Utifundze ngekucophelela yini tihloko letiku-Sicongosekulindza salomnyaka? Buka kutsi ungakhona yini kuphendvula lemibuto lelandzelako:

Kufaka ekhatsi ini ‘kushintja tingcondvo tenu’? (Rom. 12:2)

Kufaka ekhatsi lokungetulu nje kwekwenta tintfo letinhle. Kufaka ekhatsi nekuhlola loko lesingiko ngekhatsi futsi sente lushintjo kuze kuphila kwetfu kuhambisane netimiso taNkulunkulu.—w23.01, emakh. 8-9.

Singakukhombisa njani kulinganisela nasibuka tintfo letentekako emhlabeni?

Siyafuna kwati kutsi tintfo letentekako tisigcwalisa njani siphrofetho. Kunekutsi sicagele, lokungenta kube bete bunye, senta kahle ngekutsi loko lesikukhulumako kusekelwe etintfweni letishicilelwe yinhlangano yaJehova. (1 Khor. 1:10)—w23.02, likh. 16.

Indlela Jesu labhajatiswa ngayo yehluke njani endleleni balandzeli bakhe lababhajatiswa ngayo?

Ngenca yekutsi Jesu watalelwa esiveni lesitinikele kuNkulunkulu, bekungadzingeki kutsi atinikele kuJehova. Jesu bekete sono. Bekute sidzingo sekutsi aphendvuke etonweni takhe.—w23.03, likh. 5.

Singabasita njani labanye kutsi baphendvule emihlanganweni yelibandla?

Singasho imphendvulo lemfisha kuze nalabanye batawukhona kuphendvula. Singakugwema nekusho emaphuzu lamanyenti. Ngaleyondlela kutawuba khona lokutawusalela labanye.—w23.04, likh. 23.

Usho kutsini ‘Umgwaco Webungcwele’ lokukhulunywa ngawo ku-Isaya 35:8?

Ekucaleni, lomgwaco longumfanekiso bewusho indlela leyasetjentiswa ngemaJuda nawasuka eBhabhulona abuyela ekhaya. Kutsiwani eminyakeni yakamuva? Eminyakeni lengaphambi kwa-1919, kwentiwa umsebenti wekulungisa, lomunye wawo bekukuhumusha nekushicilela emaBhayibheli. Bantfu baNkulunkulu bebasolo bahamba ‘Ngemgwaco Webungcwele’ baya epharadisi lelingumfanekiso, kuhamba kulomgwaco kutawenta kutsi batfole tibusiso letitawuletfwa nguMbuso waNkulunkulu.—w23.05, emakh. 15-19.

Taga sehluko 9 tineseluleko lesimayelana nabaphi bafati lababili labangumfanekiso?

Taga tikhuluma ‘ngemfati losilima’ futsi kumenywa nguye kuholela ‘eThuneni,’ tiphindze tikhulume ‘ngekuhlakanipha lokungiko’ lokumelelwa ngumfati futsi kumenywa nguye kwenta umuntfu ahambe ‘ngendlela lekhombisa kutsi unekucondza’ futsi iholela ekuphileni. (Taga 9:1, 6, 13, 18)—w23.06, emakh. 22-24.

Kutfobeka kwaNkulunkulu nekucabangela kwakhe kwabonakala njani endleleni laphatsa ngayo Loti?

Jehova watjela Loti kutsi abaleke eSodoma aye esifundzeni lesinetintsaba. Kodvwa ngesikhatsi Loti acela kuya eSowari, Nkulunkulu wamvumela.—w23.07, likh. 21.

Yini umfati langayenta nangabe indvodza yakhe ibuka titfombe letikhombisa kungcola?

Kufanele akhumbule kutsi akusilo liphutsa lakhe. Kufanele anake buhlobo bakhe naNkulunkulu futsi acabangisise ngebafati lokukhulunywa ngabo eBhayibhelini lebebanetinkinga kodvwa labadvudvutwa nguye. Angasita indvodza yakhe kutsi ingatifaki enkingeni.—w23.08, emakh. 14-17.

Nangabe sichukulutwa ngenca yetinkholelo tetfu, kucondza kutasisita njani kutsi sibe nemoya lophansi?

Nangabe sichukulutwa ngenca yetinkholelo tetfu nobe sitfola umbuto lokanjalo ungasivulela litfuba lekubona kutsi lomuntfu ucabangani nobe kutsi yini lebalulekile kuye. Nasenta njalo sitawukhona kuphendvula ngemoya lophansi.—w23.09, likh. 17.

Yini lesingayifundza kuMariya mayelana nekutfola emandla?

Ngesikhatsi Mariya eva kutsi utawuba ngumake waMesiya, waciniswa ngulabanye. Gabriyeli na-Elizabethe bakhutsata Mariya ngemiBhalo. Natsi singawatfola emandla kubazalwane betfu nakubodzadze.—w23.10, likh. 15.

Jehova angayiphendvula njani imithantazo yetfu?

Wetsembisa kulalela imithantazo yetfu futsi anake kutsi ihlangana njani nenjongo yakhe. (Jer. 29:12) Angaphendvula sicelo sinye ngetindlela letehlukene, kodvwa utawuhlale asisita.—w23.11, emakh. 21-22.

KubaseRoma 5:2 kukhulunywa ‘ngelitsemba,’ ngako yini leyenta kuphindze kukhulunywe ngalo kuvesi 4?

Umuntfu nakeva tindzaba letimnandzi, angaba nelitsemba lekuphila emhlabeni lolipharadisi. Kodvwa njengobe abhekana netinkinga, acinisela futsi abona kutsi Nkulunkulu uyamemukela, litsemba lanalo lingahle licine kakhulu futsi libe yintfo mbamba kuye.—w23.12, emakh. 12-13.