UKILE yini waba senkingeni futsi wativa uwedvwa? Siphila ‘etikhatsini letibucayi lokumatima kubhekana nato,’ letingasenta sidvumateke futsi sitive sisodvwa. (2 Thim. 3:1) Nobe kunjalo, nasinetinkinga, bakhona bantfu labangasisita. LiBhayibheli liveta kutsi bangani sibili bangasisita kakhulu “ngesikhatsi sekuhlupheka.”​—Taga 17:17.

Umphostoli Pawula wahamba nalabanye bangani bakhe ngesikhatsi asitfunywa selivangeli futsi bamsita ngetindlela letinyenti. (Khol. 4:7-11) Ngesikhatsi Pawula aboshiwe eRoma, bangani bakhe bamentela tintfo lebekangeke akhone kutentela tona. Sibonelo nje, Ephafrodithu waletsela Pawula tintfo lebekatidzinga lebetibuya kubazalwane nabodzadze eFiliphi. (Fil. 4:18) Thikhikhusi wamikisa tincwadzi taPawula emabandleni lehlukene. (Khol. 4:7) Ngekusitswa bangani bakhe, Pawula wakhona kwenta umsebenti wakhe nanobe bekaboshelwe endlini futsi ngekuhamba kwesikhatsi wavalelwa ejele. Yini longayenta kuze ukhombise kutsi ungumngani sibili lamuhla?

Tibonelo talamuhla tikhombisa kutsi kusita ngani kuba ngumngani sibili. Cabanga ngadzadze lowakhombisa kutsi ungumngani sibili ku-Elisabet, lolihlahlandlela lelivamile eSpain. Ngesikhatsi kutfolakala kutsi makwa-Elisabet unamdlavuza losesigabeni sekugcina, lodzadze watfumelela Elisabet imilayeto lekhutsatako lesekelwe emavesini eliBhayibheli. Elisabet utsi: “Lemilayeto yanginiketa emandla ekubeketelela lilanga ngalinye futsi bengingativa ngingedvwa.”​—Taga 18:24.

Singabucinisa bungani betfu nebazalwane nabodzadze ngekutsi sibasekele nabenta imisebenti yelibandla. Sibonelo nje, ungavolontiya kuhamba nemzalwane losakhulile nobe nadzadze losakhulile emihlanganweni yelibandla nobe emsebentini wekushumayela. Nawenta njalo, nitawukhutsatana. (Rom. 1:12) Nobe kunjalo, lamanye emaKhristu akakhoni kuphuma emakhaya. Yini lesingayenta kuze sikhombise kutsi sibangani sibili kubo?

Labanye bazalwane betfu nabodzadze abakhoni kuya emihlanganweni yelibandla eHholweni leMbuso ngenca yekutsi bagula kakhulu nobe ngenca yaletinye timo. Cabanga ngesibonelo saDavid, lokwatfolakala kutsi unamdlavuza lokutsiwa yi-lymphoma. Kwaphela tinyanga letingetulu kwaletisitfupha elashwa kusetjentiswa i-chemotherapy. Kuso sonkhe lesikhatsi, David nemkakhe Lidia, bebasebentisa  tebuchwephesha kuze babe khona emihlanganweni yelibandla.

Bazalwane nabodzadze ebandleni babasita njani? Njalo nakuphela umhlangano, labanye labaseHholweni leMbuso bebacoca naDavid naLidia nge-videoconference. Ngetulu kwaloko, nabaphendvulile, bebabese batfola imilayeto lekhutsatako levela kubazalwane babo nabodzadze. Waba yini umphumela? Bebangativa babodvwa.

Singashumayela yini nalabo labangakhoni kuphuma emakhaya? Ngekwenta lushintjo loluncane singakhombisa kutsi asikabakhohlwa. (Taga 3:27) Ungahlela yini kushumayela nabo ngekubhala tincwadzi nobe ngekushaya lucingo? Labo labangakhoni kushumayela nelibandla bangakhona kutfola imihlangano lengaphambi kwekuyoshumayela nge-videoconference. BoDavid naLidia kwabasita loko. David utsi: “Kuba semhlanganweni longaphambi kwekuyoshumayela nelicembu futsi kuthantazwe kwasisita kakhulu.” Ngetulu kwaloko, nangabe timo tivuma futsi kuphephile kwenta kanjalo, ungahlela yini kutsi ngalesinye sikhatsi uhambe nalodadisha naye liBhayibheli niyofundzela ekhaya lemmemeteli longakhoni kuphuma ekhaya?

Nangabe sicitsa sikhatsi nebazalwane nabodzadze labangakhoni kuphuma emakhaya, futsi sibona buntfu babo lobuhle, siyasondzelana nabo. Sibonelo nje, nangabe ushumayela nabo futsi unaka indlela labasebentisa ngayo liVi laNkulunkulu ngelikhono kuze batsintse tinhlitiyo tebantfu, kungakwenta usondzelane kakhulu nabo. Nangabe ubasita emsebentini lophatselene nekukhonta Nkulunkulu, ungaba nebangani labanyenti.​—2 Khor. 6:13.

Pawula kwamdvudvuta kuba nemngani wakhe Thithusi. (2 Khor. 7:5-7) Lendzaba isikhumbuta kutsi singabadvudvuta labo labadzinga lusito ngekutsi sikhombise kutsi siyabavela futsi sibe nabo, siphindze sente konkhe lokusemandleni kuze sibasekele.​—1 Joh. 3:18.

Bazalwane betfu nabodzadze baseRussia basibekela sibonelo lesihle sekusekelana. Cabanga ngaloko lokwenteka kuSergey nemkakhe Tatyana. Ngemuva kwekutsi likhaya labo liphenywe maphoyisa, abese ahamba nabo kuze ayobaphenya ngemibuto. Tatyana wakhululwa kucala futsi wabuyela ekhaya. Sergey utsi: “Ngemuva nje kwekutsi [Tatyana] afike ekhaya, kweta lomunye dzadze lonesibindzi. Kwabese kuta nalabanye bazalwane nabodzadze labasisita kutsi sibuyisele tonkhe tintfo ngabolonina.”

Sergey uchubeka atsi: “Ngiyawatsandza emavi lakuTaga 17:17, latsi: ‘Umngani sibili ukutsandza ngaso sonkhe sikhatsi, futsi ungumnakenu longetsembela kuye ngesikhatsi sekuhlupheka.’ Ngikubonile kuba liciniso kwalamavi kulesikhatsi sekuphatfwa kabi nangingakhoni kubeketelela lesimo ngingedvwa. Jehova unginikete bangani labanesibindzi labahlale banami.”

Sibadzinga kakhulu bangani kulesikhatsi lesimatima. Sitawubadzinga nakakhulu ngesikhatsi sekuhlupheka lokukhulu. Ngako yenta konkhe longakwenta kuze ube ngumngani sibili nyalo!​—1 Phet. 4:7, 8.