufanele kuwente. Ngumuphi umsebenti lokufanele wentiwe kucinisela? Kungakusita kutsi ubuvete kakhudlwana buntfu lobunjengekubeketela, kukholwa nekwetsembela kuNkulunkulu. Nobe kunjalo, kunalenye indlela lokungasisita ngayo kucinisela.

13-14. Uyini umphumela wekucinisela, futsi uhlobana njani nelitsemba? (KubaseRoma 5:4)

¹³ Fundza KubaseRoma 5:4. Pawula utsi kucinisela “kusenta semukeleke.” Kucinisela kwakho kwenta kutsi Jehova akwemukele. Loko akusho kutsi kuyamjabulisa kukubona unetinkinga. Akemukeli tona, wemukela wena. Kucinisela kwakho kwenta kutsi akwemukele. Leso sibusiso lesihle kakhulu!​—Hla. 5:12.

¹⁴ Khumbula kutsi Abrahama wacinisela nakabhekene netinkinga futsi wemukelwa nguNkulunkulu. Jehova watsi ngumngani wakhe futsi watsi ulungile. (Gen. 15:6; Rom. 4:13, 22) Kungenteka lokufanako nakitsi. Kuze Nkulunkulu asemukele, akuyi ngekutsi unganani umsebenti lesimentela wona nobe kutsi ngumiphi imisebenti lesiyentako ebandleni. Uyasemukela ngenca yekutsi siyachubeka sicinisela. Sonkhe singakhona kucinisela, ngisho nobe singanani ngeminyaka, sikutiphi timo nobe sinamaphi emakhono. Ikhona yini inkinga loyibeketelelako nyalo? Nangabe kunjalo, akukudvudvute kwati kutsi Nkulunkulu uyakwemukela. Kwati kutsi Nkulunkulu uyasemukela kungasisita kakhulu, kungalicinisa litsemba letfu.

15. Nguliphi liphuzu lelashiwo nguPawula, futsi yini lengenta labanye libamangalise?

¹⁵ Njengobe Pawula achaza, semukelwa nguJehova nangabe sicinisela nasinetinkinga. Naka kutsi Pawula uchubeka atsi: “Kwemukeleka kuNkulunkulu kona kusinika litsemba, futsi litsemba alisidvumati.” (Rom. 5:4, 5) Loko kungahle kubamangalise labanye. Sisho ngani? Ngobe ekucaleni KubaseRoma 5:2, Pawula utsi lamaKhristu aseRoma besekavele analo litsemba, ‘lokulitsemba lekutfola inkhatimulo yaNkulunkulu.’ Ngenca yaloko lomunye angahle abute: ‘Nangabe lamaKhristu besekavele analo litsemba, kwentiwa yini kutsi Pawula aphindze akhulume ngalo nasekayophetsa indzaba yakhe?’

16. Litsemba licala njani kucina kumuntfu? (Buka netitfombe.)

¹⁶ Singacondza kutsi Pawula bekasho kutsini nasicabanga ngekutsi litsemba yintfo leya ngekucina. Ase sibekise: Usakhumbula yini ngesikhatsi ucala kuva ngelitsemba lelihle leliseVini laNkulunkulu? Kungenteka ngaleso sikhatsi bewucabanga kutsi indzaba yekuphila phakadze emhlabeni lolipharadisi imane nje isifiso. Kodvwa njengobe uchubeka ufundza lokunyenti ngaJehova nangetetsembiso teliBhayibheli, waciniseka kakhulu kutsi lelitsemba litawugcwaliseka.

17. Litsemba lakho lichubeka njani licina ngemuva kwekutinikela nekubhajatiswa?

¹⁷ Ngisho nangemuva kwekutinikela futsi ubhajatiswe, litsemba lakho lichubeke lacina njengobe ufundza lokunyenti futsi uba ngumKhristu lovutsiwe. (Heb. 5:13–6:1) Kungenteka kwentekile kuwe loko lokushiwo KubaseRoma 5:2-4. Ukile wabhekana netinkinga letehlukahlukene kodvwa wacinisela futsi wabona kutsi Nkulunkulu uyakwemukela. Njengobe uciniseka kutsi Nkulunkulu uyakwemukela, sewunesizatfu lesicinile sekulindzela kutitfola tonkhe tintfo latetsembisile. Litsemba lakho selicine kakhulu kunasekucaleni.  Seliyintfo mbamba kuwe, selikutsintsa kakhulu. Likutsintsa konkhe kuphila kwakho, lishintje indlela lophatsa ngayo umndeni wakho, tincumo lotentako kanye nendlela losisebentisa ngayo sikhatsi sakho.

18. Yini Jehova lasicinisekisa ngayo?

¹⁸ Lomphostoli wengeta nali lelinye liphuzu lelibalulekile mayelana nelitsemba lakho nasewemukelwe nguNkulunkulu. Uyakucinisekisa kutsi litsemba lakho litawugcwaliseka. Yini lengakwenta uciniseke? Pawula watjela emaKhristu nawa emavi lasicinisekiso: “Litsemba alisidvumati, ngobe lutsandvo Nkulunkulu lanalo ngatsi lugcwaliswe etinhlitiyweni tetfu ngemoya longcwele lesanikwa wona.” (Rom. 5:5) Unesizatfu lesivakalako sekuciniseka ngelitsemba lakho.

19. Yini longaciniseka ngayo ngelitsemba lakho?

¹⁹ Cabanga ngesetsembiso Jehova lasitjela Abrahama, nangendlela lamemukela ngayo futsi watsi ngumngani wakhe. Litsemba la-Abrahama belingasilo lite. LiBhayibheli litsi: “Ngemuva kwekubeketela, Abrahama wasitfola lesetsembiso.” (Heb. 6:15; 11:9, 18; Rom. 4:20-22) Akazange advumateke. Nawe ungaciniseka kutsi nawuhlala wetsembekile, litsemba lakho litawufezeka. Litsemba lakho liyintfo mbamba; likwenta ujabule, hhayi kutsi udvumateke! (Rom. 12:12) Pawula wabhala watsi: “Shengatsi Nkulunkulu lonikana litsemba anganenta nijabule kakhulu futsi aninike nekuthula ngenca yekutsi netsembele kuye, kuze nitogcwala litsemba ngemandla emoya longcwele.”​—Rom. 15:13.