1-2. Bekangubani Sadoki? (1 Tikhronike 12:22, 26-28)

 KUBONE ngeliso lengcondvo naku lokwentekako. Sicumbi semadvodza langetulu kwa-340 000 sihlangene kuze sibeke Davide kutsi abe yinkhosi yaka-Israyeli. Sekuphele emalanga lamatsatfu lamadvodza asemagcumeni lanematje, dvutane neHebroni. Ayahleka, ayacoca futsi ahlabela tingoma tekudvumisa Jehova ajabulile. (1 Khr. 12:39) Emkhatsini walamadvodza bekunalelinye lijaha lokutsiwa nguSadoki, lokungenteka bantfu labanyenti bebanganaki nekutsi likhona. Nanobe kunjalo, Jehova walinaka lelijaha futsi ufuna nekutsi natsi sati kutsi belikhona lapho. (Fundza 1 Tikhronike 12:22, 26-28.) Bekangubani Sadoki?

² Sadoki bekangumphristi lebekasebentisana na-Abiyatha umPhristi Lophakeme. Bekaphindze abe ngumboni wemibono lobekacondza intsandvo yaNkulunkulu futsi anikwe nekuhlakanipha lokukhulu. (2 Sam. 15:27) Bantfu bebaya kuSadoki nabadzinga seluleko lesihlakaniphile. Bekaphindze abe nesibindzi. Kulesihloko, sitawufundza ngekutsi Sadoki wakhombisa njani kutsi unesibindzi.

3. (a) Yini leyenta bantfu baJehova badzinge sibindzi? (b) Sitawucoca ngani kulesihloko?

³ Kulamalanga ekugcina, Sathane wenta konkhe langakwenta kuze ahlasele bantfu baNkulunkulu. (1 Phet. 5:8) Sidzinga kuba nesibindzi njengobe sisalindzele Jehova kutsi abhubhise Sathane nalelive lakhe lelibi. (Hla. 31:24) Ase sicoce ngetindlela letintsatfu lesingakulingisa ngato kuba nesibindzi kwaSadoki.

SEKELA UMBUSO WANKULUNKULU

4. Yini leyenta bantfu baJehova badzinge sibindzi kuze basekele uMbuso waNkulunkulu? (Buka nesitfombe.)

⁴ Njengobe sibantfu baJehova, siwusekela ngenhlitiyo yonkhe  uMbuso waNkulunkulu. Kodvwa esikhatsini lesinyenti sidzinga kuba nesibindzi kuze sikhone kukwenta loko. (Mat. 6:33) Sibonelo nje, kulelive lelibi sidzinga sibindzi kuze siphile ngetimiso taJehova futsi sishumayele tindzaba letimnandzi teMbuso. (1 Thes. 2:2) Ngetulu kwaloko, lelive liya ngekwehlukana kakhulu ngenca yetindzaba tepolitiki, ngako sidzinga sibindzi kuze singalutsatsi luhlangotsi. (Joh. 18:36) Bantfu baJehova labanyenti babhekene netinkinga tetimali, bashaywa nobe baboshwa ngenca yekutsi abafuni kungenela tepolitiki nobe kuya emasotjeni.

5. Yini leyenta kwadzingeka kutsi Sadoki abe nesibindzi kuze asekele Davide?

⁵ Sadoki akazange aye eHebroni kuze nje ayohalalisa kutsi Davide sewuyinkhosi. Waya ahlomile eHebroni futsi alungele imphi. (1 Khr. 12:38) Bekakulungele kulandzela Davide nakungenteka kube nemphi futsi avikele ema-Israyeli etitseni tawo. Nanobe Sadoki bekangasilo lisotja lelilichawe, kodvwa bekanesibindzi.

6. Davide wambekela njani Sadoki sibonelo lesihle sekuba nesibindzi? (Tihlabelelo 138:3)

⁶ Yini leyasita Sadoki kutsi abe nesibindzi? Bekati emadvodza lamanyenti lebekanemandla futsi anesibindzi. Siyaciniseka kutsi sibonelo sawo samsita. Sibonelo nje, ngenca yekutsi Davide wakhombisa sibindzi ‘nakahola ema-Israyeli nakaya etimphini,’ loko kwenta kutsi onkhe ema-Israyeli amsekele ngenhlitiyo yawo yonkhe. (1 Khr. 11:1, 2) Davide bekahlale atsembela kuJehova kuze amsite alwe netitsa takhe. (Hla. 28:7; fundza Tihlabelelo 138:3.) Sadoki waphindze wafundza nakulamanye emadvodza lebekanesibindzi lafaka ekhatsi Jehoyada, kanye nendvodzana yakhe Bhenaya lebeyilichawe, kanye naletinye tindvuna letingu-22 lebetisekela Davide. (1 Khr. 11:22-25; 12:26-28) Onkhe lamadvodza bekatimisele  kubeka Davide kutsi abe yinkhosi futsi amvikele.

7. (a) Ngutiphi tibonelo lesingafundza kuto lamuhla tebantfu labakhombise sibindzi? (b) Yini loyifundza kuMzalwane Nsilu njengobe kuvetiwe kule-video?

⁷ Nasicabanga ngalabo labasekele bukhosi baJehova ngesibindzi, natsi siba nesibindzi. INkhosi yetfu Khristu Jesu yala ngalokucinile kuba yincenye yetepolitiki kulelive laSathane. (Mat. 4:8-11; Joh. 6:14, 15) Beyihlale yetsembele kuJehova kuze ayiphe sibindzi. Natsi lamuhla sinetibonelo letinhle temajaha lalile kuya emasotjeni nobe kwenta imisebenti lephatselene nepolitiki. Mhlawumbe ungafundza ngalokwenteke kuwo ku jw.org. a

SITA BAZALWANE BAKHO NABODZADZE

8. Kunini lapho labadzala belibandla badzinga khona kuba nesibindzi kuze basite bazalwane babo nabodzadze?

⁸ Bantfu baJehova bayakutsandza kusitana. (2 Khor. 8:4) Kodvwa ngaletinye tikhatsi loku kudzinga sibindzi. Sibonelo nje, nakunemphi, labadzala belibandla bayasibona sidzingo sekukhutsata bazalwane babo nabodzadze, babasekele, futsi bangabasita ngetintfo labatidzingako nobe babasite bacinise buhlobo babo naJehova. Labadzala belibandla bayabatsandza bazalwane babo nabodzadze kungako babeka kuphila kwabo engotini kuze baciniseke kutsi banako labakudzingako. (Joh. 15:12, 13) Nabenta njalo, balingisa sibonelo saSadoki sekuba nesibindzi.

9. Njengobe kuvetwe ku-2 Samuweli 15:27-29, yini Davide lacela Sadoki kutsi ayente? (Buka nesitfombe.)

⁹ Kuphila kwaDavide bekusengotini. Indvodzana yakhe, lokungu-Absalomu beyitimisele kumbulala kuze ibe yinkhosi. (2 Sam. 15:12, 13) Kwadzingeka kutsi abaleke ngekushesha eJerusalema! Watjela tinceku takhe watsi: “Sukumani sibaleke ngobe kute kitsi lotawukhona kuphunyuka ku-Absalomu!” (2 Sam. 15:14) Njengobe letisebenti betihamba, Davide  wabona kutsi bekudzingeka kusale umuntfu lebekatamtjela kutsi yini lebeyihlelwa ngu-Absalomu. Ngako wacela Sadoki nalabanye baphristi kutsi babuyele edolobheni kuze bamtjele ngako konkhe lokwentekako. (Fundza 2 Samuweli 15:27-29.) Bekufanele bahlale bacaphile. Loko Davide lakutjela labaphristi kutsi bakwente bekuyingoti kakhulu, futsi bebangafa ngisho nekufa. Absalomu bekayindvodza lenebudlova, leticabangela yona nalebeyikhuluma kabi ngababe wayo. Cabanga nje kutsi bekatamentani Sadoki nalalabanye baphristi kube weva kutsi bebafuna kwati konkhe lakwentako kuze bavikele Davide!

10. Sadoki kanye nemadvodza lebekanaye bamvikela njani Davide?

¹⁰ Davide wacela Hushayi lebekangumngani wakhe lowetsembekile kanye naSadoki kutsi bamsite ngalelinye lichinga. (2 Sam. 15:32-37) Bekudzingeka Hushayi ente shengatsi usekela Absalomu futsi amnikete seluleko sekutsi bekangamhlasela njani Davide, lebekutawukwenta Davide kutsi abe nesikhatsi sekulungiselela lokuhlaselwa. Ngemuva kwaloko, Hushayi watjela Sadoki na-Abiyatha ngaloko bekuhleliwe. (2 Sam. 17:8-16) Lamadvodza lamabili abese atfumela umlayeto kuDavide. (2 Sam. 17:17) Ngekusitwa nguJehova, Sadoki kanye nalaba labanye baphristi badlala indzima lebalulekile kuze bavikele Davide.​—2 Sam. 17:21, 22.

11. Singasilingisa njani sibindzi saSadoki nasisita bazalwane betfu nabodzadze?

¹¹ Nangabe sicelwa kutsi sisite bazalwane betfu nabodzadze ngetikhatsi letiyingoti, singakhombisa njani kutsi sinesibindzi njengaSadoki? (1) Lalela sicondziso. Ngetikhatsi letinjalo, kubalulekile kutsi sihlale sinebunye. Lalela sicondziso lesivela ehhovisini leligatja longephansi kwalo. (Heb. 13:17) Labadzala belibandla kufanele bahlale babuketa ticondziso letisebenta endzaweni labakuyo kanye neticondziso letivela enhlanganweni tekutsi yini lokufanele bayente nakunesehlakalo.  (1 Khor. 14:33, 40) (2) Bani nesibindzi kodvwa ucaphele. (Taga 22:3) Sebentisa ingcondvo. Ungafaki kuphila kwakho engotini ngalokungenasidzingo. (3) Yetsembela kuJehova. Khumbula kutsi Jehova unendzaba nekutsi wena nebazalwane bakho nabodzadze niphephile yini. Angakusekela kuze ukhone kusita bazalwane bakho nabodzadze ngendlela lephephile.

12-13. Yini loyifundza kuloko lokwenteka kuViktor nakuVitalii? (Buka nesitfombe.)

¹² Cabanga ngaloko lokwenteka kulabanye labadzala belibandla lababili, lokunguViktor naVitalii lebebamikisela bazalwane babo nabodzadze kudla nemanti e-Ukraine. Viktor utsi: “Safuna kudla yonkhe indzawo. Bekuvame kukhala tibhamu eceleni kwetfu. Lomunye umzalwane wanikela ngekudla lebekusesitolo sakhe. Lokudla kwasita bamemeteli labanyenti sikhatsi lesidze. Njengobe besifaka lokudla emotweni yetfu, kwachuma ibhomu dvutane natsi ngemamitha langaba ngu-20. Kulolonkhe lelo langa, bengincenga Jehova kutsi angiphe sibindzi lebengisidzinga kuze ngichubeke ngisita bamemeteli.”

¹³ Vitalii utsi: “Besisidzinga kakhulu sibindzi. Nangicala kuyomikisa kudla nemanti kubazalwane nabodzadze, kwaphela ema-awa langu-12 sisendleleni. Yonkhe indlela bengithantaza kuJehova.” Vitalii bekanesibindzi, kodvwa ngesikhatsi lesifanako acaphele. Uchubeka utsi: “Bengihlale ngicela Jehova kutsi angiphe kuhlakanipha nekutfobeka. Bengishayela kuphela emigwacweni lebeyivunyelwe tiphatsimandla. Kukholwa kwami kucinile nangibona indlela bazalwane bami nabodzadze lebebabambisana ngayo. Bebasusa tintfo letivimbe umgwaco, bakweleka kudla, timphahla naletinye tintfo letibalulekile batifake emotweni, futsi bebasinika nekudla nendzawo yekulala njengobe sisahamba.”

HLALA WETSEMBEKILE KUJEHOVA

14. Singativa njani nangabe lotsite lesimtsandzako angetsembeki kuJehova?

¹⁴ Lolunye luvivinyo lolumatima lesingabhekana nalo kulapho lilunga lemndeni nobe umngani lesimtsandzako ashiya Jehova. (Hla. 78:40; Taga 24:10) Nangabe sisondzelene kakhulu naloyo muntfu, kuba matima kakhulu kusemukela lesimo. Nangabe uke wabhekana nalesimo, sibonelo saSadoki sekwetsembeka singakucinisa.

15. Yini leyenta Sadoki wadzinga sibindzi kuze ahlale etsembekile kuJehova? (1 Emakhosi 1:5-8)

¹⁵ Sadoki wahlale etsembekile kuJehova ngesikhatsi umngani wakhe Abiyatha akhetsa kungetsembeki. Loku kwenteka ngasekupheleni kwekubusa kwaDavide. Ngesikhatsi Davide sekakhulile futsi sekatawufa, indvodzana yakhe Adoniya yetama kutenta inkhosi ngisho nobe Jehova bekatsite kutawuba nguSolomoni. (1 Khr. 22:9, 10) Abiyatha wakhetsa kusekela Adoniya. (Fundza 1 Emakhosi 1:5-8.) Ngekwenta njalo, Abiyatha bekakhombisa kutsi akaketsembeki kuDavide nakuJehova! Cabanga nje kutsi Sadoki weva buhlungu kangakanani. Besekuphele iminyaka lengetulu kwalengu-40 basebenta ndzawonye na-Abiyatha babaphristi. (2 Sam. 8:17) Banakekela ‘Libhokisi laNkulunkulu weliciniso’ kanye kanye. (2 Sam. 15:29) Bebasekele Davide njengobe ayinkhosi, futsi bebente tintfo letinyenti ndzawonye emsebentini waJehova.​—2 Sam. 19:11-14.

16. Yini lokungenteka yasita Sadoki kutsi ahlale etsembekile?

¹⁶ Sadoki wahlale etsembekile kuJehova ngisho nobe Abiyatha akhetsa kungetsembeki. Davide bekati kutsi angametsemba Sadoki. Ngesikhatsi licebo la-Adoniya livela ebaleni, Davide wakhetsa Sadoki, Nathani naBhenaya kutsi bagcobe Solomoni kutsi abe yinkhosi.  (1 Khos. 1:32-34) Kungenta kwamcinisa Sadoki futsi kwamkhutsata kuba netikhonti taJehova letetsembekile, letinjengaNathani nalabanye labasekela iNkhosi Davide. (1 Khos. 1:38, 39) Ngesikhatsi Solomoni aba yinkhosi, ‘wabeka Sadoki umphristi esikhundleni sa-Abiyatha.’​—1 Khos. 2:35.

17. Ungamlingisa njani Sadoki nangabe lotsite losondzelene naye angetsembeki kuJehova?

¹⁷ Ungamlingisa njani Sadoki? Nangabe lotsite losondzelene naye akhetsa kushiya Jehova, khombisa Jehova kutsi ukhetsa kuhlala wetsembekile kuye. (Josh. 24:15) Utakuniketa emandla kanye nesibindzi losidzingako. Thantaza kuye futsi uhlale usondzelene netikhonti takhe letetsembekile. Jehova ujabula kakhulu ngekwetsembeka kwakho futsi utakubusisa ngenca yako.​—2 Sam. 22:26.

18. Yini loyifundza kuloko lokwenteka kuMarco nakuSidse?

¹⁸ Cabanga ngaloko lokwenteka kuMarco nakuSidse. Emadvodzakati abo lamabili lasakhulile ancuma kuyekela kukhonta Jehova. Marco utsi: “Bantfwana bakho ubatsandza kakhulu kusukela batalwa. Ungenta nobe ngabe yini kuze ubavikele bangalimali. Ngako nabakhetsa kushiya Jehova, kuba buhlungu kakhulu.” Uchubeka utsi: “Kodvwa Jehova bekasolo asisekela. Bekaciniseka kutsi nangabe mine ngibutsakatsaka, umkami uba nemandla, futsi nakwenteka yena aba butsakatsaka mine ngiba nemandla.” Sidse wengeta utsi: “Besingeke sikhone kucinisela kube Jehova bekangasiniki emandla lesiwadzingako. Bengicabanga kutsi kuliphutsa lami kutsi bantfwana bami bayekele kukhonta Jehova, ngako ngamtjela indlela lengitiva ngayo. Kungakapheli sikhatsi lesidze, lomunye dzadze lebesekuphele iminyaka leminyenti singabonani weta kimi wafike wangigaca wase ungibuka emehlweni watsi: ‘Khumbula Sidse, akusilo liphutsa lakho!’ Ngekusitwa nguJehova, ngikhonile kuchubeka ngimkhonta ngijabulile.”

19. Yini lotimisele kuyenta?

¹⁹ Jehova ufuna kutsi tonkhe tinceku takhe tibe nesibindzi njengaSadoki. (2 Thim. 1:7) Nanobe kunjalo, akafuni setsembele emandleni etfu. Ufuna setsembele kuye. Ngako nawubhekene nesimo lesikwenta udzinge sibindzi, sicele kuye. Ungaciniseka kutsi utakwenta ube nesibindzi njengaSadoki!​—1 Phet. 5:10.