1. Kusisita ngani kuba khona eSikhumbutweni sekufa kwaKhristu lesiba khona njalo ngemnyaka?

 SIYACINISEKA kutsi uyavuma kutsi inhlawulo isipho lesiligugu kakhulu! (2 Khor. 9:15) Ngenca yekutsi Jesu wanikela ngekuphila kwakhe, nyalo ungaba ngumngani waJehova Nkulunkulu. Ungaphindze ube nelitsemba lekuphila phakadze. Kungako kubalulekile kutsi sikhombise kutsi siyabonga ngenhlawulo futsi simbonge Jehova, lowasipha lesipho ngobe asitsandza! (Rom. 5:8) Kuze Jesu asisite kutsi sihlale sibonga futsi singacali siyibukele phasi inhlawulo, wasungula Sikhumbuto sekufa kwakhe lesigujwa njalo ngemnyaka.​—Luk. 22:19, 20.

2. Sitawucoca ngani kulesihloko?

² Kulomnyaka, Sikhumbuto sitawuba ngeMgcibelo, April 12, 2025. Siyaciniseka kutsi sonkhe sitawuhlela kuba khona. Kutasisita kakhulu nekutsi ngemalanga eSikhumbuto sitinike sikhatsi sekuzindla a ngaloko Jehova neNdvodzana yakhe labasentele kona. Kulesihloko, sitawucoca ngekutsi inhlawulo isifundzisani ngaJehova nangeNdvodzana yakhe. Sihloko lesilandzelako sitasisita sicondze kutsi ingasisita njani inhlawulo nekutsi singakhombisa njani kutsi siyabonga ngayo.

 LOKO INHLAWULO LESIFUNDZISA KONA NGAJEHOVA

3. Kufa kwemuntfu munye kutikhulula njani tigidzi tebantfu? (Buka nesitfombe.)

³ Inhlawulo isifundzisa kutsi Jehova wehlulela ngekulunga. (Dut. 32:4) Kanjani? Cabanga nganaku: Ngenca yekutsi Adamu akazange alalele, satfola sono lesiholela ekufeni. (Rom. 5:12) Kuze Jehova asikhulule esonweni nasekufeni, wahlela kutsi Jesu abe yinhlawulo. Kodvwa bekungenteka njani kutsi inhlawulo yemuntfu munye lote sono ikhulule tigidzi tebantfu? Umphostoli Pawula uyachaza: “Njengobe ngekungalaleli kwemuntfu munye [lokungu-Adamu] bantfu labanyenti baba toni, ngendlela lefanako, ngekulalela kwemuntfu munye [lokunguJesu] bantfu labanyenti kutawutsiwa balungile.” (Rom. 5:19; 1 Thim. 2:6) Ngalamanye emavi, kungalaleli kwemuntfu munye lote sono kwenta kutsi sigcilatwe sono nekufa. Ngako kulalela kwemuntfu munye lote sono kuyasikhulula.

4. Yini leyenta Jehova wangamane wavumela situkulwane sa-Adamu lesinenhlitiyo lecotfo kutsi siphile phakadze?

⁴ Bekufanele yini vele kutsi Jesu afe kuze asisindzise? Bekangeke yini Jehova avele avumele situkulwane sa-Adamu lesinenhlitiyo lecotfo kutsi siphile phakadze? Kubantfu labanesono, loko bekungaba yintfo lekhombisa umusa nalenengcondvo. Kodvwa loko bekungeke kuvete kutsi Jehova wehlulela ngekulunga. Ngobe bekutawuba ngatsi Adamu akasenti sono lesikhulu futsi nebantfwana bakhe abakasitfoli sono kuye. Kodvwa loko bekungasilo liciniso.

5. Yini lesenta siciniseke kutsi Jehova utawuhlale enta tintfo ngekulunga?

⁵ Bekutawentekani kube Jehova akazange ahlele kutsi kube nenhlawulo, kodvwa akubeke eceleni kwehlulela ngekulunga ngekutsi avumele emadvodzana nemadvodzakati a-Adamu lanesono kutsi aphile phakadze? Kungenteka bantfu bebatatibuta kutsi Nkulunkulu utayibeka eceleni yini indzaba yekwehlulela ngekulunga ngisho nakuletinye tintfo. Sibonelo nje, bekungenteka yini ehluleke kugcina letinye tetsembiso takhe? Akukafaneli sikhatsateke ngaloko. Lokutsi nje Jehova wenta lokulungile ngisho nobe alahlekelwa kakhulu, wanikela ngeNdvodzana yakhe layitsandzako, kuyasicinisekisa kutsi utawuhlale enta tintfo ngekulunga.

6. Nguyiphi lenye indlela inhlawulo lekhombisa ngayo lutsandvo lwaJehova? (1 Johane 4:9, 10)

⁶ Nanobe inhlawulo isisita sicondze kutsi Jehova ulungile, iphindze isisite sicondze kutsi lujule kangakanani lutsandvo lwakhe. (Joh. 3:16; fundza 1 Johane 4:9, 10.) Imfundziso yenhlawulo iveta kutsi Jehova ufuna siphile phakadze futsi sibe yincenye yemndeni wakhe.  Cabanga nganaku: Ngesikhatsi Adamu ona, Jehova wamcosha emndenini wakhe. Ngenca yaloko, sonkhe nasitalwa sisuke singasiyo incenye yemndeni waNkulunkulu. Kodvwa ngesisekelo senhlawulo, Jehova usicolela tono tetfu futsi ekugcineni utawubenta babe yincenye yemndeni wakhe bonkhe bantfu labanekukholwa nalabalalelako. Ngisho nanyalo, singaba nebuhlobo lobuhle naJehova kanye nabomnaketfu nabodzadze. Loko kusikhombisa kutsi Jehova usitsandza mbamba!​—Rom. 5:10, 11.

7. Buhlungu lobaviwa nguJesu busisita njani sicondze kutsi Jehova usitsandza kangakanani?

⁷ Singayicondza kancono indlela Jehova lasitsandza ngayo ngekutsi sicabange ngendlela lalahlekelwa ngayo kuze kube nenhlawulo. Sathane utsi kute sikhonti saNkulunkulu lesitawuhlala setsembekile kuJehova nangabe kumatima kwenta njalo. Kuze Jehova akhombise kutsi lawo ngemanga, wavumela Jesu kutsi advonse kamatima ngaphambi kwekutsi afe. (Jobe 2:1-5; 1 Phet. 2:21) Njengobe Jehova bekabukile, baholi benkholo lebebaphikisa Jesu bahlekisa ngaye, emasotja amshaya futsi wabetselwa elugodvweni. Ngemuva kwaloko, Jehova wabona ngesikhatsi iNdvodzana yakhe layitsandzako ifa kabuhlungu. (Mat. 27:28-31, 39) Jehova bekanawo emandla ekukuvimba konkhe loku kutsi kungenteki. Sibonelo nje, ngesikhatsi bantfu batsi: ‘Nkulunkulu akamsindzise-ke nangabe amemukela,’ Jehova bekangakwenta loko. (Mat. 27:42, 43) Kodvwa kube wakwenta, bekutawuba bete inhlawulo futsi besitawuba bete litsemba. Ngako Jehova wavumela iNdvodzana yakhe kutsi ive buhlungu lobukhulu kwaze kwaba ngulapho ifa.

8. Jehova wabuva yini buhlungu ngesikhatsi iNdvodzana yakhe iphatfwa kabi? Chaza. (Buka nesitfombe.)

⁸ Akukafaneli sicabange kutsi ngenca yekutsi Nkulunkulu unguSomandla, ute imiva! Sentiwe ngemfanekiso wakhe, sadalwa sakhona kuba nemiva, ngako kunengcondvo kulindzela kutsi naJehova unayo imiva. LiBhayibheli litsi ‘uva buhlungu’ futsi ‘uyadzabuka.’ (Hla. 78:40, 41) Cabanga nangendzaba ya-Abrahama na-Isaka. Utawukhumbula kutsi Abrahama watjelwa kutsi ente umhlatjelo ngendvodzana yakhe lekuphela kwayo. (Gen. 22:9-12; Heb. 11:17-19) Cabanga ngendlela lehlukahlukene lokungenteka Abrahama wativa ngayo njengobe alungiselela kubulala indvodzana yakhe. Cabanga-ke ngekutsi Jehova weva buhlungu lobunganani futsi wacindzeteleka kanganani njengobe abona bantfu bayiphatsa ngesibhuku iNdvodzana yakhe futsi bayibulala!​—Buka i-video letsi Lingisa Kukholwa Kwabo—Abrahama, Incenye 2 ku jw.org.

9. Umbhalo waKubaseRoma 8:32, 38, 39 ukusita njani ucondze kutsi lujule kangakanani lutsandvo Jehova lanalo ngawe nangebazalwane bakho nabodzadze?

⁹ Inhlawulo isifundzisa kutsi kute ngisho namunye umuntfu lositsandza kakhulu kwendlula  Jehova. Usitsandza kakhulu kwendlula ngisho nesihlobo lesisitsandzako nobe umngani lomkhulu. (Fundza KubaseRoma 8:32, 38, 39.) Siyaciniseka kutsi Jehova usitsandza kakhulu kwendlula indlela tsine lesititsandza ngayo. Uyafuna yini kuphila phakadze? Angeke ufike endleleni Jehova lafuna ngayo. Uyafuna yini kutsi tono takho ticolelwe? Angeke ufike endleleni Jehova lafuna ngayo kukucolela. Lakucelako nje kutsi semukele lesipho sakhe lesiligugu ngekutsi sibe nekukholwa futsi silalele. Inhlawulo isipho lesiligugu lesikhombisa kutsi lujule kangakanani lutsandvo lwaNkulunkulu ngatsi. Ngetulu kwaloko, emhlabeni lomusha sitawufundza lokunyenti ngelutsandvo lwaJehova.​—Shu. 3:11.

LOKO INHLAWULO LESIFUNDZISA KONA NGAJESU

10. (a) Yini leyamvisa buhlungu kakhulu Jesu mayelana nekufa kwakhe? (b) Ngutiphi tindlela Jesu lalingcwelisa ngato libito laNkulunkulu? (Buka nelibhokisi lelitsi “ Kuba Cotfo KwaJesu Kwangcwelisa Libito LaJehova.”)

¹⁰ Jesu unendzaba mbamba nelidvumela laBabe wakhe. (Joh. 14:31) Weva buhlungu kakhulu ngemacala labekwa wona ekuhlambalata nekuvukela umbuso, lebekangalihlambalata libito laBabe wakhe. Kungako athantaza watsi: “Babe, nakungenteka, yendlulise kimi lendzebe.” (Mat. 26:39) Ngekuhlala etsembekile kuJehova kuze kube ngulapho afa, Jesu wangcwelisa libito laBabe wakhe.

11. Jesu wakhombisa njani kutsi ubatsandza ngalokujulile bantfu? (Johane 13:1)

¹¹ Inhlawulo iphindze isifundzise kutsi Jesu unendzaba ngalokujulile nebantfu, ikakhulukati balandzeli bakhe. (Taga 8:31; fundza Johane 13:1.) Nasi sibonelo, Jesu bekati kutsi letinye tintfo lebekatawutenta lamhlabeni betitawuba matima kakhulu, ikakhulukati kufa kwakhe kabuhlungu. Nobe kunjalo, akazange atikhiphe ecaleni nakenta lemisebenti yakhe.  Kunaloko, washumayela ngenhlitiyo yonkhe, wafundzisa futsi wasita labanye. Ngisho nangelilanga lebekatawubulawa ngalo, watinika sikhatsi sekugeza tinyawo tebaphostoli bakhe, wabatjela nemavi lamanyenti labadvudvuta futsi wabafundzisa. (Joh. 13:12-15) Ngesikhatsi abetselwe elugodvweni, watinika sikhatsi sekuniketa litsemba lesinye sigebengu lebesifa futsi wahlela kutsi make wakhe anakekelwe. (Luk. 23:42, 43; Joh. 19:26, 27) Ngako lutsandvo lwaJesu lolujulile aluzange nje lubonakale kuphela ngesikhatsi afa kodvwa lwabonakala kuko konkhe kuphila kwakhe lamhlabeni.

12. Yini Jesu lasentela yona nyalo?

¹² Nanobe Khristu afa “kwaba kanye kuphela,” solo uyachubeka nekusentela tintfo letinyenti. (Rom. 6:10) Kanjani? Uyachubeka asebenta kuze asinike tintfo letinyenti lesikhona kutitfola ngenca yenhlawulo. Cabanga ngaloko lamatasa ngako nyalo. UyiNkhosi yetfu, unguMphristi Lophakeme futsi uyinhloko yelibandla. (1 Khor. 15:25; Ef. 5:23; Heb. 2:17) Ucondzisa umsebenti wekuhlanganisa ndzawonye labagcotjiwe kanye nesicumbi lesikhulu, lokungumsebenti lotawuphela ngaphambi kwekutsi kucale kuhlupheka lokukhulu. b (Mat 25:32; Mak 13:27) Uphindze ente konkhe langakwenta kuze asebentise sisebenti lesihlakaniphile kutsi sichubeke sisinika loko lesikudzingako kuze sichubeke sikhonta Jehova ngekwetsembeka. (Mat. 24:45) Ngetulu kwaloko, ngesikhatsi Sekubusa KwaJesu Kweminyaka Leyinkhulungwane utawuchubeka enta tintfo letisisitako. Vele Jehova wasipha iNdvodzana yakhe!

CHUBEKA UFUNDZA

13. Kuzindla kungakusita njani kutsi uchubeke ufundza ngelutsandvo Nkulunkulu naKhristu labanalo ngatsi?

¹³ Ungachubeka ufundza ngelutsandvo Jehova Nkulunkulu naKhristu Jesu labanalo ngatsi nangabe uchubeka uzindla ngalo. Mhlawumbe ngemalanga eSikhumbuto kulomnyaka ungafundza ngekucophelela liVangeli linye nobe ngetulu. Ungetami kufundza tintfo letinyenti ngasikhatsi sinye. Kunaloko, yehlisa litubane futsi ufune letinye tizatfu tekutsi kubaluleke ngani kutsi simtsandze Jehova naJesu. Ngetulu kwaloko, yenta konkhe longakhona kukwenta kuze ucocele labanye loko lokutfolile.

14. Ngekuvumelana neTihlabelelo 119:97 nembhalo longentasi, kucwaninga kungasisita njani kutsi sichubeke sifundza ngenhlawulo nangaletinye timfundziso? (Buka nesitfombe.)

 ¹⁴ Nangabe sekuphele iminyaka leminyenti usecinisweni, mhlawumbe uyatibuta kutsi kungenteka yini utfole lokunye lokusha ngetihloko letivamile njengesihloko lesimayelana nekwehlulela kwaJehova ngekulunga, lutsandvo lwakhe nangenhlawulo. Liciniso likutsi sitawuhlale sifundza tintfo letinsha ngaloku nangaletinye tihloko. Ngako yini longayenta? Fundza futsi udadishe tincwadzi tetfu. Nangabe kunendzaba longayicondzi kahle, cwaninga ngayo. Njengobe kuchubeka lilanga, cabangisisa ngaloko lokutfolile nekutsi kukutjelani ngaJehova, ngeNdvodzana yakhe nangelutsandvo labanalo ngawe.​—Fundza Tihlabelelo 119:97 nembhalo longentasi.

15. Kubaluleke ngani kutsi sichubeke sifuna umcebo loseBhayibhelini?

¹⁵ Ungadvumateki nangabe kute lokusha lokutfolako nobe lokujabulisako njalo nje nawufundza nobe nawucwaninga. Ngandlela tsite, ufana nemuntfu lofuna ligolide. Ngalokuvamile umuntfu lofuna ligolide kufanele acitse ema-awa lamanyenti nobe emalanga lamanyenti etama kufuna ligolide, ngisho lilincane kangakanani. Kodvwa uyachubeka nekulifuna ngobe liligugu ngisho nobe lingakanani. Kakhulu kangakanani-ke ngeliciniso leliligugu leliseBhayibhelini! (Hla. 119:127; Taga 8:10) Ngako bani nesineke futsi unamatsele eluhlelweni lwakho lwekufundza liBhayibheli.​—Hla. 1:2.

16. Singamlingisa njani Jehova naJesu?

¹⁶ Njengobe udadisha, funa tindlela longakusebentisa ngato loko lokufundzako. Sibonelo nje, yenta tintfo ngekulunga njengaJehova ngekutsi uphatse labanye ngekungakhetsi. Lingisa indlela Jesu lamtsandza ngayo Babe wakhe nebantfu ngekutsi utimisele kuhlupheka ngenca yelibito laJehova futsi utidzele ngenca yebazalwane bakho nabodzadze. Ngetulu kwaloko, lingisa Jesu ngekutsi ushumayele labanye kuze nabo batawuba nelitfuba lekwemukela sipho saJehova lesiligugu kakhulu.

17. Sitawucoca ngani esihlokweni lesilandzelako?

¹⁷ Nasichubeka siyicondza kakhulu inhlawulo futsi sibonga kakhulu ngayo, sitamtsandza kakhulu Jehova neNdvodzana yakhe. Nabo batasitsandza kakhulu. (Joh. 14:21; Jak. 4:8) Ngako shengatsi singachubeka sikusebentisa loko Jehova lasinike kona kuze sichubeke sifundza ngenhlawulo. Esihlokweni lesilandzelako, sitawucoca ngaletinye tindlela lengasisita ngato inhlawulo nekutsi singakhombisa njani kutsi siyabonga ngelutsandvo lwaJehova.