1-2. (a) Yini lesenta singamangali nasibhekene netinkinga? (b) Sitawucoca ngani kulesihloko?

 NJENGOBE sibantfu baJehova asimangali nasiba netinkinga. Siyati kutsi liBhayibheli litsi “kufanele sendlule ekuhluphekeni lokunyenti ngaphambi kwekutsi singene embusweni waNkulunkulu.” (Imis. 14:22) Siyati nekutsi letinye tinkinga tetfu angeke tiphele ngalokuphelele kuze kube ngulapho kufika live lelisha, lapho khona “kufa kungeke kusaba khona, futsi kulila, nekukhala kanye nebuhlungu ngeke kusaba khona.”​—Semb. 21:4.

² Jehova akasivikeli kutsi singabhekani netinkinga. Nobe kunjalo, uyasisita kuze sikhone kutibeketelela. Naka naku umphostoli Pawula lakusho kumaKhristu lebekahlala eRoma. Wacale washo tinkinga yena kanye nebazalwane bakhe lababhekana nato. Ngemuva kwaloko wabhala watsi: “Siyaphumelela ngenca yaloyo lowasitsandza.” (Rom. 8:35-37) Loku kusho kutsi Jehova angakwenta uphumelele ngisho ubhekene nenkinga. Asesibone kutsi Jehova wamsita njani Josefa kutsi aphumelele nekutsi angakusita njani wena.

3. Kuphila kwaJosefa kwashintja njani ngekushesha?

³ Jakobe bekangafihli kutsi uyitsandza kakhulu indvodzana yakhe lenguJosefa. (Gen. 37:3, 4) Loko kwenta banakaboJosefa labadzala kutsi babe nemona. Batsi nabatfola litfuba, batsengisa Josefa kulelinye licembu lebakaMidiyani lebelibatsengisi. Labatsengisi bamtsatsa baya naye eGibhithe, lokuyindzawo  lebeyikhashane ngemakhulu emakhilomitha. Nabefika lapho, bamtsengisa kuPhotifari, lobekayindvuna yabogadzi baFaro. Kuphila kwaJosefa kwashintja ngekushesha, kwasuka ekubeni yintsandvokati yababe wakhe, waba sigcili saseGibhithe!​—Gen. 39:1.

4. Yini lengenta kutsi sibe netinkinga letifana naleto Josefa labhekana nato?

⁴ LiBhayibheli litsi tintfo letimbi tenteka kubo bonkhe bantfu. (Shu. 9:11) Singahle sibhekane netinkinga letehlela nalabanye bantfu, lokusho kutsi singaba netinkinga bonkhe bantfu lababa nato. (1 Khor. 10:13) Nobe singahlupheka ngenca yekutsi sibafundzi baJesu. Sibonelo saloko kutsi kungahlekiswa ngatsi, siphikiswe futsi singaze siphatfwe kabi ngenca yekukholwa kwetfu. (2 Thim. 3:12) Kunobe nguyiphi inkinga lobhekana nayo, Jehova angakwenta uphumelele. Wamsita njani Josefa kutsi aphumelele?

5. Yini Photifari layibona mayelana nekuphumelela kwaJosefa? (Genesisi 39:2-6)

⁵ Fundza Genesisi 39:2-6. Photifari wabona kutsi Josefa bekalijaha lelihlakaniphile futsi lebelitimisela nalenta umsebenti. Bekati nekutsi kwentiwa yini loko. Photifari wabona kutsi “Jehova abephumelelisa konkhe Josefa labekwenta.” b Ngekuhamba kwesikhatsi, wamenta inceku yakhe. Wambeka nekutsi engamele yonkhe indlu yakhe. Waba yini umphumela? Photifari waphumelela.

6. Kungenteka Josefa bekativa njani ngesimo lebekakuso?

⁶ Cabanga ngekutsi Josefa bekativa njani ngesimo lebekakuso. Yini lebekayifuna kakhulu? Bekafuna Photifari amnake yini, amnike nemvuzo? Kungenteka Josefa bekafuna kukhululwa kuze abuyele kubabe wakhe. Nanobe bekanemisebenti leminyenti endlini yaPhotifari, bekasolo asigcili semphatsi wakhe lebekangamkhonti Jehova. Jehova akazange ente Photifari kutsi akhulule Josefa, futsi simo saJosefa besisetawuba sibi kakhulu.

7. Simo saJosefa sashintja njani saba sibi kakhulu? (Genesisi 39:14, 15)

⁷ Njengobe kuvetwe kuGenesisi sehluko 39, umfati waPhotifari bekakhangwa nguJosefa  futsi wamcela tikhatsi letinyenti kutsi alale naye. Kodvwa Josefa bekala. Ekugcineni, wamtfukutselela kakhulu Josefa kangangekutsi waze watsi wetame kumdlwengula. (Fundza Genesisi 39:14, 15.) Watsi Photifari nakakuva loku, wavalela Josefa ejele futsi wahlala lapho iminyaka. (Gen. 39:19, 20) Bekunjani kulelijele? Ligama lesiHebheru lelasetjentiswa nguJosefa kuze achaze ‘lijele’ lingasho ‘umgodzi,’ lokukhombisa kutsi indzawo lebekakuyo beyimnyama futsi bekete litsemba. (Gen. 40:15; umbhalo longentasi) Ngetulu kwaloko, liBhayibheli liveta kutsi kwaphela sikhatsi tinyawo taJosefa tiboshwe ngetinketane futsi intsamo yakhe iboshwe ngetinsimbi. (Hla. 105:17, 18) Simo saJosefa besiya ngekuba sibi kakhulu. Wasuka ekubeni sigcili lesetsenjwako, waba siboshwa lesibukelwa phansi.

8. Yini lesingaciniseka ngayo ngisho simo sibonakala siya ngekuba sibi kakhulu?

⁸ Ukile yini waba sesimeni lesibonakala siya ngekuba sibi kakhulu, ngisho nobe uthantaza ngalokuphindzaphindziwe? Kungenteka loko. Jehova akasivikeli kutsi singabhekani netinkinga kulelive lelibuswa nguSathane. (1 Joh. 5:19) Nobe kunjalo, naku longaciniseka ngako: Jehova uyakwati loko lobhekene nako, futsi unendzaba nawe. (Mat. 10:29-31; 1 Phet. 5:6, 7) Ngetulu kwaloko, wetsembisile watsi: “Ngeke ngize ngikushiye, futsi ngeke ngize ngikulahle.” (Heb. 13:5) Jehova angakusita kutsi ubeketelele simo lobhekene naso ngisho nobe kubonakala kute litsemba. Asesibone kutsi loku wakwenta njani kuJosefa.

9. Yini lekhombisa kutsi Jehova bekanaJosefa ngesikhatsi asejele? (Genesisi 39:21-23)

⁹ Fundza Genesisi 39:21-23. Nanobe Josefa abhekana nesikhatsi lesimatima nakaboshiwe, Jehova wamenta waphumelela. Kanjani? Ngekuhamba kwesikhatsi, indvuna yelijele yametsemba Josefa futsi yamhlonipha, njengobe naPhotifari bekentile. Ekugcineni, lendvuna yelijele yabeka Josefa kutsi engamele letinye tiboshwa. Ecinisweni, liBhayibheli litsi “lendvuna yelijele beyingakhatsateki ngalutfo lebeluphatsiswe Josefa.” Nyalo Josefa besekanemsebenti lokufanele awente. Lolu kwaba lushintjo lelingakalindzeleki! Kwenteka njani kutsi siboshwa lebesimangalelwe ngekutsi setame kudlwengula umfati wendvuna yabogadzi sinikwe sikhundla lesisetulu kangaka? Imphendvulo isebaleni. Genesisi 39:23 utsi: “Jehova [abenaJosefa] futsi Jehova abephumelelisa konkhe labekwenta.”

10. Chaza kutsi yini lebeyingenta Josefa angatiboni aphumelela kuko konkhe.

¹⁰ Yetama kuphindze ucabange ngendlela Josefa lebekativa ngayo ngesimo lebekakuso. Ngemuva kwekubekwa licala lelingemanga futsi aboshwe, ucabanga kutsi bekabona ngatsi uphumelela kuko konkhe yini? Yini Josefa lebekayifuna kakhulu? Bekafuna kwemukelwa yindvuna yelijele yini? Kungenteka Josefa bekafuna kukhululwa. Waze wacela lesinye siboshwa lebesesitawukhululwa kutsi simkhulumele naFaro kuze naye atokhululwa kulelijele. (Gen. 40:14) Nobe kunjalo, lendvodza ayizange ikhulume naFaro nayiphuma nje ejele. Umphumela waloko waba kutsi Josefa wachubeka asejele leminye iminyaka lemibili. (Gen. 40:23; 41:1, 14) Nobe kunjalo, Jehova wachubeka amphumelelisa. Kanjani?

11. Nguliphi likhono Jehova lalinika Josefa, futsi loku kwasita njani ekugcwaliseni injongo yaJehova?

¹¹ Ngesikhatsi Josefa asejele, Jehova wenta kutsi inkhosi yaseGibhithe iphuphe emaphupho lamabili layihlupha. Faro bekakufuna kamatima kwati kutsi asho kutsini. Ngesikhatsi  lenkhosi iva kutsi Josefa unelikhono lekuchaza emaphupho, yatsi akalandvwe. Ngekusitwa nguJehova, Josefa wakhona kuwachaza lamaphupho futsi Faro wajabula ngaleseluleko lamnika sona. Ngenca yekutsi Faro wabona kutsi Jehova bekanalelijaha, walibeka kutsi lengamele kudla kwaseGibhithe. (Gen. 41:38, 41-44) Ngekuhamba kwesikhatsi, kwaba nendlala lenkhulu eGibhithe naseKhenani, lokuyindzawo lapho umndeni wakuboJosefa bewuhlala khona. Nyalo Josefa besekangakhona kusita umndeni wakubo futsi avikele luhla lwekutalwa kwaMesiya.

12. Jehova wamenta njani Josefa waphumelela?

¹² Cabanga ngetimo letingakavami letenteka ekuphileni kwaJosefa. Ngubani lowabangela Photifari kutsi anake Josefa lobekasigcili nje? Ngubani lowabangela indvuna yelijele kutsi itsandze Josefa lobekasiboshwa lesibukelwa phasi? Ngubani lowabangela Faro kutsi abe nemaphupho lamhlupha futsi waniketa Josefa likhono lekuwachaza? Ngubani lowenta Faro wabeka Josefa kutsi abe ngumphatsi wekudla eGibhithe? (Gen. 45:5) Kusebaleni kutsi nguJehova lowenta Josefa waphumelela kuko konkhe lebekakwenta. Nanobe banakaboJosefa bebafuna kumbulala, Jehova washintja lesimo kuze afeze intsandvo yakhe.

13. Jehova ulawula tonkhe timo lesibhekana nato yini? Chaza.

¹³ Yini lesiyifundza kuloko lokwenteka kuJosefa? Jehova ulawula tonkhe timo lesibhekana nato yini? Ucondzisa tonkhe tintfo letenteka ekuphileni kwetfu yini kuze tonkhe tintfo letimbi tenteke ngesizatfu lesihle? Cha, liBhayibheli alikufundzisi loku. (Shu. 8:9; 9:11) Nobe kunjalo, naku lesikwatiko: Nasibhekene nenkinga, Jehova uyabona futsi uyeva nasicela lusito. (Hla. 34:15; 55:22; Isa. 59:1) Ngetulu kwaloko, Jehova angasisita kutsi sikhone kubeketelela bumatima. Kanjani?

14. Jehova usisita njani nasibhekene netikhatsi letimatima?

¹⁴ Lenye indlela Jehova lasisita ngayo kutsi uyasidvudvuta futsi asikhutsate ngesikhatsi lesifanele. (2 Khor. 1:3, 4) Nguloko lokwenteka kulomunye umzalwane waseTurkmenistan  lokutsiwa ngu-Eziz, lowagwetjwa iminyaka lemibili ejele ngenca yekukholwa kwakhe. Utsi: “Ngelilanga lekutekwa kwelicala lami, lomunye umzalwane wangikhombisa Isaya 30:15 lotsi: ‘Nitawuba nemandla nangabe ningeke nesabe futsi nitawetsembela kimi.’ Lelivesi lihlale lingisita kutsi ngingesabi futsi ngetsembe Jehova kuko konkhe. Kucabangisisa ngalelivesi kwangisita ngesikhatsi ngiboshiwe.” Sikhona yini sikhatsi lapho Jehova ake wakusita khona ngekutsi akudvudvute futsi akukhutsate ngesikhatsi lobewukudzinge ngaso?

15-16. Yini loyifundza kuloko lokwenteka kuTori?

¹⁵ Sivame kubona sekwengcile kutsi Jehova usisite kangakanani kuze sibeketelele simo lesimatima. Lomunye dzadze lokutsiwa nguTori wakubona loku. Kwaphela iminyaka lesitfupha indvodzana yakhe lokutsiwa nguMason inamdlavuza, kwaze kwaba ngulapho ishona. Tori weva buhlungu kakhulu. Utsi: “Njengamake, angicabangi kutsi sikhona simo lesaba matima kimi kwengca lesi.” Uchubeka atsi: “Ngiyaciniseka kutsi nalabanye batali batawuvumelana nami kutsi kugulelwa ngumntfwana kubuhlungu kakhulu kwengca nangabe kugula wena.”

¹⁶ Nanobe lesimo senta Tori weva buhlungu kakhulu, ngekuhamba kwesikhatsi wacabanga ngendlela Jehova lamsite ngayo kutsi abeketelele lesimo. Utsi: “Nangicabanga ngaleso sikhatsi, ngiyabona kutsi Jehova wangisita ngesikhatsi indvodzana yami igula. Sibonelo nje, ngisho nangesikhatsi Mason agula kakhulu kutsi angabona tivakashi, bazalwane nabodzadze bebahamba ngemoto ema-awa lamabili baye esibhedlela. Bekuhlale kunalotsite esibhedlela lolungele kusisekela. Ngetulu kwaloko, bazalwane nabodzadze bebasipha loko besikudzinga. Ngisho nangetikhatsi  letimatima besihlale sinako lesikudzingako.” Jehova waniketa Tori loko lebekakudzinga kuze abeketelele lesimo futsi wenta lokufanako nakuMason.​—Buka libhokisi lelitsi “ Jehova Wasiniketa Loko Lebesikudzinga.”

17-18. Yini lengasenta sibone kutsi Jehova uyasisita ngetikhatsi letimatima futsi sibonge ngako? (Tihlabelelo 40:5)

¹⁷ Fundza Tihlabelelo 40:5. Umgomo wemuntfu locanca intsaba kutsi afike esicongweni sayo. Nobe kunjalo, kunetindzawo letinyenti langema kuto kuze abuke indzawo lenhle. Ngendlela lefanako, kufanele uhle uma futsi ucabange ngendlela Jehova lakusite ngayo ngisho ubeketelela simo lesimatima. Njalo nakuphela lilanga, tibute: ‘Jehova ungibusise njani lamuhla? Nanobe lenkinga isekhona, Jehova ungisita njani kuze ngiyibeketelele?’ Funa lokungenani kunye Jehova lakwentile kuze akusite.

¹⁸ Kuliciniso kutsi kungenteka uthantazela kutsi inkinga lonayo iphele. Kufanele vele ukuthantazele loko futsi kukahle kukwenta. (Fil. 4:6) Kodvwa kufanele sinake kutsi singatikhohlwa tibusiso lesinato nyalo. Ngetulu kwaloko, Jehova wetsembisa kutsi utasicinisa futsi asisite sicinisele. Ngako hlale ubonga ngekutsi Jehova uyakusita. Nawenta njalo, utayibona indlela Jehova lakusita ngayo kutsi uphumelele ngisho ubhekene netimo letimatima, njengobe amsita naJosefa.​—Gen. 41:51, 52.