1-2. (a) Sitiva njani nasicabanga ngekufa kwaJesu nangemsebenti wakhe wekushumayela? (b) Sitawucoca ngani kulesihloko?

 NASISHONELWA ngumuntfu lesimtsandzako, siva buhlungu kakhulu! Ekucaleni, sivame kuva buhlungu nasicabanga ngemalanga langaphambi kwekufa kwakhe, ikakhulukati nangabe ube setinhlungwini ngaphambi kwekutsi ashone. Kodvwa ngekuhamba kwesikhatsi sibese siyajabula nasicabanga ngalokutsite lasifundzisa kona, lakwenta, lakusho kuze asikhutsate nobe lokwasenta sahleka.

² Ngendlela lefanako, kusivisa buhlungu kufundza ngekuhlupheka kwaJesu nangekufa kwakhe. Ngesikhatsi seSikhumbuto, sivame kutinika sikhatsi sekucabanga ngekutsi umhlatjelo waJesu uligugu kangakanani. (1 Khor. 11:24, 25) Nobe kunjalo, sijabula kakhulu nasicabanga ngato tonkhe tintfo Jesu latisho nalatenta ngesikhatsi alapha emhlabeni. Kuyasikhutsata nekucabanga ngaloko lakwentako nyalo, nalatawusentela kona esikhatsini lesitako. Kucabangisisa ngaletintfo nangelutsandvo lanalo ngatsi kusenta sifune kukhombisa nangaletinye tindlela kutsi siyabonga, njengobe sitawubona kulesihloko.

3. Ngutiphi tizatfu lesinato tekubonga ngenhlawulo?

³ Siyajabula nasicabanga ngekuphila kwaJesu nangekufa kwakhe. Ngesikhatsi Jesu ashumayela lamhlabeni, wafundzisa bantfu ngetibusiso letitawuletfwa nguMbuso waNkulunkulu.  Ayasijabulisa lamaciniso lamayelana neMbuso. Siyabonga ngenhlawulo ngobe isenta sibe bangani baJehova naJesu. Ngetulu kwaloko, labo labakhombisa kutsi banekukholwa kuJesu banelitsemba lekuphila phakadze, nelekuphindze babone bantfu lababatsandzako labashona. (Joh. 5:28, 29; Rom. 6:23) Kute lesikwentile lokusenta sifanelwe nguletibusiso, futsi asiyuze sikhone kubuyisela Nkulunkulu naKhristu ngaloko labasentele kona. (Rom. 5:8, 20, 21) Kodvwa singakhombisa kutsi sibonga kangakanani. Kanjani?

4. Mariya waseMagdala wakhombisa njani kutsi uyabonga ngaloko Jesu lamentela kona? (Buka sitfombe.)

⁴ Cabanga ngesibonelo salomunye umfati lebekangumJuda, lebekutsiwa nguMariya waseMagdala. Simo sakhe besimatima kakhulu ngobe bekahlushwa ngemadimoni langu-7. Kungenteka bakacabanga kutsi kute longamsita kulesimo. Ngako cabanga kutsi wajabula kangakanani ngesikhatsi Jesu amkhulula kulamadimoni! Wakhombisa kubonga kwakhe ngekutsi abe ngumlandzeli waJesu futsi asebentise sikhatsi sakhe, emandla kanye netintfo lebekanato kuze amsekele emsebentini wakhe wekushumayela. (Luk. 8:1-3) Nanobe Mariya bekabonga kakhulu ngaloko Jesu lamentela kona, kungenteka bekangati kutsi kusenalokukhulu latamentela kona. Bekatawufela bonkhe bantfu, ‘kuze wonkhe umuntfu lokholwa nguye’ atfole kuphila lokuphakadze. (Joh. 3:16) Kodvwa Mariya wakhombisa kutsi uyabonga kuJesu ngekutsi etsembeke kuye. Ngesikhatsi Jesu asetinhlungwini elugodvweni, Mariya bekaseceleni kwakhe ngobe bekamkhatsalela futsi afuna kudvudvuta labanye lebebakhona lapho. (Joh. 19:25) Ngemuva kwekufa kwaJesu, Mariya kanye nalabanye bafati lababili baya nemakha ethuneni laJesu kuze bayogcobisa sidvumbu sakhe. (Mak. 16:1, 2) Mariya wabusiswa kakhulu ngekwetsembeka kwakhe. Wabona Jesu lebesekavusiwe futsi wakhuluma  naye, lokulitfuba bafundzi labanyenti labangazange sebalitfole.​—Joh. 20:11-18.

5. Singakhombisa njani kutsi siyabonga ngako konkhe Jehova naJesu labasentele kona?

⁵ Natsi singakhombisa kutsi siyabonga ngako konkhe Jehova naJesu labasentele kona ngekutsi sisebentise sikhatsi setfu, emandla netintfo lesinato kuze sisekele umsebenti weMbuso. Sibonelo nje, singasita ekwakhiweni kwetakhiwo tenhlangano nasekutinakekeleni.

6. Sisho ngani kutsi inhlawulo isipho lesinikwe ngamunye wetfu?

⁶ Nasicabanga ngendlela Jehova naJesu labasitsandza ngayo, loko kwenta kutsi natsi sibatsandze. (1 Joh. 4:10, 19) Sibatsandza kakhulu nasicabanga ngekutsi Jesu wafela ngamunye wetfu. Umphostoli Pawula wakuvuma loku futsi waveta indlela labonga ngayo ngesikhatsi abhalela baseGalathiya atsi: ‘INdvodzana yaNkulunkulu yangitsandza futsi yatinikela ngenca yami.’ (Gal. 2:20) Ngenca yekutsi Jesu wasifela, Jehova ukudvonsele kuye kuze ube ngumngani wakhe. (Joh. 6:44) Akukujabulisi yini kwati kutsi Jehova wabona lokuhle kuwe futsi wakhipha linani lelisetulu kakhulu kuze ube ngumngani wakhe? Akukwenti yini umtsandze kakhulu Jehova naJesu? Kufanele sitibute: ‘Lolutsandvo lungenta kutsi ngifune kwentani?’

7. Njengobe ubona kulesitfombe, singakhombisa njani kutsi siyamtsandza Jehova naJesu? (2 KubaseKhorinte 5:14, 15; 6:1, 2)

⁷ Lutsandvo lesinalo ngaNkulunkulu nangaKhristu lusenta kutsi sikhombise kutsi siyabatsandza labanye. (Fundza 2 KubaseKhorinte 5:14, 15; 6:1, 2.) Lenye indlela lesikwenta ngayo loku kutsi siwente ngekutimisela umsebenti wekushumayela. Sikhuluma nabo bonkhe bantfu. Asikhetsi kutsi umuntfu usive sini, unjingile yini nobe uphuyile, ufundzile  yini nobe akafundzi. Nasenta njalo, sitawube senta ngekuvumelana nentsandvo yaJehova, lekutsi “tonkhe tinhlobo tebantfu tisindziswe, titfole nelwati lolungulonalona lweliciniso.”​—1 Thim. 2:4.

8. Singakhombisa njani kutsi siyabatsandza bazalwane betfu nabodzadze?

⁸ Siphindze sikhombise kutsi siyamtsandza Nkulunkulu naKhristu ngekutsi sikhombise kutsi siyabatsandza bazalwane betfu nabodzadze. (1 Joh. 4:21) Siba nendzaba nabo futsi sibasite nababhekene netinkinga. Siyabadvudvuta nabashonelwe ngulotsite labamtsandzako, sibavakashele nabagula futsi sente konkhe lesingakhona kukwenta kuze sibadvudvute nabadvumatekile. (2 Khor. 1:3-7; 1 Thes. 5:11, 14) Siyachubeka sibathantazela, ngobe siyati kutsi “kuncusa kwemuntfu lolungile kunemandla kakhulu.”​—Jak. 5:16.

9. Nguyiphi lenye indlela lesingakhombisa ngayo kutsi siyabatsandza bazalwane betfu nabodzadze?

⁹ Siphindze sikhombise kutsi siyabatsandza bazalwane betfu nabodzadze ngekutsi sente konkhe lesingakwenta kuze sihlale sinekuthula nabo. Siyatimisela kulingisa sibonelo saJehova sekucolela. Nangabe Jehova avuma kutsi iNdvodzana yakhe ifele tono tetfu, natsi kufanele sikulungele kucolela bazalwane betfu nabodzadze nabasivisa buhlungu. Asifuni kufana nalesisebenti lesibi lokukhulunywa ngaso emfanekisweni waJesu. Ngisho nangemuva kwekutsi umphatsi waso sekasesulile sikweleti saso lesikhulu, lesisebenti asizange sisesule sikweleti lesincane salesinye sisebenti. (Mat. 18:23-35) Nangabe ukhona longevani naye ebandleni, kungaba njani kutsi uye kuye kuze nakhe kuthula ngaphambi kwekutsi niye eSikhumbutweni? (Mat. 5:23, 24) Nawenta njalo, utawube uyakhombisa kutsi umtsandza kakhulu Jehova naJesu.

10-11. Labadzala belibandla bangakhombisa njani kutsi bayamtsandza Jehova naJesu? (1 Phetro 5:1, 2)

¹⁰ Labadzala belibandla bangakhombisa njani kutsi bayamtsandza Jehova naJesu? Indlela lehamba embili kutsi banakekele tidzingo tetimvu taJesu. (Fundza 1 Phetro 5:1, 2.) Jesu wakwenta kwacaca loku kumphostoli Phetro. Ngemuva kwekutsi Phetro sekaphike Jesu tikhatsi letintsatfu, kungenteka bekafisa kakhulu kukhombisa kutsi uyamtsandza. Ngemuva kwekutsi Jesu sekavusiwe, wabuta Phetro watsi: “Simoni ndvodzana yaJohane, uyangitsandza yini?” Siyaciniseka kutsi Phetro bekangenta nobe ngabe yini kuze akhombise kutsi uyayitsandza iNkhosi yakhe. Jesu watjela Phetro watsi: “Yelusa emawundlu ami.” (Joh. 21:15-17) Kuko konkhe kuphila kwakhe, Phetro watinakekela ngelutsandvo timvu teNkhosi, ngaleyo ndlela bekakhombisa kutsi uyamtsandza Jesu.

¹¹ Nine labadzala belibandla, ningakhombisa njani ngesikhatsi seSikhumbuto kutsi abalulekile kini emavi Jesu lawasho kuPhetro? Ningakhombisa kutsi nimtsandza kangakanani Jehova naJesu ngekutsi nitinikete sikhatsi sekukhutsata bazalwane nabodzadze nangekutsi nisite labo lasebaphelelwe ngumdlandla wekukhonta Jehova kutsi babuyele kuye. (Hez. 34:11, 12) Ningaphindze nikhutsate labo lokudadishwa nabo liBhayibheli nalabacalako kuba khona eSikhumbutweni, nente konkhe leningakwenta kuze nibente bative basekhaya.

12. Kucabanga ngemavi Jesu lawasho ngebusuku lobungaphambi kwekufa kwakhe kusiniketa njani sibindzi? (Johane 16:32, 33)

¹² Ngebusuku lebebungaphambi kwekufa kwaJesu, watjela bafundzi bakhe watsi: “Eveni nitawuba nelusizi, kodvwa banini  nesibindzi! Mine ngilincobile live.” (Fundza Johane 16:32, 33.) Yini leyasita Jesu kutsi abe nesibindzi ngesikhatsi asongelwa titsa takhe nekutsi ahlale etsembekile kuze kube ngulapho afa? Wetsembela kuJehova. Ngenca yekutsi bekati kutsi balandzeli bakhe batawubhekana netinkinga letifanako, wacela Jehova kutsi abavikele. (Joh. 17:11) Loko kusenta njani sibe nesibindzi? Siba nesibindzi ngobe Jehova unemandla kunetitsa tetfu. (1 Joh. 4:4) Ubona konkhe. Siyaciniseka kutsi nasetsembela kuJehova, singaba nesibindzi.

13. Josefa wase-Arimathiya wakhombisa njani kutsi unesibindzi?

¹³ Cabanga ngesibonelo saJosefa wase-Arimathiya. EmaJuda bekamhlonipha kakhulu. Bekalilunga leNkantolo Lephakeme yemaJuda. Nobe kunjalo, ngesikhatsi Jesu enta umsebenti wekushumayela lamhlabeni, Josefa bekete sibindzi. Johane watsi ‘bekangumfundzi waJesu, kodvwa atifihla ngobe esaba emaJuda.’ (Joh. 19:38) Nanobe Josefa bekawutsandza umlayeto weMbuso, kepha bekafihla kutsi uyakholwa kuJesu. Kungenteka bekesaba kutsi labanye ngeke basamhlonipha. Kunobe ngukuphi, liBhayibheli litsi ngemuva kwekufa kwaJesu, Josefa “wacunga sibindzi waya kuPilatu wayocela sidvumbu saJesu.” (Mak. 15:42, 43) Josefa wabese uyayekela kufihla kutsi ungumlandzeli waJesu.

14. Yini lokufanele uyente nangabe wesaba bantfu?

¹⁴ Nawe wesaba bantfu njengaJosefa yini? Ngalesinye sikhatsi uyesaba yini kutjela labanye esikolweni nobe emsebentini kutsi unguFakazi waJehova? Uyangabata yini kuba ngummemeteli nobe kubhajatiswa ngenca yekutsi ukhatsateka ngekutsi labanye batawutsini? Ungakuvumeli loko kukuvimbe kutsi wente lokuhle. Thantaza kuJehova ngalokusuka enhlitiyweni, umcele kutsi akuphe sibindzi sekwenta intsandvo yakhe. Njengobe ubona nakaphendvula imithantazo yakho, utawuba nemandla futsi ube nesibindzi.​—Isa. 41:10, 13.

15. Ngemuva kwekutsi Jesu sekabonakele kubafundzi bakhe, injabulo lebebanayo yabenta kutsi benteni? (Lukha 24:52, 53)

¹⁵ Bafundzi beva buhlungu kakhulu ngesikhatsi Jesu ashona. Ticabange nawe usesimeni sabo. Abagcinanga nje ngekulahlekelwa ngumngani wabo labamtsandzako, kodvwa beva shengatsi balahlekelwe nalitsemba labo. (Luk. 24:17-21) Nobe kunjalo, ngesikhatsi Jesu abonakala kubo, wabasita bacondza indlela lasigcwalise ngayo siphrofetho  seliBhayibheli. Waphindze wabaniketa umsebenti lobalulekile. (Luk. 24:26, 27, 45-48) Ngesikhatsi Jesu enyukela ezulwini ngemuva kwemalanga langu-40, lobuhlungu lebebanabo bese bugucuke baba yinjabulo. Kwati kutsi iNkhosi yabo iyaphila nekutsi ikulungele kubasita kuze bente umsebenti lebeyibanike wona kwabajabulisa kakhulu. Lenjabulo lebebanayo yabenta kutsi bachubeke badvumisa Jehova.​—Fundza Lukha 24:52, 53; Imis. 5:42.

16. Singasilingisa njani sibonelo sebafundzi baJesu?

¹⁶ Singasilingisa njani sibonelo sebafundzi baJesu? Singajabula ngekukhonta Jehova, hhayi nje ngesikhatsi seSikhumbuto kuphela kodvwa umnyaka wonkhe. Kuze sikhone kukwenta loko, kufanele sibeke kucala uMbuso waNkulunkulu ekuphileni kwetfu. Sibonelo nje, labanye bahlele kahle sikhatsi sabo kuze bakhone kwenta umsebenti wekushumayela, kuya emihlanganweni nekuba nekukhonta kwemndeni njalo. Labanye bancume kuba bete tintfo labanye labatibona tibalulekile, kuze babe lusito kakhulu ebandleni nobe bakhonte lapho kunesidzingo lesikhulu khona sebamemeteli. Nanobe kudzingeka kutsi sicinisele kuze sichubeke sikhonta Jehova, yena wetsembisa kusibusisa kakhulu nangabe sibeka tintfo letiphatselene neMbuso wakhe kucala ekuphileni kwetfu.​—Taga 10:22; Mat. 6:32, 33.

17. Yini lotimisele kuyenta ngesikhatsi seSikhumbuto? (Buka sitfombe.)

¹⁷ Sikubuke ngalabovu kugubha Sikhumbuto ngaLesibili, April 4. Nobe kunjalo, asifuni kulindza kuze kube ngulelo langa ngaphambi kwekutsi sicale kucabanga ngekuphila kwaJesu, kufa kwakhe nangelutsandvo yena naJehova labasikhombisa lona. Cabanga kakhulu ngaletintfo emavikini langaphambi kweSikhumbuto nalangemuva kwaso. Sibonelo nje, tinikete sikhatsi sekufundza nesekucabangisisa ngalokwenteka lokutfolakala eshadini lelitsi “Liviki Lekugcina Lekuphila KwaJesu Kwasemhlabeni,” kuSandzisanchazo B12 eHumushweni Lemhlaba Lomusha. Njengobe wenta njalo, buka emavesi latakwenta ubonge, ube nelutsandvo, ube nesibindzi futsi ujabule. Yetama kucabanga nangaletinye tindlela longakhombisa ngato kutsi uyabonga. Ungaciniseka nangekutsi Jesu utawujabula ngako konkhe lokwentako kuze umkhumbule ngesikhatsi seSikhumbuto.​—Semb. 2:19.