1. Fanekisa kutsi kubaluleke ngani kulandzela sicondziso saJehova.

 ASE sitsi ulahlekile ekhatsi ehlatsini. Utungeletwe tintfo letiyingoti: tilwane tesiganga, tilokatana letibanga tifo, titjalo letinashevu nematje. Bewungativa ukhululekile nakunalokucondzisako lowatiko kutsi ngutiphi tindzawo letiyingoti futsi akusite ungayi kuto! Lelive lifana nalelihlatsi. Ligcwele tintfo letiyingoti letingalimata buhlobo betfu naJehova. Kodvwa sijabula kakhulu ngekutsi kuneMuntfu lokahle kakhulu losicondzisako, lokunguJehova. Uyasisita kutsi singayi etindzaweni letiyingoti kodvwa siye lapho sifuna kuya khona, eveni lelisha.

2. Jehova usicondzisa njani?

² Usicondzisa njani Jehova? Ngalokuyinhloko usebentisa liVi lakhe liBhayibheli. Kodvwa uphindze asebentise nebantfu labammelele. Sibonelo nje, usebentisa ‘sisebenti lesetsembekile nalesihlakaniphile’ kuze sisinike imfundvo levela kuye lesisita kutsi sente tincumo letihlakaniphile. (Mat. 24:45) Jehova uphindze asebentise nalamanye emadvodza kuze asicondzise. Sibonelo nje, babonisi betigodzi nalabadzala belibandla bayasikhutsata baphindze basinikete ticondziso letisisita kutsi sibhekane netikhatsi letimatima. Sijabula kakhulu ngaleticondziso lesitetsembako lesititfola kulamalanga ekugcina lamatima! Tisisita kutsi sichubeke semukelwa nguJehova futsi sichubeke sihamba endleleni leholela ekuphileni.

3. Sitawucoca ngani kulesihloko?

³ Nobe kunjalo, ngaletinye tikhatsi singahle sikutfole kumatima kulandzela sicondziso saJehova, ikakhulukati nasisinikwa bantfu labanesono. Ngasiphi sizatfu? Singahle singasitsandzi lesicondziso. Nobe kungenteka sibone ngatsi asisebentiseki futsi sephetse ngekutsi asiveli kuJehova. Etikhatsini letinjalo,  kufanele setsembe mbamba kutsi nguJehova locondzisa bantfu bakhe nekutsi kulandzela ticondziso takhe kuhlale kusisita. Kuze sikhone kukwenta loko, lesihloko sitawucoca ngekutsi (1) Jehova bekabacondzisa njani bantfu bakhe ngetikhatsi tekubhalwa kweliBhayibheli, (2) ubacondzisa njani lamuhla, nekutsi (3) kusisita ngani kuchubeka silandzela sicondziso sakhe.

INDLELA JEHOVA BEKACONDZISA NGAYO SIVE SEMA-ISRAYELI

4-5. Jehova wakhombisa njani kutsi bekasebentisa Mosi kuze acondzise ema-Israyeli? (Buka sitfombe.)

⁴ Jehova wakhetsa Mosi kutsi ahole ema-Israyeli awakhiphe eGibhithe. Wabese uniketa ema-Israyeli bufakazi lobuphatsekako bekutsi bekawacondzisa asebentisa Mosi. Sibonelo nje, wenta kutsi kube nensika yelifu emini futsi kube nensika yemlilo ebusuku. (Eks. 13:21) Mosi nema-Israyeli bayilandzela futsi yabaholela eLwandle Lolubovu. Labantfu besaba ngesikhatsi bacabanga kutsi sebavimbeteleke emkhatsini welwandle nelibutfo lebaseGibhithe lebelibacosha. Bacabanga kutsi Mosi wente liphutsa ngekubaholela eLwandle Lolubovu. Kodvwa lelo bekungasilo liphutsa. Jehova bekasebentise Mosi kuze aholele bantfu bakhe lapho. (Eks. 14:2) Nkulunkulu wabese ubakhulula ngendlela lemangalisa kakhulu.​—Eks. 14:26-28.

⁵ Eminyakeni lengu-40 leyalandzela, Mosi wachubeka etsembele kulensika yelifu kuze acondzise bantfu baNkulunkulu ehlane. a Kwaphela sikhatsi lesitsite Jehova abeke lensika ngetulu kwelithende laMosi lapho onkhe ema-Israyeli bekangayibona khona. (Eks. 33:7, 9, 10) Jehova bekakhuluma naMosi akulensika, futsi yena bekabese utjela labantfu ticondziso taNkulunkulu. (Hla. 99:7) Ema-Israyeli bekanebufakazi lobunyenti bekutsi Jehova bekasebentisa Mosi kuze awacondzise.

6. Ema-Israyeli enta njani nawacondziswa nguJehova? (Numeri 14:2, 10, 11)

⁶ Lokubuhlungu kutsi ema-Israyeli lamanyenti awazange abemukele bufakazi lobusebaleni bekutsi Jehova bekasebentisa Mosi kuze ammelele. (Fundza Numeri 14:2, 10, 11.) Ala tikhatsi letinyenti kwemukela kutsi Jehova bekasebentisa Mosi kuze awacondzise. Ngenca yaloko, leso situkulwane sema-Israyeli asizange sivunyelwe kutsi singene eVeni Lesetsembiso.​—Num. 14:30.

7. Shano tibonelo talabo labalandzela sicondziso saJehova. (Numeri 14:24) (Buka nesitfombe.)

⁷ Nobe kunjalo, lamanye ema-Israyeli asilandzela sicondziso saJehova. Sibonelo nje, Jehova watsi: “Khalebi . . . wachubeka angilandzela ngenhlitiyo yonkhe.” (Fundza Numeri 14:24.) Nkulunkulu wambusisa Khalebi, waze wamvumela nekutsi atikhetsele indzawo layifunako eKhenani. (Josh. 14:12-14) Situkulwane sema-Israyeli lesalandzela naso sabeka sibonelo lesihle sekulandzela sicondziso saJehova. Ngesikhatsi Joshuwa sekangumholi lomusha wema-Israyeli esikhundleni saMosi, ema-Israyeli “amhlonipha kakhulu Joshuwa kuko konkhe kuphila kwakhe.” (Josh. 4:14) Ngenca yaloko, Jehova wawabusisa ngekutsi awangenise eveni lebekawetsembise lona.​—Josh. 21:43, 44.

8. Chaza kutsi Jehova wabacondzisa njani bantfu bakhe ngesikhatsi kubusa emakhosi. (Buka nesitfombe.)

⁸ Ngemuva kweminyaka, Jehova wakhetsa behluleli kuze bacondzise bantfu bakhe. Ngemuva kwesikhatsi, nasekubusa emakhosi, Jehova wakhetsa baphrofethi kuze bacondzise bantfu bakhe. Emakhosi letsembekile  bekasisebentisa seluleko salabaphrofethi. Sibonelo nje, iNkhosi Davide yatfobeka futsi yemukela siyalo leyasinikwa ngumphrofethi Nathani. (2 Sam. 12:7, 13; 1 Khr. 17:3, 4) INkhosi Jehoshafati yalalela sicondziso semphrofethi Jahaziyeli futsi yakhutsata bantfu bakaJuda kutsi ‘bakukholwe lokushiwo baphrofethi’ baNkulunkulu. (2 Khr. 20:14, 15, 20) Ngesikhatsi iNkhosi Hezekiya icindzetelekile, yacela lusito kumphrofethi Isaya. (Isa. 37:1-6) Ngaso sonkhe sikhatsi lamakhosi nawalandzela sicondziso saJehova, bewabusiswa futsi nalesive besivikeleka. (2 Khr. 20:29, 30; 32:22) Bekufanele kube sebaleni kubo bonkhe kutsi Jehova bekasebentisa labaphrofethi bakhe kuze acondzise bantfu bakhe. Nobe kunjalo, emakhosi lamanyenti nema-Israyeli lamanyenti abazange babalalele labaphrofethi.​—Jer. 35:12-15.

INDLELA JEHOVA BEKACONDZISA NGAYO EMAKHRISTU EKUCALA

9. Bobani Jehova labasebentisa kuze bacondzise emaKhristu ngesikhatsi semaKhristu ekucala? (Buka nesitfombe.)

⁹ Ngesikhatsi semaKhristu ekucala, Jehova wasungula libandla lebuKhristu. Wawacondzisa njani? Wakhetsa Jesu kutsi abe yinhloko yelibandla. (Ef. 5:23) Kodvwa Jesu bekangakhulumi nemfundzi ngamunye amtjele loko lokufanele akwente. Kunaloko, wasebentisa baphostoli kanye nemadvodza lamadzala eJerusalema kuze ahole. (Imis. 15:1, 2) Ngetulu kwaloko, kwakhetfwa emadvodza lamadzala kuze acondzise emabandla.​—1 Thes. 5:12; Thit. 1:5.

10. (a) Labanyenti ngesikhatsi semaKhristu ekucala benta njani nabatfola sicondziso? (Imisebenti 15:30, 31) (b) Yini leyenta labanye bangabemukeli labo bebasetjentiswa nguJehova kuze abacondzise? (Buka libhokisi lelitsi “ Yini Leyente Labanye Bangabemukeli Bufakazi?”)

¹⁰ Enta njani emaKhristu ekucala? Linyenti lawo lajabula ngalesicondziso lasitfola. Ecinisweni, ‘ajabula ngenca yalesikhutsato’ laniketwa sona. (Fundza Imisebenti 15:30, 31.) Kodvwa Jehova bekasolo abacondzisa njani bantfu bakhe etikhatsini takamuva?

INDLELA JEHOVA LASICONDZISA NGAYO LAMUHLA

11. Niketa sibonelo sendlela Jehova lacondzise ngayo labo labaholako etikhatsini takamuva.

¹¹ Jehova uyachubeka nekucondzisa bantfu bakhe lamuhla. Bekasolo abacondzisa asebentisa  liVi lakhe kanye neNdvodzana yakhe leyinhloko yelibandla. Bukhona yini bufakazi lesibubonako bekutsi Nkulunkulu uyachubeka nekusebentisa bantfu kuze bammelele? Yebo. Cabanga ngetintfo letenteka ngasekupheleni kwabo-1800. Charles Taze Russell kanye nalabo bekanabo bacala kucondza kutsi umnyaka wa-1914 bewutawuba ngumnyaka lobalulekile wekubekwa kweMbuso waNkulunkulu. (Dan. 4:25, 26) Basitwa tiphrofetho teliBhayibheli kuze bafike kuleso siphetfo. Jehova bekabacondzisa yini nabacwaninga eBhayibhelini? Kusebaleni kutsi bekabacondzisa. Tintfo letenteka emhlabeni nga-1914 tafakazela kutsi uMbuso waNkulunkulu besewucalile kubusa. Kwacala iMphi Yelive Yekucala, kwaba netifo letingumshayabhuce, kutamatama kwemhlaba kanye nekweswelakala kwekudla. (Luk. 21:10, 11) Kusebaleni kutsi Jehova bekasebentisa lamadvodza lacotfo kuze acondzise bantfu bakhe.

12-13. Yini leyentiwa kuze wentiwe ngelizinga leliphakeme umsebenti wekushumayela newekufundzisa ngesikhatsi seMphi Yelive Yesibili?

¹² Cabanga nangaloko lokwenteka ngesikhatsi seMphi Yelive Yesibili. Ngemuva kwekudadisha Sembulo 17:8, bazalwane labaholako endlunkhulu bacondza kutsi lemphi beyingeke iholele ku-Amagedoni, kodvwa bekutawuba nesikhatsi sekuthula lokusezingeni lelitsite lebekutawuvula litfuba lekutsi umsebenti wekushumayela wentiwe ngelizinga leliphakeme. Nanobe kungenteka bekubonakala kungasiso sincumo lesikahle ngaleso sikhatsi, inhlangano yaJehova yasungula Sikolwa SaseGileyadi kuze kuceceshwe titfunywa telivangeli kutsi tishumayele tiphindze tifundzise emhlabeni wonkhe. Letitfunywa telivangeli tatfunyelwa ngesikhatsi kusachubeka lemphi. Ngetulu kwaloko, lesisebenti lesetsembekile sahlela kutsi kube neMfundo Yenkonzo Engokwasezulwini b kuze kuceceshwe bonkhe emabandleni kutsi babe bashumayeli nebafundzisi labakahle. Konkhe loku kwasita bantfu baNkulunkulu kutsi balungele umsebenti lebekusafanele wentiwe.

¹³ Nasibuka emuva, siyabona kutsi Jehova bekacondzisa bantfu bakhe ngaleso sikhatsi lesimatima. Kusukela ngeMphi Yelive Yesibili,  bantfu baJehova emaveni lamanyenti bajabulele kuthula nenkhululeko lesezingeni lelitsite nabasenta umsebenti wekushumayela. Ecinisweni, lomsebenti ube yimphumelelo.

14. Yini leyenta sisetsembe sicondziso lesisitfola enhlanganweni yaJehova nakulabadzala belibandla? (Sembulo 2:1) (Buka nesitfombe.)

¹⁴ Lamuhla Sigungu Lesibusako siyachubeka nekufuna sicondziso saKhristu. Sifuna kutsi ticondziso lesitinika bazalwane tivumelane nembono waNkulunkulu. Sisebentisa babonisi labajikeletako nalabadzala belibandla kuze banike emabandla ticondziso. c Labadzala belibandla ‘basesandleni saKhristu sangesekudla.’ (Fundza Sembulo 2:1.) Kuliciniso kutsi labazalwane banesono futsi bayawenta emaphutsa. Njengebaphostoli, boMosi naJoshuwa nabo bebahle benta emaphutsa. (Num. 20:12; Josh. 9:14, 15; Rom. 3:23) Nobe kunjalo, Khristu uyachubeka acondzisa sisebenti lesetsembekile kanye nalabadzala belibandla, futsi utawuchubeka enta njalo “onkhe emalanga kuze kube sekupheleni kwalelive.” (Mat. 28:20) Ngako sinesizatfu lesivakalako sekusetsemba sicondziso lasinika sona asebentisa labo labaholako.

SIYASITAKALA NASICHUBEKA SILANDZELA SICONDZISO SAJEHOVA

15-16. Yini loyifundza kulabo labalandzela sicondziso saJehova?

¹⁵ Nasichubeka silandzela sicondziso saJehova sitfola tibusiso ngisho nanyalo. Nasi sibonelo, bo-Andy naRobyn balalela seluleko sekutsi bente kuphila kwabo kube melula. (Heb. 13:5) Ngenca yaloko, bakhona kuvolontiya kuze bayosita ekwakheni takhiwo tenhlangano. Robyn utsi: “Ngaletinye tikhatsi besihlala etindlini letincane lebetivame kuba bete likhishi. Kwadzingeka ngitsengise tintfo tami letinyenti lebengitisebentisela kutsatsa titfombe, kantsi bengikutsandza. Ngakhala nangititsengisa. Kodvwa njengaSara, umfati wa-Abrahama, bengitimisele ngekubuka embili, hhayi emuva.” (Heb. 11:15) Yini labayitfola? Robyn utsi: “Siyajabula ngobe siyati kutsi sinika Jehova konkhe lesinako. Nasenta umsebenti waJehova, siyabona kutsi kutawuba njani kuphila eveni lelisha.” Andy uvumelana naye nakatsi: “Sijabulile ngobe sinika Jehova emandla  etfu nesikhatsi setfu senta umsebenti wakhe.”

¹⁶ Kuphindze kusisite njani kuchubeka silalela sicondziso saJehova? Ngemuva kwekutsi Marcia acedze sikolwa, walalela seluleko sekutsi angenele umsebenti wasikhatsi sonkhe. (Mat. 6:33; Rom. 12:11) Utsi: “Nganikwa umfundzate weminyaka lemine enyuvesi. Kodvwa bengifuna kunika Jehova lokuncono kakhulu. Ngako ngancuma kufundza likhono kuze ngikhone kutisekela njengobe ngilihlahlandlela. Leso kube ngulesinye setincumo letinhle kakhulu lengike ngasenta. Nyalo ngilihlahlandlela lelivamile, futsi njengobe ngikhona kukhetsa kutsi ngitawusebenta nini, ngiyakhona kusita eBethel ngemalanga latsite ngiphindze ngentele Jehova naleminye imisebenti lemihle.”

17. Kuphindze kusisite njani kuchubeka silandzela sicondziso saJehova? (Isaya 48:17, 18)

¹⁷ Ngalesinye sikhatsi sitfola seluleko lesisisita kutsi singatsandzi kakhulu imali futsi sisivikele ekwenteni tintfo letingenta sephule imitsetfo yaNkulunkulu. Nakuletimo, kuyasisita kulalela sicondziso saJehova. Siba nanembeza lohlobile futsi sigwema kuba netinkinga letinyenti. (1 Thim. 6:9, 10) Ngenca yaloko siyakhona kukhonta Jehova ngenhlitiyo yonkhe, lokwenta kutsi sijabule kakhulu, sibe nekuthula futsi senetiseke.​—Fundza Isaya 48:17, 18.

18. Yini lekwenta utimisele kuchubeka ulandzela sicondziso saJehova?

¹⁸ Siyaciniseka kutsi Jehova utawuchubeka asebentisa bantfu labammelele kuze asinikete sicondziso ngekuhlupheka lokukhulu kuze kube sikhatsi Sekubusa Kweminyaka Leyinkhulungwane. (Hla. 45:16) Utawuchubeka yini ulalela sicondziso ngisho nalapho kutawudzingeka kutsi ungenti lokufunako? Kutawuba melula kukwenta loko nangabe utawuchubeka ulandzela sicondziso saJehova nyalo. Ngako shengatsi singahlale silandzela sicondziso saJehova, ngisho naleso lesisinikwa ngulabo labakhetfwe kutsi basihole. (Isa. 32:1, 2; Heb. 13:17) Nasenta njalo, sitawuba nesizatfu lesivakalako sekwetsemba loyo losicondzisako, lokunguJehova, losisita kutsi singayi etindzaweni letiyingoti kodvwa siye lapho sifuna kuya khona, eveni lelisha.