1. Yini indvodza lengumKhristu lokufanele iyente kuze iphumelele?

 INKHOSI Davide yatjela Solomoni yatsi: “Cina futsi ukhombise kutsi uyindvodza.” (1 Khos. 2:1-3) Onkhe emadvodza langemaKhristu enta kahle ngekusebentisa leseluleko. Kuze akhone kwenta njalo, kufanele alalele imitsetfo yaNkulunkulu futsi asebentise timiso letiseBhayibhelini kuko konkhe kuphila kwawo. (Luk. 2:52) Kubaluleke ngani kutsi bazalwane labasebasha babe ngemaKhristu lavutsiwe?

2-3. Kubaluleke ngani kutsi umzalwane losemusha abe ngumKhristu lovutsiwe?

² Indvodza lengumKhristu inemisebenti leminyenti lebalulekile emndenini nasebandleni. Kungenteka nine bazalwane labasebasha nike nacabanga ngemisebenti lokungenteka nibe nayo esikhatsini lesitako. Kungenteka ninemgomo wekuba tisebenti tasikhatsi sonkhe, wekuba yinceku lesebentako futsi ngekuhamba kwesikhatsi nibe ngulabadzala belibandla. Kungenteka futsi nishade nibe nebantfwana. (Ef. 6:4; 1 Thim. 3:1) Kuze niyifinyelele lemigomo futsi niphumelele, kufanele nibe ngemaKhristu lavutsiwe. b

³ Yini lengakusita kutsi ube ngumKhristu lovutsiwe? Kunemakhono labalulekile lokufanele uwafundze. Ngako yini longayenta nyalo kuze utilungiselele imisebenti lokungenteka uyente esikhatsini lesitako futsi uphumelele?

4. Ungatitfolaphi tibonelo letinhle longatilingisa? (Buka nesitfombe.)

⁴ Cabanga ngetibonelo letinhle longatilingisa. LiBhayibheli linetibonelo letinhle tebantfu labanyenti bazalwane labasebasha labangabalingisa. Lamadvodza asesikhatsini lesendlulile bekamtsandza  Nkulunkulu futsi anemisebenti leminyenti lebekayenta kuze anakekele bantfu bakhe. Nawe ungatfola tibonelo letinhle emkhatsini wemadvodza lavutsiwe langemaKhristu emndenini wakini nasebandleni. (Heb. 13:7) Ngetulu kwaloko unesibonelo lesihle kakhulu saJesu Khristu. (1 Phet. 2:21) Njengobe uchubeka udadisha letibonelo, cabanga ngebuntfu babo lobuhle. (Heb. 12:1, 2) Ngemuva kwaloko cabanga ngekutsi utabalingisa njani.

5. Yini longayenta kuze ube nelikhono lekusebentisa kahle ingcondvo, futsi kubaluleke ngani loku? (Tihlabelelo 119:9)

⁵ Bani nelikhono ‘lekusebentisa kahle ingcondvo’ futsi ulibambisise. (Taga 3:21) Indvodza lenelikhono lekusebentisa kahle ingcondvo iyacabangisisa ngaphambi kwekutsi yente lokutsite. Ngako timisele kuba nalelikhono futsi ulibambisise. Leni? Kungobe emajaha lamanyenti kulelive enta tincumo letisekelwe kuloko lakucabangako nobe endleleni lativa ngayo. (Taga 7:7; 29:11) Netinhlelo tekuchumana tingayitsintsa indlela lowenta ngayo. Kodvwa yini longayenta kuze ube nelikhono lekusebentisa kahle ingcondvo? Cala ngekufundza timiso teliBhayibheli futsi ucabange ngekutsi tizuzisa ngani. Ngemuva kwaloko, tisebentise kuze wente tincumo letitawujabulisa Jehova. (Fundza Tihlabelelo 119:9.) Nawunalelikhono, litakusita kakhulu kutsi ube ngumKhristu lovutsiwe. (Taga 2:11, 12; Heb. 5:14) Cabanga ngekutsi kusebentisa ingcondvo kungakusita njani kunati timo letimbili: (1) indlela lophatsa ngayo bodzadze kanye (2) nalapho wenta tincumo tendlela lotawugcoka ngayo nalotawubukeka ngayo.

6. Likhono lekusebentisa ingcondvo lingamsita njani umzalwane losemusha kutsi ahloniphe bodzadze?

⁶ Kusebentisa kahle ingcondvo kutakusita kutsi ubahloniphe besifazane. Kungulokuvamile futsi kukahle kutsi umzalwane losemusha afise kumati kancono dzadze longumKhristu. Nobe kunjalo, umzalwane losemusha losebentisa kahle ingcondvo angeke asho, abhale nobe ente lokutsite lokutawenta dzadze acabange kutsi ufuna kutsandzana naye, abe lomzalwane ete sifiso sekushada naye. (1 Thim. 5:1, 2) Nangabe lomzalwane atsandzana nadzadze, utawuvikela lidvumela  lelihle lalodzadze ngekutsi bangabi bodvwana ngaphandle nangabe ukhona lobagadzile.​—1 Khor. 6:18.

7. Likhono lekusebentisa ingcondvo lingamsita njani umzalwane losemusha nakenta tincumo letimayelana nekugcoka nekutilungisa?

⁷ Lenye indlela umzalwane losemusha lakhombisa ngayo kutsi uyisebentisa kahle ingcondvo kutsi ente tincumo letinhle mayelana nekugcoka nekutilungisa. Ngalokuvamile, labo labenta timphahla futsi batikhangise abamhloniphi Jehova. Ngetulu kwaloko, kungenteka baphila imphilo lengcolile. Kucabanga kwabo lokungcolile kubonakala kahle etimphahleni letimpintjanako nobe letenta emadvodza abonakale ngatsi besifazane. Nakakhetsa loko latakugcoka, umzalwane losemusha lofuna kuba ngumKhristu lovutsiwe utawucondziswa timiso teliBhayibheli kanye netibonelo letinhle ebandleni. Angahle atibute: ‘Tincumo tami tiyakhombisa yini kutsi ngibhadlile engcondvweni futsi ngiyabacabangela labanye? Indlela lengigcoka ngayo yenta kube melula yini ngalabanye kutsi betsembe kutsi ngimkhonta mbamba Nkulunkulu?’ (1 Khor. 10:31-33; Thit. 2:6) Umzalwane losemusha losebentisa kahle ingcondvo angeke agcine ngekuhlonishwa bazalwane bakhe nabodzadze kodvwa utawuhlonishwa nanguBabe wakhe losezulwini.

8. Yini umzalwane losemusha langayenta kuze etsenjwe ngulabanye?

⁸ Yenta kutsi labanye bakwetsembe. Umzalwane losemusha lowetsenjwa ngulabanye uwenta kahle wonkhe umsebenti wakhe. (Luk. 16:10) Cabanga ngesibonelo lesihle saJesu. Bekatimisela. Wayenta yonkhe imisebenti layinikwa nguJehova, ngisho nalapho kulukhuni kuyenta. Bekabatsandza bantfu, ikakhulukati bafundzi bakhe, futsi waze wanikela ngekuphila kwakhe ngenca yabo. (Joh. 13:1) NjengaJesu, sebenta kamatima kuze wente imisebenti lonikwe yona. Nangabe ungati kutsi wentiwa njani, tfobeka futsi ucele bazalwane labavutsiwe kutsi bakusite. Ungatikhiphi ecaleni. (Rom. 12:11) Kunaloko, wucedze umsebenti wakho, ‘kube shengatsi uwentela Jehova hhayi bantfu.’ (Khol. 3:23) Kuliciniso kutsi unesono, ngako tfobeka futsi uvume emaphutsa akho.​—Taga 11:2.

9. Kubaluleke ngani kutsi umzalwane losemusha afundze emakhono lalusito?

⁹ Kuze ube ngumKhristu lovutsiwe, kufanele ufundze emakhono lalusito. Loku kutakusita kutsi wente imisebenti letsite ebandleni, utfole umsebenti kuze utinakekele nobe unakekele umndeni wakho futsi ube nebuhlobo lobuhle nalabanye. Cabanga nganawa lamanye emakhono lalusito.

10-11. Umzalwane losemusha kumsita njani yena kanye nelibandla nakafundza kufundza kahle kanye nekubhala kahle? (Tihlabelelo 1:1-3) (Buka nesitfombe.)

¹⁰ Fundza kufundza kahle nekubhala kahle. LiBhayibheli litsi umuntfu lojabulako nalophumelelako ngulotinika sikhatsi onkhe malanga afundze liVi laNkulunkulu futsi acabangisise  ngalo. (Fundza Tihlabelelo 1:1-3.) Kufundza liBhayibheli onkhe malanga kutawumenta ati indlela Jehova lacabanga ngayo, lokutamsita kutsi acabange kahle futsi afundze kusebentisa imiBhalo. (Taga 1:3, 4) Emadvodza lanjalo ayadzingeka ebandleni. Ngasiphi sizatfu?

¹¹ Bazalwane betfu nabodzadze betsembele kubazalwane labakhonako kubafundzisa futsi babanikete seluleko lesivela eBhayibhelini. (Thit. 1:9) Nangabe ukhona kufundza kahle nekubhala kahle, utawukhona kulungiselela tinkhulumo kanye netimphendvulo letitawusita labanye futsi ticinise kukholwa kwabo. Ngetulu kwaloko, nawutidadishela liBhayibheli futsi ulalela tinkhulumo emihlanganweni yelibandla, yesigodzi neyesifundza utawukhona kubhala emaphuzu lalusito. Lamaphuzu atakusita kutsi ucinise kukholwa kwakho futsi ukhutsate nalabanye.

12. Yini letakusita kutsi ukwati kukhuluma kahle nalabanye?

¹² Fundza likhono lekukhuluma kahle nalabanye. Indvodza lengumKhristu kufanele ifundze kukhuluma kahle nalabanye. Umuntfu lokhuluma kahle nalabanye uyabalalelisisa futsi unendzaba naloko labakucabangako nendlela labativa ngayo. (Taga 20:5) Angetama kufundza kunaka livi lakhe, simo sebuso nesimo semtimba kute akhone kumcondza kahle. Loku angeke ukhone kukufundza nangabe ungacitsi sikhatsi nalabanye. Nangabe uhlale usebentisa tintfo tebuchwephesha kuze ukhulume nalabanye, njengekubhala ema-email nobe imilayeto, ungahle ungakhoni kukhuluma kahle nalabanye bantfu buso nebuso. Ngako yakha ematfuba ekukhuluma nalabanye buso nebuso.​—2 Joh. 12.

13. Yini lenye umzalwane losemusha lokufanele ayifundze? (1 KuThimothi 5:8) (Buka nesitfombe.)

¹³ Fundza kutinakekela. Indvodza levutsiwe kufanele ikhone kutinakekela nekunakekela umndeni wayo. (Fundza 1 KuThimothi 5:8.) Kulamanye emave, bazalwane labasebasha bangafundza likhono kubobabe babo nobe kuletinye tihlobo. Kuletinye tindzawo, umzalwane losemusha angafundza umsebenti nobe likhono nakasebangeni leliphakeme (high school). Kunobe ngukuphi, kuhle kufundza likhono lelitakusita kutsi utfole umsebenti. (Imis. 18:2, 3; 20:34; Ef. 4:28) Yatiwa ngekutsi usebenta kamatima nangekutsi wenta umsebenti uze uwucedze. Nawenta njalo, manyenti ematfuba ekutsi utfole umsebenti futsi uwugcine. Lobuntfu kanye nemakhono lesesicoce ngawo abalulekile kuze indvodza lengumKhristu ikhone kwenta leminye imisebenti esikhatsini lesitako. Asesicoce ngaleminye yalemisebenti.

14. Umzalwane losemusha angakulungiselela njani kuba sisebenti sasikhatsi sonkhe?

¹⁴ Kuba semsebentini wasikhatsi sonkhe. Emadvodza lamanyenti langemaKhristu lavutsiwe acala umsebenti wasikhatsi sonkhe asesemasha. Kuba lihlahlandlela kusita umzalwane losemusha kutsi akhone kusebenta kahle nebantfu labehlukahlukene. Kuphindze kumsite kutsi akhone kuhlela kusebentisa kahle imali futsi anamatsele kuloluhlelo. (Fil. 4:11-13) Indlela lekahle yekuba sisebenti sasikhatsi sonkhe kutsi ucale ube lihlahlandlela lelisitako. Labanyenti babe ngemahlahlandlela lasitako sikhatsi lesitsite, lokubasitile kutsi bakulungele kuba ngemahlahlandlela lavamile. Kuba lihlahlandlela kungavula ematfuba ekwenta leminye imisebenti yasikhatsi sonkhe, lefaka ekhatsi kwenta umsebenti wekwakha nobe kuba lilunga lemndeni waseBethel.

15-16. Yini umzalwane losemusha langayenta kuze akufanele kuba yinceku lesebentako nobe lomdzala welibandla?

¹⁵ Kuba yinceku lesebentako nobe lomdzala welibandla. Bazalwane labangemaKhristu kufanele batibekele umgomo wekutsi bakufanele kuba ngulabadzala belibandla kuze bakhonte bazalwane babo nabodzadze ebandleni. LiBhayibheli litsi emadvodza lafisa kwenta lomsebenti “afisa umsebenti lomuhle.” (1 Thim. 3:1) Ngaphambi kwekutsi umzalwane abe ngulomdzala welibandla, kufanele akufanele kuba yinceku lesebentako. Tinceku letisebentako tisita labadzala belibandla ngetindlela letinyenti letehlukene. Labadzala belibandla netinceku letisebentako bakhonta bazalwane babo nabodzadze futsi bayatimisela emsebentini wekushumayela. Bazalwane labasebasha bangakufanela kuba tinceku letisebentako ngisho nobe baneminyaka lesukela kulengu-17 kuya kulengu-19. Inceku lesebentako lefanelekako ingakufanela kuba ngulomdzala welibandla kusukela ineminyaka lengu-20.

¹⁶ Yini longayenta kuze ukufanele kuba yinceku lesebentako nobe lomdzala welibandla? LiBhayibheli limane nje lisho kutsi kufanele ube ngumuntfu lokanjani. Kodvwa konkhe loko lokwenta umuntfu akufanele kwenta lomsebenti kusekelwe eBhayibhelini, ekutsandzeni Jehova, umndeni wakhe kanye nelibandla. (1 Thim. 3:1-13; Thit. 1:6-9; 1 Phet. 5:2, 3) Yetama kucondza intfo ngayinye ledzingekako. Thantaza, ucele Jehova akusite kutsi ukhone kukwenta. c

17. Umzalwane losemusha angatilungiselela njani kuba yindvodza nekuba yinhloko yemndeni? (Buka nesitfombe.)

¹⁷ Kuba yindvodza nekuba yinhloko yemndeni.  Njengobe Jesu aveta, lamanye emaKhristu lavutsiwe ahlala angakashadi. (Mat. 19:12) Nobe kunjalo, nangabe ukhetsa kushada, utawuba naleminye imisebenti leyentiwa yindvodza nenhloko yemndeni. (1 Khor. 11:3) Jehova ulindzele kutsi indvodza imtsandze umkayo futsi inakekele tidzingo takhe, ibe ngumngani wakhe lomkhulu, futsi imsite asondzelane naJehova. (Ef. 5:28, 29) Lobuntfu kanye nemakhono lesifundze ngako ekucaleni kwalesihloko, lobunjengelikhono lekusebentisa ingcondvo, kuhlonipha besifazane, kanye nekwetsenjwa ngulabanye kutakusita kutsi ube yindvodza lekahle. Utakulungela kahle kuba yindvodza nekuba yinhloko yemndeni.

18. Umzalwane losemusha angatilungiselela njani kuba ngubabe?

¹⁸ Kuba ngubabe. Ngemuva kwekushada, kungenteka ube ngubabe. Yini longayifundza kuJehova ngekuba ngubabe lokahle? Kunyenti longakufundza. (Ef. 6:4) Jehova watjela Jesu iNdvodzana yakhe kutsi uyamtsandza nekutsi uyamemukela. (Mat. 3:17) Nangabe uba ngubabe, ciniseka kutsi uhlale ubacinisekisa bantfwana bakho kutsi uyabatsandza. Hlale ubancoma ngetintfo letinhle labatentako. Bobabe labalingisa Jehova basita bantfwana babo kutsi babe ngemadvodza nebafati labavutsiwe. Ungakulungiselela nyalo kukwenta loku ngekutsi ubanakekele labanye emndenini wakini nasebandleni, futsi ufundze kutjela labanye kutsi uyabatsandza nekutsi baligugu kuwe. (Joh. 15:9) Loko kutakusita kutsi ube yindvodza lekahle futsi ube ngubabe lokahle esikhatsini lesitako. Kodvwa kwanyalo, utawuba ligugu kuJehova, emndenini wakini nasebandleni.

19-20. Yini lengasita bazalwane labasebasha kutsi babe ngemaKhristu lavutsiwe? (Buka sitfombe lesisekhasini lekucala.)

¹⁹ Nine bazalwane labasebasha, angeke kutentakalele kutsi nibe ngemadvodza lavutsiwe. Kufanele nikhetse tibonelo letinhle lenitatilingisa, nibe nelikhono lekusebentisa kahle ingcondvo, netsenjwe ngulabanye, nifundze emakhono lalusito futsi nilungele imisebenti lenitayenta esikhatsini lesitako.

²⁰ Ngaletinye tikhatsi ungahle uve shengatsi mnyenti kakhulu umsebenti lokufanele uwente. Kodvwa ungakhona kuwenta. Khumbula kutsi Jehova ufuna mbamba kukusita. (Isa. 41:10, 13) Nebazalwane bakho nabodzadze nabo batakusita. NasewungumKhristu lovutsiwe, imphilo yakho itawujabulisa. Siyanitsandza nine bazalwane labasebasha! Shengatsi Jehova angachubeka anibusisa njengobe netama kuba ngemadvodza lavutsiwe.​—Taga 22:4.