1-2. UmKhristu angafana njani nesitezi lesidze? (1 KubaseKhorinte 15:58)

 NGA-1978, kwakhiwa sitezi lesidze kakhulu eTokyo, eJapan. Bantfu bebatibuta kutsi angeke yini sidzilike njengobe kuvama kuba nekutamatama kwemhlaba kulelidolobha. Yini bonjiniyela labayenta kuze singadziliki nakutamatama umhlaba? Basakha ngendlela yekutsi sicine kodvwa ngesikhatsi lesifanako sivumelane nekutamatama kwemhlaba. EmaKhristu ayafana nalesitezi lesidze. Ngayiphi indlela?

² UmKhristu kufanele abe nembono lokahle emkhatsini wekuma acine nekuvumelana netimo. Kufanele eme acine futsi anganyakatiswa nakutiwa endzabeni yekulalela imitsetfo yaJehova netimiso takhe. (Fundza 1 KubaseKhorinte 15:58.) ‘Ukulungele kulalela’ nekuma acine ngisho acindzetelwa. Ngesikhatsi lesifanako, kufanele “acabangele” nobe avumelane nesimo nangabe kudzingekile. (Jak. 3:17) UmKhristu lonembono lokahle utakugwema kucinisa sandla kakhulu nobe kusitsambisa kakhulu. Kulesihloko, sitawucoca ngekutsi yini lesingayenta kuze sime sicinile. Sitawucoca nangetindlela letisihlanu Sathane latisebentisako kuze ente kube matima kutsi sime sicinile nekutsi yini lesingayenta kuze simelane nato.

3. Ngumiphi imitsetfo levela kuMnikimtsetfo Lophakeme lebhalwe embhalweni weMisebenti 15:28, 29?

³ Njengobe Jehova anguMnikimtsetfo Lophakeme, bekasolo anika bantfu bakhe imitsetfo lecacile. (Isa. 33:22) Sibonelo nje, sigungu lesibusako sangesikhatsi semaKhristu ekucala sasho tintfo letintsatfu emaKhristu lokufanele eme acine kuto:  (1) kungatikhonti tithico kodvwa akhonte Jehova kuphela, (2) kulalela umtsetfo waJehova wekutsi ingati ingcwele, kanye (3) nekulalela timiso letiphakeme tekutiphatsa letiseBhayibhelini. (Fundza Imisebenti 15:28, 29.) EmaKhristu lamuhla angema njani acinile kuletintfo letintsatfu?

4. Yini lesingayenta kuze sikhonte Jehova kuphela? (Sembulo 4:11)

⁴ Asitikhonti tithico, sikhonta Jehova kuphela. Jehova wayala ema-Israyeli kutsi akhonte yena kuphela. (Dut. 5:6-10) Ngesikhatsi Jesu alingwa nguDeveli, wamtjela ngalokucacile kutsi kufanele sikhonte Jehova kuphela. (Mat. 4:8-10) Ngako, asitikhonti tithico. Ngetulu kwaloko asibakhotsameli bantfu, kungaba baholi benkholo, bepolitiki, nobe bantfu labadvumile kutemidlalo nakutekutijabulisa, sibente bonkulunkulwana betfu. Sima sicine eluhlangotsini lwaJehova futsi sikhonte kuphela loyo ‘lowadala tonkhe tintfo.’​—Fundza Sembulo 4:11.

5. Yini leyenta silalele umtsetfo waJehova lomayelana nebungcwele bekuphila nengati?

⁵ Silalela umtsetfo waJehova lomayelana nebungcwele bekuphila nengati. Leni? Ngobe Jehova utsi ingati imelela kuphila, lokusipho lesiligugu lesivela kuye. (Lev. 17:14) Ngesikhatsi Jehova avumela bantfu kutsi badle inyama, wabatjela kutsi bangayidli ingati. (Gen. 9:4) Wawuphindza lomtsetfo ngesikhatsi anika ema-Israyeli uMtsetfo waMosi. (Lev. 17:10) Ngetulu kwaloko, wacondzisa sigungu lesibusako sangesikhatsi semaKhristu ekucala kutsi sitjele onkhe emaKhristu kutsi ‘angayidli ingati.’ (Imis. 15:28, 29) Siyawulalela lomyalo nasincuma kutsi nguyiphi indlela yekwelashwa lesitayemukela. b

6. Yini lesiyentako kuze siphile ngetimiso taJehova letiphakeme tekutiphatsa?

⁶ Silalela timiso letiphakeme taJehova tekutiphatsa. (Heb. 13:4) Pawula wasebentisa sitfombemcondvo kuze asecwayise kutsi ‘sibulale’ emalunga emitimba yetfu, lokusho kwenta konkhe lokusemandleni etfu kuze sisuse tifiso letimbi. Siyakugwema kubuka nobe kwenta intfo lengasenta kutsi sigcine sitiphetse kabi. (Khol. 3:5; Jobe 31:1) Nasilingwa, siyekela ngekushesha kucabanga ngentfo lengalimata buhlobo betfu naNkulunkulu nobe siyiyekele ngekushesha.

7. Yini lokufanele sitimisele kuyenta, futsi leni?

⁷ Jehova ulindzele kutsi ‘silalele ngalokusuka enhlitiyweni.’ (Rom. 6:17) Sicondziso sakhe sihlale sisita tsine, futsi kute lesingakwenta kuze sishintje imitsetfo yakhe. (Isa. 48:17, 18; 1 Khor. 6:9, 10) Siyatimisela kujabulisa Jehova futsi sivete kutsi sinesimo sengcondvo lesifana nesemhlabeleli lowatsi: “Ngitimisele kulalela imiyalo yakho, ngitawuhlale ngiyilalela ngize ngiyokufa.” (Hla. 119:112) Nobe kunjalo, Sathane wetama kwenta kube matima kutsi sime sicinile. Usebentisa tiphi tindlela?

8. Sathane ukusebentisa njani kuphatfwa kabi kuze ente kube matima kutsi sime sicinile?

⁸ Kuphatfwa kabi. Develi usebentisa budlova nekucindzetelwa kuze ente kube matima kutsi sime sicinile. Umgomo wakhe ‘kusishwabadzela,’ lokusho kucedza buhlobo betfu naJehova. (1 Phet. 5:8) EmaKhristu ekucala bekasongelwa, ashaywa futsi abulawa ngenca yekutsi bekatimisele kuma acinile. (Imis. 5:27, 28, 40; 7:54-60) Nalamuhla Sathane uyachubeka nekusebentisa kuphatfwa kabi. Loku kuyabonakala endleleni labaphatfwa kabi ngayo bazalwane betfu nabodzadze  eRussia nakulamanye emave, kanye nebantfu labahlasela bazalwane betfu nabodzadze.

9. Shano sibonelo lesikhombisa kubaluleka kwekuhlale sigadze kucindzetelwa lokubhacile.

⁹ Kucindzetela lokubhacile. Ngetulu nje kwekusebentisa kuhlasela lokucondzile, Sathane uphindze asebentise ‘bucili.’ (Ef. 6:11) Cabanga ngalokwenteka kumzalwane Bob, lowalaliswa esibhedlela kuze ahlindvwe. Watjela bodokotela kutsi bekangeke ayemukele ingati ngisho kungentekani. Lodokotela lebekatamhlindza wasihlonipha sincumo sakhe. Nobe kunjalo, ngebusuku lobungaphambi kwekutsi ahlindvwe, lomunye dokotela waya kuBob ngemuva kwekutsi umndeni wakhe sewuhambile. Wamtjela kutsi kusenekwenteka bangayisebentisi ingati nabamhlindza, kodvwa beyitawuba khona dvutane nakutawenteka idzingeke. Kungenteka lodokotela bekacabanga kutsi Bob utawushintja ingcondvo njengobe umndeni wakhe bewungekho. Kodvwa Bob wema acinile, watjela lodokotela kutsi bekangeke ayemukele ingati ngisho kungentekani.

10. Iyingoti ngani imibono yebantfu? (1 KubaseKhorinte 3:19, 20)

¹⁰ Imibono yebantfu. Nangabe sibuka tintfo ngendlela bantfu labatibuka ngayo, singahle singasamlaleli Jehova netimiso takhe. (Fundza 1 KubaseKhorinte 3:19, 20.) “Kuhlakanipha kwalelive” kuvame kujabulisa tifiso tenyama. Lamanye emaKhristu asePhegamu naseThiyathira alalela bantfu labatiphatsa kabi nalabakhonta tithico. Jesu wawanika seluleko lesicinile lamabandla ngenca yekutsi bekakwemukela kutiphatsa kabi. (Semb. 2:14, 20) Lamuhla, sicindzetelwa kutsi semukele imibono yebantfu lengakalungi. Emalunga emndeni kanye nebantfu lesibatiko bangahle batsi sitincisha injabulo futsi basikhutsate kutsi singayilaleli imitsetfo yaJehova. Sibonelo nje, bangahle batsi akusikubi kwenta loko lesikufisako nekutsi timiso teliBhayibheli tekutiphatsa setiphelelwe sikhatsi.

11. Njengobe singanyakatiswa, yini lokufanele siyigweme?

¹¹ Ngalesinye sikhatsi, singahle sicabange kutsi sicondziso lesisinikwa nguJehova asivakali kahle. Singahle silingeke kutsi ‘secele ngale kwetintfo letibhaliwe.’ (1 Khor. 4:6) Nguloko kanye lokwentiwa baholi benkholo ngesikhatsi saJesu. Ngetulu kweMtsetfo lebebanikwe wona, bengeta yabo imitsetfo futsi benta kwaba matima ngalabanye bantfu kutsi bawulalele. (Mat. 23:4) Jehova usinika ticondziso leticacile asebentisa liVi lakhe nenhlangano yakhe. Akukafaneli sengete kuleticondziso lasiniketa tona. (Taga 3:5-7) Ngako, angeke secele ngale kwalokubhalwe eBhayibhelini nobe sishayele bazalwane nabodzadze imitsetfo kuloko umuntfu langatincumela kuko.

12. Sathane ukusebentisa njani ‘kuyenga lokulite’?

¹² Kukhohlisa. Sathane usebentisa ‘kuyenga lokulite’ kanye ‘netintfo letitsatfwa njengaletibalulekile eveni’ kuze adukise bantfu futsi abehlukanise. (Khol. 2:8) Ngesikhatsi semaKhristu ekucala, loku bekufaka ekhatsi emafilosofi lasekelwe emicabangweni yebantfu, timfundziso temaJuda letingakasekelwa emibhalweni, nemfundziso yekutsi emaKhristu kufanele agcine uMtsetfo waMosi. Loku bekukhohlisa ngobe kwenta bantfu bangasamnaki Jehova, longuMtfombo wekuhlakanipha. Lamuhla, Sathane usebentisa betindzaba netinhlelo tekuchumana kuze asakate emahemuhemu netindzaba letingemanga letikhutsatwa baholi bepolitiki. Sikubonile  loku ngesikhatsi se-COVID-19. c BoFakazi BaJehova labalalela sicondziso lesivela enhlanganweni abazange bakhatsateke ngalokungenasidzingo njengalabo labalalela tindzaba letidukisako.​—Mat. 24:45.

13. Kubaluleke ngani kutsi sihlale sigadze tiphatamiso?

¹³ Tiphatamiso. Kufanele sihlale sinake ‘tintfo letibaluleke kakhulu.’ (Fil. 1:9, 10) Tiphatamiso tingatsatsa sikhatsi setfu lesinyenti nemandla etfu bese asisakusebentiseli kwenta tintfo letibalulekile. Tintfo letivamile ekuphileni njengekudla, kunatsa, kutijabulisa nemsebenti wekutiphilisa, kungaba tiphatamiso nasikwenta kute kucala. (Luk. 21:34, 35) Ngetulu kwaloko, onkhe malanga siva tindzaba letinyenti letimayelana nekungevani kwebantfu netindzaba tepolitiki. Kufanele singativumeli letimphikiswano kutsi tisiphazamise. Ngale kwaloko, singacala kutsatsa luhlangotsi etingcondvweni tetfu nasetinhlitiyweni tetfu. Sathane usebentisa letintfo lesicedza kutibala kuze ente kube matima kutsi sente lokulungile. Ase sicoce ngekutsi singamelana njani nemetamo yakhe futsi sime sicinile.

14. Yini lenye lengasisita kutsi sihlale sicinile eluhlangotsini lwaJehova?

¹⁴ Cabanga ngekutsi yini leyakwenta wanikela kuphila kwakho kuJehova futsi wabhajatiswa. Loko wakwenta ngobe bewufuna kuba seluhlangotsini lwaJehova. Cabanga nangekutsi yini leyakusita waciniseka kutsi ulitfolile liciniso. Wangenisa lwati lolungulonalona ngaJehova futsi waya ngekumhlonipha kakhulu waphindze wamtsandza kakhulu njengobe anguBabe wakho wasezulwini. Waba nekukholwa futsi waphendvuka. Inhlitiyo yakho yakwenta kutsi uyekele kwenta tintfo letimbi futsi uphile ngekuvumelana nentsandvo yaNkulunkulu. Wativa ukhululekile nawubona kutsi Nkulunkulu ukucolele. (Hla. 32:1, 2) Wacala kuya emihlanganweni yebuKhristu  futsi wacocela labanye tintfo lebewutifundzile. Njengobe nyalo ungumKhristu lotinikele kuJehova futsi wabhajatiswa, uhamba endleleni leya ekuphileni futsi utimisele kuchubeka uhamba kuyo.​—Mat. 7:13, 14.

15. Kusisita ngani kudadisha nekucabangisisa?

¹⁵ Dadisha liVi laNkulunkulu futsi ucabangisise ngalokufundza kulo. Njengobe sihlahla singema sicine nangabe sinetimphandze letishonako, natsi singema sicine nangabe kukholwa kwetfu kusekelwe ngalokucinile eVini laNkulunkulu. Njengobe sihlahla sikhula, timphandze taso tishona kakhulu futsi tenabe. Nasidadisha futsi sicabangisisa ngaloko lesikufundzako, sicinisa kukholwa kwetfu futsi siciniseke kakhulu kutsi tindlela taJehova tincono kakhulu. (Khol. 2:6, 7) Cabanga ngekutsi imiyalo yaJehova, ticondziso takhe, nesivikelo sakhe, kutisite njani tikhonti takhe esikhatsini lesendlulile. Sibonelo nje, Hezekeli, wanakisisa ngesikhatsi ingilosi ikala ngekucophelela lithempeli lalibona embonweni. Lombono wamcinisa Hezekeli futsi natsi uyasifundzisa kutsi singatilalela njani timiso taJehova letimayelana nekukhonta lokuhlantekile. d (Hez. 40:1-4; 43:10-12) Siyasitakala nasitinika sikhatsi sekudadisha tintfo letijulile letiseVini laNkulunkulu futsi sicabangisise ngato.

16. Yamvikela njani Bob inhlitiyo lengangabati? (Tihlabelelo 112:7)

¹⁶ Bani nenhlitiyo lengangabati. INkhosi Davide yahlabela yatsi angeke iyekele kutsandza Jehova, nayitsi: “Awu Nkulunkulu, inhlitiyo yami ayingabati.” (Hla. 57:7) Natsi singaba nenhlitiyo lengangabati, setsembele ngalokuphelele kuJehova. (Fundza Tihlabelelo 112:7.) Naka kutsi loko kwamsita njani Bob lesike sakhuluma ngaye. Ngesikhatsi atjelwa kutsi itawuba khona ingati edvute kuze isetjentiswe nakunesidzingo, wavele washo ngekushesha kutsi nangabe kungenteka bamfake ingati bekatawuhamba ngekushesha kulesibhedlela. Ngekuhamba kwesikhatsi, Bob watsi: “Bengiciniseka ngalebekufanele  ngikwente futsi bengingakhatsateki ngaloko lebekungahle kwenteke.”

17. Yini lesingayifundza kulokwenteka kuBob? (Buka nesitfombe.)

¹⁷ Bob wema acinile ngobe bekente sincumo sekunganyakatiswa ngaphambi kwekutsi aye esibhedlela. Kwekucala, bekafuna kujabulisa Jehova. Kwesibili, bekakudadishe ngekucophelela loko lokushiwo liBhayibheli netincwadzi letisekelwe kulo mayelana nebungcwele bekuphila nengati. Kwesitsatfu, bekaciniseka kutsi Jehova utambusisa nangabe alalela sicondziso sakhe. Natsi singema sicinile ngisho singabhekana nayiphi inkinga.

18. Sibonelo saBharaki sisifundzisa njani kutsi setsembe Jehova? (Buka sitfombe lesisekhasini lekucala.)

¹⁸ Yetsemba Jehova. Cabanga ngendlela Bharaki laphumelela ngayo ngenca yekwetsemba sicondziso saJehova. Nanobe bekute lihawu nobe sikhali kulo lonkhe lelive, Jehova watjela Bharaki kutsi alwe nelibutfo lemaKhenani lebeliholwa nguSisera futsi lebelihlome laphelela. (Khu. 5:8) Umphrofethikati Debhora watjela Bharaki kutsi ehlele endzaweni lebekile kuze ahlangane naSisera netincola takhe temphi letingu-900. Nanobe letincola betitawenta kutsi kube melula ngaSisera kutsi ancobe, kepha Bharaki walalela. Njengobe emasotja ehla eNtsabeni iThabori, Jehova wanisa imvula lenkhulu. Tincola temphi taSisera tabisha eludzakeni futsi Jehova wenta kutsi Bharaki ancobe. (Khu. 4:1-7, 10, 13-16) Ngendlela lefanako, Jehova utawusenta sincobe nangabe simetsemba futsi setsemba nesicondziso lasinika sona asebentisa inhlangano yakhe.​—Dut. 31:6.

19. Yini leyenta ufune kuma ucinile?

¹⁹ Nangabe nje sisaphila kulelive, sitawuchubeka silwa kamatima kuze sime sicinile. (1 Thim. 6:11, 12; 2 Phet. 3:17) Shengatsi singatimisela kunganyakatiswa kuphatfwa kabi, kucindzetela lokubhacile, yimibono yebantfu, kukhohliswa kanye netiphatamiso. (Ef. 4:14) Kunaloko, asime sicine futsi sihlale sitsandza Jehova, silalele nemiyalo yakhe. Ngesikhatsi lesifanako kufanele sicabangele. Esihlokweni lesilandzelako sitawucoca ngekutsi Jehova naJesu basibekela njani sibonelo lesihle sekucabangela.