1. Ngumaphi emaciniso lowawafundza nawucala kufundza liBhayibheli?

 USAKHUMBULA yini ngesikhatsi ucala kudadisha liBhayibheli? Kungenteka wamangala nawufundza kutsi Nkulunkulu uneligama. Kungenteka wajabula nawutfola kutsi Nkulunkulu akabashisi bantfu esihogweni. Mhlawumbe futsi wajabula nawufundza ngelitsemba lekutsi utawuphindze ubabone labashona lobatsandzako uhlale nabo emhlabeni lolipharadisi.

2. Ngetulu kwekufundza emaciniso laseBhayibhelini, yini lokunye lowakwenta? (Kubase-Efesu 5:1, 2)

² Njengobe uchubeka udadisha liVi laNkulunkulu, wamtsandza kakhulu Jehova. Lolutsandvo lwakwenta kutsi ukusebentise loko bewukufundza. Wenta tincumo letincono kakhulu letisekelwe etimisweni teliBhayibheli. Wafundza kucabanga nekwenta tintfo letikahle ngenca yekutsi bewufuna kujabulisa Nkulunkulu. Njengobe nemntfwana alingisa umtali lonelutsandvo, nawe walingisa Babe wakho wasezulwini.​—Fundza Kubase-Efesu 5:1, 2.

3. Ngumiphi imibuto lesingatibuta yona?

³ Singahle sitibute nayi imibuto: ‘Nyalo sengimtsandza kakhulu yini Jehova kunangalesikhatsi ngicala kuba ngumKhristu? Kusukela ngabhajatiswa, indlela lengicabanga ngayo naloko lengikwentako kuyafana yini nekwaJehova, ikakhulukati nakutiwa ekukhombiseni lutsandvo kubazalwane bami nabodzadze?’ Nangabe “sewute lutsandvo lobewunalo ekucaleni,” ungadvumateki. Kwenteka intfo lefanako kumaKhristu ekucala. Jesu akazange awalahle futsi natsi akasilahli. (Semb. 2:4, 7) Uyati kutsi singaluvusetela lutsandvo lebesinalo ekucaleni nasicala kufundza liciniso.

4. Sitawucoca ngani kulesihloko?

 ⁴ Kulesihloko, sitawucoca ngekutsi singachubeka njani simtsandza kakhulu Jehova nalabanye. Sitawuphindze sicoce ngaletinye tintfo letinhle letitakwenteka nangabe simtsandza kakhulu Jehova nebazalwane betfu.

5-6. Ngutiphi tinkinga umphostoli Pawula labhekana nato nakenta umsebenti wekushumayela, kodvwa yini leyamsita kutsi achubeke akhonta Jehova?

⁵ Umphostoli Pawula bekakujabulela kukhonta Jehova, kodvwa ngaletinye tikhatsi bekahle abhekana netinkinga. Bekavame kuhamba libanga lelidze, futsi ngaleto tikhatsi loko bekungasiko melula. Nakasendleleni, Pawula bekahle ‘aba setingotini temifula,’ “nasetingotini tetigelekece.” Ngaletinye tikhatsi titsa takhe betihle timshaya. (2 Khor. 11:23-27) Bazalwane baPawula bebahle bangabongi ngekutikhandla kwakhe kuze abasite.​—2 Khor. 10:10; Fil. 4:15.

⁶ Yini leyasita Pawula kutsi achubeke akhonta Jehova? Pawula wafundza lokunyenti ngebuntfu baJehova emiBhalweni nakuloko lokwenteka ekuphileni kwakhe. Pawula bekaciniseka kutsi Jehova Nkulunkulu uyamtsandza. (Rom. 8:38, 39; Ef. 2:4, 5) Naye wamtsandza kakhulu Jehova. Pawula wakhombisa kutsi uyamtsandza Jehova ngekutsi ‘asite labangcwele futsi achubeke abasita.’​—Heb. 6:10.

7. Nguyiphi lenye indlela lolungakhula ngayo lutsandvo lwetfu ngaJehova?

⁷ Indlela lesimtsandza ngayo Nkulunkulu ingachubeka ikhula ngekutsi silifundze ngekutimisela liVi lakhe. Njengobe ufundza liBhayibheli, yetama kubona kutsi livesi ngalinye livetani ngaJehova. Tibute: ‘Lendzaba lengiyifundzako ikhombisa njani kutsi Jehova uyangitsandza? Inginika tiphi tizatfu tekutsandza Jehova?’

8. Umthantazo ungasisita njani kutsi ikhule indlela lesimtsandza ngayo Nkulunkulu?

⁸ Lenye indlela lolungakhula ngayo lutsandvo lwetfu ngaJehova kutsi sihlale sithantaza kuye simtjele loko lokusetinhlitiyweni tetfu. (Hla. 25:4, 5) Jehova utayiphendvula imithantazo yetfu. (1 Joh. 3:21, 22) Lomunye dzadze wase-Asia lokutsiwa nguKhanh utsi: “Ekucaleni lutsandvo lwami ngaJehova belusekelwe elwatini, kodvwa lwakhula nangibona indlela laphendvula ngayo imithantazo yami. Loko kwangenta ngafuna kwenta tintfo letimjabulisako.” b

9. Thimothi wakhombisa njani kutsi beyikhula indlela bekabatsandza ngayo bazalwane bakhe nabodzadze?

⁹ Ngemuva kweminyaka Pawula abe ngumKhristu, wahlangana nalelinye lijaha lokutsiwa nguThimothi. Thimothi bekamtsandza Jehova futsi abatsandza nebantfu. Pawula watjela baseFiliphi watsi: “Ngite muntfu lonenhlitiyo [lenjengeyaThimothi], lotawunakekela tindzaba tenu ngebucotfo.” (Fil. 2:20) Kulelivesi, Pawula bekangakhulumi ngelikhono laThimothi lekuhlela tintfo nobe lekuba sikhulumi kodvwa wajatjuliswa yindlela Thimothi bakabatsandza ngayo bazalwane bakhe nabodzadze. Siyaciniseka kutsi emabandla bekavakashelwa nguThimothi bakahlale akubuke ngalabovu kuta kwakhe.​—1 Khor. 4:17.

10. Anna nendvodza yakhe balukhombisa njani lutsandvo labanalo ngebazalwane babo nabodzadze?

¹⁰ Natsi singabuka tindlela lesingasita ngato bazalwane betfu nabodzadze. (Heb. 13:16) Cabanga ngalokwenteka ku-Anna lesikhulume ngaye esihlokweni lesendlulile. Ngemuva kwesiphepho lesikhulu, yena nemyeni wakhe bavakashela lomunye umndeni waboFakazi futsi  batfola kutsi lesiphepho besilimete luphahla lwendlu yabo. Ngenca yaloko, lomndeni bewute timphahla letihlobile. Anna utsi: “Satsatsa timphahla tabo, satiwasha futsi satibuyisela ti-ayiniwe futsi tigociwe. Loko bekuyintfo lencane kitsi, kodvwa kwenta kutsi sibe nebungani lobucinile nalomndeni kuze kube ngulamuhla.” Lutsandvo Anna nemyeni wakhe labanalo ngebazalwane babo nabodzadze lwenta kutsi babasite.​—1 Joh. 3:17, 18.

11. (a) Labanye bativa njani nasikhombisa kutsi siyabatsandza? (b) Ngekusho kweTaga 19:17, Jehova utiva njani nasikhombisa kutsi siyabatsandza labanye?

¹¹ Nangabe sinemusa futsi sikhombisa kutsi siyabatsandza labanye, batawubona kutsi siyetama kulingisa Jehova. Loku kungabajabulisa ngendlela lesingakase siyicabange. Khanh lesicoce ngaye uyabakhumbula labo labamsita. Utsi: “Ngibabonga kakhulu bonkhe bodzadze lebebahamba nami emsebentini wekushumayela. Bebangilandza, bahambe nami siyokudla futsi baciniseka kutsi ngifika ekhaya ngiphephile. Nyalo sengiyabona kutsi loko bekudzinga kutidzela. Bebakwenta ngalokusuka enhlitiyweni.” Kuliciniso kutsi akusibo bonkhe labatasibonga ngaloko lesibentela kona. Naka naku lokushiwo nguKhanh ngalabo labamsita: “Ngifisa ngatsi ngingabentela lokutsite ngako konkhe labangentela kona, kodvwa angibati labanye kutsi bahlala kuphi. Nobe kunjalo, Jehova uyati futsi ngithantazela kutsi angibusisele bona.” Khanh ucinisile. Jehova unaka ngisho tento letincane lesitentako kuze sikhombise kutsi siyabatsandza labanye. Loko ukutsatsa njengemnikelo loligugu nanjengesikweleti latasibhadala.​—Fundza Taga 19:17.

12. Bazalwane bangakhombisa njani kutsi bayalitsandza libandla? (Buka netitfombe.)

¹² Nangabe ungumzalwane, ungakhombisa njani kutsi uyabatsandza labanye futsi wente lokutsite kuze ubasite? Lomunye umzalwane  losemusha lokutsiwa nguJordan wabuta lomunye lomdzala welibandla kutsi yini langayenta kuze asite ebandleni. Lolomdzala welibandla wamncoma ngentfutfuko lasayentile futsi wamniketa seluleko, wamtjela nekutsi yini lenye langayenta. Sibonelo nje, wamtjela kutsi etame kusheshe efike eHholweni leMbuso futsi avusele bazalwane nabodzadze, aphendvule emihlanganweni yelibandla, aye njalo emsebentini wekushumayela nelicembu lakulo lensimu futsi abuke naletinye tindlela langabasita ngato labanye. Ngesikhatsi Jordan asebentisa leseluleko, akagcinanga ngekufundza emakhono lamasha kodvwa yaphindze yakhula nendlela labatsandza ngayo bazalwane bakhe nabodzadze. Jordan wafundza kutsi umzalwane nakaba yinceku lesebentako leso kusuke kungasiso sikhatsi sekucala kusita labanye kodvwa kusuke kusikhatsi sekutsi achubeke asite labanye.​—1 Thim. 3:8-10, 13.

13. Lutsandvo lwamsita njani umzalwane Christian kutsi aphindze abe ngulomdzala welibandla?

¹³ Kutsiwani nangabe wake waba yinceku lesebentako nobe lomdzala welibandla? Jehova uyawukhumbula umsebenti lowawenta esikhatsini lesendlulile nelutsandvo lolwakwenta kutsi uwente lomsebenti. (1 Khor. 15:58) Uyalunaka nelutsandvo lochubeka ulukhombisa. Lomunye umzalwane lokutsiwa nguChristian wadvumateka ngesikhatsi ayekeliswa kuba ngulomdzala welibandla. Kodvwa utsi: “Ngancuma kutsi ngitawenta konkhe lengingakwenta kuze ngikhonte Jehova ngisho ngingulomdzala nobe ngingesuye.” Ngekuhamba kwesikhatsi waphindze waba ngulomdzala welibandla. Christian utsi: “Ngacale ngesaba kuphindze ngibe ngulomdzala. Kodvwa ngatitjela kutsi nangabe Jehova afuna ngiphindze ngibe ngulomdzala, ngitakwenta loko ngobe ngiyamtsandza futsi  ngiyabatsandza bazalwane bami nabodzadze.”

14. Yini loyifundzako kuloko lokwashiwo ngulomunye dzadze waseGeorgia?

¹⁴ Tikhonti taJehova tiphindze tikhombise kutsi tiyabatsandza bomakhelwane bato. (Mat. 22:37-39) Sibonelo nje, lomunye dzadze lokutsiwa ngu-Elena waseGeorgia utsi: “Intfo lebeyingenta ngishumayele kutsi ngiyamtsandza Jehova. Kodvwa njengobe lutsandvo lwami ngaBabe wami wasezulwini lukhula, yakhula nendlela lebengibatsandza ngayo bantfu. Ngetama kucabanga kutsi ngutiphi tinkinga lebebanato nekutsi yini lebengingacoca ngayo lebeyingatsintsa tinhlitiyo tabo. Nangichubeka ngicabanga ngaloko, sifiso sami sekubasita sakhula.”​—Rom. 10:13-15.

15-16. Njengobe kuvetiwe kuletitfombe, ngutiphi tibusiso lesititfolako nasikhombisa kutsi siyabatsandza labanye?

¹⁵ Nasikhombisa kutsi siyabatsandza bazalwane betfu nabodzadze, akusibo bodvwa labasitakalako. Ngemuva kwekucala kwe-COVID-19, lomunye umzalwane lokutsiwa nguPaolo nemkakhe bafundzisa bodzadze labanyenti lasebakhulile kusebentisa tintfo tabo tebuchwephesha kuze bashumayele. Lomunye dzadze wacale wangakhoni kuyisebentisa, kodvwa wagcine akhonile. Wakhona kumema tihlobo takhe kutsi tibe khona eSikhumbutweni. Letingu-60 kuto taba khona tisebentisa tebuchwephesha! Lodzadze kanye netihlobo takhe basitakala kulemetamo yemzalwane  Paolo nemkakhe. Ngekuhamba kwesikhatsi, lodzadze wabhalela Paolo watsi: “Siyabonga ngekufundzisa tsine lesesikhulile. Angeke ngize ngikhohlwe kutsi Jehova usikhatsalela kangakanani nekutsi nitikhandla kangakanani kuze nisisite.”

¹⁶ Tibonelo letinjengaleti tafundzisa Paolo sifundvo lesibalulekile. Loko kwamkhumbuta kutsi lutsandvo lubaluleke kakhulu kunelwati nobe likhono lelingekwemvelo. Utsi: “Ngake ngaba ngumbonisi lojikeletako. Kodvwa lamuhla ngiyabona kutsi kusenekwenteka bazalwane nabodzadze sebatikhohlwa tinkhulumo lengake ngatibeka kodvwa kungenteka basayikhumbula indlela lengabasita ngayo.”

17. Ngubani lomunye lotawusitakala nasikhombisa lutsandvo?

¹⁷ Nasikhombisa kutsi siyabatsandza labanye, natsi sisitakala ngetindlela lebesingakatigadzi. Jonathan lohlala eNew Zealand uyavumelana naloku. Ngalelinye lilanga kunguMgcibelo ntsambama futsi lishisa, wabona lelinye lihlahlandlela lishumayela eceleni kwemgwaco. Jonathan wancuma kushumayela nalelihlahlandlela ngeMigcibelo ntsambama. Ngaleso sikhatsi bekangati kutsi lesento sakhe semusa besitamsita kangakanani. Utsi: “Ngaleso sikhatsi bengingakutsandzi kushumayela. Kodvwa ngesikhatsi ngiva indlela lelihlahlandlela belifundzisa ngayo futsi ngibona kutsi liyaphumelela kulomsebenti wekushumayela, loko kwangenta ngawutsandza. Ngatfola umngani sibili lowangisita kutsi ngiwujabulele umsebenti wekushumayela ngiphindze ngisondzelane naJehova.”

18. Yini Jehova lafuna siyente?

¹⁸ Jehova ufuna kutsi ikhule kitsi sonkhe indlela lesimtsandza ngayo nendlela lesibatsandza ngayo labanye. Njengobe sesifundzile, indlela lesimtsandza ngayo Jehova ingakhula nasifundza liVi lakhe, sicabangisise ngaloko lesikufundza kulo futsi sihlale sithantaza. Ingakhula indlela lesibatsandza ngayo bazalwane betfu nabodzadze ngekutsi sibasite. Njengobe lutsandvo lwetfu lukhula, sitawusondzelana nakakhulu naJehova nebazalwane betfu nabodzadze. Ngetulu kwaloko, bungani betfu nabo butawuhlala kuze kube phakadze!