Labanye bakhule ngemasiko lenta emadvodza lamanyenti abukele phansi bafati. Sibonelo nje, Hans longumbonisi lojikeletako eBolivia utsi: “Lamanye emadvodza akholelwa kutsi abaluleke kakhulu kunebafati futsi ngalokuvamile abaphatsa kabi.” Shengxian, longulomdzala welibandla eTaiwan utsi: “Langihlala khona, emadvodza lamanyenti eva ngatsi bafati akukafaneli bangene tindzaba tawo. Nangabe indvodza isho umbono lovetwe ngumfati endzabeni letsite, lamanye emadvodza angahle ayibukele phansi.” Lamanye emadvodza akhombisa ngetindlela letiphansi kutsi akabahloniphi bafati. Sibonelo nje, angasho tintfo lacabanga kutsi tiyahlekisa letilulata bafati.

Lokujabulisako kutsi ngisho nobe umuntfu akhule ngamaphi emasiko, angashintja. Angayekela kucabanga kutsi emadvodza abaluleke kakhulu kunebafati. (Ef. 4:22-24) Loko angakwenta ngekutsi alingise sibonelo saJehova. Kulesihloko, sitawucoca ngendlela Jehova labaphatsa ngayo besifazane, naloko bazalwane labangakwenta kuze bafundze kuphatsa besifazane njengaJehova, nekutsi labadzala belibandla bangahamba njani embili ekukhombiseni kutsi bayabahlonipha bodzadze.

JEHOVA UBAPHATSA NJANI BANTFU BESIFAZANE?

Jehova usibekela sibonelo lesihle sendlela yekuphatsa bantfu besifazane. Njengobe anguBabe lonesihawu, ubatsandza bonkhe bantfwana bakhe. (Joh. 3:16) Bodzadze labetsembekile bafana nemadvodzakati laligugu kuye. Cabanga nganati tindlela letilandzelako Jehova lakhombisa ngato kutsi uyabahlonipha bantfu besifazane.

Jehova akababandlululi. Wadala indvodza nemfati ngemfanekiso wakhe. (Gen. 1:27) Akazange ente indvodza ihlakaniphe kakhulu kunemfati  nobe ibe nemakhono langetulu kunewemfati; futsi akanconoti emadvodza kunebafati. (2 Khr. 19:7) Wadala indvodza nemfati baba nelikhono lelilinganako lekucondza emaciniso laseBhayibhelini kanye nekulingisa buntfu bakhe lobuhle. Jehova uwatsandza ngendlela lefanako emadvodza nebafati labanekukholwa kuye, ngisho nobe banelitsemba lekuphila phakadze emhlabeni lolipharadisi nobe batawuba ngemakhosi nebaphristi ezulwini. (2 Phet. 1:1, umbhalo longentansi) Kusebaleni kutsi Jehova akababandlululi bantfu besifazane.

Uyabalalela. Jehova unendzaba nendlela bantfu besifazane labativa ngayo nangaloko lokubakhatsatako. Sibonelo nje, walalela imithantazo yaRakheli neyaHana futsi wayiphendvula. (Gen. 30:22; 1 Sam. 1:10, 11, 19, 20) Jehova waphindze waphefumulela babhali beliBhayibheli kutsi babhale ngemadvodza lalalela bafati. Sibonelo nje, Abrahama walalela sicondziso saJehova sekutsi alalele Sara. (Gen. 21:12-14) INkhosi Davide yalalela Abigayili. Ecinisweni, lenkhosi yabona ngatsi Jehova bekatfumele Abigayili kutsi akhulume naye. (1 Sam. 25:32-35) Jesu, lobukhombisa kahle buntfu baBabe wakhe, walalela make wakhe, lokunguMariya. (Joh. 2:3-10) Letibonelo tiveta kutsi lenye indlela Jehova lakhombisa ngayo kutsi uyabahlonipha bantfu besifazane kutsi abalalele.

Uyabetsemba. Sibonelo nje, Jehova wakhombisa kutsi uyametsemba Eva kangangekutsi wamnika umsebenti wekunakekela wonkhe umhlaba. (Gen. 1:28) Ngekwenta njalo, wakhombisa kutsi akamtsatsi ngatsi akasilutfo nakacatsaniswa na-Adamu, kodvwa umtsatsa njengemphelelisi wakhe. Jehova waphindze wakhombisa kutsi uyametsemba umphrofethikati Debhora naHulda ngekutsi abanike umsebenti wekweluleka bantfu bakhe, lokufaka ekhatsi umehluleli kanye nenkhosi. (Khu. 4:4-9; 2 Khos. 22:14-20) Lamuhla, Jehova ukhombisa kutsi uyabetsemba bodzadze ngekutsi abavumele bente umsebenti wakhe. Labodzadze labetsembekile babamemeteli, emahlahlandlela netitfunywa telivangeli. Basita ekuhleleni kutsi atawubukeka futsi akhiwe njani emaHholwa eMbuso netakhiwo tenhlangano, bakwakhe futsi bakunakekele. Labanye babo basebenta eBethel; labanye basebenta emahhovisini ekuhumusha. Labodzadze banjengelibutfo lelikhulu lelisetjentiswa nguJehova kuze lifeze injongo yakhe. (Hla. 68:11) Kusebaleni kutsi Jehova akaboni ngatsi bantfu besifazane ngeke bakhone kwenta tintfo.

YINI BAZALWANE LABANGAYENTA KUZE BAFUNDZE KUPHATSA BESIFAZANE NJENGAJEHOVA?

Nine bazalwane, kuze nibone kutsi bodzadze nibaphatsa ngendlela Jehova labaphatsa ngayo yini, kufanele netsembeke nanihlola loko lenikucabangako naloko lenikwentako. Kuze sikwente loko, sidzinga lusito. Njengobe i-X-ray iveta kugula lokusenhlitiyweni yemuntfu, umngani lokahle neliVi laNkulunkulu kungasisita kutsi sibone imicabango lemibi lemayelana nebantfu besifazane lokungenteka sinayo. Yini lesingayenta kuze sitfole lolusito?

Buta umngani lokahle. (Taga 18:17) Senta kahle ngekubuta umngani lesimetsembako, lowatiwa ngekutsi unemusa imibuto lenjengaletsi: “Ngibaphatsa njani bodzadze? Bayabona yini kutsi ngiyabahlonipha? Kukhona yini lengingakwenta kuze ngitfutfukise indlela lengibaphatsa ngayo?” Nangabe umngani wakho aveta tintfo lokufanele utfutfukise kuto, kugweme kutivikela. Kunaloko, timisele kwenta lushintjo loludzingekile.

Dadisha liVi laNkulunkulu. Indlela lekahle kakhulu yekubona kutsi sibaphatsa kahle yini bodzadze kubuka loko lesikucabangako nalesikwentako sisebentisa liVi laNkulunkulu. (Heb. 4:12) Njengobe silidadisha, sifundza ngemadvodza labaphatsa kahle bafati nalawo langazange. Singabese sicatsanisa loko lakwenta nalesikwentako. Ngetulu kwaloko, kucatsanisa emavesi eliBhayibheli kungasisita kutsi singasekeli imibono leliphutsa ngebafati evesini lelitsite. Sibonelo nje, ngekusho kwa-1 Phetro 3:7, umfati kufanele ‘ahlonishwe njengesitja lesibutsakatsaka kakhudlwana.’ b Loku kusho kutsi akabaluleki yini, akahlakaniphi nobe ute emakhono kunendvodza? Cha! Catsanisa emavi aPhetro  nalokushiwo ngumbhalo waKubaseGalathiya 3:26-29 lotsi Jehova ukhetse bafati nemadvodza kutsi bayobusa naJesu ezulwini. Nasidadisha liVi laNkulunkulu futsi sibute umngani lokahle mayelana nekutsi sibaphatsa njani bantfu besifazane, singafundza kubahlonipha bodzadzewetfu.

LABADZALA BELIBANDLA BAKHOMBISA NJANI KUTSI BAYABAHLONIPHA BODZADZE?

Bazalwane bangaphindze bafundze kuhlonipha bodzadze ebandleni ngekutsi balingise sibonelo salabadzala belibandla labanelutsandvo. Labadzala belibandla bahamba njani embili ekuhlonipheni bodzadze? Cabanga nganati tindlela letilandzelako.

Bancoma bodzadze. Umphostoli Pawula wabekela labadzala belibandla sibonelo lesihle labangasilingisa. Wancoma bodzadze labatsite encwadzini layibhalela libandla laseRoma. (Rom. 16:12) Ungacabanga nje kutsi labodzadze bajabula kanganani ngesikhatsi lencwadzi ifundvwa ebandleni. Ngendlela lefanako, labadzala belibandla bancoma bodzadze ngebuntfu babo lobuhle nangemisebenti labayentela Jehova. Loko kwenta bodzadze babone kutsi bahlonishwa mbamba nekutsi babalulekile. Emavi lakhutsatako alomdzala welibandla angaba nguloko kanye lokudzingwa ngulabodzadze kuze bachubeke bakhonta Jehova ngekwetsembeka.​—Taga 15:23.

Labadzala belibandla nabancoma bodzadze, kufanele loko bakwenta ngalokusuka enhlitiyweni futsi basho kutsi yini lena labayibongako. Ngasiphi sizatfu? Lomunye dzadze lokutsiwa nguJessica utsi: “Kukahle kutsi bazalwane batjele dzadze kutsi wente umsebenti lomuhle. Kodvwa sijabula kakhulu nangabe basitjela ngalokucondzile kutsi yini lena lenhle lesiyentile, njengekufundzisa bantfwana betfu kutsi babindze emihlanganweni yelibandla nobe nangabe silandze loyo lesidadisha naye liBhayibheli kutsi ete emihlanganweni yelibandla.” Nangabe labadzala belibandla basho kutsi yini  labayibongako, benta bodzadze bative badzingekile futsi baligugu ebandleni.

Balalela bodzadze. Labadzala belibandla labatfobekile bayati kutsi akusibo kuphela labanemibono lemihle. Bacela bodzadze kutsi basho imibono yabo futsi bayabalalelisisa njengobe bakhuluma. Nabenta njalo, labadzala bakhutsata bodzadze futsi kuyabasita nabo. Njani? Lomunye lomdzala welibandla lokutsiwa nguGerardo, losebenta eBethel utsi: “Ngitfole kutsi kubuta bodzadze kwenta kutsi ngiwente kahle kakhulu umsebenti wami. Ngalokuvamile, banesikhatsi lesidze benta lomsebenti kunebazalwane labanyenti.” Ebandleni, bodzadze labanyenti bangemahlahlandlela, ngako kunyenti labakwatiko ngebantfu labahlala endzaweni lokushunyayelwa kuyo. Lomunye lomdzala lokutsiwa nguBryan utsi: “Bodzadzewetfu banalokunyenti labangakwentela inhlangano. Ngako munya lwati kubo!”

Labadzala belibandla labahlakaniphile abasheshi bawuphikise umbono wabodzadze. Ngasiphi sizatfu? Lomunye lomdzala welibandla lokutsiwa ngu-Edward utsi: “Umbono wadzadze nelwati lanalo kungenta umzalwane ayicondze kahle indzaba letsite, futsi loko kungamsita kutsi abe neluvelo.” (Taga 1:5) Ngisho nobe lomdzala welibandla angeke awusebentise umbono wadzadze, kodvwa angabonga ngembono wakhe nangekuhlakanipha kwakhe.

Bacecesha bodzadze. Labadzala belibandla labanekucondza bafuna ematfuba ekucecesha bodzadze. Sibonelo nje, bangafundzisa bodzadze kuchuba umhlangano wangaphambi kwekuyoshumayela nakwenteka kuba bete umzalwane lobhajatisiwe. Bangabacecesha kutsi basebentise emathulusi nobe imishini kuze bakhone kusita nakunakekelwa futsi kwakhiwa takhiwo tenhlangano. EBethel, bazalwane lababuke ematiko baceceshe bodzadze kuze bakhone kwenta imisebenti leyehlukahlukene, lefaka ekhatsi kunakekela lokutsite, kutsenga, kusebenta ngetimali, kusebenta ngabongcondvomshini kanye nalokunye. Nangabe labadzala belibandla bacecesha bodzadze, basuke bakhombisa kutsi babatsatsa ngekutsi bangakhona kwenta imisebenti letsite futsi bangetsenjwa.

Bodzadze labanyenti basebentisa kuceceshwa labakutfola kulabadzala belibandla kuze baceceshe labanye. Sibonelo nje, labanye bodzadze basebentisa kuceceshwa labakutfola nakwakhiwa takhiwo tenhlangano kuze basite labanye bakhe kabusha tindlu tabo nakwenteke sehlakalo semvelo. Labanye bodzadze basebentise emakhono labafundziswe wona ekushumayela etindzaweni tawonkhe wonkhe kuze baceceshe bodzadze labanyenti kulomsebenti. Bodzadze bativa njani ngebazalwane lababaceceshile? Lomunye dzadze lokutsiwa nguJennifer utsi: “Ngesikhatsi sakha liHholwa leMbuso, lomunye umzalwane wangicecesha. Wanaka umsebenti lebengiwenta futsi wangincoma. Bengikutsandza kusebenta naye ngobe bekangenta ngitive ngibalulekile futsi ngetsenjwa.”

TINZUZO TEKUPHATSA BODZADZE NJENGEMALUNGA EMINDENI YETFU

Bodzadzawetfu labetsembekile sibatsandza ngendlela Jehova labatsandza ngayo! Ngako sibaphatsa njengemalunga emindeni yetfu. (1 Thim. 5:1, 2) Baligugu kitsi futsi siyajabula kusebenta kanye nabo. Sijabula kakhulu nababona kutsi siyabatsandza futsi siyabasekela. Lomunye dzadze lokutsiwa nguVanessa utsi: “Ngibonga kakhulu kuJehova ngekutsi ngibe yincenye yenhlangano yakhe legcwele bazalwane labangikhutsata kakhulu.” Lomunye dzadze waseTaiwan utsi: “Ngibonga kakhulu ngekutsi Jehova nenhlangano yakhe babatsatsa njengalabaligugu bantfu besifazane futsi banendzaba nendlela lesitiva ngayo. Loko kukucinisa kakhulu kukholwa kwami, futsi kungenta ngibonge kakhulu ngekuba yincenye yenhlangano yaJehova.”

Jehova uyatigcabha nakabona emadvodza langemaKhristu atimisela kuphatsa bantfu besifazane ngendlela labaphatsa ngayo futsi ababuka ngendlela lababuka ngayo! (Taga 27:11) Lomunye lomdzala waseScotland lokutsiwa nguBenjamin utsi: “Lelive libabukela phansi kakhulu bantfu besifazane. Ngako sifuna kutsi bodzadze bawuve umehluko nabangena eHholweni leMbuso.” Shengatsi sonkhe singatimisela kulingisa Jehova ngekutsi siphatse bodzadzewetfu ngelutsandvo nangenhlonipho lebafanele.​—Rom. 12:10.