1. Utiva njani ngeliciniso?

 BANTFU baJehova bayalitsandza liciniso lelitfolakala eVini laNkulunkulu. Kukholwa kwetfu kusekelwe kulo. (Rom. 10:17) Sesiyaciniseka kutsi nguJehova lowasungula libandla lebuKhristu “leliyinsika nesisekelo seliciniso.” (1 Thim. 3:15) Sititfoba ngekutitsandzela ‘kulabo labasiholako’ labasichazela liciniso leliseBhayibhelini futsi basinike neticondziso letivumelana nentsandvo yaNkulunkulu.​—Heb. 13:17.

2. Ngekusho kwaJakobe 5:19, yini lengenteka ngisho sesilifundzile liciniso?

² Nobe kunjalo, ngemuva kwekwemukela liciniso futsi sivume kutsi siyakudzinga kulandzela ticondziso lesitinikwa yinhlangano yaNkulunkulu, sisengadukiswa. (Fundza Jakobe 5:19.) Sathane angajabula kakhulu nakangasibona singasaletsembi liBhayibheli nobe sicondziso lesisinikwa yinhlangano yaNkulunkulu.​—Ef. 4:14.

3. Kubaluleke ngani kutsi sibambelele ecinisweni? (Kubase-Efesu 6:13, 14)

³ Fundza Kubase-Efesu 6:13, 14. Ngekushesha, Develi utawusebentisa emanga lamabi kuze adukise tonkhe tive timelane naJehova. (Semb. 16:13, 14) Singalindzela nekutsi Sathane afake kakhulu emandla endleleni ladukisa ngayo bantfu baJehova. (Semb. 12:9) Ngako kubalulekile kutsi siticeceshe kuze sikhone kubona umehluko emkhatsini weliciniso nemanga, futsi silalele liciniso. (Rom. 6:17; 1 Phet. 1:22) Loku kubalulekile kuze sisindze ngekuhlupheka lokukhulu!

4. Sitawucoca ngani kulesihloko?

 ⁴ Kulesihloko, sitawucoca ngebuntfu lobubili lobudzingekako lobutasisita kutsi sibone liciniso lelivela eBhayibhelini nekutsi semukele sicondziso lesivela enhlanganweni yaNkulunkulu. Sitawubese sicoca ngetintfo letintsatfu letitasisita kutsi sichubeke sibambelele ecinisweni.

BUNTFU LOKUFANELE SIBE NABO KUZE SIBONE LICINISO

5. Kwesaba Jehova kusisita njani kutsi sikhone kubona liciniso?

⁵ Kwesaba Jehova. Nangabe simesaba ngendlela lekahle Jehova, simtsandza kakhulu kangangekutsi asiyuze sente intfo lengeke imjabulise. Siyatimisela kuze sifundze umehluko emkhatsini walokulungile nalokungakalungi, emkhatsini weliciniso nemanga kuze Jehova asemukele. (Taga 2:3-6; Heb. 5:14) Akukafaneli sivumele kwesaba bantfu kube ngetulu kwendlela lesitsandza ngayo Jehova, ngobe ngalokuvamile tintfo letijabulisa bantfu atimjabulisi Jehova.

6. Kwesaba bantfu kwababangela njani baholi betive letingu-10 taka-Israyeli kutsi bashintje liciniso?

⁶ Nangabe sesaba bantfu kwendlula indlela lesesaba ngayo Nkulunkulu, besingalishiya liciniso. Cabanga ngesibonelo sebaholi labangu-12 labaya kuyohlola live lebeletsenjiswe ema-Israyeli. Tinhloli letingu-10 betesaba kakhulu bantfu baseKhenani kwendlula indlela betimtsandza ngayo Jehova. Tatjela ema-Israyeli tatsi: “Angeke sikhone kukhuphuka siyekulwa nalabantfu, ngobe banemandla kunatsi.” (Num. 13:27-31) Ngekubuka kwemuntfu, emaKhenani bekanemandla kunema-Israyeli, futsi loko bekuliciniso. Kodvwa ngesikhatsi letinhloli titsi ema-Israyeli ngeke akhone kuncoba titsa tawo, loko bekushiyela Jehova ngephandle. Bekufanele tinake loko Jehova bekafuna ema-Israyeli kutsi akwente. Bekufanele ngabe tacabangisisa ngaloko  Jehova bekasandza kutentela kona. Betitawubese tiyabona kutsi emandla ebantfu baseKhenani bekangasilutfo nakacatsaniswa nemandla aJehova lamakhulu kakhulu. Ngalokwehlukile kuletinhloli letite kukholwa, boJoshuwa naKhalebi bebafuna kwemukelwa nguJehova. Batjela labantfu batsi: “Nangabe Jehova ajabula ngatsi, nakanjani utawusingenisa kulelive . . . futsi asinike lona.”​—Num. 14:6-9.

7. Singayikhulisa njani indlela lesimesaba ngayo Jehova? (Buka nesitfombe.)

⁷ Kuze sikhulise indlela lesimesaba ngayo Jehova, kufanele sinake kakhulu kumjabulisa kuto tonkhe tincumo lesitentako. (Hla. 16:8) Nawufundza tindzaba letiseBhayibhelini, tibute: ‘Kube bengikulesimo, ngusiphi sincumo lebengingasenta?’ Sibonelo nje, ticabange ulalele njengobe labaholi labangu-10 baka-Israyeli betfula umbiko lomubi. Bewutawetsemba yini lombiko futsi uncotjwe kwesaba bantfu, nobe kutsandza Jehova nesifiso sekumjabulisa bekutawuhamba embili? Situkulwane sonkhe saka-Israyeli asizange silibone liciniso kuloko bekushiwo nguJoshuwa naKhalebi. Ngenca yaloko, asizange singene eVeni Lesetsembiso.​—Num. 14:10, 22, 23.

8. Ngubuphi buntfu lokufanele setame kamatima kuba nabo, futsi ngasiphi sizatfu?

⁸ Kutfobeka. Jehova ulembulela labo labatfobekile liciniso. (Mat. 11:25) Ngekutfobeka, savuma kusitwa kuze sifundze liciniso. (Imis. 8:30, 31) Nobe kunjalo, kufanele sigadze kutsi singatigcabhi. Kutigcabha kungasenta sicabange kutsi imibono yetfu ikahle, ifanana netimiso letiseBhayibhelini kanye nesicondziso lesivela enhlanganweni yaJehova.

9. Yini lesingayenta kuze sihlale sitfobekile?

⁹ Kuze sihlale sitfobekile, kufanele sikhumbule kutsi sibancane kakhulu nasicatsaniswa nebukhulu baJehova. (Hla. 8:3, 4) Singaphindze sithantazele kutfobeka nekutsi sifundziseke. Jehova utasisita sente imicabango yakhe lasinika yona asebentisa liVi lakhe nenhlangano yakhe ite kucala kuneyetfu. Nawutifundzela liBhayibheli, buka emaphuzu lakhombisa kutsi Jehova uyakutsandza kutfobeka, futsi uyakwenyanya kutigcabha, kutibona uncono nekutiphakamisa. Ngetulu kwaloko, yenta konkhe longakwenta kuze uhlale utfobekile nawutfola sabelo lesikwenta ube neligunya nobe lesenta labanye kutsi bakwati.

LESINGAKWENTA KUZE SIBAMBELELE ECINISWENI

10. Jehova usebentise bobani kuze bacondzise bantfu bakhe?

¹⁰ Chubeka usetsemba sicondziso lositfola enhlanganweni yaJehova. Ka-Israyeli, Jehova wasebentisa Mosi kuze anikete bantfu bakhe ticondziso, futsi ngekuhamba kwesikhatsi wasebentisa Joshuwa. (Josh. 1:16, 17) Ema-Israyeli bekabusiswa nakatsatsa lamadvodza njengebameleli baJehova Nkulunkulu. Ngemuva kweminyaka leminyenti, ngesikhatsi libandla lebuKhristu licala kusungulwa, baphostoli labangu-12 bebaniketa ticondziso. (Imis. 8:14, 15) Lelicembu labase liyakhula lafaka ekhatsi lamanye emadvodza lamadzala aseJerusalema. “Kukholwa kwemabandla bekuchubeka kuciniswa, futsi bekandza malanga onkhe” ngesikhatsi alandzela ticondziso bekatitfola kulamadvodza letsembekile. (Imis. 16:4, 5) Nalamuhla, siyabusiswa nasilandzela sicondziso lesisitfola enhlanganweni yaJehova. Kodvwa Jehova angativa njani nakungenteka singabemukeli labo labakhetsile kutsi basihole? Lombuto singawuphendvula  ngekutsi sibuke loko lokwenteka ngesikhatsi ema-Israyeli aya eVeni Lesetsembiso.

11. Yini leyenteka kuma-Israyeli langazange emukele kutsi Nkulunkulu ukhetse Mosi kutsi awahole? (Buka nesitfombe.)

¹¹ Ngesikhatsi ema-Israyeli aya eVeni Lesetsembiso, lamanye emadvodza lahlonishwako amelana naMosi futsi angemukeli kutsi ukhetfwe nguJehova. Atsi: “Onkhe ema-Israyeli [hhayi nje Mosi kuphela] angcwele futsi Jehova usemkhatsini wawo.” (Num. 16:1-3) Nanobe bekuliciniso kutsi kuNkulunkulu “onkhe ema-Israyeli angcwele,” kodvwa bekakhetse Mosi kutsi ahole bantfu bakhe. (Num. 16:28) Ngesikhatsi labantfu bamelene naMosi, ecinisweni bebamelene naJehova. Bebangakakunaki lokufunwa nguJehova; bebanake lokufunwa ngibo, lokuligunya neludvumo. Nkulunkulu wababulala bonkhe labo bebahamba embili kulokuvukela kanye netinkhulungwane talabo bebavumelana nabo. (Num. 16:30-35, 41, 49) Lamuhla, singaciniseka kutsi Jehova akajabuli ngalabo labangatilaleli ticondziso letivela enhlanganweni yakhe.

12. Kubaluleke ngani kutsi sichubeke siyetsemba inhlangano yaJehova?

¹² Singachubeka siyetsemba inhlangano yaJehova. Nakwenteka kuba sebaleni kutsi kudzingeka lushintjo endleleni lebesicondza ngayo liciniso lelitsite leliseBhayibhelini nobe endleleni lohlelwe ngayo umsebenti wetfu weMbuso, labo labaholako bavele bente lushintjo loludzingekile. (Taga 4:18) Loko bakwenta ngobe bafuna kujabulisa Jehova. Baphindze bente konkhe labangakwenta kuze tincumo tabo tisekelwe eVini laNkulunkulu, njengobe bonkhe bantfu baJehova kufanele balihloniphe.

13. Siyini ‘sibonelo semavi laphilile,’ futsi yini lokufanele siyente?

¹³ “Chubeka ubambelele esibonelweni semavi laphilile.” (2 Thim. 1:13) ‘Sibonelo  semavi laphilile’ timfundziso tebuKhristu letisekelwe eBhayibhelini. (Joh. 17:17) Letimfundziso tisisekelo sako konkhe lesikukholelwako. Inhlangano yaJehova isifundzisile kutsi kufanele sibambelele kuletimfundziso. Nasichubeka senta njalo, sitawubusiswa.

14. Lamanye emaKhristu ayekela njani kubambelela “esibonelweni semavi laphilile”?

¹⁴ Yini lengenteka nasingayekela kubambelela “esibonelweni semavi laphilile”? Cabanga nganasi sibonelo. Ngesikhatsi semaKhristu ekucala, bekunemahemuhemu lebekandzile emkhatsini walamanye emaKhristu latsi lilanga laJehova selifikile. Kungenteka bekunencwadzi lebekucatjangwa kutsi ibhalwe ngumphostoli Pawula lebeyisho loko. Ngaphambi kwekutsi lamanye emaKhristu aseThesalonika atinike sikhatsi sekuhlola kutsi kuliciniso yini loko, awetsemba lamahemuhemu futsi aze awasakata. Bewangeke adukiswe kube akhumbula tintfo Pawula lawafundzisa tona ngesikhatsi asenawo. (2 Thes. 2:1-5) Pawula wecwayisa bazalwane bakhe nabodzadze kutsi bangatetsembi tonkhe tintfo labativako. Kuze abasite kutsi bangadukiswa esikhatsini lesitako, wephetsa incwadzi yesibili lebekayibhalele baseThesalonika ngemavi latsi: “Mine Pawula ngiyanivusela futsi loku ngikubhale ngesandla sami. Tonkhe tincwadzi tami ngitibhala kanjena kuze nati kutsi tibhalwe ngimi.”​—2 Thes. 3:17.

15. Singativikela njani emangeni labonakala aliciniso? Niketa sibonelo. (Buka netitfombe.)

¹⁵ Yini lesingayifundza emavini aPawula lawabhalela baseThesalonika? Nasiva lokutsite lokungavumelani nalesikufundzile eBhayibhelini, nobe nasiva indzaba lemangalisako, kufanele sisebentise kucondza. Ngesikhatsi seSoviet Union, titsa tetfu take tanika bazalwane betfu labanyenti incwadzi lebekutsiwa ibuya endlunkhulu. Lencwadzi beyikhutsata labanye bazalwane kutsi batakhele inhlangano yabo leyehlukile. Lencwadzi beyibonakala ngatsi vele ibuya endlunkhulu. Kodvwa bazalwane labetsembekile abazange  badukiswe. Babona kutsi lomlayeto lebewukulencwadzi bewungavumelani naloko bebafundziswe kona. Lamuhla, titsa tetfu tihle tisebentisa tebuchwephesha kuze tetame kusidida nobe kusehlukanisa. Kunekutsi ‘sisheshe siyekele kucabanga kahle,’ singativikela ngekutsi sibuke kutsi loko lesikufundzako nobe lesikuvako kuyavumelana yini nemaciniso lesesiwafundzile.​—2 Thes. 2:2; 1 Joh. 4:1.

16. Ngekusho kwembhalo waKubaseRoma 16:17, 18, yini lokufanele siyente nangabe labanye bashiya liciniso?

¹⁶ Hlale unebunye nalabo labetsembekile kuJehova. Nkulunkulu ufuna simkhonte ngebunye. Sitawuhlale simunye nangabe nje sibambelela ecinisweni. Nobe ngubani lophambukako ecinisweni, wenta kutsi kube nekwehlukana ebandleni, ngako Nkulunkulu usecwayisa ngekutsi ‘simecwaye.’ Ngale kwaloko singatitfola sesilishiyile liciniso.​—Fundza KubaseRoma 16:17, 18.

17. Kutasisita ngani kukhona kubona liciniso nekubambelela kulo?

¹⁷ Nasilibona liciniso futsi sibambelela kulo, sitawuhlale sisondzelene naJehova futsi sinekukholwa lokucinile. (Ef. 4:15, 16) Sitawuvikeleka etimfundzisweni letingemanga taSathane nasemangeni lawasakatako, futsi sitawuhlale sivikelekile njengobe sitawube sinakekelwa nguJehova ngekuhlupheka lokukhulu. Ngako chubeka ubambelela kuloko lokuliciniso, futsi “Nkulunkulu wekuthula utawuba” nawe.​—Fil. 4:8, 9.