SIHLOKO LESIFUNDVWAKO 8
INGOMA 130 Bani Ngulocolelanako
Kucolela KwaJehova—Ungakulingisa Njani?
“Njengobe nje Jehova anitsetselele ngekukhululeka, nani yentani kanjalo.”—KHOL. 3:13.
LOKUTAWUCOCWA NGAKO
Lesihloko sitawucoca ngetintfo lesingatenta kuze sicolele umuntfu losivise buhlungu.
1-2. (a) Kukutiphi timo lasingakutfola kumatima kakhulu khona kucolela? (b) Denise wakukhombisa njani kucolela?
UKUTFOLA kumatima yini kucolela labanye? Linyenti letfu likutfola kumatima, ikakhulukati nangabe lotsite asho intfo nobe ente intfo lesivise buhlungu. Nobe kunjalo, kunetintfo letingasisita kutsi singahlali sitfukutsele. Nasi sibonelo, cabanga ngalokwenteka kulomunye dzadze lokutsiwa nguDenise, a lowacolela ngendlela lemangalisako. Nga-2017, Denise nemndeni wakhe bebabuya kuyovakasha eNdlunkhulu YaBoFakazi BaJehova lebeyisandza kuvulwa. Nababuyela ekhaya, lomunye umshayeli wehluleka kulawula imoto yakhe futsi yashayisa leyabo. Denise waculeka. Nakavuka, watfola kutsi bantfwana bakhe bebalimele kamatima kantsi indvodza yakhe Brian, beyishonile. Nakacabanga ngaloko lokwenteka, Denise utsi: “Ngeva buhlungu lobukhulu futsi bengididekile.” Ngekuhamba kwesikhatsi watfola kutsi lomshayeli bekangakalimali ndzawo, futsi wathantaza kuJehova wacela kuthula.
2 Lomshayeli wabekwa licala lekufelwa ngumuntfu ngesiphosiso. Bekatawuvalelwa ejele nangabe inkantolo imtfola anelicala. Kodvwa inkantolo yatjela Denise kutsi sigwebo salendvodza besitawuya ngaloko bekatakusho enkantolo. Denise utsi: “Bekungatsi kunemuntfu longivule linceba lebelitfungiwe futsi watsela luswayi lolunyenti kakhulu, njengobe bekufanele ngikhulume ngentfo lengivise buhlungu kakhulu ekuphileni kwami.” Emavikini lambalwa lalandzela, Denise waya enkantolo futsi wakhuluma embikwalendvodza lebeyibangele umndeni wakhe buhlungu lobukhulu. Yini layisho? Denise wacela lijaji kutsi libe nemusa kulendvodza. b Nakacedza kukhuluma, lelijaji lakhala tinyembeti. Latsi: “Kuyo yonkhe iminyaka lengu-25 ngilijaji, angizange sengiyive intfo lenjengalena nangiteka licala enkantolo. Angikaze sengive lilunga lemndeni lalowoniwe lincengela lona lobekwe licala. Angizange sengiweve emavi lakhombisa lutsandvo nekucolela.”
3. Yini leyasita Denise kutsi acolele?
3 Yini leyasita Denise kutsi acolele? Wacabangisisa ngekucolela kwaJehova. (Mik. 7:18) Nangabe sibonga kakhulu ngekutsi Jehova uyasicolela, loko kutasisita kusi sicolele labanye.
4. Yini Jehova lafuna siyente? (Kubase-Efesu 4:32)
4 Jehova ufuna sicolele labanye ngekukhululeka njengobe naye asicolela. (Fundza Kubase-Efesu 4:32.) Ulindzele kutsi sihlale sikulungele kucolela labo labasivisa buhlungu. (Hla. 86:5; Luk. 17:4) Kulesihloko, sitawucoca ngetintfo letintsatfu letitasisita kutsi sicolele kakhudlwana.
YINAKE INDLELA LOTIVA NGAYO
5. Ngekusho kweTaga 12:18, singativa njani nangabe lotsite asiphetse kabi?
5 Singahle siviswe buhlungu nguloko lokushiwo ngulotsite nobe akwente, ikakhulukati nangabe angumngani nobe lilunga lemndeni. (Hla. 55:12-14) Ngalesinye sikhatsi, buhlungu lesibuva ngekhatsi bungafananiswa nebuhlungu lesibuvako nasigwazwa. (Fundza Taga 12:18.) Singahle sitsalalise nobe singayinaki indlela lesitiva ngayo. Kodvwa kwenta njalo kungafanana nekugwazwa bese kushiywa lomukhwa kulelinceba. Ngendlela lefanako, ngeke silindzele kuba ncono nangabe singayinaki indlela lesitiva ngayo.
6. Yini lesingayenta nangabe umuntfu asivisa buhlungu?
6 Singacale sitfukutsele nangabe umuntfu asiphatsa kabi. LiBhayibheli liyavuma kutsi kungenteka sitfukutsele. Nobe kunjalo, liyasecwayisa kutsi singakuvumeli kutsi kusincobe. (Hla. 4:4; Ef. 4:26) Ngasiphi sizatfu? Ngobe indlela lesitiva ngayo ivame kuholela ekwenteni lokutsite, futsi intfukutselo ayikavami kuba nemiphumela lemihle. (Jak. 1:20) Khumbula, kutfukutsela kuyatentakalela, kodvwa sitawukhetsa kutsi sitawuhlale sitfukutsele yini nobe cha.
Kutfukutsela kuyatentakalela, kodvwa sitawukhetsa kutsi sitawuhlale sitfukutsele yini nobe cha
7. Nguyiphi lenye indlela lesingativa ngayo nangabe lotsite asivisa buhlungu?
7 Nangabe siphetfwe kabi, singafikelwa nanguleminye imiva lebuhlungu. Sibonelo nje, lomunye dzadze lokutsiwa ngu-Ann utsi: “Ngesikhatsi ngisemncane, babe wehlukana namake futsi washada nasisi lebekangigadza. Ngativa ngilahliwe. Ngesikhatsi baba nebantfwana, ngeva ngatsi batsatsa sikhundla sami. Ngakhula ngiva shengatsi angifunwa ngumuntfu.” Lomunye dzadze lokutsiwa nguGeorgette uchaza indlela lativa ngayo ngesikhatsi indvodza yakhe ingetsembeki kuye, utsi: “Besibangani kusukela sisebancane. Besishumayela kanye kanye njengobe besingemahlahlandlela! Ngephuka inhlitiyo.” Lomunye dzadze lokutsiwa nguNaomi utsi: “Angizange sengicabange kutsi indvodza yami ingangivisa buhlungu. Ngako ngesikhatsi ingitjela kutsi beyisolo ibukela titfombe letikhombisa kungcola futsi ingifihlela, ngativa ngikhohliswe kakhulu.”
8. (a) Ngutiphi letinye tizatfu letenta kudzingeke sicolele labanye? (b) Kusisita njani kucolela? (Buka libhokisi lelitsi “ Yini Lesingayenta Nangabe Lotsite Asivise Buhlungu Kakhulu?”)
8 Angeke sikhone kulawula loko bantfu labakushoko nobe labakwentako kitsi, kodvwa singetama kulawula indlela lesenta ngayo. Ngalokuvamile intfo lencono lesingayenta kutsi sicolele. Ngasiphi sizatfu? Ngobe siyamtsandza Jehova futsi ufuna sicolele. Nangabe sihlala sitfukutsele futsi singacoleli, manyenti ematfuba ekutsi sente intfo lengakahlakaniphi futsi singaze sitilimate. (Taga 14:17, 29, 30) Cabanga nganasi sibonelo salomunye dzadze lokutsiwa nguChristine. Utsi: “Nangitfukusele, angikavami kumoyitela. Ngivame kudla kudla lokute imphilo. Angilali kahle, futsi kuba matima kakhulu kutsi ngilawule indlela lengitiva ngayo, lokuwulimatako umshado wami kanye nebudlelwane lenginabo nalabanye.”
9. Kubaluleke ngani kutsi siyekele kuhlala sitfukutsele?
9 Ngisho nobe lomuntfu losivise buhlungu angacolisi ngaloko lakwentile, singawunciphisa umonakalo lawentile. Njani? Georgette, lesike sakhuluma ngaye utsi: “Kwatsatsa sikhatsi, kodvwa ngayekela kuhlala ngimtfukutselele loyo bekake waba yindvodza yami. Ngenca yaloko, ngativa nginekuthula lokukhulu.” Nasiyekela kutfukutsela, sivikela tinhlitiyo tetfu kutsi tingalinyatwa kuva buhlungu. Siphindze sitisite ngekutsi siyekele kunaka loko lokusivisa buhlungu futsi sichubeke nemphilo sijabulile. (Taga 11:17) Kodvwa yini longayenta nangabe solo awukakulungeli kucolela ngisho nobe sewuyati indlela lotiva ngayo?
YINI LONGAYENTA KUZE UNGAHLALI UTFUKUTSELE?
10. Kubaluleke ngani kutsi sitinikete sikhatsi sekuphola emoyeni? (Buka netitfombe.)
10 Yini lengakusita kutsi ungahlali utfukutsele? Lenye indlela kutsi utinikete sikhatsi sekuphola. Ngemuva kwekutsi umuntfu lolimele kamatima sekatfole lusito kubodokotela, udzinga sikhatsi kuze elulame emtimbeni. Ngendlela lefanako, singahle sidzinge sikhatsi sekutsi siphole emoyeni ngaphambi kwekutsi sicolele lotsite ngalokusuka enhlitiyweni.—Shu. 3:3; 1 Phet. 1:22.
Njengobe umuntfu lolimele adzinga kunakekelwa kahle, loko kuyafana nalapho umuntfu akuvise buhlungu (Buka sigaba 10)
11. Umthantazo ungakusita njani kutsi ucolele?
11 Thantaza, ucele Jehova kutsi akusite ucolele. c Ann, lesicoce ngaye uchaza indlela kuthantaza lokwamsita ngayo. Utsi: “Ngacela Jehova kutsi acolele lilunga ngalinye lemndeni ngetintfo lesingazange sitente kahle. Ngabese ngibhalela babe nemfati wakhe lomusha ngabatjela kutsi sengibacolele.” Ann uyavuma kutsi kwenta loko bekungasimelula. Kodvwa utsi: “Ngiyetsemba kutsi kwetama kwami kulingisa kucolela kwaJehova kutawenta babe nemfati wakhe bafune kufundza lokunyenti ngaye.”
12. Kubaluleke ngani kutsi setsembe Jehova kunekwetsemba indlela lesitiva ngayo? (Taga 3:5, 6)
12 Tsemba Jehova, hhayi indlela lotiva ngayo. (Fundza Taga 3:5, 6.) Jehova uhlale akwati loko lokusilungelako. (Isa. 55:8, 9) Ngetulu kwaloko, akayuze asicele kutsi sente intfo letasilimata. Ngako nakasikhutsata kutsi sicolele, singaciniseka kutsi loko kutawusita tsine. (Hla. 40:4; Isa. 48:17, 18) Ngakulolunye luhlangotsi, nangabe setsemba indlela lesitiva ngayo, singahle singakhoni kucolela. (Taga 14:12; Jer. 17:9) Naomi, lesike sakhuluma ngaye utsi: “Ekucaleni, bengibona ngatsi nginesizatfu lesivakalako sekungayicoleli indvodza yami ngenca yekubukela titfombe letikhombisa kungcola. Bengesaba kutsi itawuphindze ingivise buhlungu nobe kutsi beyitawukhohlwa kutsi beyingivise buhlungu lobungakanani. Ngetulu kwaloko bengititjela kutsi Jehova uyayicondza indlela lengitiva ngayo. Kodvwa ngabese ngiyabona kutsi njengobe Jehova ayicondza indlela lengitiva ngayo, loko akusho kutsi uvumelana nayo. Uyayati indlela lengitiva ngayo nekutsi kutsatsa sikhatsi kutsi ngiphole, kepha uyafuna nekutsi ngicolele.” d
SHINTJA INDLELA LOTIVA NGAYO IBE KAHLE
13. Ngekusho kwembhalo waKubaseRoma 12:18-21, yini lokufanele siyente?
13 Nasicolela umuntfu losivise buhlungu kakhulu, sifuna kwenta lokungetulu nje kwekutsi singakhulumi ngaloko lokwentekile. Nangabe lomuntfu losivise buhlungu kungumzalwane nobe dzadze, umgomo wetfu kwakha kuthula. (Mat. 5:23, 24) Sikhetsa kuba nemusa esikhundleni sekutfukutsela, futsi sicolele esikhundleni sekukwata. (Fundza KubaseRoma 12:18-21; 1 Phet. 3:9) Yini lengasisita kutsi sikwente loko?
14. Yini lokufanele sitimisele kuyenta, futsi ngasiphi sizatfu?
14 Kufanele setame kubuka lomuntfu losivise buhlungu ngendlela Jehova lambuka ngayo. Jehova ukhetsa kubuka lokuhle kubantfu. (2 Khr. 16:9; Hla. 130:3) Ngalokuvamile siyakutfola loko lesikubukako kubantfu, kungaba ngulokuhle nobe lokubi. Nangabe sibuka lokuhle kulabanye, kutawuba melula kutsi sibacolele. Nasi sibonelo, lomunye umzalwane lokutsiwa nguJarrod utsi: “Kuba melula kutsi ngicolele umzalwane nangabe ngibuka tintfo letinyenti letinhle latentako kunaletimbi.”
15. Kubaluleke ngani kutjela umuntfu kutsi umcolele?
15 Lenye intfo lebalulekile longayenta kutsi utjele lomuntfu lokuvise buhlungu kutsi umcolele. Ngasiphi sizatfu? Naka naku lokushiwo nguNaomi lesike sakhuluma ngaye, utsi: “Indvodza yami yangibuta yatsi: ‘Sewungicolele yini?’ Nangivula umlomo ngifuna kutsi: ‘Ngiyakucolela,’ kwashwaphana lulwimi. Ngabona kutsi bengingakamcoleli ngalokusuka enhlitiyweni. Ngekuhamba kwesikhatsi, ngakhona kuwasho lamagama labalulekile latsi: ‘Ngiyakucolela.’ Ngamangala kakhulu nangibona emehlo akhe agcwala tinyembeti ngenca yekuthula laba nako, futsi nami ngativa nginekuthula. Kusukela lapho ngaphindze ngacala kuyetsemba indvodza yami futsi sesiphindze sibangani labakhulu.”
16. Yini loyifundzile mayelana nekucolela?
16 Jehova ufuna sicolele. (Khol. 3:13) Nobe kunjalo, kungahle kube matima kucolela labanye. Kodvwa singakhona kukwenta loko nangabe sinaka indlela lesitiva ngayo futsi siyekele kuhlala sitfukutsele. Nasenta njalo sitawukhona kutiva ngendlela lekahle.—Buka libhokisi lelitsi “ Tintfo Letitsantfu Letitasisita Kutsi Sicolele.”
NAKA TINZUZO TEKUCOLELA
17. Kusisita njani kucolela?
17 Sinetizatfu letinyenti tekucolela. Cabanga nganati letinye tato. Sekucala, silingisa Babe wetfu lonemusa Jehova futsi simjabulise. (Luk. 6:36) Sesibili, sikhombisa kutsi siyabonga ngekutsi Jehova uyasicolela. (Mat. 6:12) Sesitsatfu, siba nemphilo lenhle futsi sibe nebudlelwane lobuhle nalabanye.
18-19. Ungaba yini umphumela nasicolela?
18 Nasicolela labanye, singahle sitfole tibusiso lesingakatigadzi. Sibonelo nje, naka naku lokwenteka kuDenise lesike sakhuluma ngaye. Bekangati kutsi lendvodza leyabashayisa beyifuna kutibulala ngemuva kwekutekwa kwalelicala. Kodvwa kwayitsintsa kakhulu kucolela kwaDenise kangangekutsi yacala kudadisha liBhayibheli naBoFakazi BaJehova.
19 Singahle sive shengatsi kucolela umuntfu kuyintfo lelukhuni kakhulu kulesiyoke sikwente, kodvwa kungaphindze kuletse tibusiso. (Mat. 5:7) Ngako shengatsi sonkhe singenta konkhe lesingakwenta kuze sicolele njengaJehova.
INGOMA 125 “Bayajabula Labo Labanesihawu!”
a Lamanye emagama ashintjiwe.
b Esimeni lesinjalo, umKhristu ngamunye kufanele atentele sincumo sekutsi utawenta njani.
c Ku jw.org bukela ema-video latsi “Masithethelelane,” “Colela Ngekukhululeka” naletsi “Sesiphindze Sibangani.”
d Nanobe kubukela titfombe letikhombisa kungcola kusono futsi kuvisana buhlungu, kepha akumniketi lona loshade naye longakoni ngalutfo sizatfu lesisekelwe emiBhalweni sekudivosa.
