1. Besibaluleke kanganani sinkhwa ngetikhatsi tekubhalwa kweliBhayibheli?

 SINKHWA besikudla lokubaluleke kakhulu kubantfu bangesikhatsi sekubhalwa kweliBhayibheli. (Gen. 14:18; Luk. 4:4) Ecinisweni besibaluleke kangangekutsi liBhayibheli belihle lisebentisa ligama lelitsi “sinkhwa” nalisho kudla. (Mat. 6:11) Jesu wasebentisa sinkhwa etimangalisweni takhe letimbili letatiwa kakhulu. (Mat. 16:9, 10) Lesinye saletimangaliso kukhulunywa ngaso kuJohane sehluko 6. Njengobe sitawube sikhuluma ngalesimangaliso, sitawufuna tifundvo lesingatisebentisa lamuhla.

2. Yini leyenta sicumbi sebantfu sadzinga kudla?

² Ngemuva kwekutsi baphostoli baJesu sebacedzile kushumayela, Jesu wahamba nabo ngesikebhe bewela Lwandle LwaseGalile kuze bayophumula. (Mak. 6:7, 30-32; Luk. 9:10) Befika endzaweni lengenamuntfu eBhethsayida. Kodvwa ngekushesha kwefika tinkhulungwane tebantfu tifuna kubona Jesu. Jesu wabanaka labantfu. Watinika sikhatsi sekubafundzisa ngeMbuso futsi welapha labagulako. Njengobe sikhatsi besesihambile, labafundzi bebatibuta kutsi labantfu labangaka batakutfola njani labangakudla. Kungenteka labanye bebanako kudla lokuncane lebebakuphetse, kodvwa linyenti labo bekutawudzingeka lihambe liye emadolobheni liyokutsenga. (Mat. 14:15; Joh. 6:4, 5) Yini Jesu lebekatawuyenta?

JESU WENTA TINKHWA NGALOKUSIMANGALISO

3. Yini Jesu layisho ngesikhatsi sicumbi sebantfu sidzinga kudla? (Buka sitfombe lesisekhasini lekucala.)

³ Jesu watjela baphostoli bakhe watsi: “Kute sidzingo sekutsi  [labantfu] bahambe; bapheni nine kudla.” (Mat. 14:16) Loku bekubonakala kuyintfo lengeke yenteke ngobe bekunemadvodza langaba ngu-5 000. Kantsi nakubalwa bafati nebantfwana, labantfu bebangaba ngu-15 000. (Mat. 14:21) Andreya watsi: “Nangu umfana lonetinkhwa tebhali letisihlanu netinhlanti letincane letimbili. Kodvwa loku kungasita ngani kubantfu labanyenti kangaka?” (Joh. 6:9) Tinkhwa tebhali betivame kudliwa bantfu labeswele kanye nalabanye nje bantfu, futsi letinhlanti letincane kungenteka betifakwe luswayi tabese tiyonyiswa. Nobe kunjalo, lokudla kwalomfana bekungeke kubenele labantfu labanyenti kangaka.

4. Yini lesingayifundza kuJohane 6:11-13? (Buka netitfombe.)

⁴ Ngenca yekutsi Jesu bekafuna kukhombisa umoya wekwemukela tivakashi, watjela labantfu kutsi bahlale etjanini ngemacembu. (Mak. 6:39, 40; fundza Johane 6:11-13.) Lendzaba itsi Jesu wabonga Babe wakhe ngaletinkhwa nangaletinhlanti. Bekukahle kubonga Nkulunkulu ngobe bekunguye uMtfombo walokudla. Loku kuyasikhumbuta kutsi silingise Jesu ngekutsi sithantaze ngaphambi kwekutsi sidle, kungaba kulapho sisodvwa nobe nasinalabanye. Jesu wabese utsi lokudla akuniketwe labantfu, futsi badla besutsa. Kwaba nalokusalako, futsi Jesu bekangafuni kulahlwe. Ngako watsi akubutfwe, mhlawumbe kuze kusetjentiswe esikhatsini lesitako. Jesu wasibekela sibonelo lesihle sekukusebentisa kahle loko lesinako. Nangabe ungumtali, kungaba njani nifundze lendzaba nebantfwana bakho futsi nicoce ngekutsi  nifundzani mayelana nemthantazo, kwemukela tivakashi nekupha.

5. Yini bantfu labayenta ngaloko Jesu lakwenta ngalelo langa, futsi Jesu wenta njani?

⁵ Labantfu tabamangalisa kakhulu letimangaliso taJesu nekutsi bekangumfundzisi lomuhle. Ngenca yekutsi bebati kutsi Mosi watsi Nkulunkulu utawuveta umphrofethi lokhetsekile, mhlawumbe bebatibuta: ‘Kungenteka yini kutsi Jesu ungulomphrofethi?’ (Dut. 18:15-18) Nangabe kunjalo, kungenteka bebacabanga kutsi utawuba ngumbusi lokahle, longakhona kuniketa sonkhe lesive kudla. Ngako lesicumbi besifuna ‘kumbamba kuze simente inkhosi.’ (Joh. 6:14, 15) Kube Jesu wakuvumela loko kutsi kwenteke, bekatawube usekela emaJuda kutepolitiki, lebekabuswa ngemaRoma. Wakwenta yini loko? Cha. Lendzaba itsi Jesu “waya entsabeni.” Ngako nanobe acindzetelwa ngulabanye, akazange atingenele tepolitiki. Lesi sifundvo lesihle!

6. Singakhombisa njani kutsi sifuna kulingisa Jesu? (Buka nesitfombe.)

⁶ Kuliciniso kutsi labanye ngeke basicele kutsi sandzise tinkhwa ngalokusimangaliso nobe selaphe labagulako; ngeke futsi betame kusenta inkhosi nobe umbusi. Kodvwa bangahle basicele kutsi singenele tepolitiki ngekutsi sivote nobe sisho kutsi sisekela lotsite lababona ngatsi utawenta kuphila kwabo kube ncono. Kodvwa sibonelo saJesu sicacile.  Wala kungenela tepolitiki, ngekuhamba kwesikhatsi waze watsi: “UMbuso wami awusiyo incenye yalelive.” (Joh. 17:14; 18:36) EmaKhristu lamuhla enta kahle ngekulingisa indlela Jesu bekacabanga ngayo nalenta ngayo. Sisekela uMbuso wakhe, sifakaze ngawo futsi siwuthantazele. (Mat. 6:10) Ase sibuyele kulendzaba yesimangaliso setinkhwa kuze sibone kutsi yini lenye lesingayifundza.

“SIFUNDVO KULESIMANGALISO SETINKHWA”

7. Yini Jesu nebaphostoli labayenta? (Johane 6:16-20)

⁷ Ngemuva kwekutsi Jesu anikete lesicumbi kudla, watjela baphostoli bakhe kutsi babuyele eKhaphanawume ngesikebhe, futsi yena waya entsabeni, lokwenta kutsi lesicumbi singakhoni kumenta inkhosi. (Fundza Johane 6:16-20.) Ngesikhatsi labaphostoli baseselwandle, kwaba nesivunguvungu lesikhulu, lokwenta kutsi kube nemagagasi layingoti. Jesu weta ngakubo ahamba etikwemanti. Watjela umphostoli Phetro kutsi naye ente lokufanako. (Mat. 14:22-31) Ngesikhatsi Jesu sekakulesikebhe, lesivunguvungu sabinza. Labafundzi bamangele, batsi: “Vele uyiNdvodzana yaNkulunkulu.” a (Mat. 14:33) Nobe kunjalo, abazange babone kutsi lesimangaliso bekasandza kusenta besihlangana njani nalesimangaliso bekasentele lesicumbi. Makho washo naku: “[Labaphostoli] bamangala kakhulu, ngobe bebangakasifundzi sifundvo kulesimangaliso setinkhwa lebekasentile, netingcondvo tabo betisolo tingacondzi.” (Mak. 6:50-52) Labafundzi behluleka kubona kutsi nguJehova lebekanikete Jesu emandla ekwenta letimangaliso. Kodvwa ngekushesha Jesu wabese ukhuluma ngalesimangaliso setinkhwa, futsi loko lakusho kusifundzisa lokutsite natsi lamuhla.

8-9. Yini leyenta lesicumbi safuna Jesu? (Johane 6:26, 27)

⁸ Lesicumbi lebesitfole kudla kuJesu besinake kakhulu kwenetisa tidzingo taso tesikhashana. Sisho ngani? Ngelilanga lelilandzelako, lesicumbi sabona kutsi Jesu nebaphostoli bakhe besebahambile. Ngako sagibela tikebhe letibuya eThibheriyase, futsi saya eKhaphanawume sayofuna Jesu. (Joh. 6:22-24) Loko sakwenta ngobe sifuna kuva lokunyenti yini ngeMbuso waNkulunkulu? Cha. Besicabanga kakhulu ngekudla. Sikwati njani loko?

⁹ Naka loko lokwenteka ngesikhatsi lesicumbi sitfola Jesu dvutane naseKhaphanawume. Jesu watjela labantfu kutsi bebamfuna kuze benetise tidzingo tabo tesikhashana. Watsi ‘bebadle tinkhwa futsi besutsa’ ‘kudla lokuphelako.’ Wabatjela kutsi basebentele “kudla lokuhlala kuze kube phakadze.” (Fundza Johane 6:26, 27.) Jesu watsi nguBabe wakhe longabaniketa lokudla. Kungenteka labantfu bamangala nabeva kutsi kunekudla lokungabenta baphile phakadze! Kudla lokunjani loko, futsi bebangakutfola njani?

10. Yini loku “lokwemukelwa nguNkulunkulu” labantfu lebekufanele bafundze ngako?

¹⁰ Kubonakala ngatsi lamaJuda eva ngatsi kufanele ente imisebenti letsite kuze akutfole lokudla. Kungenteka bewacabanga ngemisebenti lokukhulunywa ngayo eMtsetfweni waMosi. Nobe kunjalo, Jesu wawatjela watsi: “Nguloku lokwemukelwa nguNkulunkulu, kutsi nikholwe nguloyo lamtfumile.” (Joh. 6:28, 29) Bekufanele lamaJuda akholwe kuloyo Nkulunkulu bekamtfumile kuze “atfole kuphila lokuphakadze.” Ecinisweni Jesu bekakile wakhuluma ngalendzaba. (Joh. 3:16-18,  36) Ngekuhamba kwesikhatsi, bekasetawuchubeka akhulume ngekutsi singakutfola njani kuphila lokuphakadze.​—Joh. 17:3.

11. EmaJuda akhombisa njani kutsi bekanake kakhulu kutfola sinkhwa mbamba? (Tihlabelelo 78:24, 25)

¹¹ LamaJuda akazange akwemukele loko Jesu lawafundzisa kona mayelana naloko “lokwemukelwa nguNkulunkulu.” Ambuta atsi: “Ngusiphi simangaliso lotawusenta kuze sisibone bese siyakholwa kuwe?” (Joh. 6:30) Amtjela kutsi bokhokho bawo ngesikhatsi saMosi bebatfole imana, lesingayifananisa nesinkhwa. (Neh. 9:15; fundza Tihlabelelo 78:24, 25.) Kusebaleni kutsi bewasolo acabanga ngekutfola sinkhwa mbamba. Ehluleka nekubuta Jesu kutsi bekasho kutsini nakakhuluma ‘ngesinkhwa sibili lesivela ezulwini,’ lebesehlukile kunemana ngobe sona besingawanika kuphila lokuphakadze. (Joh. 6:32) Bewanake kakhulu kwenetisa tidzingo tawo tesikhashana kunekunaka loko Jesu beketama kuwafundzisa kona mayelana nekutfola kuphila lokuphakadze. Yini lesingayifundza kulendzaba?

LOKUFANELE SIKUNAKE KAKHULU

12. Jesu wakhombisa njani kutsi yini lebaluleke kakhulu?

¹² Nasi sifundvo lesibalulekile lesisifundza kuJohane sehluko 6. Kufanele sinake kakhulu kulalela Nkulunkulu nekuba nebuhlobo lobuhle naye. Khumbula kutsi Jesu wakwenta kwacaca loko ngesikhatsi alingwa nguSathane. (Mat. 4:3, 4) ENshumayelweni yakhe yaseNtsabeni, wagcizelela kakhulu kutsi umuntfu kufanele anake kakhulu sidzingo sakhe sekwati Nkulunkulu. (Mat. 5:3) Ngako natsi singatibuta: ‘Indlela lengiphila ngayo iyakhombisa yini kutsi nginake kakhulu buhlobo bami naJehova kunekwenetisa tidzingo tami tesikhashana?’

13. (a) Sisho ngani kutsi akusikubi kujabulela kudla? (b) Ngusiphi secwayiso lokufanele sisinake? (1 KubaseKhorinte 10:6, 7, 11)

¹³ Akusikubi kuthantazela tintfo lesitidzingako futsi sitijabulele. (Luk. 11:3) Kusebenta kamatima kwenta kutsi ‘sidle, sinatse,’ sijabule futsi loko “kuvela esandleni saNkulunkulu weliciniso.” (Shu. 2:24; 8:15; Jak. 1:17) Kodvwa kufanele sicaphele, singavumeli kutsandza tintfo kubaluleke kakhulu ekuphileni kwetfu. Umphostoli Pawula wakugcizelela loku ngesikhatsi abhalela emaKhristu lebekaphila ngesikhatsi sekutawubhujiswa iJerusalema nelithempeli. Wakhuluma ngetintfo lebetenteke kuma-Israyeli, lokufaka ekhatsi loko bekwenteke ngaseNtsabeni iSinayi. Wecwayisa lamaKhristu kutsi ‘angatifisi tintfo letimbi, njengobe [ema-Israyeli] atifisa.’ (Fundza 1 KubaseKhorinte 10:6, 7, 11.) Ema-Israyeli avumela sifiso sawo sekutfola kudla senta naletimangaliso taJehova tekuwapha kudla taba ‘yintfo lembi.’ (Num. 11:4-6, 31-34) Ngesikhatsi akhonta litfole leligolide, akhombisa kutsi bekanendzaba nekudla, kunatsa nekuba nesikhatsi lesimnandzi kunekutsi alalele Jehova. (Eks. 32:4-6) Pawula wasebentisa letibonelo kuze ecwayise emaKhristu lebekaphila nasekusondzele kubhujiswa kweJerusalema nelithempeli nga-70 C.E. Natsi siphila ngasekupheleni kwalelive, ngako sitawube senta kahle ngekusinakisisa leseluleko saPawula.

14. Yini liBhayibheli leliyishoko mayelana nekudla eveni lelisha?

¹⁴ Ngesikhatsi Jesu akhuluma ‘ngesinkhwa setfu salamuhla,’ wakhuluma ngesikhatsi lapho intsandvo yaNkulunkulu itawentiwa “emhlabeni njengasezulwini.” (Mat. 6:9-11) Yini lefika engcondvweni yakho nawucabanga ngaloku? LiBhayibheli liveta kutsi intsandvo yaNkulunkulu emhlabeni ifaka ekhatsi  kudla lokumnandzi. Isaya 25:6-8 usitjela kutsi kutawuba nekudla lokunyenti lesitakujabulela nasesibuswa nguMbuso waJehova. Tihlabelelo 72:16 titsi: “Kutawuba nenala yekudla emhlabeni; kube kunyenti ngisho naseticongweni tetintsaba.” Ukubuke ngalabovu yini kupheka kudla lokutsandzako nobe kwetama kupheka kudla longazange sewukupheke? Ngetulu kwaloko, utawuhlanyela tihlahla temagilebisi futsi udle titselo tato. (Isa. 65:21, 22) Lokuhle kakhulu kutsi utawube ungasiwedvwa.

15. Nguluphi luhlelo lolutawuba khona nakuvuswa labafile? (Johane 6:35)

¹⁵ Fundza Johane 6:35. Yini lelindzele labo labadla letinkhwa netinhlanti labatinikwa nguJesu? Nasekuvuswa labafile, kungenteka uhlangane nalabanye babo. Ngisho nobe esikhatsini lesendlulile bangazange babe nekukholwa, kungenteka bavuswe. (Joh. 5:28, 29) Labantfu kutawudzingeka bafundze kutsi bekasho kutsini emavi aJesu latsi: “Mine ngisinkhwa sekuphila. Loyo lota kimi ngeke kwenteke alambe.” Kutawudzingeka bakholwe enhlawulweni yaJesu, nekutsi wanikela ngekuphila kwakhe ngenca yabo. Ngaleso sikhatsi, kutawuba neluhlelo lwekubafundzisa liciniso ngaJehova nangenjongo yakhe labo labavusiwe kanye nebantfwana labatawutalwa. Kutawujabulisa kakhulu kufaka sandla kuloluhlelo! Kwenta lomsebenti kutakujabulisa kakhulu kwendlula kudla sinkhwa mbamba. Tintfo letitakujabulisa kakhulu kutawuba kwenta tintfo letiphatselene naNkulunkulu.

16. Sitawucoca ngani esihlokweni lesilandzelako?

¹⁶ Sesicoce ngendzaba lekuJohane sehluko 6, kodvwa kunyenti Jesu lakufundzisa ‘ngekuphila lokuphakadze.’ EmaJuda bekufanele akunake loko lakusho, futsi natsi kufanele sente njalo. Esihlokweni lesilandzelako, sitawuchubeka sicoce ngaJohane sehluko 6.