1. Ngusiphi lesinye sizatfu lesente Jehova wenta kutsi kube nemshado?

 JEHOVA ‘nguNkulunkulu lojabulako,’ futsi ufuna natsi sijabule. (1 Thim. 1:11) Usiphe tipho letinyenti letisenta sikujabulele kuphila. (Jak. 1:17) Lesinye saletipho ngumshado. Nakushada indvodza nemfati, basuke betsembisa kutsandzana, kuhloniphana nekuphatsana kahle. Nangabe bachubeka basondzelene kakhulu, loko kungabenta bajabule mbamba.​—Taga 5:18.

2. Yini leyenteka emishadweni leminyenti lamuhla?

² Lokubuhlungu kutsi labanyenti labashadile lamuhla babese bayatikhohlwa tetsembiso labatenta ngelilanga labo lemshado. Ngenca yaloko, abakajabuli. Lomunye umbiko wakamuva we-World Health Organization ukhombisa kutsi emadvodza lamanyenti ahlukubeta bafati bawo emtimbeni, ngemavi nasemoyeni. Indvodza leyenta loku kungenteka imphatse kahle umkayo nabasembikwebantfu kodvwa imphatse kabi nasebasekhaya. Imishado leminyenti iphindze ilimale nalapho indvodza ibukela titfombe letikhombisa kungcola.

3. Ngutiphi timo letingenta indvodza ihlukubete umkayo?

³ Yini lengenta lamanye emadvodza ahlukubete bafati bawo? Kungenteka akhuliswe bobabe labanebudlova, ngako acabanga kutsi kuphatsa kabi umfati kuyintfo levamile. Lamanye kungenteka entiwa lisiko lakhulele kulo, lokungenteka likhutsata umbono longasiwo wekutsi “indvodza sibili” kufanele isebentise emandla kuze ikhombise umkayo kutsi ngubani lophetse. Lamanye emadvodza akazange sekafundziswe kulawula indlela lativa ngayo, lokufaka ekhatsi kulawula intfukutselo. Lamanye sekanembono longasiwo mayelana nebesifazane kanye nekuya ecansini ngenca yekutsi ahlale abuka titfombe letikhombisa kungcola. Ngetulu kwaloko, imibiko ikhombisa kutsi i-COVID-19 yente letinkinga taba timbi kakhulu.  Kuliciniso kutsi kute kuletimo letinika indvodza sizatfu sekuhlukubeta umkayo.

4. Yini emadvodza langemaKhristu lokufanele ayigadze, futsi ngasiphi sizatfu?

⁴ Emadvodza langemaKhristu kufanele agadze kutsi angabi nembono longasiwo ngebesifazane. a Ngasiphi sizatfu? Lesinye sizatfu kutsi loko umuntfu lakucabangako kuvame kumholela esentweni. Umphostoli Pawula wecwayisa emaKhristu lagcotjiwe aseRoma kutsi ‘ayekele kufana nebantfu balelive.’ (Rom. 12:1, 2) Ngesikhatsi Pawula abhalela lamaKhristu, kubonakala ngatsi lelibandla beselinesikhatsi likhona. Nanobe kunjalo, lamavi aPawula akhombisa kutsi labanye kulelibandla bebasolo banamatsele emasikweni kanye nasendleni lelive lelicabanga ngayo. Kungako abecwayisa kutsi bashintje indlela labacabanga ngayo nalabenta ngayo. Leseluleko sisasebenta nakumadvodza langemaKhristu lamuhla. Lokubuhlungu kutsi lamanye awo abese acabanga njengalelive futsi loko kwente kutsi ahlukubete bafati bawo. b Jehova ulindzele kutsi indvodza imphatse njani umkayo? Imphendvulo siyitfola kulombhalo lokusekelwe kuwo lesihloko.

5. Ngekusho kwa-1 Phetro 3:7, indvodza kufanele imphatse njani umkayo?

⁵ Fundza 1 Phetro 3:7. Jehova utsi emadvodza kufanele ahloniphe bomkawo. Indvodza lehlonipha umkayo itamphatsa ngemusa nangelutsandvo. Kulesihloko, sitawucoca ngekutsi indvodza ingakhombisa njani kutsi iyamhlonipha umkayo. Kodvwa asesicale sicoce ngekutsi yini indvodza lengayenta lengakhombisa kutsi ayimhloniphi umkayo.

UNGENTI NOBE NGABE YINI LEKHOMBISA KUTSI AWUMHLONIPHI UMKAKHO

6. Jehova utiva njani nangabe indvodza ihlukubeta umkayo emtimbeni? (KubaseKholose 3:19)

⁶ Kumhlukubeta emtimbeni. Jehova uyamenyanya umuntfu lonebudlova. (Hla. 11:5) Akayemukeli mbamba indvodza lehlukubeta umkayo. (Mal. 2:16; fundza KubaseKholose 3:19.) Ngekusho kwa-1 Phetro 3:7, lokungumbhalo lokusekelwe kuwo lesihloko, nangabe indvodza ingamphatsi kahle umkayo, buhlobo bayo naNkulunkulu butawulimala. Jehova angahle angawulaleli umthantazo wayo.

7. Ngekusho kwembhalo waKubase-Efesu 4:31, 32, emadvodza kufanele agweme inkhulumo lenjani? (Buka “Inchazelo Yeligama.”)

⁷ Kumhlukubeta ngemavi. Lamanye emadvodza ahlukubeta bafati bawo nawatfukutsele ngaloko lakushoko nangemavi lalimatako. Kodvwa Jehova uyayenyanya ‘intfukutselo, lulaka, umsindvo nenkhulumo lehlabako.’ c (Fundza Kubase-Efesu 4:31, 32.) Uva konkhe. Indlela indvodza lekhuluma ngayo nemkayo, ngisho nobe babodvwa ekhaya, ibalulekile kuJehova. Indvodza lekhuluma kabi nemkayo ayigcini nje ngekulimata umshado wayo kodvwa iphindze ilimate nebuhlobo bayo naNkulunkulu.​—Jak. 1:26.

8. Jehova utiva njani ngetitfombe letikhombisa kungcola, futsi ngasiphi sizatfu?

⁸ Kubuka titfombe letikhombisa kungcola. Jehova utiva njani ngetitfombe letikhombisa kungcola? Uyatenyanya. Ngako nangabe indvodza ibukela titfombe letingcolile ilimata buhlobo bayo naJehova futsi ikhombisa kutsi ayimhloniphi umkayo. d Jehova ulindzele kutsi indvodza  ihlale yetsembekile kumkayo hhayi nje ngaloko lekwentako kuphela kodvwa nangaloko lekucabangako. Jesu watsi indvodza lebuka lomunye wesifazane ize imkhanuke seyivele iphingile naye “enhlitiyweni.” e​—Mat. 5:28, 29.

9. Yini leyenta Jehova angajabuli nangabe indvodza ifuna umkayo ente tintfo letimenta ative alahlekelwa sitfunti nabaya ecansini?

⁹ Kwenta umkakho ative alahlekelwa sitfunti naniya ecansini. Lamanye emadvodza acindzetela bafati bawo kutsi bente tento letitsite letibenta bative balahlekelwa sitfunti nabaya ecansini futsi letibenta bative bangcolile nobe bangatsandvwa. Jehova uyatenyanya letento tebugovu naletikhombisa kuticabangela. Ulindzele kutsi indvodza imtsandze umkayo, imphatse kahle futsi ihloniphe indlela lativa ngayo. (Ef. 5:28, 29) Yini indvodza lengumKhristu lokufanele ikwente nangabe imphatsa ngalendlela umkayo nobe imhlukubeta nobe ibuka titfombe letikhombisa kungcola? Ingayishintja njani indlela leyenta ngayo nalecabanga ngayo?

UNGAYEKELA NJANI KUKHOMBISA KUTSI AWUMHLONIPHI UMKAKHO?

10. Sibonelo saJesu singawasita njani emadvodza?

¹⁰ Yini lengasita indvodza kutsi iyekele kuhlukubeta umkayo nekumentisa tintfo letimenta ative alahlekelwa sitfunti nabaya ecansini? Ingatimisela kulingisa Jesu. Nanobe Jesu angazange sekashade, indlela lebekaphatsa ngayo bafundzi bakhe isibonelo lesihle sekutsi indvodza kufanele imphatse njani umfati wayo. (Ef. 5:25) Sibonelo nje, cabanga ngaloko emadvodza langakufundza endleleni Jesu laphatsa ngayo baphostoli bakhe nasendleleni labakhulumisa ngayo.

11. Jesu wabaphatsa njani baphostoli bakhe?

¹¹ Jesu waphatsa baphostoli bakhe ngendlela lenemusa nalenenhlonipho. Bekangabakhahlabeti nobe abacindzetele. Nanobe bekayiNkhosi yabo, akazange asebentise emandla kuze abesabise, kunaloko ngekutfobeka wabasita. (Joh. 13:12-17) Watjela bafundzi bakhe watsi: “Nifundze kimi, ngobe nginemoya lophansi futsi ngitfobekile, nanenta njalo nitawuphumula.” (Mat. 11:28-30) Naka kutsi Jesu bekanemoya lophansi. Akusho kutsi umuntfu lonemoya lophansi ute emandla. Kunaloko uyakhona kutibamba. Nakatfukutsele, uhlale ehlise umoya futsi akhone kulawula indlela lativa ngayo.

12. Jesu bekabakhulumisa njani labanye?

¹² Jesu wasebentisa emavi akhe kuze advudvute labanye futsi abakhutsate. Akazange abakhulumise kabi balandzeli bakhe. (Luk. 8:47, 48) Ngisho nalapho lebebamphikisa bametfuka futsi betama kumtfukutselisa, “akazange aphindzisele ngekwetfuka.” (1 Phet. 2:21-23) Ngalesinye sikhatsi bekaze akhetse kuthula kunekutsi aphendvule kabi. (Mat. 27:12-14) Lesi sibonelo lesihle emadvodza langemaKhristu langasilingisa!

13. Njengobe kuvetiwe kuMatewu 19:4-6, indvodza ‘inganamatselana’ njani nemkayo? (Buka nesitfombe.)

¹³ Jesu watjela emadvodza kutsi ahlale etsembekile kubafati bawo. Wacaphuna emavi aBabe wakhe lowatsi indvodza kufanele “inamatsele kumkayo.” (Fundza Matewu 19:4-6.) Ligama lesiGriki lesisetjentiswe kulelivesi lelitsi ‘kunamatsela’ lisho kunamatsela ngatsi kusetjentiswe “i-glue.” Ngako budlelwane lobusemkhatsini wendvodza nemfati kufanele bucine kakhulu kube shengatsi banamatsiselwe nge-glue. Nangabe lotsite kubo ente intfo lemvisa buhlungu lolomunye, bobabili bayatsintseka. Indvodza lenalobudlelwane lobucinile nemkayo itawutigwema tonkhe tinhlobo tetitfombe letikhombisa kungcola. Itakubalekela ngekushesha ‘kubuka lokungenamsebenti.’ (Hla. 119:37) Ecinisweni,  yenta sivumelwane nemehlo ayo kutsi angabuki ngekumkhanuka lomunye wesifazane ngaphandle kwemkayo.​—Jobe 31:1.

14. Ngutiphi tintfo indvodza lehlukubeta umkayo lokufanele itente kuze ilungise buhlobo bayo naJehova nemkayo?

¹⁴ Indvodza lehlukubeta umkayo emtimbeni nobe ngemavi kufanele yente lokutsite kuze ilungise buhlobo bayo naJehova nemkayo. Yini lokufanele iyente? Kwekucala, kufanele ibone kutsi inenkinga lenkhulu. Kute lokufihlakele emehlweni aJehova. (Hla. 44:21; Shu. 12:14; Heb. 4:13) Kwesibili, iyayekela kuhlukubeta umkayo futsi ishintje indlela leyenta ngayo. (Taga 28:13) Kwesitsatfu, iyacolisa kumkayo nakuJehova futsi icele kutsi bayicolele. (Imis. 3:19) Kufanele iphindze icele Jehova kutsi ayinikete sifiso sekushintja futsi ayisite ikhone kulawula loko lekucabangako, lekukhulumako nalekwentako. (Hla. 51:10-12; 2 Khor. 10:5; Fil. 2:13) Kwesine, kufanele yente ngekuvumelana nemithantazo yayo ngekutsi ifundze kwenyanya yonkhe inhlobo yebudlova nenkhulumo lehlabako. (Hla. 97:10) Kwesihlanu, kufanele ifune lusito kulabadzala belibandla ngekushesha. (Jak. 5:14-16) Kwesitfupha, kufanele yente luhlelo lolutayisita kutsi igweme lendlela yekutiphatsa esikhatsini lesitako. Indvodza lebuka titfombe letikhombisa kungcola kufanele yente lokufanako. Jehova utayibusisa imetamo yayo yekushintja indlela leyenta ngayo. (Hla. 37:5) Kodvwa akukeneli kutsi indvodza imane nje igweme tintfo letikhombisa kungamhloniphi umkayo. Kufanele iphindze ifundze nekukhombisa kutsi iyamhlonipha. Ingakwenta njani loko?

UNGAKHOMBISA NJANI KUTSI UYAMHLONIPHA UMKAKHO?

15. Indvodza ingakhombisa njani kutsi iyamtsandza umkayo?

¹⁵ Mkhombise kutsi uyamtsandza. Labanye bazalwane labajabulile emishadweni yabo bavame kwenta lokutsite onkhe malanga kuze bakhombise bafati babo kutsi babatsandza kangakanani. (1 Joh. 3:18) Indvodza ingakhombisa kutsi iyamtsandza umkayo ngetindlela letehlukahlukene letincane letifaka ekhatsi kumbamba  sandla nobe kumhaga. Ingambhalela nemlayeto lotsi: “Sengikukhumbulile” nobe imbute itsi: “Lihamba njani lilanga lakho?” Iyavama kusho indlela lemtsandza ngayo ngekutsi imbhalele emavi lamnandzi ekhadini. Nangabe indvodza itenta letintfo, ikhombisa kutsi iyamhlonipha umkayo futsi icinisa nemshado wabo.

16. Kubaluleke ngani kutsi indvodza idvumise umkayo?

¹⁶ Mtjele kutsi uligugu kuwe. Indvodza lehlonipha umkayo iyamtjela kutsi yini leyenta abeligugu kuyo futsi imenta ative ajabula. Lenye indlela lengakwenta ngayo loku kutsi ikhumbule kukhombisa kutsi iyabonga ngako konkhe umkayo lakwentako kuze amsekele. (Khol. 3:15) Nangabe indvodza imdvumisa ngalokusuka enhlitiyweni umkayo, yenta inhlitiyo yakhe ijabule. Utawutiva avikelekile, atsandvwa futsi ahlonishwa.​—Taga 31:28.

17. Indvodza ingakhombisa njani kutsi iyamhlonipha umkayo?

¹⁷ Bani nemusa futsi umhloniphe. Indvodza lemtsandzako umkayo imtsatsa njengaloligugu futsi imphatsa kahle. Imtsatsa njengesipho lesiligugu kakhulu lesivela kuJehova. (Taga 18:22; 31:10) Loko kwenta kutsi imphatse kahle futsi imhloniphe ngisho nalapho baya ecansini. Angeke imcindzetele kutsi ente tento letimenta ative angakhululeki nabaya ecansini, ehlelwa sitfunti nobe letihlupha nembeza wakhe. f Nendvodza itawetama kuhlala inanembeza lohlobile embikwaJehova.​—Imis. 24:16.

18. Yini emadvodza lokufanele atimisele kuyenta? (Buka nelibhokisi lelitsi “ Tindlela Letine Letingasita Indvodza Ihloniphe Umkayo.”)

¹⁸ Madvodza, cinisekani kutsi Jehova uyayibona imetamo leniyentako yekuhlonipha bafati benu kuto tonkhe tici tekuphila, futsi uyajabula ngayo. Timisele kuhlonipha umkakho ngekutsi ugweme kwenta nobe yini lengamenta ative angahlonishwa nangekutsi ube nemusa kuye, umhloniphe futsi umtsandze. Nawenta njalo, utamkhombisa kutsi uyamtsandza nekutsi uligugu kuwe. Mhloniphe umkakho, futsi nawenta njalo utawuvikela buhlobo lobubaluleke kakhulu, lokubuhlobo bakho naJehova.​—Hla. 25:14.