SIHLOKO LESIFUNDVWAKO 30
INGOMA 36 Silondvolota Tinhlitiyo Tetfu
Tifundvo Letibalulekile Lesingatifundza Emakhosini Aka-Israyeli
“Nitawuphindze nibone umehluko emkhatsini wemuntfu lolungile nemuntfu lomubi, nasemkhatsini walokhonta Nkulunkulu naloyo longamkhonti.”—MAL. 3:18.
LOKUTAWUCOCWA NGAKO
Sitawucoca ngendlela Jehova lebekawabuka ngayo emakhosi aka-Israyeli, lokutasisita sibone loko lakubukako lamuhla kubantfu labamkhontako.
1-2. Yini liBhayibheli lelisitjela yona mayelana nalamanye emakhosi aka-Israyeli?
LIBHAYIBHELI lisitjela ngemadvodza langetulu kwalangu-40 laba ngemakhosi aka-Israyeli. a Liphindze lisitjele onkhe emaciniso lamayelana naloko lakwenta. Sibonelo nje, ngisho nemakhosi lakahle atenta tintfo letimbi. Cabanga ngeNkhosi Davide lebeyikahle. Jehova watsi: “Inceku yami Davide . . . yangilandzela ngayo yonkhe inhlitiyo yayo, yenta lokuhle emehlweni ami.” (1 Khos. 14:8) Kodvwa Davide waphinga nemfati walenye indvodza, futsi wahlela kutsi lendvodza ibulawe emphini.—2 Sam. 11:4, 14, 15.
2 Ngakulokunye, linyenti lalamakhosi lebekangaketsembeki atenta tintfo letinhle. Cabanga ngaRehobhowamu. ‘Wenta lokubi’ emehlweni aJehova. (2 Khr. 12:14) Nobe kunjalo, Rehobhowamu wamlalela Jehova ngesikhatsi amtjela kutsi angalwi netive letilishumi taka-Israyeli futsi ativumele tikhetse lenye inkhosi. Waphindze wasita sive sakhe ngekutsi ente emadolobha akhona avikeleke.—1 Khos. 12:21-24; 2 Khr. 11:5-12.
3. Ngumuphi umbuto lobalulekile lophakamako, futsi sitawucoca ngani kulesihloko?
3 Kuphakama umbuto lobalulekile. Nangabe emakhosi aka-Israyeli bekenta tintfo letinhle naletimbi, Jehova bekancuma njani kutsi inkhosi letsite yetsembekile kuye nobe cha? Imphendvulo yalombuto itasisita sicondze kutsi yini Jehova layibukako kitsi. Sitawucoca ngetintfo letintsatfu Jehova lebekatibuka kulamakhosi aka-Israyeli: simo senhlitiyo yawo, kutsi aphendvukile yini, nekutsi bekamkhonta ngendlela lafuna ngayo yini.
INHLITIYO YAWO BEYITINIKELE NGALOKUPHELELE KUJEHOVA
4. Ngumuphi umehluko lebewukhona emkhatsini wemakhosi letsembekile nalawo bekangaketsembeki?
4 Emakhosi lebekajubulisa Jehova bekamkhonta ngenhlitiyo lephelele. b INkhosi Jehoshafati lebeyikahle ‘yafuna Jehova ngenhlitiyo yayo yonkhe.’ (2 Khr. 22:9) LiBhayibheli nalikhuluma ngaJosaya litsi: “Kute inkhosi lebeyinjengaye ngaphambi kwakhe, leyabuyela kuJehova ngayo yonkhe inhlitiyo yayo.” (2 Khos. 23:25) Kutsiwani ngaSolomoni, lowabese wenta tintfo letimbi ngekuhamba kwesikhatsi? ‘Inhlitiyo yakhe beyingakapheleli.’ (1 Khos. 11:4) LiBhayibheli nalikhuluma ngalenye inkhosi lengaketsembeki lokutsiwa ngu-Abijamu, litsi: “Inhlitiyo yakhe beyingakatinikeli ngalokuphelele kuJehova.”—1 Khos. 15:3.
5. Chaza kutsi kusho kutsini kukhonta Jehova ngenhlitiyo lephelele.
5 Kusho kutsini kukhonta Jehova ngenhlitiyo lephelele? Umuntfu lonenhlitiyo lephelele akakhonti Nkulunkulu ngenca yekutsi uyati kutsi kufanele amkhonte. Kunaloko, umkhonta ngenca yekutsi uyamtsandza futsi utinikele kuye. Ngetulu kwaloko, uyachubeka amtsandza futsi atinikele kuye kuphila kwakhe konkhe.
6. Yini lesingayenta kuze sihlale sinenhlitiyo lephelele? (Taga 4:23; Matewu 5:29, 30)
6 Singawalingisa njani emakhosi letsembekile futsi sihlale sinenhlitiyo lephelele? Ngekutsi sigweme nobe ngabe yini lengasenta singetsembeki kuJehova. Sibonelo nje, kutijabulisa lokungamlungeli umKhristu, bangani lababi nekuhlale sicabanga ngemali kungayehlukanisa ekhatsi inhlitiyo yetfu. Nasibona kutsi kunentfo lenciphisa lutsandvo lwetfu ngaJehova, kufanele sente lokutsite ngekushesha sikususe.—Fundza Taga 4:23; Matewu 5:29, 30.
7. Kubaluleke ngani kutsi sigweme tintfo letingalimata buhlobo betfu naJehova?
7 Kufanele singayivumeli inhlitiyo yetfu kutsi yehlukane ekhatsi. Nasingakanaki, singahle sitiyenge ngekutsi nangabe senta lokunyenti emsebentini waJehova, kute sidzingo sekutsi sigadze tintfo letingalimata buhlobo betfu naye. Ase sitsi bewungephandle emakhateni lashubisa umkhantja, futsi kunemoya. Nawufika ekhaya uyabasa. Kodvwa lomlilo ungakusita yini nawungashiya umnyango uvuliwe? Umoya lobandzako ungagcwala ngekushesha kulendlu. Liyini liphuzu? Kufanele singagcini nje ngekungenisa lwati ngaNkulunkulu lolusenta sibe nebuhlobo lobuhle naye. Kufanele siphindze sigweme netintfo letingalimata buhlobo betfu naye, kube ngatsi sivala umnyango kuze kungangeni emakhata nobe umoya lomubi walelive longayehlukanisa ekhatsi inhlitiyo yetfu.—Ef. 2:2.
APHENDVUKA ETONWENI TAWO
8-9. Yini iNkhosi Davide neNkhosi Hezekiya labayenta nabekhutwa? (Buka sitfombe lekucala.)
8 Njengobe kuvetiwe, iNkhosi Davide yenta sono lesikhulu. Kodvwa ngesikhatsi umphrofethi Nathani atjela Davide ngesono sakhe, watitfoba futsi waphendvuka. (2 Sam. 12:13) Emavi akhe labhalwe kuTihlabelelo 51 ayakhombisa kutsi waphendvuka mbamba. Akazange ente ngatsi uyatisola kuze akhohlise Nathani nobe kuze abalekele sijeziso.—Hla. 51:3, 4, 17, umbhalo longenhla.
9 NeNkhosi Hezekiya yenta sono kuJehova. LiBhayibheli litsi: “Inhlitiyo yakhe beseyigcwele kutati, watiletsela yena intfukutselo kanye nesive sakaJuda neJerusalema.” (2 Khr. 32:25) Yini leyenta Hezekiya watigcabha? Mhlawumbe wentiwa kutsi bekatibona ancono ngobe bekanjingile, nobe ngenca yekutsi bekancobe ema-Asiriya nobe ngenca yekutsi bekelashwe ngalokusimangaliso. Kungenteka kutigcabha lokwenta kutsi agabatise umcebo wakhe kubantfu baseBhabhulona, lokwenta kutsi umphrofethi Isaya amekhute. (2 Khos. 20:12-18) Kodvwa njengaDavide, Hezekiya watitfoba futsi waphendvuka. (2 Khr. 32:26) Ngenca yaloko, Jehova wativa njani ngaHezekiya? Wamtsatsa njengenkhosi leyetsembekile, ‘leyachubeka yenta lokuhle.’—2 Khos. 18:3.
INkhosi Davide neNkhosi Hezekiya batfobeka futsi baphendvuka ngemuva kwekutjelwa ngetono tabo (Buka tigaba 8-9)
10. INkhosi Amasiya yenta njani nayekhutwa?
10 Ngalokwehlukile, iNkhosi Amasiya yakaJuda yenta lokulungile, kodvwa ‘loko beyingakwenti ngenhlitiyo yonkhe.’ (2 Khr. 25:2) Kwentekani? Ngemuva kwekutsi Jehova amsitile kutsi ancobe baka-Edomi, Amasiya wakhotsamela bonkulunkulu bakhona. c Ngemuva kwaloko, ngesikhatsi umphrofethi waJehova ekhuta lenkhosi, yamthulisa.—2 Khr. 25:14-16.
11. Ngekusho kwembhalo waKubaseKhorinte 7:9, 11, yini lokufanele siyente kuze sicolelwe? (Buka netitfombe.)
11 Yini lesiyifundza kuletibonelo? Kufanele siphendvuke etonweni tetfu futsi sente konkhe lesingakwenta kuze singatiphindzi. Yini lokufanele siyente naselulekwa ngulabadzala belibandla ngisho nasendzabeni lebonakala iyincane? Akukafaneli sicabange kutsi Jehova akasasitsandzi nobe kutsi labadzala belibandla bamelene natsi. Ngisho nemakhosi aka-Israyeli lakahle bekakudzinga kwelulekwa nekwekhutwa. (Heb. 12:6) Nasekhutwa, kufanele (1) sitfobeke, (2) sente lushintjo loludzingekako, futsi (3) sichubeke sikhonta Jehova ngenhlitiyo yonkhe. Nasiphendvuka etonweni tetfu, Jehova utasicolela.—Fundza 2 KubaseKhorinte 7:9, 11.
Nasekhutwa, kufanele (1) sitfobeke, (2) sente lushintjo loludzingekako, futsi (3) sichubeke sikhonta Jehova ngenhlitiyo lephelele (Buka sigaba 11) f
AKHONTA JEHOVA NGENDLELA LAYIFUNAKO
12. Yini leyenta lamakhosi letsembekile ehluka?
12 Lamakhosi lebeketsembekile ngembono waJehova, amkhonta ngendlela lebekayifuna. Akhutsata nebantfu lebekababusa kutsi bente lokufanako. Kuliciniso kutsi awenta emaphutsa njengobe sesibonile. Kodvwa amkhonta ngemphefumulo wonkhe Jehova futsi aze enta konkhe langakwenta kuze acedze kukhonta kwemanga. d
13. Yini leyenta Jehova watsi iNkhosi Ahabi beyingaketsembeki?
13 Yini leyenta Jehova watsi lamanye emakhosi bekangaketsembeki? Akusiko kutsi tonkhe tintfo lebekatenta betitimbi. Ngisho neNkhosi Ahabi lebeyiyimbi yakhombisa kutsi itfobekile ngelizinga lelitsite futsi yatisola ngesandla beyisifakile ekubulaweni kwaNabothi. (1 Khos. 21:27-29) Yaphindze yakha emadolobha futsi yancoba timphi lebetiliwa ngema-Israyeli. (1 Khos. 20:21, 29; 22:39) Kodvwa Ahabi bekatiwa nangekutsi ukhutsata kukhonta kwemanga njengobe bekasekelwa ngumkakhe. Kuloku, akazange aphendvuke.—1 Khos. 21:25, 26.
14. (a) Yini leyenta Jehova watsi iNkhosi Rehobhowamu beyingaketsembeki? (b) Bekafana ngani emakhosi langaketsembeki?
14 Cabanga ngalenye inkhosi lebeyingaketsembeki lokutsiwa nguRehobhowamu. Njengobe kuke kwavetwa, kukhona lokuhle lakwenta ngesikhatsi asabusa. Kodvwa ngesikhatsi bukhosi bakhe sebucinile, washiya uMtsetfo waJehova futsi wacala kukhonta bonkulunkulu bemanga. (2 Khr. 12:1) Ngemuva kwaloko, besekakhonta Jehova aphindze akhonte bonkulunkulu bemanga. (1 Khos. 14:21-24) Rehobhowamu na-Ahabi bekungasibo bona kuphela labashiya kukhonta kweliciniso. Ecinisweni, emakhosi lamanyenti langaketsembeki bekakhonta bonkulunkulu bemanga, futsi akhutsata nalabanye kutsi bente lokufanako. Kusebaleni kutsi emehlweni aJehova, kumkhonta ngendlela lekahle bekubaluleke kakhulu kuze atsi inkhosi letsite ikahle nobe yimbi.
15. Yini leyenta kukhonta Jehova ngendlela lekahle kubaluleke kakhulu kuye?
15 Yini lebeyenta indzaba yekukhonta ibaluleke kakhulu kuJehova? Lesinye sizatfu kutsi emakhosi bekufanele ahole bantfu baNkulunkulu ekukhonteni kweliciniso. Ngetulu kwaloko, kukhonta kwemanga kwenta kutsi bantfu bente letinye tono letinkhulu futsi babaphatse kabi labanye. (Hos. 4:1, 2) Ngetulu kwaloko, emakhosi kanye nebantfu bebatinikele kuJehova. Ngako liBhayibheli lifananisa kukhonta kwabo bonkulunkulu bemanga nekuphinga. (Jer. 3:8, 9) Umuntfu lophingako umvisa buhlungu kakhulu lashade naye. Ngendlela lefanako, sikhonti saJehova lesitinikele simvisa buhlungu kakhulu nasikhonta labanye bonkulunkulu. e—Dut. 4:23, 24.
16. Emehlweni aJehova, yini leyehlukanisa umuntfu lolungile kulongakalungi?
16 Yini lesiyifundzako? Kufanele sitimisele kukubalekela kukhonta kwemanga. Kodvwa ngesikhatsi lesifanako, kufanele sikhonte Jehova ngendlela lafuna ngayo futsi sihlale simatasatasa emsebentini wakhe. Umphrofethi Malakhi wakwenta kwacaca kutsi yini leyehlukanisa umuntfu lolungile kulongakalungi emehlweni aJehova. Wabhala watsi: “Nitawuphindze nibone umehluko emkhatsini wemuntfu lolungile nemuntfu lomubi, nasemkhatsini walokhonta Nkulunkulu naloyo longamkhonti.” (Mal. 3:18) Ngako akukafaneli sivumele nobe yini, lokufaka ekhatsi butsakatsaka betfu nemaphutsa etfu kutsi kusicedze emandla size siyekele kukhonta Nkulunkulu. Kuyekela kukhonta Jehova kusono lesikhulu.
17. Kubaluleke ngani kunaka kutsi ngubani lesikhetsa kushada naye?
17 Nangabe ungakashadi futsi ufuna kushada, uyabona yini kutsi emavi aMalakhi lamayelana nekukhonta Nkulunkulu angakusita njani kutsi umkhetse kahle lotawushada naye? Umuntfu angaba nebuntfu lobuhle, kodvwa nangabe angamkhonti Nkulunkulu weliciniso, ulungile yini emehlweni aJehova? (2 Khor. 6:14) Nasenishadile, utakusita yini kutsi uhlale wetsembekile kuJehova? Cabanga nganaku: Kungenteka kutsi bafati beNkhosi Solomoni lebebakhonta bonkulunkulu bemanga bebanabo buntfu lobuhle. Kodvwa bebangamkhonti Jehova, futsi kancane kancane benta Solomoni kutsi agcine sekakhonta labonkulunkulu bemanga.—1 Khos. 11:1, 4.
18. Yini batali lokufanele bayifundzise bantfwana babo?
18 Batali, ningasebentisa tindzaba letiseBhayibhelini letimayelana nalamakhosi kuze nisite bantfwana benu kutsi babe nesifiso lesikhulu sekukhonta Jehova. Basiteni babone kutsi Jehova bekatsi lamakhosi akahle nobe akabi kuye ngekutsi bekakukhutsata yini kukhonta kweliciniso. Fundzisani bantfwana benu ngemavi nangesibonelo senu kutsi tintfo letiphatselene nekukhonta Nkulunkulu kufanele tite kucala ekuphileni, tintfo letifana nekudadisha liBhayibheli, kuya emihlanganweni nekwenta umsebenti wekushumayela. (Mat. 6:33) Naningenti njalo, bantfwana benu bangahle bacabange kutsi kuba nguFakazi waJehova kumane nje kusho kuba senkholweni yasekhaya. Loko kungenta kutsi bangakwenti kute kucala kukhonta kweliciniso nobe bakushiye ngalokuphelele.
19. Nguliphi litsemba lelikhona ngalabo labayekele kukhonta Jehova? (Buka nelibhokisi lelitsi “ Ungabuyela KuJehova!”)
19 Sekute yini litsemba ngaloyo losayekele kukhonta Jehova? Lisekhona ngobe angaphendvuka futsi abuyele ekukhonteni kweliciniso. Kuze akhone kukwenta loko, kungadzingeka atitfobe futsi avume kusitwa ngulabadzala belibandla. (Jak. 5:14) Angeke atisole nganobe ngukuphi kutidzela latawukwenta kuze aphindze abe ngumngani waJehova!
20. Yini Jehova latawuyisho ngatsi nasilingisa lamakhosi letsembekile?
20 Yini lesiyifundzile kulamakhosi aka-Israyeli? Singafana nalamakhosi lebeketsembekile nangabe sichubeka sikhonta Jehova ngenhlitiyo lephelele. Shengatsi singafundza emaphutseni etfu, siphendvuke futsi sente lushintjo loludzingekile. Shengatsi singakhumbula kutsi kubalulekile kukhonta Jehova, lokunguye yedvwa Nkulunkulu weliciniso. Nawunamatsela kuJehova utawutsi wena wetsembekile kuye.
INGOMA 45 Kuzindla Kwenhlitiyo Yami
a Kulesihloko, emavi latsi “emakhosi aka-Israyeli” asho onkhe emakhosi labusa bantfu baJehova, kungaba ngulabusa umbuso wakaJuda wetive letimbili, umbuso waka-Israyeli wetive letilishumi nobe tonkhe letive letingu-12.
b INCHAZELO YELIGAMA: LiBhayibheli livame kusebentisa ligama lelitsi “inhlitiyo” kuze lichaze umuntfu lesinguye ngekhatsi, lokufaka ekhatsi lesikufisako, lesikucabangako, lokusenta sente lokutsite, simo setfu sengcondvo kanye nemigomo lesifuna kuyifinyelela.
c Kubonakala ngatsi bekuyintfo levamile ngemakhosi langamkhonti Jehova kutsi akhonte bonkulunkulu betive latincobile.
d INkhosi Asa yenta tono letinkhulu. (2 Khr. 16:7, 10) Nobe kunjalo, liBhayibheli litsi Asa wenta lokulungile emehlweni aJehova. Nanobe wacale wangakwemukeli kwekhutwa, kungenteka ngekuhamba kwesikhatsi waphendvuka. Jehova wabona lokunyenti lokuhle kuye kunemaphutsa akhe. Asa wakhonta Jehova kuphela futsi watimisela kucedza kukhontwa kwetithico embusweni wakhe.—1 Khos. 15:11-13; 2 Khr. 14:2-5.
e Imitsetfo lemibili yekucala eMtsetfweni waMosi beyitsi akukafaneli kukhontwe umuntfu nobe lenye intfo ngaphandle kwaJehova.—Eks. 20:1-6.
f KUCHAZWA KWETITFOMBE: Lomunye umzalwane losemusha longulomdzala welibandla uveta kukhatsateka kwakhe ngendlela lomunye umzalwane lanatsa ngayo tjwala. Ngekutfobeka, lomzalwane uyasemukela leseluleko, wenta lushintjo loludzingekako futsi uyachubeka akhonta Jehova ngekwetsembeka.
