1. Yini lokufanele siyente kuze sibe ngemaKhristu lavutsiwe?

 IYASIMANGALISA indlela umntfwana lasheshe akhule ngayo. Kubonakala ngatsi loko kuyatentakalela. Nobe kunjalo, kuba ngumKhristu lovutsiwe akutentakaleli. b (1 Khor. 13:11; Heb. 6:1) Kuze sifinyelele lomgomo, kufanele sibe nebuhlobo lobuhle naJehova. Ngetulu kwaloko, sidzinga umoya wakhe longcwele kuze usisite sibe nebuntfu lobumjabulisako, sifundze emakhono lalusito futsi sitilungiselele imisebenti lokungenteka siyente esikhatsini lesitako.​—Taga 1:5.

2. Yini lesiyifundza kuGenesisi 1:27, futsi sitawucoca ngani kulesihloko?

² Jehova wenta bantfu kwaba ngumfati nendvodza. (Fundza Genesisi 1:27.) Kusebaleni kutsi indvodza yakheke ngendlela leyehlukile kunemfati, kodvwa kunaletinye tindlela labehlukene ngato. Sibonelo nje, Jehova wenta kutsi indvodza nemfati badlale indzima lengafanani, ngako kufanele babe nebuntfu lobutsite futsi bafundze emakhono latawubasita kutsi bakhone kufeza lendzima yabo. (Gen. 2:18) Kulesihloko, sitawucoca ngekutsi yini lengentiwa bodzadze labasebasha kuze babe bodzadze labavutsiwe. Esihlokweni lesilandzelako, sitawucoca ngekutsi yini lengentiwa bazalwane labasebasha.

3-4. Bodzadze labasebasha bangatitfolaphi tibonelo letinhle labangatilingisa? (Buka nesitfombe.)

³ LiBhayibheli likhuluma ngebafati labanyenti labasibonelo lebebatsandza Jehova futsi bamkhonta. (Buka sihloko lesiku  jw.org lesitfolakala ngesiZulu lesitsi “Abesifazane Okukhulunywa Ngabo EBhayibhelini​—Singafundani Kubo?”) Njengobe umbhalo lokutsatselwe kuwo lesihloko usho, nabo ‘bebatitsiba, futsi betsembeke kuto tonkhe tintfo.’ Ngetulu kwaloko, emabandleni labakuwo bodzadze labasebasha bangatfola tibonelo tabodzadze lasebavutsiwe labangabalingisa.

⁴ Nine bodzadze labasebasha, ningacabanga ngekutsi bobani bodzadze lenibatiko labasibonelo lesihle leningabalingisa. Nakani buntfu babo lobuhle; bese nicabanga ngekutsi ningabulingisa njani. Kuletigaba letilandzelako, sitawucoca ngebuntfu lobutsatfu lobubalulekile lokufanele babe nabo bodzadze labavutsiwe.

5. Yini leyenta kutfobeka kubaluleke kudzadze lovutsiwe?

⁵ Kutfobeka kubalulekile kuze umKhristu avutfwe. Nangabe umfati atfobekile, utawuba nebuhlobo lobuhle naJehova kanye nalabanye. (Jak. 4:6) Sibonelo nje, umfati lotsandza Jehova uyatitfoba, akhetse kusekela lilungiselelo lebunhloko lelibekwe nguBabe wakhe wasezulwini. (1 Khor. 11:3) Lelilungiselelo lisebenta ngendlela leyehlukile ebandleni nasemndenini. c

6. Yini bodzadze labasebasha labangayifundza ngekutfobeka kuRebheka?

⁶ Cabanga ngesibonelo saRebheka. Bekangumfati lohlakaniphile nalowenta tincumo letihlakaniphile, futsi bekati kutsi kunini lakufanele atsatse khona sinyatselo nekutsi ente njani. (Gen. 24:58; 27:5-17) Nobe kunjalo, bekahlonipha futsi atitfoba. (Gen. 24:17, 18, 65) Nangabe nawe usekela nobe nguliphi lilungiselelo laJehova njengaRebheka, utawuba sibonelo lesihle emndenini wakho nasebandleni.

7. Bodzadze labasebasha bangamlingisa njani Esta kuze bakhombise kutsi bayati kutsi kunetintfo labangeke bakhone kutenta?

⁷ Kwati kutsi kunetintfo longeke ukhone kutenta kubuntfu onkhe emaKhristu lokufanele abe nabo. LiBhayibheli litsi “kuhlakanipha kukubantfu labatfobekile.” (Taga 11:2) Esta  bekanebuntfu lobujabulisa Nkulunkulu, futsi bekati kutsi kunetintfo labengeke akhone kutenta. Loko kwamvikela kutsi angatigcabhi. Walalela seluleko sabhuti wakhe lomdzala, lokunguModekhayi futsi wasisebentisa. (Esta 2:10, 20, 22) Nawe ungakhombisa kutsi uyati kutsi kunetintfo longeke ukhone kutenta ngekutsi ucele seluleko kulabanye futsi usisebentise.​—Thit. 2:3-5.

8. Ngekusho kwa-1 KuThimothi 2:9, 10, dzadze nakati kutsi kunetintfo langeke akhone kutenta, loko kutamsita njani kutsi ente tincumo letihlakaniphile mayelana nekugcoka nekutilungisa?

⁸ Esta wakhombisa nangalenye indlela kutsi uyakwati loko langeke akhone kukwenta. ‘Bekeme kahle futsi amuhle’; kodvwa bekangenti kutsi kunakwe yena. (Esta 2:7, 15) Sibonelo sa-Esta singabasita njani bodzadze? Lenye indlela ivetwe ku-1 KuThimothi 2:9, 10. (Fundza.) Umphostoli Pawula watjela besifazane labangemaKhristu kutsi bagcoke ngendlela lezitsile nalekhombisa kuvutfwa. Ligama lesiGriki lelisetjentisiwe liveta kutsi bodzadze kufanele bagcoke ngendlela lehloniphekile nalekhombisa kutsi banendzaba nendlela labanye labativa ngayo nobe ngemibono yabo. Sibatsandza kakhulu bodzadze labavutsiwe, labagcoka ngendlela lezitsile!

9. Yini lesingayifundza esibonelweni sa-Abigayili?

⁹ Ngetulu kwaloko, bodzadze labavutsiwe kufanele babe nekucondza. Kuyini kucondza? Kukhona kubona lokulungile nalokukabi bese ukhetsa kwenta lokulungile. Cabanga ngesibonelo sa-Abigayili. Indvodza yakhe yenta sincumo lesibi lebesitawuba nemphumela lomubi kuwo wonkhe umndeni wayo. Abigayili wenta lokutsite ngekushesha. Ngenca yekutsi wabona kutsi kukunini lakufanele ente khona lokutsite, loko kwasindzisa kuphila kwebantfu. (1 Sam. 25:14-23, 32-35) Kucondza kuphindze kusisite sibone kutsi kunini lapho kufanele sikhulume khona nalapho kufanele sibindze khona. Ngetulu kwaloko, nangabe sikhatsalela lotsite kucondza kusisita kutsi singakwenti ngendlela letamenta ative angakhululeki.​—1 Thes. 4:11.

10-11. Kungakusita njani wena nalabanye kufundza kahle nekubhala kahle? (Buka nesitfombe.)

¹⁰ Dzadze kufanele afundze emakhono latamsita. Lamanye emakhono lafundvwa yintfombatane nayiseyincane achubeka ayisita kuko konkhe kuphila kwayo. Cabanga nganati tibonelo letilandzelako.

¹¹ Fundza kufundza kahle nekubhala kahle. Kulamanye emasiko, kutsatfwa ngekutsi akukabaluleki kutsi wesifazane afundze kufundza nekubhala. Nobe kunjalo, lamakhono abalulekile kuwo onkhe emaKhristu. d (1 Thim. 4: 13) Ngako ungavumeli lutfo lukuvimbe kutsi ufundze kufundza nekubhala kahle. Utawuba yini umphumela? Lamakhono angakusita kutsi utfole umsebenti futsi uwugcine. Ngetulu kwaloko kutawuba melula kutsi udadishe liVi laNkulunkulu futsi ulifundzise labanye. Lokuhle kakhulu kutsi utawusondzelana kakhulu naJehova njengobe ufundza liVi lakhe futsi ucabangisisa ngalokufundza kulo.​—Josh. 1:8; 1 Thim. 4:15.

12. Taga 31:26 tingakusita njani kutsi ukhone kubakhulumisa kahle labanye?

¹² Fundza kukhuluma kahle nalabanye. Onkhe emaKhristu kufanele afundze kukhuluma kahle. Mayelana naloku, umfundzi Jakobe washo nasi seluleko lesihle watsi: “Wonkhe umuntfu kufanele asheshe kulalela, ephute kukhuluma.” (Jak. 1:19) Nawulalelisisa njengobe lomunye akhuluma, usuke ukhombisa kutsi ‘uvelana’ naye. (1 Phet. 3:8) Nangabe ungaciniseki kutsi ukucondza kahle yini loko lakushoko nobe indlela lativa ngayo, mbute imibuto lekahle. Ngemuva kwaloko tinike sikhashana sekucabanga ngaphambi kwekutsi ukhulume. (Taga 15:28) Tibute: ‘Loku lengitakusho kuliciniso futsi kuyakha yini? Kukhombisa inhlonipho nemusa yini?’ Fundza kubodzadze labavutsiwe labakwatiko kukhuluma kahle. (Fundza Taga 31:26.) Naka indlela labakhuluma ngayo. Nawulifundza lelikhono, utawuba nebuhlobo lobuhle nalabanye.

13. Ungakufundza njani kunakekela kahle likhaya? (Buka nesitfombe.)

¹³ Fundza kunakekela likhaya. Etindzaweni letinyenti, bantfu besifazane benta umsebenti lomnyenti wekunakekela likhaya. Kungenteka make wakho nobe sisi wakho akufundzise emakhono labalulekile. Lomunye dzadze lokutsiwa nguCindy utsi: “Lesinye setipho lesiligugu make langipha sona kungifundzisa kutsi kusebenta kamatima kuletsa injabulo. Kufundza emakhono lanjengekupheka, kuhlanta indlu, kutfunga, kanye nekuyotsenga kwente kuphila kwami kwaba melula, futsi kwente kutsi ngikhone kwenta lokunyenti emsebentini waJehova. Make waphindze wangifundzisa kwemukela tivakashi, futsi loko kwente kutsi ngati bazalwane nabodzadze lababe sibonelo lesihle lengingasilingisa.” (Taga 31:15, 21, 22) Umfati lokhutsele nalowemukela tivakashi futsi lofundze kunakekela likhaya usibusiso emndenini wakhe nasebandleni.​—Taga 31:13, 17, 27; Imis. 16:15.

14. Yini loyifundza kulokwenteka kuCrystal, futsi yini lokufanele uyinake kakhulu?

¹⁴ Fundza kutentela tintfo. Kufundza kutentela tintfo kungumgomo lobalulekile kuwo onkhe emaKhristu lavutsiwe. (Fil. 4:11) Lomunye dzadze lokutsiwa nguCrystal utsi: “Batali bami bangisita nangikhetsa tifundvo lebengitatifundza ebangeni leliphakeme (high school) kuze ngitofundza emakhono lalusito. Babe wangikhutsata kutsi ngikhetse sifundvo setimali, lesibe lusito kakhulu.” Ngetulu  kwekufundza emakhono kuze utfole umsebenti, yetama kufundza kusebentisa imali nekuhlela indlela yekuyisebentisa futsi unamatsele kuloko lokuhlelile. (Taga 31:16, 18) Hlale unake imigomo yakho ekukhonteni Nkulunkulu ngekutsi ugweme kudala tikweleti nangekutsi wenetiseke ngemphilo lemelula.​—1 Thim. 6:8.

15-16. Bodzadze labangakashadi babasita njani labanye? (Makho 10:29, 30)

¹⁵ Nangabe uba nebuntfu lobujabulisa Jehova futsi ufundze emakhono lalusito, loko kutakusita esikhatsini lesitako. Cabanga nganati tibonelo letimbalwa taloko longakwenta.

¹⁶ Ungahlala ungakashadi sikhatsi lesitsite. Ngekuvumelana nemavi aJesu, labanye besifazane bakhetsa kungashadi nanobe loko kungakhutsatwa ngemasiko abo. (Mat. 19:10-12) Labanye bahlala bangakashadi ngenca yetimo letitsite. Ciniseka kutsi Jehova naJesu abawabukeli phansi emaKhristu langakashadi. Emhlabeni wonkhe, bodzadze labangakashadi basibonelo lesihle ebandleni. Ngenca yekutsi bayabatsandza labanye futsi bayabakhatsalela, sebabe bosisi nabomake kulabanyenti.​—Fundza Makho 10:29, 30; 1 Thim. 5:2.

17. Dzadze losemusha angatilungiselela njani nyalo kungenela umsebenti wasikhatsi sonkhe?

¹⁷ Ungaba semsebentini wasikhatsi sonkhe. Bodzadze benta umsebenti lomkhulu wekushumayela emhlabeni wonkhe. (Hla. 68:11) Ungahlela yini nyalo kungenela umsebenti wasikhatsi sonkhe? Ungaba lihlahlandlela, usite emsebentini wekwakha nobe ube lilunga lemndeni waseBethel. Thantaza ngemgomo wakho. Khuluma nalabanye labawufinyelele lomgomo futsi utfole kutsi yini lokufanele uyente kuze ukhone kuwufinyelela. Ngemuva kwaloko takhele luhlelo lolutakusebentela. Kufinyelela umgomo wakho kutakuvulela ematfuba lamanyenti lajabulisako emsebentini waJehova.

18. Kubaluleke ngani kutsi dzadze amkhetse ngekucophelela loyo latawushada naye? (Buka nesitfombe.)

¹⁸ Ungakhetsa kushada. Buntfu kanye nemakhono lesesicoce ngawo kutakusita kutsi ube ngumfati lokahle. Kuliciniso kutsi nangabe ufuna kushada, kufanele umkhetse ngekucophelela loyo lotawushada naye. Lesi ngulesinye setincumo lesibaluleke kakhulu lotawusenta ekuphileni. Khumbula, inhloko yakho kutawuba ngulomzalwane lotawushada naye. (Rom. 7:2; Ef. 5:23, 33) Ngako tibute: ‘Ungumzalwane lovutsiwe yini? Tintfo letiphatselene  nekukhonta Jehova tita kucala yini ekuphileni kwakhe? Wenta tincumo letihlakaniphile yini? Uyawavuma yini emaphutsa akhe? Uyabahlonipha yini bantfu besifazane? Unawo yini emakhono ladzingekile kuze angisite ngibe nebuhlobo lobuhle naNkulunkulu, anginakekele futsi abe ngumngani lokahle? Uyenta kahle yini imisebenti yakhe? Sibonelo nje, ngumiphi imisebenti layentako ebandleni futsi uyenta njani?’ (Luk. 16:10; 1 Thim. 5:8) Kuliciniso kutsi nangabe ufuna indvodza lekahle, nawe kufanele ube ngudzadze lokahle.

19. Sisho ngani kutsi indzima ‘yemsiti’ ihloniphekile?

¹⁹ LiBhayibheli litsi umfati lokahle ‘ungumsiti nemphelelisi’ wendvodza yakhe. (Gen. 2:18) Loko kumehlisa sitfunti yini umfati? Cha! Umsebenti wakhe uhloniphekile. Ecinisweni, liBhayibheli livame kuchaza Jehova ngekutsi ‘ngumsiti.’ (Hla. 54:4; Heb. 13:6) Umfati usuke angumsiti lokahle wendvodza yakhe nangabe ayisekela, futsi ayibambisa etincumeni letentile letitsintsa umndeni. Ngetulu kwaloko, ngenca yekutsi utsandza Jehova, wenta konkhe lokusemandleni akhe kuze indvodza yakhe ibe neligama lelihle. (Taga 31:11, 12; 1 Thim. 3:11) Ungatilungiselela kuba ngumfati ngekutsi ukhulise indlela lomtsandza ngayo Jehova nangekutsi usite labanye ekhaya nasebandleni.

20. Make angaba njani sibusiso emndenini wakhe?

²⁰ Kungenteka ube ngumake. Ngemuva kwekushada, kungenteka wena nemyeni wakho nibe nebantfwana. (Hla. 127:3) Ngako kukuhlakanipha kucabangela likusasa. Lobuntfu kanye nemakhono lesicoce ngako kulesihloko kutakusita nakutawenteka uba ngumfati futsi uba ngumake. Lutsandvo lonalo, umusa nekubeketela kutawenta kutsi likhaya lakho libe yindzawo lapho bantfwana bakho batawutiva bavikeleke khona futsi bajabulile.​—Taga 24:3.

21. Sitiva njani ngabodzadzewetfu, futsi yini leyenta sitive ngaleyondlela? (Buka sitfombe lesisekhasini lekucala.)

²¹ Siyanitsandza bodzadzewetfu ngako konkhe lenikwentela Jehova nebantfu bakhe. (Heb. 6:10) Nisebenta kamatima kuze nibe nebuntfu lobujabulisa Jehova, nifundza emakhono latanisita ekuphileni futsi asite nalabanye, niphindze nitilungiselele indzima lokungenteka niyidlale esikhatsini lesitako. Niligugu kakhulu enhlanganweni yaJehova!