Mary nendvodza yakhe John, a bahlala eveni lapho bantfu labanyenti basePhilippines bahlala futsi basebente khona, futsi bayakhona kubashumayela. Ngesikhatsi se-COVID-19, Mary wakhona kucala kudadisha liBhayibheli nebantfu labahlala kulelive kanye nalabanye labahlala kulamanye emave. Wakwenta njani loko?

Mary bekavame kubuta labo ladadisha nabo liBhayibheli atsi: “Ukhona yini lomatiko longatsandza kudadisha liBhayibheli?” Nangabe atsi ukhona, bekabese ucela kutsi amchumanise naye. Kubuta lombuto lomelula kuvame kuba nemiphumela lemihle. Sisho ngani? Ngobe bantfu labakutsandzako loko labakufundza eVini laNkulunkulu bavame kufuna kukucocela emalunga emindeni yabo nebangani babo loko labakufundzile. Ube yini umphumela wekubuta lombuto?

Jasmin lebekadadisha liBhayibheli naMary wamchumanisa nalabanye labane lebebafuna kudadisha liBhayibheli. Lomunye wabo bekunguKristine, lobekakutsandza kakhulu loko bekakufundza kangangekutsi wacela Mary kutsi badadishe kabili ngeliviki. Ngesikhatsi Mary ambuta kutsi bakhona yini labatiko labangatsandza kudadisha liBhayibheli, Kristine watsi: “Yebo, ngitakuchumanisa nebangani bami.” Ngemuva kwemaviki lambalwa, Kristine wachumanisa Mary nalabanye bangani bakhe lebebafuna kudadisha liBhayibheli. Ngekuhamba kwesikhatsi, Kristine wamchumanisa nalabanye futsi labangani bakhe nabo benta lokufanako bamchumanisa nalabanye.

Kristine bekafuna nekutsi umndeni wakhe lohlala ePhilippines ufundze lokunyenti ngeliBhayibheli. Ngako wakhuluma nendvodzakati yakhe lokungu-Andrea. Ekucaleni Andrea wacabanga watsi: ‘BoFakazi bayinkholo lengacondzakali kahle, abakholelwa kuJesu futsi basebentisa Lithestamente Lelidzala kuphela.’ Kodvwa ngemuva kwekufundza kanye nje, lombono longasiwo lebekanawo waphela. Nabasafundza, bekahle atsi: “Nangabe kushiwo liBhayibheli, kusho kutsi kuliciniso!”

Ngekuhamba kwesikhatsi Andrea wachumanisa Mary nebangani bakhe lababili kanye nalomunye lasebenta naye. Ngetulu kwaloko Mary bekangati kutsi Angela longu-anti wa-Andrea futsi longaboni emehlweni bekalalela nakadadisha na-Andrea. Ngalelinye lilanga Angela wacela Andrea kutsi amchumanise naMary futsi waticelela kutsi adadishe naye liBhayibheli. Angela bekakutsandza loko bekakufundza. Kungakapheli inyanga, besekabambe ngengcondvo imibhalo leminyenti futsi bekafuna kudadisha tikhatsi letine  ngeliviki! Wacala nekuba khona njalo emihlanganweni asebentisa i-videoconferencing asitwa ngu-Andrea.

Ngesikhatsi Mary atfola kutsi indvodza yaKristine lokunguJoshua, beyilalela nakusafundvwa kodvwa ingafuni kunakeka, Mary wayibuta kutsi ingatsandza yini kuba khona nabafundza. Joshua watsi: “Ngitawulalela, kepha ungangibuti imibuto, wangibuta ngitawuhamba.” Kungakapheli imizuzu lesihlanu bacale kufundza, Joshua besekabute imibuto leminyenti kunaleyo lebutwe nguKristine futsi bekafuna kuchubeka nekudadisha liBhayibheli.

Umbuto waMary lomelula wenta kutsi adadishe liBhayibheli nebantfu labanyenti. Wacela kutsi bazalwane nabodzadze badadishe liBhayibheli nalabanye babo. Mary wacalisa kudadisha liBhayibheli nebantfu labangu-28 emaveni lamane.

Jasmin, lesikhulume ngaye ekucaleni, wabhajatiswa nga-April 2021. Kristine wabhajatiswa ngaMay 2022 futsi wabuyela ePhilippines kuze abe nemndeni wakhe. Kwaphindze kwabhajatiswa labanye lababili Kristine lebekabachumanise naMary. Angela wabhajatiswa ngemuva kwetinyanga letimbalwa futsi nyalo ulihlahlandlela lelivamile. Indvodza yaKristine lokunguJoshua, nendvodzakati yabo Andrea, kanye nalabanye batfutfuka kahle.

Ngesikhatsi semaKhristu ekucala, tindzaba letimnandzi betandza kakhulu emkhatsini wemalunga emndeni nebangani. (Joh. 1:41, 42a; Imis. 10:24, 27, 48; 16:25-33) Kungaba njani ubute labo lodadisha nabo liBhayibheli nobe labo labatsandza kufundza ngeliBhayibheli umbuto lotsi: “Bakhona yini lobatiko labangatsandza kudadisha liBhayibheli?” Kwati bani nje, mhlawumbe banyenti bantfu longacala kudadisha nabo liBhayibheli ngenca yalombuto lomelula.