1. Yini lefika engcondvweni yakho nawucabanga ngaJehova?

 UKILE yini wetama kucabanga kutsi Jehova ubukeka njani? Nawukhuluma naye ngemthantazo, yini lefika engcondvweni yakho? Nanobe Jehova angabonakali, liBhayibheli limchaza ngetindlela letehlukahlukene. Litsi “ulilanga nesihlangu,” liphindze litsi “ungumlilo locotfulako.” (Hla. 84:11; Heb. 12:29) Uchazwa nangekutsi ufana nelitje lesafire, ucwebetela kuhle kwensimbi futsi kukhanya kwakhe lokukhulu kufana nemushi wenkosazana. (Hez. 1:26-28) Letinye taletinchazelo tingasishiya sibambe wangentasi nobe sitive singasilutfo.

2. Yini lengavimba labanye kutsi basondzelane naJehova?

² Ngenca yekutsi asimboni Jehova, singahle sikutfole kumatima kukholelwa kutsi uyasitsandza. Labanye bacabanga kutsi Jehova akayuze abatsandze ngenca yetintfo letentekile ekuphileni kwabo. Mhlawumbe abazange sebabe nababe lobatsandzako. Jehova uyayicondza indlela lesitiva ngayo nekutsi isitsintsa njani. Kuze asisite, usivetele buntfu bakhe lobuhle eVini lakhe.

3. Kubaluleke ngani kutsi sifundze kabanti ngelutsandvo lwaJehova?

³ Linye ligama lelichaza Jehova, lutsandvo. (1 Joh. 4:8) Jehova ulutsandvo. Lutsintsa konkhe lakwentako. Lutsandvo lwakhe lukhulu futsi lunemandla kangangekutsi ulukhombisa ngisho nalabo labangamtsandzi. (Mat. 5:44, 45) Kulesihloko, sitawucoca ngaJehova nangelutsandvo lwakhe. Nasichubeka sifundza ngaNkulunkulu wetfu, sitamtsandza kakhulu.

JEHOVA USITSANDZA KAKHULU

4. Lutsandvo lwaJehova lukwenta utive njani? (Buka nesitfombe.)

⁴ “Jehova unelutsandvo lolukhulu.” (Jak. 5:11) EBhayibhelini, utifananisa namake lonelutsandvo. (Isa. 66:12, 13) Cabanga  ngamake lonakekela luswane lwakhe ngelutsandvo. Ulidlalisa ematsangeni akhe, alukhulumise ngelivi lelipholile nalelimnandzi. Nalukhala nobe lusebuhlungwini, wenta konkhe langakwenta kuze lutfole loko lelikudzingako. Nangabe siva buhlungu, singaciniseka kutsi Jehova uyasitsandza. Umhlabeleli wabhala watsi: “Ngesikhatsi ngikhatsateke kakhulu, wangidvudvuta futsi wangenta ngajabula.”​—Hla. 94:19.

5. Lusho kutsini kuwe lutsandvo lwaJehova lolucotfo?

⁵ Jehova wetsembekile. (Hla. 103:8) Akasilahli nangabe senta intfo lembi. Sive sema-Israyeli samdvumata tikhatsi letinyenti Jehova; nobe kunjalo, ngesikhatsi bantfu bakhe baphendvuka, wabacinisekisa ngelutsandvo lwakhe lolungapheli, watsi: “Ube ligugu emehlweni ami, uhlonishiwe futsi ngikutsandzile.” (Isa. 43:4, 5) Lutsandvo lwaNkulunkulu alukashintji. Singahlala setsembela kulo. Ngisho nobe sente emaphutsa lamakhulu, Jehova akasilahli. Nasiphendvuka futsi sibuyela kuye, sitalukhandza solo lunjalo lutsandvo lwakhe. Wetsembisa kutsi ‘utasitsetselela ngekukhululeka lokukhulu.’ (Isa. 55:7) LiBhayibheli litsi kucolelwa nguye kutawenta sitfole “sikhatsi sekuvuseleleka lesivela kuJehova.”​—Imis. 3:19.

6. Zakhariya 2:8 usifundzisani ngaJehova?

⁶ Fundza Zakhariya 2:8. Ngenca yekutsi Jehova uyasitsandza, usheshe ayinake indlela lesitiva ngayo futsi ufuna mbamba kusivikela. Uva buhlungu nasiva buhlungu. Ngenca yaloko, singathantaza kuye sitsi: “Ngivikele njengenhlavu yeliso lakho.” (Hla. 17:8) Liso lisheshe litsintseke futsi lililunga lemtimba leliligugu kakhulu. Ngako Jehova nakasicatsanisa nenhlavu yeliso lakhe, kuba shengatsi utsi: ‘Nobe ngubani lonilimatako, bantfu bami, ulimata lokuligugu kimi.’

7. Yini leyenta kudzingeke sikhulise indlela lesetsemba ngayo kutsi Jehova uyasitsandza?

⁷ Jehova ufuna siciniseke kutsi utsandza ngamunye wetfu. Kodvwa uyati kutsi ngenca yetintfo letentekile ekuphileni kwetfu, singahle sitibute kutsi uyasitsandza yini vele. Nobe kungenteka nyalo sibhekene netimo letisivivinyako kutsi siyaciniseka yini vele kutsi Jehova uyasitsandza. Yini lesingayenta kuze siciniseke kakhulu kutsi uyasitsandza? Kufundza indlela lakhombisa ngayo Jesu kutsi  uyamtsandza, nalakhombisa ngayo labagcotjiwe kanye nendlela lasikhombisa ngayo kutsi uyasitsandza.

INDLELA JEHOVA LAKHOMBISA NGAYO LUTSANDVO LWAKHE

8. Yini leyenta Jesu waciniseka kutsi Babe wakhe uyamtsandza?

⁸ Sekuphele iminyaka leminyenti kakhulu Jehova kanye neNdvodzana yakhe layitsandzako batsandzana. Lobu kuphela kwebudlelwane lesebukhona iminyaka leminyenti kuko konkhe lokudaliwe. Jehova waluveta ngalokucacile lutsandvo lanalo ngaJesu, njengobe kubhalwe kuMatewu 17:5. Jehova bekangatsi: ‘Lona ngiyamemukela.’ Kodvwa bekafuna sati kutsi umtsandza kakhulu Jesu, ngako wambita ngekutsi “yiNdvodzana [yakhe] letsandzekako.” Jehova bekatigcabha ngaJesu nangaloko lebekatawukwenta. (Ef. 1:7) Ngetulu kwaloko, Jesu bekangangabati kutsi Babe wakhe bekamtsandza. Jesu bekaluva ngekhatsi enhlitiyweni lutsandvo Jehova lebekanalo ngaye. Washo ngekuciniseka tikhatsi letinyenti kutsi Babe wakhe uyamtsandza.​—Joh. 3:35; 10:17; 17:24.

9. Ngumaphi emavi lachaza lutsandvo Jehova lanalo ngalabagcotjiwe? Chaza. (KubaseRoma 5:5)

⁹ Jehova uphindze acinisekise labagcotjiwe kutsi uyabatsandza. (Fundza KubaseRoma 5:5.) Naka emavi latsi “lugcwaliswe etinhlitiyweni.” Lenye incwadzi iluchaza ngekutsi “lwehlela kitsi njengemfula.” Lesi sitfombe mcondvo lesinemandla, futsi siveta kutsi Jehova ubatsandza kakhulu labagcotjiwe! Nabo bayati kutsi Nkulunkulu uyabatsandza. (Juda 1) Umphostoli Johane waveta indlela labativa ngayo nakabhala atsi: “Asenibuke kutsi lukhulu kangakanani lutsandvo Babe lasikhombise lona! Usibite ngekutsi sibantfwana bakhe.” (1 Joh. 3:1) Jehova utsandza labagcotjiwe kuphela yini? Cha, usikhombisile kutsi usitsandza sonkhe.

10. Ngubuphi bufakazi lobukhulu bekutsi Jehova uyakutsandza?

¹⁰ Yini lesicinisekisa kakhulu kutsi Jehova uyasitsandza? Yinhlawulo. Ngalesipho, Jehova ukhombise kwendlula nobe ngubani kutsi usitsandza kakhulu! (Joh. 3:16; Rom. 5:8) Jehova wanikela ngeNdvodzana yakhe leligugu, wayivumela kutsi ifele bonkhe bantfu kuze sicolelwe tono tetfu futsi sikhone kuba bangani bakhe. (1 Joh. 4:10) Nasichubeka sicabangisisa ngelinani lelakhokhwa nguJehova naJesu, sitawucondza kakhulu kutsi batsandza ngamunye wetfu. (Gal. 2:20) Inhlawulo ayizange ikhishwe ngenca nje yekutsi beyidzingekile ngekuvumelana nekwehlulela kwaJehova. Isipho lesikhombisa kutsi uyasitsandza. Jehova ukhombise kutsi uyasitsandza ngekunikela ngalokuligugu kakhulu kuye, lokunguJesu. Jehova wavumela iNdvodzana yakhe kutsi ihlupheke ngenca yetfu futsi isifele.

11. Yini lesiyifundza kuJeremiya 31:3?

¹¹ Njengobe sesibonile, Jehova akabindzi, kepha uyasitjela kutsi uyasitsandza. (Fundza Jeremiya 31:3.) Usidvonsele kuye ngobe uyasitsandza. (Catsanisa naDutheronomi 7:7, 8.) Kute lutfo futsi kute muntfu longasehlukanisa nelutsandvo lwakhe. (Rom. 8:38, 39) Lolutsandvo lukwenta utive njani? Fundza Tihlabelelo 23, futsi ubone indlela Davide lativa ngayo ngekutsandvwa nguJehova nangekunakekelwa nguye nekutsi loko kungasenta sitive njani.

LUTSANDVO LWAJEHOVA LUKWENTA UTIVE NJANI?

12. Tikhuluma ngani Tihlabelelo 23?

¹² Fundza Tihlabelelo 23:1-6. Tihlabelelo 23 yingoma leveta kuciniseka kwemhlabeleli ngekutsi Jehova uyamtsandza futsi utamnakekela.  Davide longumbhali walesihlabelelo, uchaza budlelwane lobuhle lobusemkhatsini wakhe neMelusi wakhe, lokunguJehova. Davide bekativa avikelekile ngekuvumela Jehova kutsi amcondzise, futsi beketsembele kuye ngalokuphelele. Bekati kutsi lutsandvo lwaJehova belutamlandzela onkhe emalanga ekuphila kwakhe. Yini leyamenta waciniseka ngaloku?

13. Yini lebeyenta Davide aciniseke kutsi Jehova uyamnakekela?

¹³ “Angeke ngeswele lutfo.” Davide bekativa anakekeleke kahle ngobe Jehova bekahlale amnika konkhe lakudzingako. Ngetulu kwaloko, bekanebuhlobo lobuhle naJehova futsi bekamemukela. Kungako bekaciniseka ngekutsi nanobe kungentekani esikhatsini lesitako, Jehova bekatawuchubeka anakekela tidzingo takhe. Ngenca yekutsi Davide beketsemba kutsi Jehova uyamtsandza nekutsi utamnakekela, loko kwamsita wangakhatsateki, esikhundleni saloko wajabula futsi wenetiseka.​—Hla. 16:11.

14. Jehova angasinakekela njani ngelutsandvo?

¹⁴ Jehova usinakekela ngelutsandvo, ikakhulukati nakwenteka tintfo letimbi ekuphileni kwetfu. Claire, a lesekuphele iminyaka lengetulu kwalengu-20 asebenta eBethel, bekangati kutsi kufanele awusite njani umndeni wakubo ngesikhatsi wehlelwa tinkinga letinkhulu ngekulandzelana. Babe wakhe washaywa stroke, sisi wakhe lomncane wayekeliswa kuba nguFakazi, futsi umndeni wakubo walahlekelwa yibhizinisi yabo lencane kanye nelikhaya lakubo. Jehova wabanakekela njani? Claire utsi: “Jehova bekenta konkhe langakwenta kuze umndeni wakitsi uhlale unaloko lokudzingako onkhe malanga. Sonkhe sikhatsi bekasinika  lokungetulu kwaloko lebengikucabanga! Ngivame kucabanga ngetikhatsi lapho Jehova angikhombise ngato lutsandvo, futsi tiligugu kimi. Kucabanga ngaloko kungisita kutsi ngichubeke ngimkhonta ngisho ngibhekene netinkinga.”

15. Yini leyenta Davide wavuseleleka? (Buka nesitfombe.)

¹⁵ “Uyangivuselela.” Ngaletinye tikhatsi, Davide bekativa akhatsatekile ngenca yato tonkhe tinkinga lebekabhekene nato. (Hla. 18:4-6) Nobe kunjalo, lutsandvo lwaJehova kanye nekunakekelwa nguye bekumvuselela. Jehova waholela lomngani wakhe lokhatsele “emadlelweni laluhlata” ‘nasetindzaweni tekuphumula letinemanti lamanyenti.’ Ngenca yaloko, Davide waphindze waba nemandla futsi wakhona kuchubeka akhonta Jehova ajabulile.​—Hla. 18:28-32.

16. Lutsandvo lwaJehova lukuvuselele njani?

¹⁶ Ngendlela lefanako lamuhla, kungenca yekutsi ‘Jehova unelutsandvo lolucotfo, kungako singacotfulwa siphele nya’ nasibhekene netinkinga. (Sil. 3:22; Khol. 1:11) Cabanga ngalokwenteka kuRachel. Weva buhlungu kakhulu ngesikhatsi indvodza yakhe imshiya futsi ishiya naJehova ngesikhatsi se-COVID-19. Yini Jehova lamentela yona? Utsi: “Jehova wenta konkhe langakwenta kuze ngitive ngitsandvwa. Wangipha bangani lebebacitsa sikhatsi nami, bangiletsela kudla, bangitfumelela imilayeto nemavesi lokucatjangwe kahle, bahleka nami futsi bangikhumbuta kutsi Jehova uyanginakekela. Ngihlale ngimbonga Jehova ngekungipha umndeni lomkhulu lonelutsandvo.”

17. Yini lebeyenta Davide “angesabi lutfo lolubi”?

¹⁷ “Angesabi lutfo, ngobe wena unami.” Kuphila kwaDavide bekuvame kuba sengotini futsi bekanetitsa letinyenti letinemandla. Nobe kunjalo, lutsandvo lwaJehova lwamenta wativa aphephile futsi avikelekile. Davide bekeva kutsi Jehova unaye kunobe ngusiphi simo lebekabhekene naso, futsi loko bekumenta abe nemandla. Kungako ahlabela watsi: “[Jehova] wangikhulula kuko konkhe lengikwesabako.” (Hla. 34:4) Davide bekesaba tintfo lebetikhona mbamba, kodvwa lutsandvo lwaJehova belunemandla kunaloko lakwesabako.

18. Kuciniseka kutsi Jehova uyakutsandza kukucinisa njani nawesaba?

¹⁸ Kwati kutsi Jehova uyasitsandza kusinika njani emandla nasibhekene netimo letisesabisako? Lomunye dzadze lolihlahlandlela lokutsiwa nguSusi uchaza indlela yena nendvodza  yakhe labativa ngayo ngesikhatsi indvodzana yabo itibulala. Utsi: “Nakwenteka intfo lebuhlungu ekuphileni kwakho, ikutsintsa kakhulu futsi ubese uyesaba kutsi kutawenteka letinye tintfo letimbi. Kodvwa kunakekelwa nguJehova kusente sativa siphephile futsi sivikelekile.” Rachel, lesike sakhuluma ngaye utsi: “Ngalelinye lilanga ebusuku ngesikhatsi inhlitiyo yami yopha, ngikhatsateke kakhulu futsi ngesaba, ngakhala kabuhlungu kuJehova. Ngaleso sikhatsi ngeva ngatsi uphotisa inhlitiyo yami futsi ngeva ngatsi ungisita ngehlise umoya, njengamake anakekela luswane lwakhe, futsi ngalala. Angiyuze ngilikhohlwe lelo langa.” Lomunye lomdzala welibandla lokutsiwa nguTasos wacitsa iminyaka lemine ejele ngenca yekwala kuba lisotja. Walubona njani lutsandvo lwaJehova nekunakekelwa nguye? Utsi: “Jehova wangipha lokungetulu kwalebengikudzinga. Loko kwangenta ngaciniseka kakhulu kutsi ngingametsemba ngalokuphelele. Ngetulu kwaloko, asebentisa umoya wakhe longcwele, wangipha injabulo nanobe bengisendzaweni lecindzetelako. Loku kwangisita ngabona kutsi nangichubeka ngimetsemba, utangenta ngibone mbamba kutsi uyangitsandza. Ngako ngacala kuba lihlahlandlela lelivamile ngisejele.”

SONDZELA KUNKULUNKULU WAKHO LONEMUSA

19. (a) Kwati kutsi Nkulunkulu uyasitsandza kukutsintsa njani loko lesikusho nasithantaza? (b) Ngumaphi emavi lakhuluma ngelutsandvo lwaJehova lakutsintsa inhlitiyo? (Buka libhokisi lelitsi “ Emavi Lasisita Sibone Kutsi Jehova Uyasitsandza.”)

¹⁹ Loku lesesicoce ngako kubufakazi bekutsi Jehova “Nkulunkulu welutsandvo,” unatsi! (2 Khor. 13:11) Unendzaba nemuntfu ngamunye. Siyaciniseka kutsi ‘usikhombisa lutsandvo lolucotfo.’ (Hla. 32:10) Nasichubeka sicabangisisa ngendlela lasikhombisa ngayo kutsi uyasitsandza, utawuba nguMuntfu mbamba kitsi futsi sitawutiva sisondzelene kakhulu naye. Singathantaza kuye ngekukhululeka simtjele kutsi siludzinga kangakanani lutsandvo lwakhe. Singamtjela konkhe lokusikhatsatako, siciniseke kutsi uyasicondza nekutsi uyakulangatelela kusisita.​—Hla. 145:18, 19.

20. Lutsandvo lwaJehova lusidvonsela njani kuye?

²⁰ Njengobe umlilo usidvonsa nakumakhata, nelutsandvo lwaJehova lusidvonsela kuye. Nanobe lutsandvo lwaJehova lunemandla, kodvwa luphindze lube mnandzi. Ngako vumela Jehova akutsandze. Ngetulu kwako konkhe, shengatsi sonkhe singatsi: “Ngiyamtsandza Jehova”!​—Hla. 116:1.