1-2. Batali kufanele bative njani nangabe bantfwana babo babuta imibuto lemayelana naloko lesikukholelwako lokusekelwe eBhayibhelini?

 LABANYENTI batawuvuma kutsi kuba ngumtali ngumsebenti lomatima. Nangabe ungumtali lonemntfwana losemncane, siyakuncoma ngekusebenta kamatima kuze umsite abe nekukholwa lokucinile. (Dut. 6:6, 7) Kodvwa njengobe lomntfwana akhula, angahle acale kubuta imibuto lenesisindvo lemayelana naloko lesikukholelwako lokufaka ekhatsi loko lokufundziswa liBhayibheli ngekutiphatsa.

² Ekucaleni, ingahle ikukhatsate imibuto yalomntfwana. Ungahle ucabange kutsi lemibuto ikhombisa kutsi kukholwa kwakhe sekuya ngekuncipha. Kodvwa ecinisweni umntfwana nakakhula kufanele abute imibuto kuze atawuciniseka kakhulu ngaloko lakukholelwako. (1 Khor. 13:11) Ngako ungesabi. Imibuto yalomntfwana lemayelana nekukholwa kwetfu yitsatse njengelitfuba lekumsita kutsi asebentise likhono lakhe lekucabanga.

3. Sitawucoca ngani kulesihloko?

³ Kulesihloko, sitawucoca ngaloko batali labangakwenta kuze basite umntfwana wabo kutsi (1) atitfolele yena bufakazi lobungacinisa kukholwa kwakhe, (2) atitsatse njengaletiligugu timiso teliBhayibheli letimayelana nekutiphatsa, nekutsi (3) angabachazela njani labanye loko lakukholelwako. Sitawuphindze sicoce ngekutsi kukahle ngani kutsi bantfwana babute imibuto, nangaletinye tintfo batali labangatenta nebantfwana babo letingenta kutsi bacoce ngaloko lesikukholelwako.

 SITA UMNTFWANAKHO ATITFOLELE BUFAKAZI LOBUTAWUCINISA KUKHOLWA KWAKHE

4. Ngumiphi imibuto umntfwana langahle atibute yona, futsi ngasiphi sizatfu?

⁴ Batali bayati kutsi umntfwana akakutfoli njengelufuto kukholwa kuNkulunkulu. Awuzange utalwe ukholwa kuJehova. Kungulokufanako nangemntfwanakho. Njengobe sikhatsi sichubeka, lomntfwana angahle atibute: ‘Ngati njani kutsi Nkulunkulu ukhona? Ngingakwetsemba yini vele lokushiwo liBhayibheli?’ Ecinisweni, liBhayibheli lisikhutsata kutsi sisebentise “yonkhe ingcondvo” yetfu futsi ‘siciniseke ngato tonkhe tintfo.’ (Rom. 12:1; 1 Thes. 5:21) Kodvwa ungamsita njani umntfwanakho kutsi acinise kukholwa kwakhe?

5. Yini batali labangayenta kuze basite umntfwana aletsembe kakhulu liBhayibheli? (KubaseRoma 12:2)

⁵ Khutsata umntfwanakho kutsi atitfolele bufakazi bekutsi loko liBhayibheli lelikushoko kuliciniso. (Fundza KubaseRoma 12:2.) Nangabe umntfwanakho abuta imibuto, sebentisa lelitfuba kuze umkhombise kutsi angatitfola njani timphendvulo asebentisa emathulusi etfu ekucwaninga, lafaka ekhatsi i-Watch Tower Publications Index ne-Lithulusi Lekucwaninga LaBoFakazi BaJehova. KuleLithulusi Lekucwaninga, ngephansi kwesihloko lesitsi “LiBhayibheli,” angabuka sihlokwana lesitsi “Liphefumulelwe NguNkulunkulu” kuze atfole bufakazi bekutsi liBhayibheli alisiyo nje incwadzi lebhalwe bantfu. Kodvwa ‘lilivi laNkulunkulu.’ (1 Thes. 2:13) Sibonelo nje, angacwaninga ngeNineve lebekulidolobha lase-Asiriya yakadzeni. Esikhatsini lesendlulile, labanye labaphikisa liBhayibheli batsi lelidolobha alizange selibe khona. Kodvwa ngabo-1850, kwatfolakala tindzala talo, lokwakhombisa kutsi lendzaba leseBhayibhelini iliciniso. (Zef. 2:13-15) Kuze lomntfwana atfole leminye imininingwane lekhombisa kutsi kubhujiswa kwalelidolobha bekugcwalisa siphrofetho seliBhayibheli, angabuka sihloko lesitsi “Bewati Yini?” ku-Sicongosekulindza saNovember 2021. Kucatsanisa loko lakufundza etincwadzini tetfu naloko lakufundza kuma-encyclopedia nakuleminye imitfombo leyetsenjwako kungamenta abe nesizatfu lesivakalako sekukwetsemba kakhulu loko lokushiwo liBhayibheli.

6. Yini batali labangayenta kuze basite umntfwana asebentise likhono lekucabanga? Niketa sibonelo. (Buka nesitfombe.)

⁶ Sita umntfwanakho asebentise likhono lakhe lekucabanga. Batali banematfuba lehlukahlukene ekucoca nebantfwana babo mayelana neliBhayibheli nangekukholwa kuNkulunkulu. Lamatfuba angavela nababuya kuyovakasha nebantfwana babo emsamo, nobe lakunetimbhali letinyenti khona letehlukahlukene nobe ehhovisi leligatja laBoFakazi BaJehova.  Nasi sibonelo, nanivakashe emsamo, kungaba ngulapho niye matfupha nobe nisebentise tebuchwephesha, ungasita umntfwanakho kutsi anake kakhulu tintfo letenteka kadzeni nobe letinye tintfo takadzeni letikulomsamo letingacinisa kukholwa kwakhe kutsi loko lokushiwo liBhayibheli kuliciniso. Umntfwanakho uyati yini kutsi ligama laNkulunkulu livela etjeni lakadzeni lelineminyaka lengu-3 000, lelatiwa ngekutsi yi-Moabite Stone? Lelitje mbamba lisemsamo lokutsiwa yi-Louvre Museum, eParis, eFrance. Ngetulu kwaloko, litje lelakhiwe lafana ne-Moabite Stone liyatfolakala emsamo lokutsiwa yi-“The Bible and the Divine Name” loseNdlunkhulu yaBoFakazi BaJehova eWarwick, eNew York. Kulelitje kubhalwe kutsi iNkhosi Mesha yakaMowabi yavukela ema-Israyeli. Loko kuvumelana nalokushiwo liBhayibheli. (2 Khos. 3:4, 5) Nangabe umntfwanakho atibonela yena bufakazi bekutsi liBhayibheli liliciniso futsi linembile, kukholwa kwakhe kutawucina kakhulu.​—Catsanisa na-2 Tikhronike 9:6.

7-8. (a) Yini lesingayifundza endleleni tintfo letakheke ngayo nangebuhle bato njengobe sitibona endalweni? Shano sibonelo. (Buka nesitfombe.) (b) Ngumiphi imibuto lengasita umntfwanakho kutsi acinise kukholwa kwakhe kuMdali?

⁷ Khutsata umntfwanakho kutsi acabange ngendalo. Nanihamba endzaweni yasemakhaya nobe nanisebenta engadzeni, yenta umntfwanakho anake indlela tintfo letidalwe ngayo. Ngasiphi sizatfu? Letintfo tiveta bufakazi bekutsi kuneMuntfu lohlakaniphile lotentile. Sibonelo nje, tintfo letinyenti takheke ngendlela sigubhu semnenke lesakheke ngayo, futsi sekuphele iminyaka leminyenti bososayensi badadisha loko. Sosayensi lokutsiwa nguNicola Fameli uyachaza kutsi nawubala emalayini lakuletintfo letentiwe ngendlela lefana nesigubhu semnenke, utfola kutsi tinombolo talamalayini tiyafana. Lendlela lekanjena itfolakala etinfweni letinyenti letidaliwe lokufaka ekhatsi lamanye ema-galaxie, emacembe etihlahla nakubobhekilanga. a

⁸ Njengobe umntfwanakho afundza lokunyenti ngesayensi esikolweni, utawutfola kutsi kunemtsetfo lolawula indlela tintfo letinyenti letakheka ngayo. Sibonelo nje, tihlahla letinyenti tilandzela indlela lefanako natikhula. Ticu tiveta emagala bese lamagala aveta lamanye lamancane nawo aphindze avete lamanye lamancane. Lendlela yekwakheka kwetintfo iyatfolakala nakuletinye tintfo letidaliwe. Kodvwa ngubani loshaye umtsetfo wekutsi letintfo takheke ngendlela lenhle kangaka? Ngubani lowente kutsi indalo ihleleke ngalendlela? Nangabe umntfwanakho acabangisisa ngemibuto lenjengalena, manyenti ematfuba ekutsi abe nekukholwa lokucinile kuNkulunkulu lodale tonkhe tintfo. (Heb. 3:4) Njengobe akhula, ungambuta: “Nangabe Nkulunkulu asidala, angeke yini kube nengcondvo kuphetsa ngekutsi uphindze  wasiniketa ticondziso letimayelana nekutiphatsa letingenta kutsi sijabule?” Ungamtjela kutsi leticondziso titfolakala eBhayibhelini.

SITA UMNTFWANA ATITSATSE NJENGALETILIGUGU TIMISO TELIBHAYIBHELI TEKUTIPHATSA

9. Yini lengenta umntfwana abe nemibuto ngetimiso teliBhayibheli tekutiphatsa?

⁹ Nangabe umntfwanakho angabata kubaluleka kwetimiso teliBhayibheli tekutiphatsa, yetama kutfola kutsi yini leyenta ative kanjalo. Kungenca yekutsi akavumelani mbamba yini netimiso teliBhayibheli tekutiphatsa nobe kungenca yekutsi nakakhuluma nalabanye ngalendzaba akati kutsi angakuchaza njani loko lakukholelwako? Kunobe ngusiphi simo, ungamsita kutsi atitsatse njengaletibalulekile letimiso ngekutsi udadishe naye incwadzi letsi Jabulela Kuphila Kuze Kube Phakadze! b

10. Ungamsita njani umntfwanakho kutsi acabange ngebuhlobo bakhe naJehova?

¹⁰ Khutsata umntfwanakho kutsi abutsatse njengalobuligugu buhlobo bakhe naJehova. Njengobe udadisha naye liBhayibheli, yetama kutfola loko lokungekhatsi kuye ngekutsi usebentise imibuto nemifanekiso lokutfolakala encwadzini letsi Jabulela Kuphila Kuze Kube Phakadze! (Taga 20:5) Sibonelo nje, kusifundvo 8 Jehova ufananiswa nemngani losikhatsalelako, losikhumbuta tintfo letingasivikela futsi tisisite. Ngemuva kwekucoca nga-1 Johane 5:3, ungambuta: “Kwati kutsi Jehova unguMngani lokahle kangaka kukwenta ukutsatse njani loko lasitjela kona?” Lombuto ungabonakala ungakabaluleki kangako, kodvwa kumbuta wona kungamsita kutsi atsatse imitsetfo yaNkulunkulu njengebufakazi bekutsi unelutsandvo.​—Isa. 48:17, 18.

11. Ungamsita njani umntfwanakho kutsi abone kubaluleka kwetimiso teliBhayibheli? (Taga 2:10, 11)

¹¹ Cocani ngekutsi kusisita njani kusebentisa timiso teliBhayibheli. Nangabe nifundza liBhayibheli nobe umbhalo welusuku ndzawonye, cocani ngekutsi kusebentisa timiso teliBhayibheli kuwasite njani onkhe emalunga emndeni. Sibonelo nje, umntfwanakho uyabona yini kutsi kusita ngani kukhutsala nekwetsembeka? (Heb. 13:18) Ungaphindze ugcizelele kutsi kusebentisa timiso teliBhayibheli kusisita kutsi sihlale siphilile futsi sijabulile. (Taga 14:29, 30) Kucoca ngaletimiso kungamsita umntfwanakho kutsi akubone kakhulu kubaluleka kweseluleko seliBhayibheli.​—Fundza Taga 2:10, 11.

12. Lomunye babe uyisita njani indvodzana yakhe kutsi ibone kubaluleka kwekusebentisa timiso teliBhayibheli?

¹² Lomunye babe waseFrance lokutsiwa nguSteve, uchaza loko yena nemkakhe labakwentako kuze basite indvodzana yabo lengu-Ethan leneminyaka lengu-16 kuze ibone kutsi lokwenta Jehova ashaye imitsetfo kutsi unelutsandvo, utsi: “Simbuta imibuto lenjengaletsi: ‘Yini leyenta Jehova afune sisihloniphe lesimiso? Loko kukhombisa njani kutsi uyasitsandza? Yini lengenteka nangabe ungasisebentisi lesimiso?’” Loko kusite Ethan kutsi atitsandze timiso taJehova letimayelana nekutiphatsa. Steve wengeta utsi: “Umgomo wetfu kusita Ethan abone kutsi liBhayibheli linekuhlakanipha lokuphakeme kakhulu kunekuhlakanipha kwemuntfu.”

13. Batali bangamcecesha njani umntfwana kuze akhone kusebentisa timiso teliBhayibheli? Shano sibonelo.

¹³ Cecesha umntfwanakho kutsi asebentise timiso teliBhayibheli. Lingavela litfuba lekukwenta loko nangabe umntfwanakho aniketwe umsebenti wesikolwa wekutsi afundze incwadzi letsite. Mhlawumbe lencwadzi inebalingiswa labatiphatsa kabi nobe labangayilawuli intfukutselo yabo lokutsiwa kufanele balingiswe. Ungamkhutsata umntfwanakho kutsi acabange ngaloku lokwentiwa ngulabalingiswa  kutsi kuyahambisana yini netimiso teliBhayibheli. (Taga 22:24, 25; 1 Khor. 15:33; Fil. 4:8) Loko kungamsita kutsi akhone kufakaza kuthishela nakulabanye bafundzi nakusacocwa ngalendzaba eklasini.

SITA UMNTFWANAKHO KUTSI AMELELE KUKHOLWA KWAKHE

14. Nguyiphi indzaba lengenta umKhristu losemusha kutsi esabe, futsi ngasiphi sizatfu?

¹⁴ EmaKhristu lasemasha angahle esabe kumelela loko lakukholelwako. Angahle esabe nakukhulunywa ngendzaba yekutigucukela kwemvelo eklasini. Ngasiphi sizatfu? Ngobe bothishela bangenta lendzaba ibonakale ngatsi iliciniso lelingeke liphikwe. Nangabe ungumtali, ungamsita njani umntfwanakho kutsi abe nesibindzi sekumelela loko lakukholelwako?

15. Ungamsita njani umKhristu losemusha kutsi aciniseke kakhulu ngaloko lakukholelwako?

¹⁵ Sita umntfwanakho kutsi aciniseke kakhulu ngaloko lakukholelwako. Umntfwanakho akukafaneli abe nemahloni ngenca yekutsi uyalati liciniso ngendalo. (2 Thim. 1:8) Ngasiphi sizatfu? Liciniso likutsi nabososayensi labanyenti bayati kutsi kuphila akuzange kutivelele. Bayabona kutsi kuneMuntfu lohlakaniphile lowadala yonkhe lenkimbinkimbi letfolakala endalweni. Kungako bangayemukeli imfundziso yekutigucukela kwemvelo lefundziswa etikolweni emhlabeni wonkhe. Umntfwanakho angacinisa kukholwa kwakhe ngekutsi acabange ngaletinye tizatfu letente bazalwane nabodzadze bakholelwa kutsi tintfo tadalwa. c

16. Batali bangamsita njani umntfwana kutsi akhone kuchazela labanye loko lakukholelwako ngeMdali? (1 Phetro 3:15) (Buka nesitfombe.)

¹⁶ Sita umntfwanakho kutsi akhone kuchazela labanye loko lakukholelwako mayelana neMdali. (Fundza 1 Phetro 3:15.) Kunganisita nekufundza ndzawonye tihloko letiku jw.org ngephansi kweluchungechunge lolutsi “Intsha Iyabuza​—Indalo Noma Ukuziphendukela Kwemvelo?” Ngemuva kwaloko ningacoca ngesihloko umntfwanakho labona ngatsi angakhona kusisebentisa kuze asite labanye bacondze liciniso ngeMdali. Mkhumbute kutsi angaphikisani nalafundza nabo. Mkhutsate nekutsi asebentise tintfo lokumelula kuticondza nangabe labanye bavuma kucoca naye. Sibonelo nje, lomunye umfundzi angatsi: “Mine ngikholelwa kuphela entfweni lengiyibonako, futsi angizange sengimbone Nkulunkulu.” LomKhristu losemusha  angahle atsi: “Ase uticabange uhamba ehlatsini lelikhashane kakhulu nalapho bantfu batfolakala khona, bese ufika lapho kunemtfombo lowakhelwe kahle khona. Bewungaphetsa ngekutsini? Nangabe lomtfombo ukunika bufakazi lobucacile bekutsi kunemuntfu lohlakaniphile lowawakhela, kakhulu kanganani-ke ngaloko lesikubona endalweni!”

17. Batali bangamkhutsata njani umntfwana kutsi afune ematfuba ekucocela labanye liciniso leliseBhayibhelini? Fanekisa.

¹⁷ Khutsata umntfwanakho kutsi afune kucocela labanye emaciniso laseBhayibhelini. (Rom. 10:10) Ungafananisa imetamo layentako yekucocela labanye ngekukholwa kwakhe nemetamo ledzingekako nangabe umuntfu afuna kufundza kudlala insimbi yemculo. Ekucaleni angaphrakthiza ngetingoma lokumelula kutidlala. Ngekuhamba kwesikhatsi kubese kuba melula kudlala lomculo. Ngendlela lefanako, umKhristu losemusha angacale asebentise indlela lemulela yekucocela labanye loko lakukholelwako. Sibonelo nje, angabuta lafundza naye: “Bewati yini kutsi bonjiniyela bavame kukukopa endalweni loko labakwakhako? Ngicela kukukhombisa nayi i-video lemnandzi.” Ngemuva kwekumbukelisa i-video leseluchungechungeni lolutsi Kwakhiwa Yini? angabese utsi: “Nangabe bososayensi batfola ludvumo ngekwakha intfo labayikope endalweni, ngubani-ke lokufanele advunyiswe kakhulu?” Lendlela lemelula ingahle yente lona lacoca naye abe nesifiso sekucoca nesekwati lokunyenti.

CHUBEKA USITA UMNTFWANAKHO KUTSI ACINISE KUKHOLWA KWAKHE

18. Yini batali labangayenta kuze basite umntfwana acinise kukholwa kwakhe kuNkulunkulu?

¹⁸ Siphila eveni leligcwele bantfu labete kukholwa kuJehova. (2 Phet. 3:3) Ngako batali, njengobe nidadisha liBhayibheli nemntfwana, mkhutsateni kutsi afundze tihloko letitawumenta alihloniphe kakhulu liVi laNkulunkulu kanye netimiso tekutiphatsa. Mkhutsateni kutsi asebentise likhono lakhe lekucabanga ngekutsi nikhulume ngetintfo letimangalisako letisendalweni yaJehova. Msiteni nekutsi acondze tiphrofetho teliBhayibheli lesetivele tigcwalisekile. Ngetulu kwako konkhe, thantazani nemntfwana futsi nimthantazele. Nanenta njalo, ningaciniseka kutsi Jehova utayibusisa imetamo yenu yekusita lomntfwana kutsi acinise kukholwa kwakhe.​—2 Khr. 15:7.