1. Yini lesingayenta kuze sijabulise Jehova?

 ASE uticabange upha umuntfu lomtsandzako sipho lesikhetsekile, lesihle futsi lesilusito. Ungadvumateka nangabe angavele asibeke lakuhlala khona tintfo langatisebentisi futsi angaphindzi acabange ngaso! Ngakulokunye, ungajabula nakangasisebentisa futsi akhombise kutsi uyasitsandza. Liyini liphuzu? Jehova unikele ngeNdvodzana yakhe ngenca yetfu. Ujabula kakhulu nasikhombisa kutsi siyabonga ngalesipho lesiligugu nangelutsandvo lwakhe lolumente kutsi asinike inhlawulo!​—Joh. 3:16; Rom. 5:7, 8.

2. Yini lesitawucoca ngayo kulesihloko?

² Kodvwa njengobe sikhatsi sichubeka, singacala kungabi nandzaba nalesipho lesiyinhlawulo. Kungafana nekutsi sibeke lesipho lesiligugu lasibeka khona tintfo lesingatisebentisi. Siyajabula ngekutsi sinaso, kodvwa asicabangi ngaso. Kuze loko kungenteki, kufanele sihlale sicabanga ngako konkhe Nkulunkulu naKhristu labasentele kona. Lesihloko sitasisita sikhone kukwenta loko. Sitawucoca ngekutsi inhlawulo isisita njani nyalo futsi itasisita njani esikhatsini lesitako. Sitawuphindze sicoce ngaloko lesingakwenta kuze sikhombise kutsi siyabonga ngelutsandvo lwaJehova, ikakhulukati ngemalanga eSikhumbuto.

INDLELA INHLAWULO LESISITA NGAYO NYALO

3. Nguyiphi lenye indlela inhlawulo lesisita ngayo nyalo?

³ Inhlawulo yaKhristu iyasisita nanyalo. Sibonelo nje, ngalenhlawulo, Jehova usicolela tono tetfu. Akaphoceleleki  kutsi asicolele. Kodvwa loko ukwenta ngobe afuna. Umhlabeleli lebekabonga watsi: “Wena Jehova umuhle futsi uhlale ukulungele kutsetselela.”​—Hla. 86:5; 103:3, 10-13.

4. Jehova wayentela bobani inhlawulo? (Lukha 5:32; 1 KuThimothi 1:15)

⁴ Kungenteka labanye beve shengatsi akubafaneli kucolelwa nguJehova. Ecinisweni, sonkhe akusifaneli. Umphostoli Pawula bekati kutsi ‘bekangakufaneli kubitwa ngekutsi ngumphostoli.’ Nanobe kunjalo, watsi: “Ngemusa lomkhulu waNkulunkulu nginguloku lengingiko.” (1 Khor. 15:9, 10) Nasiphendvuka etonweni tetfu, Jehova uyasicolela. Ngasiphi sizatfu? Ngenca yekutsi uyasitsandza, hhayi ngobe sikufanele. Nangabe utiva ungasilutfo, khumbula kutsi Jehova akayentelanga bantfu labete sono inhlawulo, kodvwa wayentela toni letiphendvukako.​—Fundza Lukha 5:32; 1 KuThimothi 1:15.

5. Ukhona yini kitsi lokufanele acabange kutsi uyakufanela kutfola umusa waJehova? Chaza.

⁵ Kute kitsi lokufanele acabange kutsi kufanele atfole umusa waJehova ngenca yekutsi sekuphele iminyaka leminyenti amkhonta. Kuliciniso kutsi Jehova uyakukhumbula loko lesimentele kona. (Heb. 6:10) Usinikete iNdvodzana yakhe yaba sipho samahhala, hhayi kutsi ubhadala loko lesimentele kona. Nangabe besingatsi siwusebentele umusa waJehova, bekungafana nekutsi sitsi Khristu wafela lite.​—Catsanisa naKubaseGalathiya 2:21.

6. Yini leyenta Pawula wasebenta kamatima emsebentini waJehova?

⁶ Pawula bekati kutsi ngisho nobe angamsebentela kanganani Jehova, loko bekungeke kumente awufanele umusa wakhe. Yini-ke leyamenta wasebenta kamatima emsebentini waJehova? Bekungasiko kutsi ufuna kukhombisa kutsi uyakufanela kutfola umusa waJehova, kodvwa bekafuna kukhombisa kutsi uyabonga ngemusa wakhe lomkhulu. (Ef. 3:7) NjengaPawula, natsi siyachubeka sisebenta kamatima kuze sikhombise kutsi siyabonga ngawo, hhayi ngoba sifuna kukufanela kuwutfola.

7. Nguyiphi lenye indlela inhlawulo lesisita ngayo nyalo? (KubaseRoma 5:1; Jakobe 2:23)

⁷ Lenye indlela inhlawulo lesisita ngayo nyalo kutsi singaba nebuhlobo lobuhle naJehova. a Njengobe kuvetiwe esihlokweni lesendlulile, sitalwa site buhlobo naNkulunkulu. Kodvwa ngenca yenhlawulo, singaba “nekuthula naNkulunkulu” futsi ngaleyondlela sisondzelane naye.​—Fundza KubaseRoma 5:1; Jakobe 2:23.

8. Yini leyenta simbonge Jehova ngesipho semthantazo?

⁸ Lokunye lesikutfolako ngenca yebuhlobo lobuhle naJehova kutsi siyakhona kuthantaza kuye. Jehova akagcini nje ngekuva imithantazo lesiyenta nasihlangene, kodvwa uva nemthantazo wemuntfu ngamunye. Umthantazo ungasisita sehlise umoya futsi sibe nekuthula kwengcondvo. Kodvwa akusiko loko kuphela losisita ngako. Ungasenta sibe nebuhlobo lobucinile naNkulunkulu. (Hla. 65:2; Jak. 4:8; 1 Joh. 5:14) Ngesikhatsi Jesu alamhlabeni, bekathantaza tikhatsi letinyenti ngenca yekutsi bekati kutsi Jehova bekamlalela nekutsi umthantazo bewutamsita ahlale anebuhlobo lobucinile naBabe wakhe. (Luk. 5:16) Sibonga kakhulu kutsi ngenca yemhlatjelo waJesu, singaba bangani baJehova futsi sikhone kukhuluma naye ngemthantazo!

 INHLAWULO ITASISITA NJANI ESIKHATSINI LESITAKO?

9. Itabasita njani inhlawulo esikhatsini lesitako bantfu baJehova labetsembekile?

⁹ Inhlawulo itabasita njani bantfu baJehova labetsembekile esikhatsini lesitako? Batawutfola kuphila lokuphakadze. Bantfu labanyenti lamuhla bacabanga kutsi loko ngeke kwenteke ngobe sekuphele tinkhulungwane teminyaka bantfu bafa. Kodvwa injongo yaNkulunkulu yasekucaleni beyikutsi bantfu baphile kuze kube phakadze. Kube Adamu akazange ona, kute lebekangacabanga kutsi indzaba yekuphila phakadze iyinganekwane. Nanobe nyalo kungaba lukhuni kucabanga ngekuphila lokuphakadze, singakholelwa kutsi loko kutawenteka ngobe siyati kutsi Jehova wakhipha lilanani leliphakeme kakhulu, lokukuphila kweNdvodzana yakhe.​—Rom. 8:32.

10. Yini labagcotjiwe naletinye timvu lababuke phambili kuko?

¹⁰ Ngisho nobe kuphila lokuphakadze kuyintfo lesitayitfola esikhatsini lesitako, Jehova ufuna sikulangatelele kwanyalo. Labagcotjiwe bakubuke ngalabovu kuphila ezulwini njengobe batawube babusa umhlaba naKhristu. (Semb. 20:6) Letinye timvu tikubuke ngalabovu kuphila epharadisi sekute buhlungu nelusizi. (Semb. 21:3, 4) Ulilunga laletinye timvu yini lelinelitsemba lekuphila emhlabeni phakadze? Leso akusiso nje sincephetelo ngenca yekutsi labanye batawuphila ezulwini! Kodvwa nguloko Jehova lebekakudalele bantfu. Kuphila emhlabeni kutasijabulisa kakhulu.

11-12. Ngutiphi letinye tibusiso lesitibuke ngalabovu ePharadisi? (Buka nesitfombe.)

¹¹ Cabanga ngekutsi kutawuba njani kuphila kwakho ePharadisi. Angeke ukhatsateke ngekugula nobe ngekufa. (Isa. 25:8; 33:24) Jehova utatenetisa ngalokuphelele tonkhe tifiso takho letikahle. Yini lofuna kuyifundza? Ufuna kufundza ngetilwane yini, kudlala umculo nobe kudvweba? Siyaciniseka kutsi kutawuba nesidzingo sebantfu labadvweba emaplani etindlu futsi batakhe kanye nebalimi. Kutawudzingeka nebantfu labatawulima, bakhe emathulusi  futsi banakekele umhlaba. (Isa. 35:1; 65:21) Nasewuphila phakadze, utawuba nesikhatsi lesinyenti sekwenta tonkhe letintfo, kanye nalokunye lokunyenti kakhulu.

¹² Sitawujabula kakhulu nangekwemukela labavusiwe! (Imis. 24:15) Cabanga nangekutsi utawujabula kanganani ngekufundza lokunyenti ngaJehova ngekutsi ubuke tintfo letinyenti latidalile. (Hla. 104:24; Isa. 11:9) Ngetulu kwako konkhe, cabanga nje kutsi kutawuba mnandzi kanganani kukhonta Jehova ungasaceli kutsi akucolele! Utawukhetsa ‘kutijabulisa kwesikhashana esonweni’ yini kunekutsi utfole letibusiso? (Heb. 11:25) Cha! Letibusiso tincono khashane kwendlula nobe ngukuphi kutidzela lokufanele ukwente nyalo. Khumbula, kuphila phakadze emhlabeni angeke kuhlale kulitsemba lesikhatsi lesitako. Kutawugcine kwenteke mbamba! Konkhe loku bekungeke kwenteke kube Jehova bekangasitsandzi waze wasipha iNdvodzana yakhe.

KHOMBISA KUTSI UYABONGA NGELUTSANDVO LWAJEHOVA

13. Singakhombisa njani kutsi siyabonga ngelutsandvo lwaJehova? (2 KubaseKhorinte 6:1)

¹³ Singakhombisa njani kutsi siyabonga kuJehova ngekusipha inhlawulo? Ngekutsi sente umsebenti wakhe ute kucala ekuphileni kwetfu. (Mat. 6:33) Ngetulu kwako konkhe, Jesu wafa “kuze labo labaphilako bangasatiphileli bona, kodvwa baphilele loyo lowabafela waphindze wavuswa.” (2 Khor. 5:15) Sifuna kuhlala sikunaka loko lokwente Jehova wasikhombisa umusa wakhe lomkhulu.​—Fundza 2 KubaseKhorinte 6:1.

14. Singakhombisa njani kutsi siyasetsemba sicondziso saJehova?

¹⁴ Singaphindze sikhombise kutsi siyabonga ngelutsandvo lwaJehova ngekutsi sisetsembe sicondziso sakhe futsi sisilandzele. Kanjani? Nakufanele sente tincumo, kungaba sincumo sekutsi sifuna kufundza kanganani nobe kutsi ngumuphi umsebenti lesitawenta, sitawucabanga ngaloko Jehova lebekangatsandza sikwente. (1 Khor. 10:31; 2 Khor. 5:7) Nangabe senta tincumo letisekelwe ekukholweni kwetfu kuJehova, kukholwa kwetfu kuye nebuhlobo lesinabo naye butawukhula. Litsemba letfu litawucina kakhulu.​—Rom. 5:3-5; Jak. 2:21, 22.

15. Singakhombisa njani ngesikhatsi seSikhumbuto kutsi siyabonga ngelutsandvo lwaJehova?

¹⁵ Kunalenye indlela lesingakhombisa ngayo kutsi siyabonga ngelutsandvo lwaJehova. Kutsi sisebentise lesikhatsi seSikhumbuto kuze sikhombise Jehova kutsi sibonga kanganani ngenhlawulo. Ngetulu kwekuhlela kutsi sibe khona eSikhumbutweni, singamema nalabanye kutsi babe khona. (1 Thim. 2:4) Chazela labo lobamemako kutsi kutawube kwentekani eSikhumbutweni. Kungakusita nekubakhombisa i-video letsi Kungani Jesu  Afa? naletsi Kukhumbula Kufa KwaJesu, latfolakala ku jw.org. Labadzala belibandla kufanele baciniseke kutsi bamema nalabo lasebaphelelwe ngumdlandla wekukhonta Jehova. Cabanga nje kutsi kuba nenjabulo lenganani ezulwini nasemhlabeni nangabe letinye tetimvu taJehova lebetilahlekile tiphindze tibuyela emhlambini wakhe! (Luk. 15:4-7) ESikhumbutweni, kufanele sitimisele kungagcini nje ngekuvuselana sodvwana, kodvwa sivusele nalabo labacalako kuta nobe lesekunesikhatsi bagcina kuba khona. Sifuna kubenta bative bemukelekile!​—Rom. 12:13.

16. Kubaluleke ngani kutsi sente lokunyenti emsebentini waJehova ngemalanga eSikhumbuto?

¹⁶ Ungakhona yini kwenta lokunyenti emsebentini waJehova ngemaviki langaphambi kweSikhumbuto nalangemuva kwaso? Kwenta njalo kuyindlela lekahle yekukhombisa kutsi siyabonga ngato tonkhe tintfo Nkulunkulu naKhristu labasentele tona. Nasichubeka senta umsebenti waJehova, sitasibona kakhulu sandla sakhe njengobe asisekela futsi loko kutawenta simetsembe kakhulu. (1 Khor. 3:9) Ngetulu kwaloko, timisele kuhambisana neluhlelo lwekufundvwa kweliBhayibheli kwemalanga eSikhumbuto njengobe lutfolakala kubhukwana lotsi Kuhlolisisa ImiBhalo Malanga Onkhe nobe eshadini lelisencwajaneni yekubhalela emihlanganweni. Ungaphindze usebentise lamavesi ngesikhatsi sakho sekutidadishela liBhayibheli.

17. Yini lejabulisa Jehova? (Buka nelibhokisi lelitsi “ Tindlela Longakhombisa Ngato Kutsi Uyabonga Ngelutsandvo LwaJehova.”)

¹⁷ Kuliciniso kutsi timo takho tingahle tingakuvumeli kutsi ukwente konkhe loku lesifundze ngako kulesihloko. Kodvwa khumbula kutsi Jehova akakucatsanisi loko lokwentako nalokwentiwa ngulabanye; ubona lokusenhlitiyweni yakho. Uyajabula nakakubona ubonga ngalokusuka enhlitiyweni ngalesipho lesiligugu lesiyinhlawulo.​—1 Sam. 16:7; Mak. 12:41-44.

18. Yini leyenta simbonge Jehova Nkulunkulu naJesu Khristu?

¹⁸ Yinhlawulo leyenta kutsi sicolelwe tono tetfu, sibe nebuhlobo naJehova futsi sibe nelitsemba lekuphila phakadze. Shengatsi singahlale sikhombisa kutsi siyabonga ngelutsandvo lwaJehova, lolwente kutsi asiphe letibusiso. (1 Joh. 4:19) Shengatsi singaphindze sikhombise kutsi siyabonga kuJesu lowasitsandza kakhulu waze wanikela ngekuphila kwakhe ngenca yetfu!​—Joh. 15:13.