Utifundze ngekucophelela yini tihloko letiku-Sicongosekulindza salomnyaka? Buka kutsi ungakhona yini kuphendvula lemibuto lelandzelako:

Ngusiphi sibonelo Jehova lasibekela sona endleleni yekuphatsa besifazane?

Ubaphatsa ngendlela lefanako, akasho kutsi emadvodza ancono kunebafati. Nkulunkulu uyabalalela besifazane, unendzaba nendlela labativa ngayo nangaloko lokubakhatsatako. Ngetulu kwaloko, uyabetsemba kutsi bangawenta umsebenti wakhe.​—w24.01, emakh. 15-16.

Singawusebentisa njani umbhalo waKubase-Efesu 5:7 lotsi: “Ningahlanganyeli nabo”?

Umphostoli Pawula bekasecwayisa kutsi singatihlanganisi nebantfu labatawenta kutsi kube lukhuni kutsi silalele imitsetfo yaNkulunkulu. Labantfu bangafaka ekhatsi labo lesicitsa sikhatsi nabo sibonana kanye nalabo lesicoca nabo etinhlelweni tekuchumana.​—w24.03, emakh. 22-23.

Ngutiphi tindzaba letingemanga lokufanele sitigweme?

Kufanele siticaphele tindzaba letingakahlolisiswa letivela kubangani labangakahlosi lokubi, kuma-email lesingakawagadzi labuya kubantfu lesingabati, kanye nakulabo labatihlubuki letenta ngatsi tifuna kuva umlayeto wetfu.​—w24.04, likh. 12.

Yini lesiyatiko nalesingayati mayelana nendlela Jehova latawehlulela ngayo iNkhosi Solomoni kanye nalabo labafa eSodoma naseGomora nangesikhatsi saZamcolo?

Angeke sifunge sigomele kutsi Jehova ngeke aze abavuse. Nobe kunjalo, siyati kutsi wati konkhe futsi unemusa lomkhulu.​—w24.05, emakh. 3-4.

Kusicinisekisa ngani kutsi Nkulunkulu “uLidvwala”? (Dut. 32:4)

Singakhosela kuJehova. Wetsembekile, uhlale atigcina tetsembiso takhe. Akashintji, akayuze ashintje bunguye bakhe netinjongo takhe.​—w24.06, emakh. 26-28.

Yini letakusita kutsi wetayele libandla lelisha?

Yetsembela kuJehova lotakusita, njengobe asita netikhonti takhe esikhatsini lesendlulile. Ungacatsanisi libandla lokulo nalelo losuka kulo. Hlale umatasa ebandleni lesewukulo futsi wakhe bangani labasha.​—w24.07, emakh. 26-28.

Ngutiphi tifundvo letitfolakala emifanekisweni yaJesu lemitsatfu lekuMatewu sehluko 25?

Umfanekiso lomayelana netimvu netimbuti ugcizelela kutsi kubalulekile kutsi setsembeke. Umfanekiso lomayelana netintfombi letihlakaniphile naletilibele ugcizelela kutsi kufanele sihlale silungele futsi siphapheme. Kantsi umfanekiso wemathalenta ugcizelela kutsi kubalulekile kutsi sikhutsale futsi sisebente ngekutimisela.​—w24.09, emakh. 20-24.

Beliphakeme kangakanani livulandi lelithempeli lebelakhiwe nguSolomoni?

Ku-2 Tikhronike 3:4, leminye imibhalo yesandla beyitsi “belingemakhyubhitha langu-120,” lokwenta kutsi liphakame ngemamitha langu-53. Kodvwa leminye imibhalo leyetsenjwako itsi ‘belingemakhyubhitha langu-20,’ lokwenta kutsi liphakame ngemamitha langu-9. Loku kubonakala kuliciniso nawubuka bubanti belubondza lwalelithempeli.​—w24.10, likh. 31.

Kusho kutsini kutsi inceku lesebentako kufanele ibe “yindvodza lenemfati munye”? (1 Thim. 3:12)

Kusho kutsi kufanele ibe nemfati munye futsi akukafaneli itiphatse kabi. Ngetulu kwaloko, akukafaneli itisondzete kakhulu kulabanye besifazane.​—w24.11, likh. 19.

Yini lesenta sitsi Johane 6:53 bekangasho loko lokufanele kwentiwe ngeSidlo SeNkhosi Sakusihlwa?

Johane 6:53 ukhuluma ngekutsi kufanele sidle inyama yaJesu futsi sinatse nengati yakhe. Jesu wakhuluma lamavi nga-32 C.E., eGalile, kumaJuda lebekusadzingeka akholwe kuye. Kodvwa Sidlo SeNkhosi Sakusihlwa sacaliswa eJerusalema ngemuva kwemnyaka kwenteke loku. Ngalesikhatsi acalisa lomkhosi bekakhuluma nalabo labatawubusa naye ezulwini.​—w24.12, emakh. 10-11.