1. Bonkhe labagcotjiwe labaselamhlabeni batawenyukela nini ezulwini?

 EMINYAKENI leyendlulile, bantfu baJehova bebatibuta: ‘EmaKhristu lagcotjiwe lasele lamhlabeni atawenyukela nini ezulwini?’ Esikhatsini lesendlulile besicabanga kutsi lamanye emaKhristu lagcotjiwe atawuba sePharadesi sikhatsi lesitsite ngemuva kwe-Amagedoni. Kodvwa ku-Sicongosekulindza saJuly 15, 2013, safundza kutsi bonkhe labagcotjiwe labaselamhlabeni batawenyukela ezulwini ngaphambi kwekutsi kucale imphi ye-Amagedoni.​—Mat. 24:31.

2. Ngumuphi umbuto lesingahle sitibute wona, futsi sitawucoca ngani kulesihloko?

² Nobe kunjalo, kungahle kuphakame umbuto lotsi: Yini letawenteka ‘kuletinye timvu’ taKhristu letitawube tikhonta Jehova ngekwetsembeka lamhlabeni ‘ngekuhlupheka lokukhulu’? (Joh. 10:16; Mat. 24:21) Kungenteka labanye lamuhla bakhatsateke ngekutsi batawutiva balahliwe nobe bangati kutsi bente njani nasebasezulwini labagcotjiwe. Asesicoce ngetindzaba letimbili letiseBhayibhelini letingabenta bacabange ngalendlela. Ngemuva kwaloko sitawucoca ngetizatfu letenta kungadzingeki kutsi sikhatsateke.

YINI LENGEKE YENTEKE?

3-4. Yini lokungenteka labanye batibute yona, futsi leni?

³ Kungenteka labanye bayatibuta kutsi emalunga aletinye timvu atalishiya yini liciniso nasebangekho bazalwane labagcotjiwe beSigungu Lesibusako kuze babacondzise. Kungenteka bativa ngaleyondlela ngenca yaletinye tindzaba letiseBhayibhelini. Asesicoce ngaletimbili tato. Yekucala imayelana naJehoyada umPhristi Lophakeme. Bekakhonta Nkulunkulu ngekwetsembeka. Yena nemkakhe Jehoshabathi, bavikela Jehowashi lebekasemncane futsi bamsita kutsi abe yinkhosi lekahle naleyetsembekile.  Ngesikhatsi Jehoyada asaphila, Jehowashi bekenta tintfo letinhle. Kodvwa nasekashonile Jehoyada, Jehowashi wacala kwenta tintfo letimbi. Walalela tindvuna letimbi futsi washiya Jehova.​—2 Khr. 24:2, 15-19.

⁴ Sibonelo sesibili, semaKhristu laphila ngemuva kwesikhatsi sebaphostoli. Umphostoli wekugcina lowafa nguJohane. Ngesikhatsi asaphila, wasita emaKhristu lamanyenti kutsi akhonte Jehova ngekwetsembeka. (3 Joh. 4) Kwaphela sikhatsi lesitsite Johane kanye nalabanye baphostoli baJesu labetsembekile balwa kamatima nekwandza kwetihlubuki. (1 Joh. 2:18; 2 Thes. 2:7) Kodvwa ngemuva kwekufa kwaJohane, kuhlubuka kwandza kuhle kwemlilo wemadlelo. Eminyakeni leyalandzela, letihlubuki betifundzisa timfundziso letinyenti letingemanga futsi tivumela kutiphatsa lokubi ebandleni.

5. Ngusiphi siphetfo lokungakafaneli sifike kuso nasicabanga ngaletindzaba letimbili?

⁵ Letindzaba letimbili letiseBhayibhelini tisho kutsi kutawenteka lokufanako yini nakuletinye timvu ngemuva kwekutsi labagcotjiwe sebasezulwini? Ngaleso sikhatsi, emaKhristu letsembekile lalamhlabeni atakukhohlwa yini loko lafundziswe kona njengobe kwenta Jehowashi, nobe atawuba tihlubuki yini njengobe kwenta emaKhristu lamanyenti ngemuva kwekufa kwebaphostoli? Imphendvulo ngu-cha lomkhulu! Singaciniseka kutsi nasebangasekho labagcotjiwe emhlabeni, letinye timvu titawuchubeka tinakekelwa kahle futsi tibe nebuhlobo lobuhle naNkulunkulu. Yini leyenta siciniseke ngaloko?

BANTFU BAJEHOVA BATAWUCHUBEKA BAMKHONTA NGENDLELA LAFUNA BAMKHONTE NGAYO

6. Ngutiphi tikhatsi letintsatfu letingafani lesitawucoca ngato?

⁶ Yini leyenta siciniseke kutsi bantfu baJehova batawuchubeka bamkhonta ngendlela lafuna bamkhonte ngayo, ngisho nasetikhatsini letimatima letiseta? Kungenca yaloko lesikufundze eBhayibhelini mayelana nesikhatsi lesiphila kuso. Lesikhatsi lesiphila kuso sehluke kakhulu kunesikhatsi sema-Israyeli kanye nesikhatsi lesingemuva kwekufa kwebaphostoli. Ngako asesicoce nganati tikhatsi letintsatfu letingafani: (1) Sikhatsi sema-Israyeli, (2) sikhatsi lesingemuva kwekufa kwebaphostoli, kanye (3) nesikhatsi setfu, lokusikhatsi ‘sekubuyiselwa kwato tonkhe tintfo.’​—Imis. 3:21.

7. Yini leyenta ema-Israyeli letsembekile angaphelelwa litsemba ngesikhatsi emakhosi kanye nebantfu labanyenti bakhetsa kwenta tintfo letimbi?

⁷ Sikhatsi sema-Israyeli. Ngaphambi nje kwekutsi Mosi afe, watjela ema-Israyeli watsi: “Ngati kahle kutsi nasengifile nitawukwenta lokubi, niyishiye nendlela lenginitjele yona.” (Dut. 31:29) Mosi waphindze wecwayisa ema-Israyeli kutsi nangabe avukela Nkulunkulu, lesive besitawutfunjwa. (Dut. 28:35, 36) Kwenteka yini vele loko lakusho? Yebo. Eminyakeni leminyenti leyalandzela, emakhosi lamanyenti akhetsa kwenta tintfo letimbi futsi adukisa bantfu baNkulunkulu. Loku kwenta Jehova wabalahla labantfu lababi futsi wangasawavumeli emakhosi aka-Israyeli kutsi achubeke ababusa. (Hez. 21:25-27) Kodvwa ema-Israyeli letsembekile aba nesibindzi sekuchubeka amkhonta ngekwetsembeka nakakubona kwenteka loko Nkulunkulu bekakushito.​—Isa. 55:10, 11.

8. Yini leyenta singamangali kutsi kwabese kuba netihlubuki ebandleni lebuKhristu ngemuva kwekufa kwebaphostoli? Chaza.

⁸ Sikhatsi lesingemuva kwekufa kwebaphostoli. Kufanele kusimangalise yini kutsi ngemuva kwekufa kwebaphostoli kwabese kuba netihlubuki ebandleni lebuKhristu? Cha. Jesu bekashito kutsi bekutawuba nekwandza kwetihlubuki. (Mat. 7:21-23; 13:24-30, 36-43) Umphostoli Pawula, umphostoli Phetro kanye  nemphostoli Johane basho kutsi lesiphrofetho saJesu besesigcwaliseka ngesikhatsi sabo. (2 Thes. 2:3, 7; 2 Phet. 2:1; 1 Joh. 2:18) Ngemuva kwekufa kwebaphostoli, besekunetihlubuki ebandleni lebuKhristu. Ngekushesha ngemuva kwekufa kwemphostoli Johane, emaKhristu latihlubuki aba yincenye yeBhabhulona Lenkhulu, lokungumbuso wemhlaba wenkholo yemanga. Nalapho futsi saphindze sagcwaliseka lesiphrofetho.

9. Sikhatsi lesiphila kuso lamuhla sehluke njani kunesikhatsi sema-Israyeli nesikhatshi lesingemuva kwekufa kwebaphostoli?

⁹ ‘Sikhatsi sekubuyiselwa kwato tonkhe tintfo.’ Sikhatsi lesiphila kuso lamuhla sehlukile kunesema-Israyeli nangesikhatsi kwandza tihlubuki ngemuva kwekufa kwebaphostoli. Sibitwa ngekutsi yini lesikhatsi setfu? Singasibita ngekutsi ‘ngemalanga ekugcina’ alelive lelibi. (2 Thim. 3:1) Kodvwa liBhayibheli likhombisa kutsi nakucala emalanga ekugcina, kwacala nalesinye sikhatsi lesibalulekile nalesitawuba sidze. Sitawuchubeka kuze kube ngulapho uMbuso waMesiya sewente bantfu baba bete sono futsi sewushintje lomhlaba waba lipharadisi. Lesikhatsi sibitwa ngekutsi sikhatsi ‘sekubuyiselwa kwato tonkhe tintfo.’ (Imis. 3:21) Sacala nga-1914. Yini leyabuyiselwa? Jesu wabekwa kutsi abe yiNkhosi ezulwini. Ngako Jehova waphindze waba nalommelelako, loyindlalifa yeNkhosi Davide lebeyetsembekile. Nobe kunjalo, akusiko loko kuphela Jehova lakubuyisela. Ngekushesha ngemuva kwaloko, kukhonta lokuhlantekile kwacala kubuyiselwa! (Isa. 2:2-4; Hez. 11:17-20) Kutawuphindze kwenteke yini kutsi bantfu bangcolise kukhonta lokuhlantekile?

10. (a) Yini liBhayibheli lelayisho mayelana nekukhonta lokuhlantekile ngesikhatsi setfu? (Isaya 54:17) (b) Letiphrofetho tisicinisekisa ngani?

¹⁰ Fundza Isaya 54:17. Cabanga nganasi siphrofetho lesitsi: “Kute sikhali lesakhelwe kulwa nawe lesiyawuphumelela”! Lamavi laphefumulelwe ayagcwaliseka lamuhla. Nawa lamanye emavi ladvudvutako lagcwalisekako: “Onkhe emadvodzana akho ayawufundziswa nguJehova, futsi kuthula kwemadvodzana akho kuyawuba kukhulu. Uyawusimamiswa ngekulunga. . . . Angeke wesabe lutfo futsi kute lokutakwetfusa, ngobe loko angeke kusondzele kuwe.” (Isa. 54:13, 14) Ngisho ‘nankulunkulu walelive’ lokunguSathane, ute emandla ekumisa umsebenti wekufundzisa lowentiwa bantfu baJehova. (2 Khor. 4:4) Kukhonta lokuhlantekile sekubuyiselwe, futsi angeke kuphindze kungcoliswe. Kutawuhlala kukhona kuze kube phakadze. Kute sikhali lesakhelwe kulwa natsi lesiyawuphumelela!

 YINI LETAWENTEKA?

11. Yini leyenta siciniseke kutsi sicumbi lesikhulu ngeke sitive silahliwe ngesikhatsi labagcotjiwe sebenyukele ezulwini?

¹¹ Yini letawenteka ngemuva kwekutsi labagcotjiwe sebaye ezulwini? Khumbula kutsi nguJesu uMelusi wetfu. Uyinhloko yelibandla lebuKhristu. Jesu washo ngalokucacile watsi: “UMholi wenu munye, nguKhristu.” (Mat. 23:10) INkhosi yetfu lebusako angeke yehluleke kwenta umsebenti wayo. Ngenca yekutsi Khristu utawube aphetse tonkhe tintfo, balandzeli bakhe angeke kudzingeke kutsi besabe. Kuliciniso kutsi asikwati konkhe mayelana nekutsi Khristu utawubahola njani bantfu bakhe ngaleso sikhatsi. Ngako asesicoce ngaletinye tibonelo letiseBhayibhelini letingasicinisekisa.

12. Jehova wabanakekela njani bantfu bakhe (a) ngemuva kwekufa kwaMosi? (b) ngemuva kwekutsi Elija atfole lesinye sabelo? (Buka nesitfombe.)

¹² Mosi wafa ngaphambi kwekutsi ema-Israyeli angene eVeni Lesetsembiso. Yini leyenteka kubantfu baNkulunkulu? Besebasele ebaleni yini ngemuva kwekufa kwalendvodza leyetsembekile? Cha. Jehova wabanakekela kuso sonkhe lesikhatsi betsembekile kuye. Ngaphambi kwekutsi Mosi afe, Jehova bekamtjelile kutsi akhetse Joshuwa kuze ahole labantfu. Besekuphele iminyaka Mosi amcecesha. (Eks. 33:11; Dut. 34:9) Ngetulu kwaloko, bekunemadvodza lamanyenti letsembekile lebekahola, lokufaka ekhatsi baholi betinkhulungwane, bemakhulu, bemashumi lasihlanu nebemashumi. (Dut. 1:15) Bantfu baNkulunkulu bebanakekelwa kahle. Kwenteka lokufanako nasendzabeni ya-Elija. Besekuphele iminyaka leminyenti ahola ekukhonteni lokuhlantekile. Kodvwa ngekuhamba kwesikhatsi, Jehova wamnika umsebenti lowehlukile, endzaweni leseningizimu yakaJuda. (2 Khos. 2:1; 2 Khr. 21:12) Besebasele bodvwa yini bantfu labetsembekile kulombuso waka-Israyeli wetive letilishumi? Cha. Besekuphele iminyaka Elija acecesha Elisha. Ngetulu kwaloko, ‘bekunemadvodzana ebaphrofethi’ lebekaceceshiwe. (2 Khos. 2:7) Ngako bekamanyenti emadvodza letsembekile lebekangahola bantfu baNkulunkulu. Jehova wachubeka afeza injongo yakhe futsi wanakekela bantfu bakhe labetsembekile.

13. Yini Jehova lasetsembisa yona KumaHebheru 13:5b? (Buka nesitfombe.)

¹³ Ucabanga ngaletibonelo, ucabanga kutsi kutawentekani ngemuva kwekutsi emaKhristu lagcotjiwe lebekasele sekasezulwini? Akukafaneli sikhatsateke. LiBhayibheli lisitjela nali liciniso lelisicinisekisako: Jehova ngeke aze abalahle bantfu bakhe labalamhlabeni.  (Fundza KumaHebheru 13:5b.) NjengaMosi na-Elija, licembu lelincane lemaKhristu lagcotjiwe leliholako lamuhla liyati kutsi kubaluleke kakhulu kucecesha labanye. Sekuphele iminyaka leminyenti Sigungu Lesibusako sicecesha bazalwane labangemalunga aletinye timvu kuze bahole. Sibonelo nje, sihlele tikolwa letinyenti leticecesha labadzala belibandla, babonisi labajikeletako, emalunga eKomidi Yeligatja, labengamele ematiko eBethel kanye nalabanye. Ngetulu kwaloko, Sigungu Lesibusako siphindze siceceshe basiti labasemakomidini lehlukahlukene eSigungu Lesibusako. Nyalo labasiti bayenta ngekwetsembeka imisebenti labanayo enhlanganweni. Bakulungele kuchubeka banakekela timvu taKhristu.

14. Nguliphi liphuzu lelibalulekile kulendzaba lesikhuluma ngayo?

¹⁴ Nali liphuzu lelibalulekile laloku lesikhuluma ngako: Nasebenyukele ezulwini bonkhe labagcotjiwe lebebasele lamhlabeni ngasekupheleni kwekuhlupheka lokukhulu, kukhonta lokuhlantekile kutawuchubeka kukhona emhlabeni. Ngenca yekutsi Jesu Khristu ngumholi wetfu, bantfu baNkulunkulu batawuchubeka bamkhonta ngekwetsembeka. Ngaleso sikhatsi, tive letihlangene letibitwa ngekutsi nguGogi wakaMagogi, titawuhlasela bantfu baNkulunkulu. (Hez. 38:18-20) Kodvwa lokuhlasela lokutawutsatsa sikhatsi lesifishane ngeke kuphumelele; angeke kuyekelise bantfu baNkulunkulu kutsi bamkhonte. Nakanjani utawubasindzisa! Embonweni, umphostoli Johane wabona “sicumbi lesikhulu” saletinye timvu taKhristu. Johane watjelwa kutsi ‘lesicumbi lesikhulu’ ‘siphuma ekuhluphekeni lokukhulu.’ (Semb. 7:9, 14) Nakanjani lesicumbi sitawuvikeleka!

15-16. Ngekusho kweSembulo 17:14, yini letawentiwa ngemaKhristu lagcotjiwe ngemphi ye-Amagedoni, futsi loko kusikhutsata njani?

¹⁵ Nobe kunjalo, kungenteka labanye batibute: ‘Kutawentekani kulabagcotjiwe? Yini labatawuyenta nasebasezulwini?’ LiBhayibheli liyawuphendvula lombuto. Liveta kutsi bohulumende balamhlabeni ‘batawulwa neliWundlu.’ Kodvwa siyati kutsi batawehlulwa. LiBhayibheli litsi: ‘Liwundlu litabancoba.’ Bobani labatalisita? Lelivesi liyaphendvula. Litsi  ngulabo ‘lababitiwe,’ ‘labakhetsiwe’ futsi ‘labetsembekile.’ (Fundza Sembulo 17:14.) Bobani laba? NgemaKhristu lagcotjiwe lasavusiwe! Ngako ngemuva kwekutsi labagcotjiwe lebebasele lamhlabeni sebaye ezulwini ngasekupheleni kwekuhlupheka lokukhulu, lomunye umsebenti labatawufike bawente kulwa. Loyo ngumsebenti lobalulekile! Labanye labagcotjiwe bebalwa ngaphambi kwekutsi babe BoFakazi BaJehova. Labanye bebasemasotjeni. Kodvwa babese baba ngemaKhristu eliciniso futsi bafundza kuthula. (Gal. 5:22; 2 Thes. 3:16) Bakuyekela kusekela imphi. Nobe kunjalo, ngemuva kwekuvuselwa ezulwini batawuba naKhristu kanye netingilosi takhe futsi balwe netitsa taNkulunkulu emphini yekugcina.

¹⁶ Cabanga nganaku. Labanye labagcotjiwe labalamhlabeni sebakhulile futsi bayagula. Kodvwa nasebavuselwe ezulwini batawuba tidalwa letinemandla futsi letingeke tife, letinikwe umsebenti wekulwa tikanye naJesu Khristu, iNkhosi yabo Lelichawe. Ngemuva kwe-Amagedoni, batawusebenta naJesu kuze basite bantfu babe bete sono. Siyaciniseka kutsi kunyenti kakhulu labatakwentela bazalwane babo nabodzadze nasebasezulwini kunaloko labakwentako nyalo basebantfu labanesono!

17. Sati njani kutsi bonkhe bantfu baNkulunkulu batawube baphephile ngemphi ye-Amagedoni?

¹⁷ Ulilunga laletinye timvu yini? Nangabe kunjalo, yini lokutawudzingeka uyente nakucala i-Amagedoni? Kulula nje: Yetsemba Jehova futsi ulalele sicondziso sakhe. Kungenteka loko kutawufaka ekhatsi ini? LiBhayibheli litsi: ‘Ngenani emakamelweni enu langekhatsi, nivale iminyango ngemuva kwenu. Bhacani sikhashana. Kuze kwendlule lulaka lwami.’ (Isa. 26:20) Tonkhe tikhonti taNkulunkulu letetsembekile ezulwini nasemhlabeni, titawuvikeleka ngaleso sikhatsi. Njengemphostoli Pawula, natsi siyaciniseka kutsi kute ‘babusi, tintfo letikhona nyalo naleto letitako . . . letitawukwati kusehlukanisa nelutsandvo Nkulunkulu lasikhombisa lona.’ (Rom. 8:38, 39) Hlale ukhumbula kutsi Jehova uyakutsandza futsi ngeke aze akulahle!