1. Yini bantfu labanyenti lamuhla labanendzaba kakhulu nayo?

 UYANAKA yini kutsi bantfu labanyenti lamuhla batinaka bona? Sibonelo nje, labanye bantfu benta labanye banake bona etinhlelweni tekuchumana kanye naloko labakufezile. Nobe kunjalo, bancane bantfu labanika Jehova Nkulunkulu ludvumo. Kulesihloko, sitawucoca ngekutsi kusho kutsini kunika Jehova ludvumo nekutsi kubaluleke ngani kukwenta loko. Sitawuphindze sifundze ngekutsi singamnika njani Nkulunkulu ludvumo lolumfanele nekutsi yena matfupha utalikhatimulisa njani libito lakhe esikhatsini lesitako.

KUSHO KUTSINI KUNIKA JEHOVA LUDVUMO?

2. Jehova waluveta njani ludvumo lwakhe eNtsabeni iSinayi? (Buka sitfombe lesisekhasini lekucala.)

² Luyini ludvumo? EBhayibhelini, ligama lelitsi “ludvumo” lisho nobe yini leyenta lotsite abe mkhulu. Jehova waveta kutsi lukhulu kanganani ludvumo lwakhe ngekushesha nje ngemuva kwekutsi sive sema-Israyeli sikhululwe ekugcilatweni eGibhithe. Sibone ngeliso lengcondvo lesimo: Tigidzi tema-Israyeli tihlangene ngephansi kweNtsaba iSinayi kuze tibe nemhlangano naNkulunkulu wato. Kunelifu lelimnyama lelimbhonye lentsaba. Kungakalindzeleki, kuba nekutamatama lokukhulu kwemhlaba, lokungenteka kuhambisana nentsabamlilo, lokunyakatisa umhlaba labeme kuwo njengobe limanyata, lidvuma futsi kunemsindvo lomkhulu wekushaywa kweluphondvo. (Eks. 19:16-18; 24:17; Hla. 68:8) Cabanga nje kutsi lama-Israyeli ajabula kanganani njengobe Jehova aveta bukhulu benkhatimulo yakhe.

3. Kusho kutsini kuniketa Jehova ludvumo?

 ³ Kutsiwani ngebantfu? Singamnika yini Jehova ludvumo? Yebo. Lenye indlela lesingakwenta ngayo loko kutsi sitjele labanye ngemandla akhe lamakhulu nangebuntfu bakhe lobuhle. Siphindze simnike ludvumo Nkulunkulu nasibonga ngetintfo lesitifezile ngenca yemandla akhe. (Isa. 26:12) INkhosi Davide isemkhatsini webantfu labahamba embili ekunikeni Jehova ludvumo. Naku lakusho kuNkulunkulu emthantazweni lawenta embikwesive sema-Israyeli, watsi: “Awu Jehova, bukhulu, nemandla, nebuhle nenkhatimulo, nebukhosi ngekwakho ngobe konkhe lokusemazulwini nasemhlabeni kwakho.” Ngemuva kwalomthantazo, “sonkhe lesive sabese sidvumisa Jehova.”​—1 Khr. 29:11, 20.

4. Jesu wamnika njani Jehova ludvumo?

⁴ Ngesikhatsi Jesu alamhlabeni, wanika Babe wakhe ludvumo ngekutsi asho kutsi nguye lebekamnikete emandla ekwenta timangaliso. (Mak. 5:18-20) Waphindze wamnika ludvumo ngendlela bekakhuluma ngayo ngaBabe wakhe nangendlela bekaphatsa ngayo labanye. Ngalelinye lilanga bekafundzisa esinagogeni. Emkhatsini walabo bebamlalele, bekunemfati lebesekuphele iminyaka lengu-18 ahlaselwe lidimoni. Lelidimoni belimente kutsi agobane kangangekutsi bekangasakhoni kuma acondze. Loko bekubuhlungu kakhulu! Ngesihawu, Jesu waya kulomfati futsi wakhuluma naye ngemusa watsi: “Sewukhululiwe ekuguleni kwakho.” Wabeka tandla takhe kuye, futsi ngekushesha lomfati wema wacondza “wase udvumisa Nkulunkulu,” waphila futsi nesitfunti besimlahlekele sabuya! (Luk. 13:10-13) Lomfati bekanesizatfu lesivakalako sekunika Jehova ludvumo, futsi kungulokufanako nangatsi.

YINI LEYENTA SIFUNE KUNIKA JEHOVA LUDVUMO?

5. Ngutiphi tizatfu letenta simhloniphe Jehova?

⁵ Sidvumisa Jehova ngenca yekutsi simhlonipha kakhulu. Sinetizatfu letinyenti tekumhlonipha. UnguSomandla; emandla akhe awapheli. (Hla. 96:4-7) Kuhlakanipha kwakhe lokukhulu kubonakala ngalokucacile etintfweni latentile. UnguMtfombo wekuphila kwetfu futsi usinike konkhe lesikudzingako kuze siphile. (Semb. 4:11) Wetsembekile. (Semb. 15:4) Konkhe lakwentako kuyaphumelela futsi uhlale atigcina tetsembiso takhe. (Josh. 23:14) Kungako umphrofethi Jeremiya atsi ngaJehova: “Kubo bonkhe bantfu labahlakaniphile labakuto tonkhe tive emhlabeni, kute ngisho namunye lofana nawe”! (Jer. 10:6, 7) Kusebaleni kutsi sinetizatfu letivakalako tekuhlonipha Babe wetfu wasezulwini. Ngetulu kwekutsi kufanele simhloniphe, unebuntfu lobuhle lobenta kutsi simtsandze kakhulu.

6. Yini leyenta sitsandze Jehova?

⁶ Sinika Jehova ludvumo ngenca yekutsi simtsandza kakhulu. Cabanga ngebuntfu baJehova lobenta simtsandze. Unemusa nesihawu. (Hla. 103:13; Isa. 49:15) Uneluvelo; nasiva buhlungu naye uva buhlungu. (Zak. 2:8) Wenta kube melula kutsi sisondzele kuye sibe bangani bakhe. (Hla. 25:14; Imis. 17:27) Ngetulu kwaloko utfobekile; “uyagobondzela kute abuke ezulwini nasemhlabeni, [aphakamise] lophansi amsuse elutfulini.” (Hla. 113:6, 7) Umuntfu angahlala njani nje angafuni kunika Nkulunkulu wetfu lomkhulu ludvumo?​—Hla. 86:12.

7. Nguliphi litfuba lelihle lesinalo?

⁷ Sinika Jehova ludvumo ngobe sifuna labanye bamati. Bantfu labanyenti abalati liciniso ngaJehova. Kwentiwa yini loko? Kungenca  yekutsi Sathane uvale tingcondvo tebantfu ngekutsi asakate emanga lamabi ngaJehova. (2 Khor. 4:4) Sathane wente bantfu bacabanga kutsi Jehova unguNkulunkulu lotfukutselako, longenandzaba nebantfu futsi lobangela kuhlupheka lokunyenti emhlabeni. Kodvwa tsine siyalati liciniso ngaNkulunkulu wetfu! Sinelitfuba lekutjela labanye liciniso ngaye futsi ngaleyondlela simnika ludvumo. (Isa. 43:10) Tihlabelelo 96 tikhuluma kakhulu ngekunika Jehova ludvumo. Njengobe sitawube sicoca ngalamanye emavi laphefumulelwe lakulesihlabelelo, cabanga ngetintfo longatenta kuze unike Jehova ludvumo lolumfanele.

SINGAMNIKA NJANI JEHOVA LUDVUMO LOLUMFANELE?

8. Nguyiphi lenye indlela lesingadvumisa ngayo Jehova? (Tihlabelelo 96:1-3)

⁸ Fundza Tihlabelelo 96:1-3. Singamnika Jehova ludvumo ngaloko lesikushoko. Kulamavesi, bantfu baJehova batjelwa kutsi ‘bahlabelele Jehova,’ ‘badvumise libito lakhe,’ ‘bamemetele tindzaba letimnandzi tensindziso yakhe’ futsi ‘bamemetele inkhatimulo yakhe etiveni.’ Konkhe loku kutindlela lesingamdvumisa ngato Babe wetfu wasezulwini. EmaJuda letsembekile kanye nemaKhristu ekucala bekahlale akulungele kutjela bantfu ngato tonkhe tintfo letinhle Jehova lawentele tona nekuvikela lidvumela lakhe. (Dan. 3:16-18; Imis. 4:29) Tsine singakwenta njani loko?

9-10. Yini loyifundza kuloko lokwenteka ku-Angelena? (Buka nesitfombe.)

⁹ Cabanga ngaloko lokwenteka kulomunye dzadze lohlala eMelika lokutsiwa ngu-Angelena. a Wamelela ligama laJehova ngesibindzi kulenye inkapane lasebenta kuyo. Njengobe bekafika kulenkapane, wabitwa kutsi aye kulomunye umhlangano lapho khona bonkhe labasandza kufika banikwa litfuba lekutsi batichaze kulabo labasebenta nabo. Angelena bekahlele kubakhombisa titfombe letikhombisa injabulo lanayo ngenca yekuba nguFakazi waJehova. Kodvwa ngaphambi kwekutsi kube litfuba lakhe, kwakhuluma lenye indvodza leyatsi yakhula inguFakazi waJehova. Yabese icala kuhlekisa ngetinkholelo tetfu. Angelena utsi: “Inhlitiyo yami yashayela etulu ngenca yeluvalo. Kodvwa ngacabanga  ngatsi: ‘Ngitamvumela yini lomuntfu kutsi akhulume emanga ngaJehova, nobe ngitammelela?’”

¹⁰ Nayicedza kukhuluma lendvodza, Angelena washo umthantazo lomfishane ngenhlitiyo. Ngemusa wabese utsi kulendvodza: “Nami ngikhule ngendlela lefana neyakho. Nami ngikhule nginguFakazi waJehova futsi solo nginguye kuze kube ngulamuhla.” Nanobe lesimo saba matima, kodvwa Angelena wachubeka ehlise umoya njengobe akhombisa lalasebenta nabo titfombe takhe anebangani bakhe bakhonta Jehova bajabulile futsi ngenhlonipho wachaza loko lakukholelwako. (1 Phet. 3:15) Waba yini umphumela? Nakacedza kukhuluma, lendvodza beseyehlise umoya. Yaze yasho kutsi iyatikhumbula tikhatsi letimnandzi beyinato nayisakhula inguFakazi waJehova. Angelena utsi: “Kufanele simmelele Jehova. Kuligugu kakhulu kumelela ligama lakhe.” Natsi sinelitfuba lelihle lekudvumisa Jehova futsi simkhatimulise ngisho nalapho labanye bamhlambalata.

11. Kusukela kadzeni, tikhonti teliciniso tisisebentise njani simiso lesikuTihlabelelo 96:8?

¹¹ Fundza Tihlabelelo 96:8. Singamdvumisa Jehova ngetintfo lesinato. Tikhonti taJehova teliciniso betisolo timdvumisa ngetintfo letinato. (Taga 3:9) Sibonelo nje, ema-Israyeli anikela kuze kwakhiwe futsi kunakekelwe lithempeli. (2 Khos. 12:4, 5; 1 Khr. 29:3-9) Bafundzi baKhristu ‘basebentisa tintfo tabo’ kuze basekele yena nebaphostoli bakhe. (Luk. 8:1-3) NemaKhristu ekucala anikela kuze kusitwe bazalwane bawo nabodzadze. (Imis. 11:27-29) Natsi lamuhla singamdvumisa Jehova ngekunikela ngekutitsandzela.

12. Iminikelo yetfu ingamdvumisa njani Jehova? (Buka nesitfombe.)

¹² Cabanga nganaku lokwenteka lokukhombisa indlela iminikelo yetfu lemdvumisa ngayo Jehova. Umbiko wa-2020 wakhuluma ngesomiso lesatsatsa sikhatsi lesidze eZimbabwe. Tigidzi tebantfu betisengotini yekubulawa yindlala, lokufaka ekhatsi nalomunye dzadze lokutsiwa nguPrisca. Ngisho nobe kunalesomiso, Prisca wachubeka neluhlelo lwakhe lwekushumayela ngaboLesitsatfu nangaboLesihlanu. Loko bekakwenta ngisho nangesikhatsi sekulima. Bomakhelwane bakhe bebahlekisa ngaye ngenca yekutsi bekaya kuyoshumayela kunekutsi asebente emasimini, bebatsi: “Utawubulawa yindlala.” Ngesibindzi Prisca bekabaphendvula atsi: “Jehova  akaze abashiye bantfu bakhe.” Kungakapheli sikhatsi lesidze kwenteke loko, watfola kudla naletinye tintfo bekatidzinga lebekubuya enhlanganweni. Lolusito lwaba khona ngenca yeminikelo yetfu. Bomakhelwane bakhe bajabulile, batsi kuye: “Nkulunkulu akaze wakushiya, ngako sifuna kufundza lokunyenti ngaye.” Bomakhelwane bakhe labangu-7 bacala kuya emihlanganweni yelibandla.

13. Indlela lesitiphatsa ngayo ingamdvumisa njani Jehova? (Tihlabelelo 96:9)

¹³ Fundza Tihlabelelo 96:9. Singamnika Jehova ludvumo ngendlela lesitiphatsa ngayo. Baphristi lebebasebenta ethempelini bekufanele bahlobe. (Eks. 40:30-32) Kodvwa lebekubaluleke kakhulu bekukutiphatsa ngendlela lehlantekile. (Hla. 24:3, 4; 1 Phet. 1:15, 16) Kufanele sisebente kamatima kuze sikhumule “buntfu lobudzala,” lokukucabanga nekwenta tintfo letingcolile, futsi sigcoke “buntfu lobusha,” lokukucabanga nekwenta ngendlela lekhombisa buntfu baJehova lobukhatimulako. (Khol. 3:9, 10) Ngekusitwa nguJehova, ngisho nebantfu lebebangcole kakhulu futsi banebudlova kakhulu bangashintja futsi bagcoke buntfu lobusha.

14. Yini loyifundza kuloko lokwenteka kuJack? (Buka nesitfombe.)

¹⁴ Cabanga ngaJack, lebekanebudlova futsi ayingoti kakhulu kangangekutsi bekabitwa ngekutsi Lidimoni. Ngenca yemacala akhe, watfola sigwebo sentsambo. Kodvwa ngesikhatsi amele kubulawa, wavuma kutsi lomunye umzalwane lebekavakasha kulelijele adadishe naye liBhayibheli. Ngisho nobe Jack bekente tintfo letinyenti letimbi, wakhumula buntfu bakhe lobudzala futsi ngekuhamba kwesikhatsi wabhajatiswa. Jack washintja kakhulu kangangekutsi ngelilanga labulawa ngalo bekugeleta tinyembeti ebusweni balabanye bogadzi njengobe bamvalelisa. Lelinye liphoyisa lebelisebenta kulelijele latsi: “Jack bekasiboshwa lesiyingoti kakhulu kulelijele. Kodvwa nyalo besekangulesinye setiboshwa lesikahle kakhulu.” Ngeliviki lelalandzela kubulawa kwaJack, bazalwane lababuyela kuyochuba imihlangano kulelijele babona lesinye siboshwa lebesicala kuta kulemihlangano. Yini leyasenta saba khona kulemihlangano? Sajatjuliswa yindlela Jack lashintja ngayo futsi besifuna kwati kutsi yini lokufanele siyente kuze sikhonte Jehova. Kusebaleni kutsi  indlela lesitiphatsa ngayo ingamnika ludvumo Babe wetfu wasezulwini!​—1 Phet. 2:12.

JEHOVA UTALIKHATIMULISA NJANI LIBITO LAKHE ESIKHATSINI LESITAKO?

15. Jehova utalikhatimulisa njani ngalokuphelele libito lakhe esikhatsini lesitako? (Tihlabelelo 96:10-13)

¹⁵ Fundza Tihlabelelo 96:10-13. Emavesi ekugcina lakuTihlabelelo 96 achaza Jehova ngekutsi nguMehluleli lolungile nangekutsi yiNkhosi lelungile. Jehova utalikhatimulisa njani libito lakhe esikhatsini lesitako? Utawehlulela. Ngekushesha utawubhubhisa iBhabhulona Lenkhulu ngenca yekutsi ihlambalate libito lakhe lelingcwele. (Semb. 17:5, 16; 19:1, 2) Labanye labatawubona nakubhujiswa iBhabhulona Lenkhulu kungenteka bacale kukhonta Jehova kanye natsi. Ekugcineni nge-Amagedoni, Jehova utawubhubhisa lelive laSathane, asuse bonkhe labamelene naye nalabahlambalata libito lakhe kodvwa asindzise bonkhe labo labamtsandzako, labamlalelako nalabakujabulelako kumnika ludvumo. (Mak. 8:38; 2 Thes. 1:6-10) Ngemuva kweluvivinyo lwekugcina lolutawulandzela Iminyaka Leyinkhulungwane Yekubusa KwaKhristu, Jehova utawube sekalingcwelise ngalokuphelele libito lakhe. (Semb. 20:7-10) Ngaleso sikhatsi, “umhlaba utawugcwala lwati lwenkhatimulo yaJehova njengemanti lagcwalisa lwandle.”​—Hab. 2:14.

16. Yini lotimisele kuyenta? (Buka nesitfombe.)

¹⁶ Kutawuba yinjabulo lenkhulu ngesikhatsi Jehova akhatimulisa libito lakhe lelikufanele kunikwa ludvumo! Kodvwa njengobe sisengakefiki lesikhatsi, singenta konkhe lokusemandleni etfu kuze sikhatimulise Nkulunkulu wetfu njalo nje nasitfola litfuba. Kuze kugcizelelwe lendzaba, Sigungu Lesibusako sikhetse Tihlabelelo 96:8 kutsi tibe ngumbhalo wemnyaka wa-2025: “Nikani Jehova ludvumo lolufanele libito lakhe.”