1-2. Ngutiphi timo letingasenta sikhale?

 SONKHE kuyenteka sikhale. Nangabe kunentfo letsite lesijabulisako, singahle sikhale tinyembeti tenjabulo. Mhlawumbe wakhala ngesikhatsi kwenteka intfo letsite lebalulekile kuwe. Sibonelo nje, mhlawumbe wakhala ngesikhatsi kutalwa umntfwana wakho, nawukhumbula sikhatsi lesimnandzi nobe nawubona umngani wakho lesekuphele iminyaka wamgcina.

² Nanobe kunjalo, etikhatsini letinyenti sikhala ngobe siselusizini. Sibonelo nje, kungenteka sikhale nangabe lotsite asidvumatile. Singakhala nalapho siva buhlungu lobukhulu ngenca yekugula lokungapheli nobe nakushone lotsite lesimtsandzako. Etikhatsini letinjalo, singativa njengemphrofethi Jeremiya ngesikhatsi baseBhabhulona bancobe iJerusalema. Jeremiya watsi: “Tinyembeti tigeleta njengemfula emehlweni ami . . . Ngikhala siphelane, ngingathuli.”​—Sil. 3:48, 49.

3. Jehova utiva njani nakabona tikhonti takhe tiva buhlungu? (Isaya 63:9)

³ Jehova uyati kutsi sesikhale kangakhi ngenca yetimo letisicindzetelako. LiBhayibheli liyasicinisekisa kutsi wati simo ngasinye lesibuhlungu lesibhekana naso, futsi uyasiva nasikhala sicela kutsi asisite. (Hla. 34:15) Kodvwa Jehova akagcini nje ngekusibona nekusiva. Njengemtali lonelutsandvo, uva buhlungu kakhulu nakabona bantfwana bakhe bakhala futsi usisita ngekushesha.​—Fundza Isaya 63:9.

4. Letinye tibonelo letiseBhayibhelini tingasifundzisani ngendlela Jehova lacabanga ngayo?

⁴ EVini lakhe, Jehova usitjela loko lakwenta ngesikhatsi tikhonti takhe tikhala. Loko singakubona ngekutsi sifundze  ngesibonelo saHana, saDavide neseNkhosi Hezekiya. Yini leyabenta bakhala? Jehova wenta njani ngesikhatsi bakhalela lusito? Tibonelo tabo tingasidvudvuta njani nasikhala ngenca yebuhlungu, yekudvumateka nobe ngenca yekuphelelwa litsemba?

TINYEMBETI TELUSIZI

5. Hana wativa njani ngesimo lebekakuso?

⁵ Hana wabhekana netinkinga letinyenti letamenta weva buhlungu kakhulu futsi wakhala. Lenye yaletinkinga kutsi bekasesitsenjini, futsi lolomunye umfati, lokunguPhenina, bekamphatsa kabi. Lokwangeta swayi esilondzeni kutsi Hana bekete bantfwana kantsi Phenina bekanabo. (1 Sam. 1:1, 2) Phenina bekahlale ahlekisa ngaHana ngenca yekutsi bekangabatfoli bantfwana. Kube bekunguwe lokulesimo bewutawutiva njani? Hana bekeva buhlungu kakhulu kangangekutsi “bekabese uyakhala futsi angadli,” futsi ‘abecindzeteleka kakhulu.’​—1 Sam. 1:6, 7, 10.

6. Yini Hana layenta kuze atfole indvudvuto?

⁶ Hana wayitfola njani indvudvuto? Lokunye lokwamsita kuya ethendeni lekukhontela, lapho bekukhontelwa khona Jehova. Nakalapho, mhlawumbe ngasekungeneni kwalelithende lekukhontela, “wathantaza kuJehova futsi wakhala wangasathuli.” Wancenga Jehova watsi: “Nawungabuka kuhlupheka kwencekukati yakho uphindze ungikhumbule.” (1 Sam. 1:10b, 11) Hana wathantaza, watfulula sifuba sakhe kuJehova. Siyaciniseka kutsi Jehova watsintseka kakhulu nakabona tinyembeti talendvodzakati yakhe leligugu!

7. Hana wativa njani ngemuva kwekutfulula sifuba sakhe kuJehova?

⁷ Hana wativa njani ngemuva kwekutfulula sifuba sakhe kuJehova ngemthantazo, nangemuva kwekutsi umPhristi Lophakeme Eli amcinisekise kutsi Jehova utamphendvula? Lendzaba itsi: “Wabese uyahamba, futsi wadla, nebuso bakhe abuzange busabonakala bujabhile.” (1 Sam. 1:17, 18) Ngisho nobe simo sakhe besisolo singakashintji, wativa sekancono. Lomtfwalo lowesindzako besekawunike Jehova. Wakubona kucindzeteleka kwakhe futsi wakuva nekukhala kwakhe, ngekuhamba kwesikhatsi wambusisa ngekutsi amvumele kutsi akhulelwe.​—1 Sam. 1:19, 20; 2:21.

8-9. Ngekuvumelana nembhalo waKumaHebheru 10:24, 25, kubaluleke ngani kutsi sente konkhe lesingakwenta kuze siye emihlanganweni yelibandla? (Buka nesitfombe.)

⁸ Lesikufundzako. Ubhekene nesimo lesimatima yini lesikwenta ukhale ngenca yebuhlungu? Mhlawumbe uva buhlungu ngenca yekutsi ushonelwe lilunga lemndeni nobe ngumngani wakho. Etimeni letinjalo, kuvamile kutsi ufune kuba wedvwa. Kodvwa njengobe naHana advudvuteka futsi wakhutsateka ngekutsi aye ethendeni lekukhontela,  nawe ungadvudvuteka ngekutsi uye emihlanganweni yelibandla ngisho nobe ungativa kahle. (Fundza KumaHebheru 10:24, 25.) Emihlanganweni silalela kufundvwa emavesi eliBhayibheli lasenta sicabange tintfo letinhle, ngaleyondlela Jehova usisita kutsi siyekele kucabanga ngetintfo letisenta sive buhlungu. Loku kungasisita kutsi sikhone kulawula indlela lesitiva ngayo ngisho nobe simo setfu singabi ncono ngekushesha.

⁹ Emihlanganweni yetfu yelibandla, banaketfu nabodzadze bayasidvudvuta, basikhombise nekutsi bayasitsandza futsi loko kusenta sitive sesincono. (1 Thes. 5:11, 14) Cabanga ngaloko lokwenteka kulomunye umzalwane lolihlahlandlela lelikhetsekile lowashonelwa ngumkakhe. Utsi: “Nanyalo solo ngisakhala. Ngalesinye sikhatsi ngihlala ekoneni ngikhale. Kodvwa imihlangano yetfu ingikhutsata kakhulu. Emavi lamnandzi lashiwo banaketfu nabodzadze angidvudvuta kakhulu. Ngisho nobe ngingaya emihlanganweni yelibandla ngikhatsatekile, kodvwa ngihlale ngitiva ngincono nasengikhonakhona.” Nasisemihlanganweni yelibandla, Jehova angasebentisa banaketfu nabodzadze kuze basisite.

10. Singasilingisa njani sibonelo saHana nangabe siselusizini?

¹⁰ Hana kwamdvudvuta nekutfulula sifuba sakhe kuJehova ngemthantazo. Nawe ‘ungaphonsa konkhe kukhatsateka’ kwakho kuJehova, futsi uciniseke kutsi utakulalela. (1 Phet. 5:7) Indvodza yalomunye dzadze yabulawa tigebengu lebetihlomile, futsi naku lakusho: “Ngeva ngatsi inhlitiyo yami iphihlike yaba ticucu letinyenti letincane, nekutsi beyingeke iphindze iphole. Ngatfola indvudvuto ngekuthantaza kuBabe wami wasezulwini longitsandzako Jehova. Ngalesinye sikhatsi bengingati kutsi ngiyichaze njani indlela lengitiva ngayo, kodvwa yena bekangicondza. Nangiselusizini lolukhulu, bengimcela kutsi angiphe kuthula. Ngekushesha nje ngemuva kwaloko, bengifikelwa kuthula kangangekutsi bengibese ngiyakhona kwenta loko lokufanele ngikwente ngalelo langa.” Nawutfulula sifuba sakho kuJehova umtjele loko lokukukhatsatako, tiyamtsintsa tinyembeti takho telusizi futsi uyabucondza buhlungu lobusenhlitiyweni yakho. Ngisho nobe lolokukukhatsatako kungachubeka kukhona, Jehova angakudvudvuta futsi akusite kutsi ube nekuthula lokusezingeni lelitsite. (Hla. 94:19; Fil. 4:6, 7) Ngetulu kwaloko, utakubusisa ngenca yekutsi uchubeka wetsembekile kuye njengobe ucinisela.​—Heb. 11:6.

TINYEMBETI TEKUDVUMATEKA

11. Timo letibuhlungu Davide labhekana nato tamenta wativa njani?

¹¹ Kuko konkhe kuphila kwaDavide, wabeketelela timo letimatima letamenta wakhala. Labanye bebamenyanya futsi waze wadvunyatwa nabantfu bekabetsemba. (1 Sam. 19:10, 11; 2 Sam. 15:10-14, 30) Ngalelinye lilanga wabhala watsi: “Sengiphelelwe ngemandla ngenca yekububula; busuku bonkhe umbhedze wami ngiwumantisa ngetinyembeti; umbhedze wami ngiwumantisa ngekukhala.” Yini leyenta Davide wativa ngalendlela? Watsi: “Ngenca yabo bonkhe labangihluphako.” (Hla. 6:6, 7) Tintfo letibuhlungu letentiwa ngulabanye tamvisa buhlungu kakhulu Davide kangangekutsi tinyembeti besetitehlela nje.

12. Njengobe kuvetiwe kuTihlabelelo 56:8, yini Davide bekaciniseka ngako?

¹² Ngetulu kwetinkinga Davide labhekana nato, bekaciniseka kutsi Jehova uyamtsandza. Wabhala watsi: “Jehova utangiva nangikhala.” (Hla. 6:8) Ngalelinye lilanga, Davide  wabhala emavi latsintsa inhlitiyo latfolakala kuTihlabelelo 56:8. (Fundza.) Lamavi aveta indlela Jehova lasitsandza ngayo nekutsi uyayinaka indlela lesitiva ngayo. Davide weva shengatsi Jehova wetsa tinyembeti takhe esikhwameni sesikhumba nobe utibhala encwadzini. Bekaciniseka kutsi Jehova uyabunaka buhlungu bakhe futsi uyabukhumbula. Bekaphindze aciniseka kutsi Babe wakhe wasezulwini lonelutsandvo bekangagcini nje ngekwati loko labhekene nako kodvwa bekati nendlela lebekumenta ative ngayo.

13. Yini lengasidvudvuta nangabe labanye basidvumata? (Buka nesitfombe.)

¹³ Lesikufundzako. Ucindzetelekile yini ngenca yekutsi udvunyatiwe nobe ujabhiswe ngumuntfu bewumetsemba? Mhlawumbe inhlitiyo yakho iyopha ngenca yekutsi uhlukene naloyo bewutsandzana naye nobe lebewushade naye ungakagadzi, nobe ngenca yekutsi lotsite lebewumtsandza uyekele kukhonta Jehova. Umfati walomunye umzalwane waphinga futsi wamshiya, lomzalwane utsi: “Ngamangala kakhulu, futsi angizange ngikholwe. Ngativa ngiyintfo lengenamsebenti, ngibuhlungu futsi ngitfukutsele.” Nangabe lotsite akudvumatile, akukudvudvute kwati kutsi Jehova akayuze akushiye. Lomzalwane uchubeka atsi: “Ngibonile kutsi budlelwane lobusemkhatsini webantfu bungaphela, kodvwa Jehova uliDvwala letfu. Ngisho nobe kungentekani, uyohlale akhona. Akayuze abashiye labetsembekile bakhe.” (Hla. 37:28) Khumbula nekutsi lutsandvo lwaJehova lulwendlula khashane lutsandvo lwebantfu. Nanobe kubuhlungu kudvunyatwa ngulotsite, loko akuyishintji indlela Jehova lativa ngayo ngawe, uligugu kuye. (Rom. 8:38, 39) Nali liphuzu: Ngisho nobe umuntfu akuphetse njani, Babe wakho wasezulwini uyakutsandza.

14. Tisicinisekisa ngani Tihlabelelo 34:18?

¹⁴ Nasidvunyatwe ngulotsite, angasidvudvuta emavi aDavide lakuTihlabelelo 34:18. (Fundza.) Lenye incwadzi yatsi labo “labephuke emoyeni” bangasho “labo labete lokuhle labangabuka phambili kuko.” Yini Jehova layentako ngalabo labativa ngaleyondlela ngenca yekutsi badvunyatwe ngulotsite? Njengemtali lonelutsandvo logodle umntfwana wakhe locindzeletekile futsi amdvudvute, Jehova “usedvute” natsi futsi uhlale akulungele kusivela nekusisita nangabe sidvunyatwe ngulotsite nobe silahlekelwe. Uyakulangatelela kusidvudvuta futsi abhandishe tinhlitiyo tetfu. Kunyenti lasetsembisa kona lesingabuka phambili kuko futsi lokusisita sibeketelele tinkinga lesibhekene nato nyalo.​—Isa. 65:17.

 TINYEMBETI TEKUPHELELWA LITSEMBA

15. Ngusiphi simo lesenta Hezekiya wakhala?

¹⁵ Ngesikhatsi iNkhosi Hezekiya yakaJuda ineminyaka lengu-39, yagula kakhulu. Umphrofethi Isaya wayitjela umlayeto lebewuvela kuJehova lotsi lokugula bekutayibulala. (2 Khos. 20:1) Bekubonakala kute litsemba ngaHezekiya. Acindzetelwe nguletindzaba, wakhala kakhulu. Wancenga Jehova kutsi amsite.​—2 Khos. 20:2, 3.

16. Jehova wenta njani ngesikhatsi Hezekiya amncenga akhala?

¹⁶ Jehova wamvela Hezekiya ngesikhatsi amncenga akhala, futsi ngemusa watsi kuye: “Ngiwuvile umthantazo wakho. Ngitibonile tinyembeti takho. Nyalo ngitakwelapha.” Asebentisa Isaya, ngemusa Jehova wetsembisa kwengeta emalanga akhe ekuphila nekukhulula iJerusalama esandleni sema-Asiriya.​—2 Khos. 20:4-6.

17. Jehova usisita njani nasigula kakhulu? (Tihlabelelo 41:3) (Buka nesitfombe.)

¹⁷ Lesikufundzako. Ugula kakhulu yini futsi kubonakala ngatsi lokugula kwakho angeke kuphele? Thantaza kuJehova umtjele indlela lotiva ngayo, utakulalela ngisho nobe uthantaza ukhala. LiBhayibheli liyasicinisekisa kutsi ‘Babe wemusa, naNkulunkulu wayo yonkhe indvudvuto’ utasidvudvuta nasinetinkinga. (2 Khor. 1:3, 4) Nalamuhla, angeke silindzele kutsi Jehova atisuse tonkhe tinkinga tetfu, kodvwa singaciniseka kutsi utasisita. (Fundza Tihlabelelo 41:3.) Asebentisa umoya wakhe longcwele, Jehova usipha emandla, kuhlakanipha nekuthula kuze sikhone kubhekana nato. (Taga 18:14; Fil. 4:13) Uphindze asisite asebentisa liBhayibheli lelisiniketa litsemba lekutsi konkhe kugula kutawuphela.​—Isa. 33:24.

18. Ngumuphi umbhalo lokudvudvutako nawubhekene netimo letimatima? (Buka libhokisi lelitsi “ Emavi Langasidvudvuta Nasikhala.”)

¹⁸ Hezekiya wadvudvutwa ngemavi aJehova. Natsi lingasidvudvuta liVi laNkulunkulu. Jehova usigcinele emavi ladvudvutako langasenta sitive sesincono nasibhekene netimo letimatima. (Rom. 15:4) Ngesikhatsi lomunye dzadze wasenshonalanga ne-Africa atjelwa kutsi unamdlavuza, bekavame kukhala. Utsi: “Lomunye umbhalo longidvudvutako ngu-Isaya 26:3. Nanobe ngalesinye sikhatsi singeke sikhone kulawula simo lesibhekene naso, lelivesi liyangicinisekisa kutsi Jehova angasinika kuthula lokungasisita silawule indlela lesenta ngayo nasibhekene naleto tinkinga.” Ukhona yini umbhalo lokudvudvutako nawubhekene netinkinga letimatima, mhlawumbe lokubonakala kute litsemba lekutsi titawuba ncono?

19. Nguliphi likusasa lelisimele?

¹⁹ Siphila emalangeni ekugcina futsi singalindzela  kutsi tintfo letisenta sikhale tibe tinyenti kakhulu. Kodvwa njengobe sibonile esibonelweni saHana, saDavide neseNkhosi Hezekiya, Jehova uyatibona tinyembeti tetfu futsi timvisa buhlungu. Uyasitsandza ngobe sihlale setsembekile kuye ngisho siva buhlungu. Uyatikhumbula tinyembeti tetfu. Ngako nasibhekene netimo leticindzetelako, sifuna kuthantaza kuJehova sitfulule tifuba tetfu kuye. Shengatsi singete satehlukanisa nebanaketfu nabodzadze labasitsandzako. Ngetulu kwaloko, asichubeke sitfola indvudvuto emavini laseBhayibhelini. Singaciniseka kutsi nangabe sichubeka setsembekile, Jehova utasibusisa. Letibusiso titawufaka ekhatsi setsembiso lesihle sekutsi utawusesula tinyembeti telusizi, tekudvunyatwa ngulotsite netekuphelelwa litsemba. (Semb. 21:4) Ngaleso sikhatsi, sitawube sesikhala tinyembeti tenjabulo kuphela.