1. Yini Jesu layitjela bafundzi bakhe mayelana nesikhatsi sekuphela, futsi ngusiphi secwayiso labaniketa sona?

 NASEKUSELE emalanga lambalwa ngaphambi kwekutsi Jesu afe, bafundzi bakhe labane bambuta batsi: ‘Sitawubona ngani kutsi sesikhatsi sekuphela kwalelive?’ (Mat. 24:3) Kungenteka labafundzi bebafuna kwati kutsi batawubona ngani kutsi iJerusalema nelithempeli sekutawubhujiswa. Nakabaphendvula, Jesu akagcinanga nje ngekubatjela ngekubhujiswa kweJerusalema nelithempeli, kodvwa wabatjela ‘nangekuphela kwalelive’ lesiphila kulo. Mayelana nesikhatsi sekuphela kwalelive, Jesu watsi: “Macondzana nalelolanga neli-awa, kute lowatiko, tingilosi ezulwini atati ngisho neNdvodzana ayati, kodvwa nguBabe kuphela lowatiko.” Wabese wecwayisa bonkhe bafundzi bakhe kutsi ‘bahlale bacaphele futsi bahlale balindzile.’—Mak. 13:32-37.

2. Bekubaluleke ngani kutsi emaKhristu ekucala ahlale acaphele?

² EmaKhristu ekucala langemaJuda bekufanele ahlale acaphele; loko bekubalulekile kuze asindzise kuphila kwawo. Jesu watjela balandzeli bakhe kutsi yini lebebatawubona ngayo kutsi iJerusalema beseyitawubhujiswa. Watsi: “Nanibona iJerusalema itungeletwe ngemabutfo, nibowati kutsi sekusedvute kutsi ibhujiswe.” Ngaleso sikhatsi, bekufanele balalele secwayiso saJesu futsi ‘babalekele etintsabeni.’ (Luk. 21: 20, 21) Labo labasilalela lesecwayiso basindza ngesikhatsi emaRoma abhubhisa iJerusalema.

3. Yini lesitawucoca ngayo kulesihloko?

³ Lamuhla siphila emalangeni ekugcina alelive lelibi. Ngako natsi kufanele sihlale sisangulukile futsi sicaphele. Kulesihloko, sitawucoca ngekutsi singahlala njani sinembono lokahle nasibuka tintfo letentekako emhlabeni, singahlala njani siticaphele nekutsi singasisebentisa njani kahle sikhatsi lesisele.

4. Yini lesenta sibe nendzaba nekutsi tintfo letentekako kulelive tisigcwalisa njani siphrofetho seliBhayibheli?

⁴ Sinetizatfu letivakalako letisenta sibe nendzaba nekutsi lokwentekako kulelive kusigcwalisa njani siphrofetho seliBhayibheli. Sibonelo nje, Jesu washo tintfo lebetitawukwenteka lebetitasisita sibone kutsi kubhujiswa kwalelive laSathane sekusedvute. (Mat. 24:3-14) Umphostoli Phetro wasikhutsata kutsi sinake kugcwaliseka kwesiphrofetho kuze kukholwa kwetfu kuhlale kucinile. (2 Phet. 1:19-21) Livesi lekucala encwadzini yekugcina yeliBhayibheli litsi: “Lesi sembulo saJesu Khristu, Nkulunkulu lamnika sona kuze akhombise tinceku takhe tintfo letitawenteka masinyane.” (Semb. 1:1) Ngako sinendzaba netintfo letentekako kulelive futsi siyafuna kwati kutsi tisigcwalisa njani siphrofetho seliBhayibheli. Ngetulu kwaloko, kungenteka siyakutsandza kucoca ngako nalabanye.

5. Yini lokufanele siyigweme, kodvwa yini lokufanele siyente? (Buka titfombe.)

⁵ Nangabe sicoca ngetiphrofetho teliBhayibheli kufanele sikugweme kucagela kutsi kutakwentekani. Leni? Ngobe asifuni kusho intfo letawukwenta kubebete bunye ebandleni. Sibonelo nje, kungenteka sive baholi bemave bakhuluma ngekutsi bangakucatulula njani kungevani lokutsite futsi baletse kuthula nekulondzeka. Kunekutsi sicagele kutsi emavi lanjalo agcwalisa siphrofetho lesiku-1 KubaseThesalonika 5:3, kufanele sihambisane nekwatiswa kwakamuva lokushicilelwe. Nangabe sicoca ngetintfo letishicilelwe yinhlangano yaJehova, sitawukwenta kutsi libandla lihlale ‘licabanga ngendlela lefanako.’—1 Khor. 1:10; 4:6.

6. Ngutiphi tifundvo lesititfola ku-2 Phetro 3:11-13?

⁶ Fundza 2 Phetro 3:11-13. Umphostoli Phetro usisita kutsi sibe nembono lokahle nasicabanga ngesiphrofetho seliBhayibheli. Usikhutsata kutsi “sihlale sikukhumbula kuba khona kwelilanga laJehova.” Leni? Sizatfu saloko akusiko kutsi sifuna kwati ‘lilanga neli-awa’ Jehova latawuletsa ngalo i-Amagedoni, kodvwa kungenca yekutsi sifuna kusebentisa sikhatsi lesisele kuze ‘kutiphatsa kwetfu kube ngcwele futsi sikhombise kutsi sitinikele kuNkulunkulu.’ (Mat. 24:36; Luk. 12:40) Ngalamanye emavi, sifuna kutiphatsa kahle futsi siciniseke kutsi konkhe lesikwentela Jehova sikwenta ngobe simtsandza kakhulu. Kuze sikhone kukwenta loku, kufanele sihlale siticaphele.

7. Sikhombisa njani kutsi siticaphele? (Lukha 21:34)

⁷ Jesu watjela balandzeli bakhe kutsi bangagcini nje ngekunaka loko lokwentekako kulelive kodvwa watsi nabo baticaphele. Leliphuzu livetwe kahle kulesecwayiso lesibhalwe kuLukha 21:34. (Fundza.) Naka emavi aJesu latsi: “Ticapheleni nine.” Umuntfu loticaphelako uhlale agadze ingoti lengalimata buhlobo bakhe naJehova futsi wenta  lokutsite kuze ayigweme. Nakenta njalo, uhlale atsandvwa nguNkulunkulu.—Taga 22:3; Juda 20, 21.

8. Yini umphostoli Pawula layitjela emaKhristu?

⁸ Umphostoli Pawula watjela emaKhristu kutsi aticaphele. Sibonelo nje, watjela emaKhristu ase-Efesu watsi: “Caphelisisani kutsi indlela lenihamba ngayo ayifani neyebantfu labangakahlakaniphi kodvwa ifana neyebantfu labahlakaniphile.” (Ef. 5:15, 16) Buhlobo betfu naJehova buhlale buhlaselwa, ngako liBhayibheli liseluleka kutsi ‘sichubeke sicondza kutsi iyini intsandvo yaJehova’ kuze sitivikele ekuhlaselweni nguSathane.—Ef. 5:17.

9. Singayicondza njani intsandvo yaJehova ngatsi?

⁹ LiBhayibheli alitisho tonkhe tintfo letingalimata buhlobo betfu naJehova. Etikhatsini letinyenti, kufanele sente tincumo ngetintfo lokungakhulunywa ngato ngalokucondzile eBhayibhelini. Kuze sente tincumo letihlakaniphile kufanele sicondze nobe sibone “intsandvo yaJehova.” Loku singakwenta ngekutsi sihlale sidadisha liVi laNkulunkulu futsi sicabangisisa ngaloko lesikufundzako. Nasichubeka siyicondza intsandvo yaJehova futsi setama kuba ‘nemicabango yaKhristu,’ manyenti ematfuba ekutsi sihambe ‘njengebantfu labahlakaniphile’ ngisho nobe kute imitsetfo lecondzile lengasicondzisa. (1 Khor. 2:14-16) Letinye tingoti kumelula kutibona kantsi letinye akusimelula.

10. Ngutiphi letinye tintfo lokufanele singatenti?

¹⁰ Letinye tintfo lokufanele singatenti tifaka ekhatsi kudlala ngelutsandvo, kunatsa kakhulu tjwala, kudla ngalokwecile, inkhulumo lelimatako, kanye nekubuka tintfo letikhombisa budlova, kungcola kanye naletinye tintfo letifana naleti. (Hla. 101:3) Sitsa setfu lesinguDeveli sihlale sifuna ematfuba ekulimata buhlobo betfu naJehova. (1 Phet. 5:8) Nangabe singakanaki, Sathane angafaka etingcondvweni tetfu nasetinhlitiyweni tetfu umona, kungetsembeki, bugovu, inzondo, kutikhukhumeta kanye nentfukutselo lengalawuleki. (Gal. 5:19-21) Ekucaleni, letintfo tingahle tibebete emandla kodvwa nangabe singatisusi ngekushesha, titawuchubeka tikhula kuhle kwesihlahla lesinashevu futsi tibange ingoti.—Jak. 1:14, 15.

11. Nguyiphi lenye ingoti lebhacile lokufanele siyibalekele, futsi yini leyenta kudzingeke siyibalekele?

¹¹ Lenye ingoti lebhacile kutihlanganisa nebantfu lababi? Cabanga nganasi simo. Asesitsi usebenta nalotsite longasuye Fakazi. Ufuna kutsi abe nembono lomuhle ngaBoFakazi BaJehova, ngako uba nemusa futsi umsite. Ngalesinye sikhatsi uhle udla naye kudla kwasemini. Kungakapheli malanga mangakhi, ubese udla naye tikhatsi letinyenti. Ngaletinye tikhatsi lona losebenta naye uhle akhuluma tintfo letingcolile futsi ucale ungatinaki. Kodvwa ngekuhamba kwesikhatsi, ubese uyakwetayela loko futsi ungasakhubeki nawukuva. Ngalelinye lilanga lona losebenta naye uyakumema kutsi nicitse sikhatsi ndzawonye ngemuva kwemsebenti futsi uyavuma. Ekugcineni ucala kucabanga njengaye. Nawubuka kutakutsatsa sikhatsi lesingakanani kutsi ucale kwenta tintfo njengaye? Kuliciniso kutsi sibakhombisa umusa bonkhe bantfu futsi siyabahlonipha, kodvwa kufanele sikhumbule kutsi labo lesikhetsa kucitsa sikhatsi nabo batayitsintsa indlela lesenta ngayo tintfo. (1 Khor. 15:33) Nangabe siticaphela njengobe Jesu asho, sitakugwema kutihlanganisa ngalokungenasidzingo nebantfu labangaphili ngetimiso taJehova. (2 Khor. 6:15) Sitayibona iseta ingoti futsi siyibalekele.

12. Yini bafundzi baJesu lebekufanele bayente njengobe balindzele kutsi kufike kuphela?

¹² Bafundzi baJesu bekungakafaneli bahlale nje bagoce tandla balindzele kutsi kufike kuphela. Jesu wabaniketa umsebenti. Watsi kufanele bashumayele tindzaba letimnandzi “eJerusalema, kuyo yonkhe iJudiya neSamariya, nakuto tonkhe tincenye temhlaba.” (Imis. 1:6-8) Lona bekungumsebenti lomkhulu! Basisebentisa kahle sikhatsi sabo ngekutsi bente konkhe labangakhona kukwenta kuze bente lomsebenti.

13. Kubaluleke ngani kutsi sisisebentise kahle sikhatsi setfu? (KubaseKholose 4:5)

¹³ Fundza KubaseKholose 4:5. Kuze siticaphele, kufanele sicabangisise ngekutsi sisisebentisa njani sikhatsi setfu. ‘Timo letingakalindzeleki’ tingafikela nobe ngubani. (Shu. 9:11) Singafa kungakalindzeleki.

14-15. Singasisebentisa njani kahle sikhatsi setfu? (KumaHebheru 6:11, 12) (Buka sitfombe.)

¹⁴ Singasisebentisa kahle sikhatsi setfu ngekutsi sente intsandvo yaJehova futsi sicinise buhlobo lesinabo naye. (Joh. 14:21) Kufanele ‘sibe ngulabacinile, labangeke banyakatiswe, sihlale sinalokunyenti kwekukwenta emsebentini weNkhosi.’ (1 Khor. 15:58) Nasenta njalo, angeke sitisole nakufika kuphela—kungaba kufa kwetfu nobe kuphela kwalelive lelibi.—Mat. 24:13; Rom. 14:8.

 ¹⁵ Lamuhla, Jesu uyachubeka nekucondzisa bafundzi bakhe njengobe bashumayela ngeMbuso waNkulunkulu emhlabeni wonkhe. Usifezile setsembiso sakhe. Usebentise inhlangano yaJehova kuze asiceceshe kutsi singashumayela njani futsi usiphe netintfo lesitidzingako kuze sikhone kusakata tindzaba letimnandzi. (Mat. 28:18-20) Sitawube senta loko Jesu lakulindzele kitsi nasisebenta kamatima sishumayela labanye futsi sibafundzise, nangekutsi sihlale sinakile njengobe silindzele Jehova kutsi aletse kuphela kwalelive. Nasisebentisa leseluleko lesiKumaHebheru 6:11, 12, sitawubambelela etsembeni letfu “kuze kube sekugcineni.”—Fundza.

16. Yini lesitimisele kuyenta?

¹⁶ Jehova sewulibekile lilanga neli-awa latawuletsa ngalo kuphela kwalelive laSathane. Nalifika lelolanga, Jehova utawutigcwalisa tonkhe tiphrofetho letiseVini lakhe. Kodvwa kungenteka nyalo sibone ngatsi kukhashane kutsi kufike kuphela. Nobe kunjalo, lilanga laJehova ‘angeke lephute!’ (Hab. 2:3) Ngako shengatsi singatimisela ‘kuchubeka silindzele Jehova’ futsi ‘sibeketele, silindze Nkulunkulu longumsindzisi’ wetfu.—Mik. 7:7.