1. Labanye bantfu bangahle bative njani ngekuphila kuze kube phakadze?

 BANTFU labanyenti bayakugadza loko labakudlako futsi betama kuhlala bajima kuze bahlale baphilile. Nobe kunjalo, abakalindzeli kutsi batawuphila kuze kube phakadze. Kufuna loko kungasho kufuna intfo lengeke yenteke nalengatsandzeki ngenca yetinkinga letibangelwa kukhula ngeminyaka. Nobe kunjalo, Jesu wakhuluma kahle ‘ngekuphila lokuphakadze,’ njengobe kuvetiwe kuJohane 3:16 naku–5:24.

2. Johane sehluko 6 utsini ngekuphila lokuphakadze? (Johane 6:39, 40)

² Ngalelinye lilanga, Jesu wanika sicumbi sebantfu tinkhwa netinhlanti lebekatente ngalokusimangaliso. a Loku bekumangalisa, kodvwa loko lakusho ngelilanga lelilandzelako kwamangalisa kakhulu. Lesicumbi besimlandzele saya eKhaphanawume, dvutane neLwandle LwaseGalile, futsi kulapho lasitjela khona kutsi bantfu labafile bangavuswa futsi baphile phakadze. (Fundza Johane 6:39, 40.) Cabanga nje kutsi loko kungasho kutsini kubangani bakho nakumalunga emndeni wakho lashonile. Emavi aJesu akhombisa kutsi bantfu labanyenti labafile bangavuswa futsi wena nebantfu lobatsandzako ningaphila phakadze. Nobe kunjalo, labanyenti bakutfole kumatima kucondza lamavi aJesu lakuJohane sehluko 6. Asesiwahlolisise.

3. Ngekusho kwaJohane 6:51, yini Jesu layisho ngaye?

 ³ Lesicumbi lebesiseKhaphanawume sakubona kufana emkhatsini waletinkhwa lebesitinikwe nguJesu kanye nemana Jehova lebekayinikete bokhokho baso. Ecinisweni, liBhayibheli libita lemana ngekutsi “sinkhwa lesivela ezulwini.” (Hla. 105:40; Joh. 6:31) Jesu wasebentisa lemana kuze ibe sisekelo saloko labese uyakufundzisa. Nanobe lemana beyikudla lokuvela kuNkulunkulu ngalokusimangaliso, labo labayidla bagcine bafile. (Joh. 6:49) Ngalokwehlukile, Jesu watibita ngekutsi ‘usinkhwa sibili lesivela ezulwini’ nangekutsi ‘usinkhwa lesivela kuNkulunkulu’ nangekutsi ‘usinkhwa sekuphila.’ (Joh. 6:32, 33, 35) Jesu washo umehluko lobalulekile emkhatsini walemana kanye naye. Watsi: “Mine ngingulesinkhwa sekuphila lesivela ezulwini; nangabe umuntfu asidla utawuphila phakadze.” (Fundza Johane 6:51.) LamaJuda adideka. Bekungenteka njani kutsi Jesu atsi yena ‘usinkhwa’ lesivela ezulwini, lesincono kunalemana Nkulunkulu lebekayinikete bokhokho bawo? Jesu wabese utsi: “Inyama yami ingulesinkhwa lengitaninika sona.” Bekasho kutsini? Kubalulekile kutsi siwacondze lamavi ngobe imphendvulo itasikhombisa kutsi tsine nalabo lesibatsandzako singakutfola njani kuphila lokuphakadze. Ase sibone kutsi Jesu bekasho kutsini.

SINKHWA SEKUPHILA NENYAMA YAKHE

4. Yini leyenta labanye bamangala ngaloko Jesu lakusho?

⁴ Labanye bamangala kakhulu nabeva Jesu atsi utawunikela ‘ngenyama yakhe kuze bantfu batfole kuphila.’ Bebacabanga kutsi utawunikela ngemtimba wakhe yini kuze bantfu bawudle, lokusho kutsi babe ngemazimu? (Joh. 6:52) Naka naku Jesu labese uyakusho lokwabamangalisa kakhulu: “Ngaphandle kwekutsi nidle inyama yeNdvodzana yemuntfu, ninatse nengati yayo, nite kuphila.”​—Joh. 6:53.

5. Yini lesenta siciniseke kutsi Jesu bekangatjeli labantfu kutsi banatse ingati yakhe mbamba?

⁵ Ngemalanga aNowa, Nkulunkulu watjela bantfu kutsi bangayidli ingati. (Gen. 9:3, 4) Jehova waphindze wakusho loko eMtsetfweni lawunika ema-Israyeli. Nobe ngubani lodla ingati ‘bekufanele abulawe.’ (Lev. 7:27) Jesu bekawuhlonipha loMtsetfo. (Mat. 5:17-19) Ngako bekangeke akhutsate lesicumbi semaJuda kutsi sidle inyama yakhe mbamba nobe sinatse ingati yakhe. Nanobe kunjalo, ngalamavi lamangalisako, Jesu bekafundzisa labantfu indlela yekutfola kuphila, ‘lokukuphila lokuphakadze.’​—Joh. 6:54.

6. Kufanele siwacondze njani emavi aJesu lamayelana nekudla inyama yakhe nekunatsa ingati yakhe?

⁶ Bekatsini Jesu? Kusebaleni kutsi emavi aJesu bekungakafaneli atsatfwe njengobe anjalo, njengobe nje naloko lebekakushito kulomunye umfati waseSamariya bekungakafaneli kutsatfwe njengobe kunjalo, nakatsi: “Nobe ngubani lonatsa emanti lengitamnika wona ngeke aphindze ome, ngobe lamanti lengitamnika wona atawuba njengemtfombo lophuphumako, amnike kuphila lokuphakadze.” (Joh. 4:7, 14) b Jesu bekangasho kutsi lomfati longumSamariya utawutfola kuphila lokuphakadze ngekutsi anatse luhlobo lolutsite lwemanti. Ngendlela lefanako, bekangasho kutsi lesicumbi lebekakhuluma naso eKhaphanawume sitawutfola kuphila lokuphakadze nangabe sidla umtimba wakhe mbamba futsi sinatsa nengati yakhe mbamba.

 UMEHLUKO WALOKO LAKUSHO ETIMENI LETIMBILI

7. Yini labanye labayishoko mayelana nemavi aJesu lakuJohane 6:53?

⁷ Labanye bantfu benkholo batsi emavi aJesu lakuJohane 6:53 lamayelana nekudla inyama yakhe nekunatsa ingati yakhe, kuchaza loko lokufanele sikwente nakuSidlo SeNkhosi Sakusihlwa ngobe ngalomkhosi Jesu wasebentisa emagama lacishe afane. (Mat. 26:26-28) Batsi bonkhe bantfu lababa khona nakuSidlo SeNkhosi Sakusihlwa kufanele badle sinkhwa futsi banatse liwayini, lokwendluliswa kulabo labakhona. Kuliciniso yini loko? Kubalulekile kutsi sifune emaciniso alendzaba ngobe njalo ngemnyaka tigidzi tebantfu emhlabeni wonkhe tiba kanye natsi kulomkhosi. Sitawubuka umehluko lokhona emkhatsini waloko lokushiwo nguJohane 6:53 naloko lokwashiwo nguJesu ngeSidlo SeNkhosi Sakusihlwa.

8. Ngukuphi kungafani lokukhona emkhatsini waletimo letimbili? (Buka netitfombe.)

⁸ Asesicoce ngemehluko lokhona kuletimo letimbili. Kwekucala, Jesu wawasho nini futsi kuphi emavi lakuJohane 6:53-56? Wawatjela sicumbi semaJuda lebesiseGalile nga-32 C.E. Bekusesele umnyaka ngaphambi kwekutsi acalise Sidlo SeNkhosi Sakusihlwa eJerusalema. Kwesibili, bekakhuluma nabobani? Linyenti lalabo bebamlalele eGalile belinendzaba nekutfola kudla kuJesu kunekwenetisa  tidzingo tabo tekwati Nkulunkulu. (Joh. 6:26) Ecinisweni, ngesikhatsi Jesu abatjela intfo lebebangayicondzi, ngekushesha bayekela kuba nekukholwa kuye. Ngisho nalabanye bafundzi bakhe bayekela kumlandzela. (Joh. 6:14, 36, 42, 60, 64, 66) Loko kucatsanise naloko lokwenteka ngemuva kwemnyaka nga-33 C.E. ngesikhatsi Jesu acalisa Sidlo SeNkhosi Sakusihlwa. Kuleso sikhatsi, baphostoli bakhe labangu-11 labetsembekile bebanaye nanobe bebangakucondzi kahle konkhe loko bekakufundzisa. Ngalokungafani nalabanyenti lebebaseGalile, labaphostoli bakhe labetsembekile bebaciniseka kutsi Jesu uyiNdvodzana yaNkulunkulu leyehla ivela ezulwini. (Mat. 16:16) Wabancoma watsi: “Nine benisolo ninami kuko konkhe kuhlupheka kwami.” (Luk. 22:28) Lomehluko uyakhombisa kutsi kuJohane 6:53 Jesu bekangetami kuchaza loko lokutawenteka ngeSidlo SeNkhosi Sakusihlwa. Ngetulu kwaloko, kunalobunye bufakazi.

EMAVI AJESU ASHO KUTSINI KUWE?

9. Bekabhekiselwe kubobani emavi lashiwo nguJesu ngeSidlo SeNkhosi Sakusihlwa?

⁹ Ngesikhatsi seSidlo SeNkhosi Sakusihlwa, Jesu wanika baphostoli bakhe sinkhwa lesite imvubelo futsi wabatjela kutsi simelela umtimba wakhe. Wabese ubanika liwayini futsi watsi limelela ‘ingati yakhe yesivumelwane.’ (Mak. 14:22-25; Luk. 22:20; 1 Khor. 11:24) Loko bekubaluleke kakhulu. Lesivumelwane wasibita ngekutsi ‘sivumelwane lesisha,’ futsi ngulabo labatawubusa naye eMbusweni waNkulunkulu labakulesivumelwane, akusibo bonkhe bantfu. (Heb. 8:6, 10; 9:15) Labaphostoli abazange bakucondze loko ngaleso sikhatsi, kodvwa ngekushesha bebatawugcotjwa ngemoya longcwele futsi babe sesivumelwaneni lesisha, kuze babe naJesu ezulwini.​—Joh. 14:2, 3.

10. Loko Jesu lakusho eGalile bekwehluke njani kuloko lakusho ngeSidlo SeNkhosi Sakusihlwa? (Buka nesitfombe.)

¹⁰ Naka kutsi ngeSidlo SeNkhosi Sakusihlwa, Jesu bekakhuluma ‘nemhlambi lomncane.’ Lelicembu lacala ngebaphostoli bakhe labetsembekile lebebanaye kulelikamelo. (Luk. 12:32) Bona kanye nalabanye lebebatawakha lelicembu bekulindzeleke kutsi badle lesinkhwa futsi banatse leliwayini. Ngibo labatawuba naJesu ezulwini. Lona ngulomunye umehluko lokhona emkhatsini waloko Jesu lakusho ngesikhatsi seSidlo SeNkhosi Sakusihlwa naloko lakusho eGalile. Loko lakusho ngeSidlo SeNkhosi Sakusihlwa bekakukhuluma nebaphostoli bakhe, kantsi emavi lawasho eKhaphanawume bekawatjela sicumbi sebantfu.

11. Yini Jesu layisho eGalile lekhombisa kutsi bekangakhulumi nelicembu lelincane?

¹¹ Ngesikhatsi Jesu aseGalile nga-32 C.E., ngalokuyinhloko bekakhuluma nemaJuda lebekafuna awanike sinkhwa. Nobe kunjalo, wawasita kutsi anake kakhulu lokutsite lebekutawasita kakhulu kwendlula kudla. Wakhuluma ngentfo lebeyingawasita kutsi atfole kuphila lokuphakadze. Jesu watsi labo labafile bangavuswa ngelilanga lekugcina futsi baphile kuze kube phakadze. Bekangakhulumi nalabambalwa labakhetsiwe, lokulicembu lelincane, njengobe enta ngekuhamba kwesikhatsi ngeSidlo SeNkhosi Sakusihlwa. Kunaloko, eGalile bekakhuluma ngesibusiso lesitawutfolwa ngibo bonkhe bantfu. Ecinisweni watsi: “Nangabe umuntfu asidla [lesinkhwa] utawuphila phakadze . . . Inyama yami ingulesinkhwa lengitaninika  sona kuze bantfu batotfola kuphila.”​—Joh. 6:51. c

12. Yini ledzingekako kuze sitfole lesibusiso Jesu bekakhuluma ngaso?

¹² Jesu akazange atjele lamaJuda lebekaseGalile kutsi lesibusiso besitawutfolwa nguwo wonkhe umuntfu loke waphila nobe lotake atalwe. Kodvwa besitawutfolwa ngulabo ‘labadla lesinkhwa,’ lokungulabo labanekukholwa. Bantfu labanyenti labatsi bangemaKhristu bacabanga kutsi batawusindziswa ngekutsi nje ‘bakholwe [kuJesu]’ futsi bavume kutsi ungumsindzisi wabo. (Joh. 6:29, King James Version) Nanobe kunjalo, labanye kulesicumbi bebake bakholwa kuJesu kodvwa babese bayamshiya. Bamshiyelani?

13. Yini ledzingekako kuze umuntfu abe ngumfundzi waJesu weliciniso?

¹³ Labanyenti kulesicumbi bebakujabulela kulandzela Jesu kuphela nje nakatabanika loko labakufunako. Bebanendzaba kakhulu nekutsi abelaphe ngalokusimangaliso, abanike kudla kwamahhala, futsi abatjele loko labafuna kukuva. Nobe kunjalo, Jesu wakhombisa kutsi kunyenti lokulindzelekile kuze umuntfu abe ngumfundzi wakhe weliciniso. Bekangaketi emhlabeni kuze nje anikete bantfu loko labakufunako. Bekufanele bavume ‘kuta kuye’ ngekutsi bakwemukele konkhe loko labafundzisa kona futsi bakulalele.​—Joh. 5:40; 6:44.

14. Yini lokufanele siyente kuze usisite umtimba waJesu nengati yakhe?

¹⁴ Jesu wagcizelela kulesicumbi kutsi bekufanele sibe nekukholwa. Sibe nekukholwa  kuphi? Sibe nekukholwa kutsi kunikela ngenyama yakhe nangengati yakhe bekutawenta kutsi baphile phakadze. Bekubalulekile kutsi lamaJuda akukhombise lokukholwa, futsi kubalulekile nalamuhla. (Joh. 6:40) Kuze umtimba waJesu nengati yakhe kusisite, njengobe kusho Johane 6:53, kufanele sibe nekukholwa enhlawulweni. Lesibusiso singatfolwa bantfu labanyenti kakhulu.​—Ef. 1:7.

15-16. Ngutiphi tintfo letibalulekile lesitifundza kuJohane sehluko 6?

¹⁵ Lendzaba lekuJohane sehluko 6 ibaluleke kakhulu kitsi nakubantfu lesibatsandzako. Ikhombisa indlela Jesu lativa ngayo ngebantfu. NakaseGalile, welapha labagulako, wafundzisa ngeMbuso waNkulunkulu futsi wanika bantfu kudla njengobe bebakudzinga. (Luk. 9:11; Joh. 6:2, 11, 12) Lokubaluleke kakhulu, wafundzisa kutsi ‘usinkhwa sekuphila.’​—Joh. 6:35, 48.

¹⁶ Labo lababita ngekutsi ‘nguletinye timvu,’ abasidli lesinkhwa futsi abalinatsi leliwayini njalo ngemnyaka nakuSidlo SeNkhosi Sakusihlwa, futsi akukafaneli bakwente loko. (Joh. 10:16) Nobe kunjalo, bayazuza kulenyama yaJesu Khristu nasengatini yakhe ngekutsi bakhombise kukholwa enhlawulweni yakhe nakuloko labatakutfola ngenca yalenhlawulo. (Joh. 6:53) Ngalokwehlukile, labo labadla lesinkhwa futsi banatse leliwayini bakhombisa kutsi basesivumelwaneni lesisha njengobe batindlalifa teMbuso wasezulwini. Ngako, ngisho nobe sigcotjiwe nobe singemalunga aletinye timvu, lendzaba lekuJohane sehluko 6 ibaluleke kakhulu kutsi sifundze kuyo. Isifundzisa kutsi sonkhe kufanele sibe nekukholwa lokucinile enhlawulweni kuze siphile phakadze.