1. Yini Jehova layifunako lamuhla?

 LAMUHLA, Nkulunkulu ufuna kutsi tindzaba letimnandzi teMbuso tishunyayelwe emhlabeni wonkhe. (Mak. 13:10; 1 Thim. 2:3, 4) Lona ngumsebenti waJehova, futsi ukhetse iNdvodzana yakhe layitsandzako kutsi iwucondzise. Singaciniseka kutsi lomsebenti utawufezwa ngendlela Jehova lafuna ufezwe ngayo ngaphambi kwekutsi kuphela kufike, ngobe ucondziswa nguJesu.​—Mat. 24:14.

2. Sitawucoca ngani kulesihloko?

² Kulesihloko, sitawucoca ngendlela Jesu lasebentisa ngayo ‘sisebenti lesetsembekile nalesihlakaniphile’ kuze sinike balandzeli bakhe sicondziso lesivela eVini laNkulunkulu futsi sibahlele kuze bente umsebenti lomkhulu wekushumayela emhlabeni wonkhe. (Mat. 24:45) Sitawuphindze sicoce ngekutsi yini ngamunye wetfu langayenta kuze sisekele Jesu nalesisebenti lesetsembekile.

3. Nguliphi ligunya Jesu lanikwa lona?

³ Jesu ucondzisa umsebenti wekushumayela. Yini lesenta siciniseke ngaloku? Ngaphambi nje kwekutsi Jesu enyukele ezulwini, wahlangana ndzawonye nalabanye balandzeli bakhe labetsembekile entsabeni yaseGalile. Watsi kubo: “Nginikwe lonkhe ligunya ezulwini nasemhlabeni.” Naka naku labese uyakusho, watsi: “Ngako-ke hambani nente bantfu bato tonkhe tive babe bafundzi bami.” (Mat. 28:18, 19) Emkhatsini walokunye, Jesu unikwe ligunya lekucondzisa umsebenti wekushumayela.

4. Yini lesenta siciniseke kutsi Jesu solo uyawucondzisa umsebenti wekushumayela?

 ⁴ Jesu watsi umsebenti wekushumayela newekwenta bafundzi bewutawentiwa kuto “tonkhe tive,” washo nekutsi bekatawuba nebalandzeli bakhe “onkhe emalanga kuze kube sekupheleni kwalelive.” (Mat. 28:20) Loko kukhombisa ngalokucacile kutsi umsebenti wekushumayela bewutawuchubeka ucondziswa nguJesu kuze kube ngulamuhla.

5. Yini lesiyentako kuze sifake sandla ekugcwalisekeni kwemavi lakuTihlabelelo 110:3?

⁵ Jesu akazange akhatsateke ngekutsi betitawuba tincane tisebenti ekupheleni kwalelive. Bekati kutsi atawugcwaliseka emavi emhlabeleli lasiphrofetho latsi: “Bantfu bakho batatinikela ngekutitsandzela mhlazana uhola libutfo lakho liya emphini.” (Hla. 110:3) Nangabe uwenta lomsebenti wekushumayela, usuke usekela Jesu nesisebenti lesetsembekile futsi ufaka sandla ekugcwalisekeni kwalesiphrofetho. Lomsebenti uyachubeka, kodvwa kunetinkinga.

6. Nguyiphi inkinga lesibhekana nayo lamuhla nasishumayela?

⁶ Kuphikiswa kungulenye inkinga lesibhekana nayo nasenta umsebenti wekushumayela. Tihlubuki, baholi benkholo nabosopolitiki batjele bantfu labanyenti emanga ngemsebenti wetfu. Nangabe tihlobo tetfu, labanye bantfu lesibatiko nalesisebenta nabo bawakholwa lamanga, bangahle basicindzetele kutsi siyekele kukhonta Jehova nekutsi siyekele kushumayela. Kulamanye emave, titsa tetfu tiyasisongela, tisihlasele, tibophe bazalwane betfu nabodzadze futsi tize tibavalele ejele. Kodvwa loko akusimangalisi. Jesu waphrofetha watsi: “Nitawutondvwa tive tonkhe ngenca yelibito lami.” (Mat. 24:9) Lokutsi nje siphatfwa kabi, kubufakazi bekutsi Jehova uyasemukela. (Mat. 5:11, 12) Develi nguye lobangela kutsi siphatfwe kabi. Kodvwa Jesu unemandla kunaye! Ngenca yekutsi sisitwa nguJesu, bantfu bato tonkhe tive bayativa letindzaba letimnandzi. Cabanga nganabu lobunye bufakazi.

7. Ngubuphi bufakazi lobubonako bekutsi Sembulo 14:6, 7 siyagcwaliseka?

⁷ Lenye inkinga lesibhekana nayo lamuhla nasishumayela kutsi bantfu bakhuluma tilwimi letingafani. Embonweni lowanikwa umphostoli Johane, Jesu watsi emalangeni etfu tindzaba letimnandzi betitawuchubeka tishunyayelwa ngisho kunalenkinga. (Fundza Sembulo 14:6, 7.) Kanjani? Sinika bantfu labanyenti litfuba lekuwuva lomlayeto weMbuso. Lamuhla, bantfu emhlabeni wonkhe bangatfola tintfo letisekelwe eBhayibhelini ngetilwimi letingetulu kwa-1 000 ku-website yetfu letsi jw.org! Sigungu Lesibusako savuma kutsi incwadzi letsi Jabulela Kuphila Kuze Kube Phakadze! ihunyushwe ngetilwimi letingetulu kwa-700, lokuyincwadzi leyinhloko lesetjentiswako kuze kwentiwe bafundzi. Kule-website kutfolakala nema-video kuze kusitakale labangeva etindlebeni kanye netincwadzi nge-braille kuze kusitakale labangaboni emehlweni. Sibona kugcwaliseka kwetiphrofetho teliBhayibheli. Bantfu labavela “kuto tonkhe tilwimi netive” bafundza kukhuluma “lulwimi loluhlantekile” lweliciniso leliseBhayibhelini. (Zak. 8:23; Zef. 3:9) Konkhe loku kwenteka ngobe Jesu Khristu ungumholi lokahle.

8. Kuze kube ngunyalo, ube yini umphumela wemsebenti wetfu wekushumayela?

⁸ Lamuhla, bantfu labangetulu kwa-8 000 000 labavela emaveni langu-240 bayincenye yenhlangano yaJehova, futsi njalo ngemnyaka kubhajatiswa tinkhulungwane tebantfu! Lokubaluleke kakhulu kunaletinombolo kutsi  labafundzi labasha sebanebuntfu bebuKhristu, futsi bagcoke “buntfu lobusha.” (Khol. 3:8-10) Labanyenti bayekele kutiphatsa kabi, kuba nebudlova, kubandlulula nekushisekela buve. Kugcwaliseka nesiphrofetho lesiku-Isaya 2:4 lesikhuluma ngekutsi ngeke ‘basaceceshelwa kulwa imphi.’ Ngenca yekutsi setama kamatima kugcoka buntfu lobusha, loko kwenta bantfu labanyenti bafune kutihlanganisa nenhlangano yaNkulunkulu, kuyakhombisa nekutsi silandzela Khristu Jesu umholi wetfu. (Joh. 13:35; 1 Phet. 2:12) Konkhe loku akukatentakaleli. Sisitwa nguJesu.

9. Ngekusho kwaMatewu 24:45-47, yini Jesu latsi itawenteka emalangeni ekugcina?

⁹ Fundza Matewu 24:45-47. Jesu watsi emalangeni ekugcina utawubeka ‘sisebenti lesetsembekile nalesihlakaniphile’ kuze sisinike sicondziso lesivela eVini laNkulunkulu. Ngako silindzele kutsi lesisebenti sitikhandle senta lomsebenti lamuhla, futsi nguloko kanye lesikwentako. Umholi wetfu usebentise lelicembu lelincane lemadvodza lagcotjiwe kuze linike bantfu baNkulunkulu “kudla ngesikhatsi lesifanele” liphindze likunike nalabo labafuna kufundza liciniso. Lamadvodza awatenti emakhosi ekukholweni kwabo. (2 Khor. 1:24) Kunaloko, ayati kutsi Jesu Khristu ‘ungumholi nembusi’ webantfu baNkulunkulu.​—Isa. 55:4.

10. Nguyiphi kuletincwadzi letikulesitfombe leyakusita kutsi ufune kuhamba kulendlela leya ekuphileni lokuphakadze?

¹⁰ Kusukela nga-1919, lesisebenti lesetsembekile sikhicite tincwadzi letehlukahlukene letisite labo labafuna kufundza liciniso eVini laNkulunkulu. Nga-1921, lesisebenti sakhicita incwadzi letsi The Harp of God leyasita labo bebafuna kufundza liciniso kutsi bafundze timfundziso letisisekelo teliBhayibheli.  Njengobe tikhatsi tishintja, kukhicitwe letinye tincwadzi. Nguyiphi kuletincwadzi leyakusita kutsi wati Babe wetfu wasezulwini futsi umtsandze? Ngulena letsi “Let God Be True,” yini nobe nguletsi The Truth That Leads to Eternal Life, Ungaphila Phakade EPharadesi Emhlabeni, Ulwazi Oluholela Ekuphileni Okumi Phakade, Lifundzisani Mbambambamba LiBhayibheli?, Lingasifundzisani LiBhayibheli?, nobe nguletsi Jabulela Kuphila Kuze Kube Phakadze!, lokuyincwadzi yetfu lensha? Tonkhe letincwadzi betihlelwe ngendlela yekutsi tihlangabetane nesidzingo sangaleso sikhatsi.

11. Kubaluleke ngani kutsi sonkhe sifundze lokunyenti ngaJehova nangeliBhayibheli?

¹¹ Labafuna kufundza liciniso kufanele babe nelwati lolujulile ngaJehova nangeliBhayibheli. Kodvwa akusibo bona kuphela, natsi siyaludzinga. Umphostoli Pawula wabhala watsi: “Kudla lokucinile kwebantfu labavutsiwe.” Waphindze watsi kusebentisa loko lesikufundza eBhayibhelini kutasisita kutsi ‘sehlukanise lokulungile nalokungakalungi.’ (Heb. 5:14) Kungaba matima kakhulu kulalela ticondziso taJehova nyalo ngobe bantfu labanyenti batiphatsa kabi kakhulu. Kodvwa Jesu uyacikelela kutsi sifundza tintfo lesitidzingako kuze sihlale sinekukholwa lokucinile. Letintfo sitifundza eVini laNkulunkulu leliphefumulelwe liBhayibheli. Sisebenti lesetsembekile sisilungiselela lemfundvo siphindze sisinike yona sicondziswa nguJesu.

12. NjengaJesu, yini lesiyentile kuze sinike libito laNkulunkulu ludvumo?

¹² NjengaJesu, sinike libito laNkulunkulu ludvumo lolulufanele. (Joh. 17:6, 26) Nasi sibonelo, nga-1931 sacala kusebentisa ligama lelitsi BoFakazi BaJehova lelisekelwe emiBhalweni. Ngekwenta njalo, sakhombisa kutsi libito laNkulunkulu libaluleke kakhulu kitsi futsi sifuna kubitwa ngalo. (Isa. 43:10-12) Kusukela nga-October ngaloyo mnyaka, libito  laNkulunkulu lacala kuvela ekhasini lekucala lalomagazini. Ngetulu kwaloko, Lihumusho Lemhlaba Lomusha LemiBhalo Lengcwele labuyisela libito laNkulunkulu lapho belivela khona. Loku kwehlukile kulokwentiwe ngemasontfo ngobe alisusile libito laNkulunkulu emaBhayibhelini awo lamanyenti!

13. Yini lekwenta uciniseke kutsi Jesu usebentisa ‘sisebenti lesetsembekile nalesihlakaniphile’ lamuhla? (Johane 6:68)

¹³ Asebentisa ‘sisebenti lesetsembekile nalesihlakaniphile,’ Jesu usungule inhlangano lamhlabeni lekhutsata kukhonta lokuhlantekile. Utiva njani ngalenhlangano? Kungenteka utiva ngendlela umphostoli Phetro lativa ngayo nakatjela Jesu atsi: “Singahamba siyephi? Ngobe nguwe lonemavi laholela ekuphileni lokuphakadze.” (Joh. 6:68) Ngabe sikuphi lamuhla kube asizange sitihlanganise nenhlangano yaJehova? Asebentisa lenhlangano, Khristu uyacikelela kutsi sinako lesikudzingako kuze sihlale setsembekile kuNkulunkulu. Uphindze asiceceshe kuze siwente kahle umsebenti wetfu wekushumayela. Ngetulu kwaloko, uyasisita kutsi sigcoke ‘buntfu lobusha’ kuze sitawujabulisa Jehova.​—Ef. 4:24.

14. Kukusite njani kuba senhlanganweni yaJehova ngesikhatsi se-COVID-19?

¹⁴ Jesu usinika ticondziso nasibhekene netikhatsi letimatima. Kubaluleka kwaleticondziso sikubonile ngesikhatsi kubhedvuke umkhuhlane we-COVID-19. Bantfu labanyenti emhlabeni bebadidekile kutsi bente njani, kodvwa Jesu wenta konkhe langakwenta kuze sitfole sicondziso lesicacile khona sitawuvikeleka. Sakhutsatwa kutsi sifake tifonyo nasisemkhatsini webantfu futsi singasondzelani nabo. Labadzala belibandla bakhutsatwa  kutsi bahlale bachumana nebamemeteli ebandleni futsi balandzelele kutsi yini labayidzingako kuze bahlale baphephile, baphilile futsi banebuhlobo lobuhle naJehova. (Isa. 32:1, 2) Saphindze satfola ticondziso futsi sakhutsatwa kusetjentiswa Kwatiswa Kwakamuva Lokuvela ESigungweni Lesibusako.

15. Ngusiphi sicondziso lesanikwa sona mayelana nekuba nemihlangano nangendlela yekushumayela ngesikhatsi se-COVID-19, futsi kube namiphi imiphumela?

¹⁵ Ngesikhatsi salomkhuhlane, saphindze satfola ticondziso leticacile mayelana nekuba nemihlangano yelibandla kanye nendlela yekushumayela. Ngekushesha nje sacala kusebentisa i-Internet kuze sibe nemihlangano yelibandla, yesigodzi neyesifundza. Ngetulu kwaloko, sacala kushumayela ngekubhala tincwadzi nangekushaya lucingo. Jehova wayibusisa imetamo yetfu. Emagatja lamanyenti abike linani lelisetulu lebamemeteli. Kwenteke tintfo letikhutsatako kulabanye kulesikhatsi.​—Buka libhokisi lelitsi “ Jehova Uyawubusisa Umsebenti Wetfu Wekushumayela.”

16. Yini lesiciniseka ngayo?

¹⁶ Kungenteka labanye bebabona ngatsi inhlangano isinika ticondziso letinyenti kakhulu ngesikhatsi salomkhuhlane. Kodvwa ngaso sonkhe sikhatsi bekuvele kube sebaleni kutsi leticondziso betisuke tihlakaniphile. (Mat. 11:19) Nasizindla ngendlela Jesu lahola ngayo bantfu bakhe ngendlela lenelutsandvo, siyaciniseka kutsi ngisho kungentekani esikhatsini lesitako, Jehova neNdvodzana yakhe layitsandzako batawuhlale banatsi.​—Fundza KumaHebheru 13:5, 6.

17. Utiva njani ngekutsi Jesu ungumholi wakho?

¹⁷ Sijabula kakhulu ngekutsi Jesu ungumholi wetfu! Sisenhlanganweni lengehlukani ekhatsi ngenca yemasiko, buve kanye nelulwimi. Sitfola imfundvo lenyenti levela kuNkulunkulu futsi sitfola konkhe kuceceshwa lesikudzingako kuze sente umsebenti wekushumayela. Ngamunye wetfu ufundziswa kugcoka buntfu lobusha futsi sifundza kutsandzana. Siyatigcabha ngekutsi Jesu ungumholi wetfu!