1. Nguyiphi intfo lematima sonkhe lokufanele siyente?

 ONKHE malanga kudzingeka sente tincumo. Letinye kumelula kutenta, njengekutsi sitawudlani ekuseni nobe kutsi sitawuya nini kuyolala. Kantsi letinye kumatima kutenta. Tingatsintsa imphilo yetfu, injabulo yetfu, bantfu lesibatsandzako nobe kukhonta kwetfu Nkulunkulu. Sifuna kutsi tincumo tetfu tisite tsine nemindeni yetfu. Ngetulu kwako konkhe, siyetsemba kutsi titamjabulisa Jehova.​—Rom. 12:1, 2.

2. Ngutiphi tintfo letingakusita kutsi wente tincumo letihlakaniphile?

² Manyenti ematfuba ekutsi wente sincumo lesikahle nangabe (1) utfola emaciniso ngendzaba, (2) ucabanga ngendlela Jehova lacabanga ngayo, futsi (3) ucabange nangalokunye longancuma kukwenta. Lesihloko sitawucoca ngaletintfo, futsi sitasisita sibone kutsi singawacecesha njani emandla etfu ekucondza.​—Taga 2:11.

TFOLA EMACINISO NGENDZABA

3. Fanekisa kutsi kubaluleke ngani kutfola emaciniso ngaphambi kwekutsi wente sincumo.

³ Kwekucala lokungakusita kuze wente sincumo lesikahle kutsi utfole emaciniso ngendzaba. Kubaluleke ngani loko? Ase sitsi umuntfu uya kudokotela ngenca yekugula lokumatima lokumphetse. Lodokotela utovele ente sincumo sekutsi utamelapha njani yini angakampopoli nobe wambuta imibuto? Cha. Nawe utawenta tincumo letikahle nangabe ucala  ngekutfola onkhe emaciniso ngendzaba. Ungakwenta njani loko?

4. Ngekuvumelana neTaga 18:13, yini longayenta kuze utfole emaciniso ngendzaba? (Buka nesitfombe.)

⁴ Ngalokuvamile ungawatfola emaciniso ngekutsi ubute imibuto. Ase sitsi umenywa emcimbini. Utawuya yini? Nangabe ungakamjwayeli lomnikati walomcimbi nobe ungati kutsi kuhlelwe ini, kutawudzingeka ubute imibuto lenjengaletsi: “Utawube ukuphi futsi nini? Utawube umkhulu kanganani? Ngubani lotawube awucondzisa? Kutawube kunabobani? Kutawube kwentiwani? Butawube bukhona yini tjwala?” Timphendvulo talemibuto tingakusita kutsi wente sincumo lesikahle.​—Fundza Taga 18:13.

5. Yini lokufanele uyente nasewunawo onkhe emaciniso?

⁵ Ngemuva kwekutsi sewuwatfolile emaciniso, cabangisisa ngaso sonkhe lesimo. Sibonelo nje, utawenta njani nawutfola kutsi kulomcimbi kutawube kunalabatsite labangatihloniphi timiso teliBhayibheli nobe nangabe bantfu batawube batinatsela ngendlela labafuna ngayo? Uyabona yini kutsi lomcimbi ungagcine sewuphuma esandleni? (1 Phet. 4:3) Ngakulokunye, kutsiwani nangabe sikhatsi salomcimbi sishayisana nesikhatsi sekuya emihlanganweni yelibandla nobe sekuyoshumayela? Nasewunesitfombe lesiphelele, utawukhona kwenta sincumo lesikahle. Kodvwa kunalokunye lokufanele ukwente. Wena sewuyati  kutsi unamuphi umbono ngalesimo, kepha Jehova yena utiva njani?​—Taga 2:6.

CABANGA NGALOKO JEHOVA LAKUCABANGAKO

6. Ngekusho kwaJakobe 1:5, kubaluleke ngani kutsi sithantaze kuJehova sicele asisite?

⁶ Cela Jehova akusite uyicondze indlela lacabanga ngayo. Jehova wetsembisa kusinika kuhlakanipha kuze sicondze kutsi indlela letsite itamjabulisa yini. “Bonkhe ubapha ngesandla lesivulekile [lokuhlakanipha] futsi ngeke abatfukutselele.”​—Fundza Jakobe 1:5.

7. Ungakutfola njani loko lokucatjangwa nguJehova? Fanekisa.

⁷ Nasewuthantazile wacela Jehova kutsi akucondzise, buka kutsi ukuphendvula njani. Ase sifanekise: Ase sitsi ulahlekile endzaweni longayati, futsi ucela umuntfu lohlala kuleyondzawo kutsi akusite. Kepha bewungavele uhambe yini usengakamniki nelitfuba lekukuphendvula? Cha. Utawulalelisisa njengobe akulayela. Ngendlela lefanako, ngemuva kwekucela Jehova kutsi akuphe kuhlakanipha, yetama kubuka imphendvulo yakhe ngekutsi ufune kutsi nguyiphi imitsetfo leseBhayibhelini kanye netimiso talo letisebenta kulesimo sakho. Sibonelo nje, nawuncuma kutsi utawuya yini kulomcimbi lesikhulume ngawo, ungacabanga ngaloko lokushiwo liBhayibheli ngemicimbi lengalawuleki, kutihlanganisa nebantfu lababi nekubeka tintfo  letiphatselene neMbuso tite kucala kunaloko lokufunwa ngitsi.​—Mat. 6:33; Rom. 13:13; 1 Khor. 15:33.

8. Yini longayenta nangabe udzinga lusito kuze utfole loko lokufunako? (Buka nesitfombe.)

⁸ Nobe kunjalo, ngalesinye sikhatsi kungahle kudzingeke ucele lusito kuze utfole loko lokudzingako. Ungalutfola lusito kumzalwane lovutsiwe nobe kudzadze lovutsiwe. Kodvwa kutakusita nekucwaninga. Kunyenti longakutfola emathulusini etfu ekucwaninga, njengalelitsi Lithulusi Lekucwaninga LaBoFakazi BaJehova nalelitsi ImiBhalo Lecondzisa Kuphila KwemaKhristu. Khumbula umgomo: kwenta sincumo lesitawujabulisa Jehova.

9. Yini lesingayenta kuze siciniseke kutsi sincumo lesisentako sitamjabulisa Jehova? (Kubase-Efesu 5:17)

⁹ Yini lesingayenta kuze siciniseke kutsi sincumo setfu sitamjabulisa Jehova? Kwekucala, kufanele simati kahle. LiBhayibheli litsi: “Kwati Nkulunkulu Longcwele kwenta umuntfu abe nekucondza.” (Taga 9:10) Kucondza sibili kutfolakala ngekwati buntfu baJehova, injongo yakhe, lakutsandzako nalakwenyanyako. Tibute: ‘Njengobe ngati loku lengikwatiko ngaJehova, ngusiphi sincumo lengingasenta lesitamjabulisa?’​—Fundza Kubase-Efesu 5:17.

10. Yini leyenta timiso teliBhayibheli tibaluleke kakhulu kunemasiko emndeni nobe endzawo?

¹⁰ Kuze sijabulise Jehova, ngaletinye tikhatsi kufanele sidvumate labo labasondzelene natsi. Sibonelo nje, labanye batali labayifisela lokuhle indvodzakati yabo leseyikhulile bangahle bayicindzetele kutsi ishade nendvodza leme kahle ngasetimalini nobe lengakhona kulobola kakhulu, ngisho nobe ite buhlobo lobucinile naJehova. Kuliciniso kutsi bafuna indvodzakati yabo ingesweli, kodvwa ngubani lotayisita kutsi ibe nebuhlobo lobucinile naJehova? Jehova utiva njani ngalendzaba? Imphendvulo siyitfola kuMatewu 6:33. Kulelivesi, emaKhristu akhutsatwa kutsi ‘afune kucala uMbuso waNkulunkulu.’ Nanobe sibahlonipha batali betfu kanye nebantfu basemmangweni lesihlala kuwo, intfo lebaluleke kakhulu kitsi kujabulisa Jehova.

CABANGA NANGALOKUNYE LONGAKWENTA

11. Yini lengakusita kutsi ucabange nangalokunye longancuma kukwenta, njengobe kuvetwe embhalweni waKubaseFiliphi 1:9, 10?

¹¹ Nasewucabangile ngetimiso teliBhayibheli letingakusita nawenta sincumo, kufanele ucabange nangekutsi yini lenye longancuma kuyenta. (Fundza KubaseFiliphi 1:9, 10.) Kucondza kutakusita ubone kutsi sincumo ngasinye longasenta singaba namiphi imiphumela. Ngaletinye tikhatsi kuba melula kwenta sincumo. Kodvwa ngaletinye tikhatsi kuba matima. Kucondza kutakusita kutsi wente tincumo letihlakaniphile ngisho nasetimeni letimatima.

12-13. Kucondza kungakusita njani kutsi wente sincumo lesikahle mayelana nemsebenti?

¹² Cabanga nganasi simo. Ufuna umsebenti kuze unakekele umndeni wakho. Kunemisebenti lemibili lekuvulekele. Ucabanga ngawo onkhe emaciniso, unake kutsi utawube wenta msebenti muni, usebenta ngamaphi emalanga, kutakutsatsa sikhatsi lesinganani kuya emsebentini kanye nalokunye. Yomibili lemisebenti ayishayisani naloko lokushiwo yimiBhalo. Mhlawumbe utsandza lolomunye ngenca yemsebenti lotawube uwenta nobe ngenca yekutsi utawuhola kakhulu. Kodvwa kunalokunye lokufanele ucabange ngako ngaphambi kwekutsi wente sincumo.

¹³ Sibonelo nje, yomibili lemisebenti itawushayisana yini nesikhatsi semihlangano yelibandla? Itawutsatsa sikhatsi lokufanele  ngabe usita ngaso umndeni wakho yini kuze utive uvikelekile, ujabulile futsi usondzelene naJehova? Kutibuta lemibuto kutakusita kutsi utente tite kucala ekuphileni kwakho ‘tintfo letibaluleke kakhulu,’ lokukukhonta Jehova kanye netidzingo temndeni wakho kunekunaka kakhulu kwakha imali. Nawenta njalo, ungenta sincumo lesitawubusiswa nguJehova.

14. Kucondza nelutsandvo kutasisita njani kutsi sigweme kukhuba labanye?

¹⁴ Kucondza kutawuphindze kusisite sicabange ngekutsi sincumo lesitawusenta sitabatsintsa njani labanye bantfu kuze singakhubi muntfu. (Fil. 1:10) Loku kubalulekile nasenta tincumo nakutiwa endzabeni yekugcoka nekutilungisa. Sibonelo nje, kungenteka sitsandze indlela letsite yekugcoka nobe yekutilungisa. Kodvwa kutsiwani nangabe labanye  ebandleni nobe labangasibo boFakazi batawukhubeka? Kucondza kutasisita kutsi sihloniphe indlela labativa ngayo. Lutsandvo lutawusenta kutsi sifune kwenta tintfo letingeke tibaphatse kabi ‘labanye bantfu’ futsi lutawusenta sitfobeke. (1 Khor. 10:23, 24, 32; 1 Thim. 2:9, 10) Sitawubese senta sincumo lesikhombisa kutsi siyabatsandza labanye futsi siyabahlonipha.

15. Yini lokufanele ucabangisise ngayo ngaphambi kwekutsi wente loku lokuncumile nawenta sincumo lesibalulekile?

¹⁵ Nawenta sincumo lesibalulekile, cabanga ngekutsi yini ledzingekako kuze siphumelele. Jesu wasifundzisa kutsi ‘sibale tindleko.’ (Luk. 14:28) Ngako cabanga ngesikhatsi lesidzingekako, imali, nemandla kuze wente loku lokuncumile. Kuletinye timo kungasita kucoca nemalunga emndeni kuze nibone kutsi yini lilunga lemndeni ngalinye lelingayenta kuze lisekele lesincumo. Kubaluleke ngani loko? Kungahle kukhombise kutsi kudzingeka wente lushintjo lolutsite kulesincumo nobe wente lesinye sincumo. Nangabe ucoca nemalunga emndeni wakho futsi uyilalelisisa imibono yawo, manyenti ematfuba ekutsi babambisane nawe kuloku lokuncumile.​—Taga 15:22.

YENTA SINCUMO LESITAWUPHUMELELA

16. Ngutiphi tintfo letingakusita kuze wente sincumo lesitawuphumelela? (Buka nelibhokisi lelitsi “ Indlela Yekwenta Tincumo Letikahle.”)

¹⁶ Nangabe ukwentile loku lesesicoce ngako, sewukulungele kwenta sincumo lesikahle. Uwatfolile emaciniso futsi wabuka netimiso letitakusita kutsi wente sincumo lesitawujabulisa Jehova. Nyalo sewungamcela Jehova kutsi akusite ente sincumo sakho siphumelele.

17. Yini lebalulekile kuze wente tincumo letihlakaniphile?

¹⁷ Ngisho nobe uke watenta tincumo letikahle esikhatsini lesendlulile, khumbula kutsi lokubalulekile kuze wente tincumo letikahle kwetsembela ekuhlakanipheni kwaJehova hhayi ekuhlakanipheni kwakho nobe kuloko lokuke kwenteka kuwe esikhatsini lesendlulile. Nguye kuphela longakunika lwati lolungulonalona nekucondza, lokutici letibalulekile tekuhlakanipha. (Taga 2:1-5) Jehova angakusita kuze wente tincumo letitamjabulisa.​—Hla. 23:2, 3.