1-2. NjengaLoti, nguyiphi inkinga emaKhristu labhekana nayo lamuhla?

 NASIBONA bantfu batiphatsa kabi lamuhla, sitiva ngendlela Loti lowetsembekile lativa ngayo. Loti “bekacindzeteleke kakhulu ngenca yekona lokuhambisana nekwedzelela lobekwentiwa bantfu labephula umtsetfo,” ngobe bekati kutsi Babe wetfu wasezulwini uyakwenyanya kutiphatsa kabi. (2 Phet. 2:7, 8) Kwesaba Nkulunkulu kanye nekumtsandza kwenta Loti kutsi akwenyanye kutiphatsa kabi lebekwentiwa bantfu bekaphila nabo. Natsi lamuhla siphila nebantfu labangatihloniphi timiso taJehova tekutiphatsa. Nanobe kunjalo, singachubeka sitiphatsa ngendlela lehlantekile nangabe sitawuhlale sitsandza Nkulunkulu futsi sifundze kumesaba.​—Taga 14:2.

² Jehova uyasisita kutsi sikhone kukwenta loko ngekusikhutsata asebentisa incwadzi yeTaga. Onkhe emaKhristu, lokungemadvodza nebafati, labasebasha nalasebakhulile bangasitakala kakhulu ngekufundza leseluleko lesihlakaniphile lesitfolakala lapho.

3. Ngekusho kweTaga 17:3, ngusiphi sizatfu lesenta kudzingeke sivikele tinhlitiyo tetfu? (Buka nesitfombe.)

³ Sizatfu lesibalulekile sekuvikela tinhlitiyo tetfu letingumfanekiso kutsi Jehova uyatihlola. Loko kusho kutsi ubuka ngale kwaloko bantfu labakubonako, futsi abone loko lesingiko ngekhatsi. (Fundza Taga 17:3.) Utasitsandza nangabe sigcwalisa tingcondvo tetfu ngekuhlakanipha lokuvela kuye lokutawenta siphile phakadze. (Joh. 4:14) Nasenta njalo, ngeke sibe khona  sikhala etingcondvweni tetfu sekutsi Sathane nelive lakhe basingcolise. (1 Joh. 5:18, 19) Njengobe sisondzelana naJehova, sitamtsandza kakhulu futsi simhloniphe kakhulu. Ngenca yekutsi asifuni kumvisa buhlungu Babe wetfu, sitawenyanya nje ngisho nekucabanga kwenta sono. Nasilingwa kutsi sente intfo lembi, kufanele sitibute: ‘Ngingamvisa njani buhlungu ngemabomu uMuntfu lokhombise kutsi ungitsandza kangaka?’​—1 Joh. 4:9, 10.

4. Kwesaba Jehova kwamvikela njani lomunye dzadze kutsi angoni?

⁴ Lomunye dzadze waseCroatia lokutsiwa nguMarta, lowalingeka kutsi atiphatse kabi wabhala watsi: “Ngakutfola kumatima kucabanga kahle kanye nekulwa nesifiso sekutijabulisa kwesikhashana ngesono. Kodvwa kwesaba Jehova kwangivikela.” b Kwamvikela njani kwesaba Nkulunkulu? Marta utsi wacabangisisa ngemiphumela lebeyitawuletfwa kwenta sincumo lesibi. Natsi singenta lokufanako. Umphumela lobuhlungu kutsi singavisa Jehova buhlungu futsi singasakhoni kumkhonta kuze kube phakadze.—Gen. 6:5, 6.

5. Yini loyifundza kulokwenteka kuLeo?

⁵ Nangabe sesaba Jehova, angeke sibe bangani bebantfu labenta tintfo letimbi. Leo, lohlala eCongo wasitfola sifundvo saloko. Ngemuva kweminyaka lemine abhajatisiwe, watihlanganisa nebantfu lababi. Bekatitjela kutsi nangabe nje yena angatenti tintfo letimbi, bekangoni kuJehova. Kodvwa ngekushesha bangani bakhe lababi benta kutsi acale kunatsa tjwala ngalokwecile nekutiphatsa kabi. Wabese ucala kucabanga ngaloko batali bakhe labangemaKhristu lebebamfundzise kona kanye nenjabulo lebeseyimlahlekele. Waba yini umphumela? Wasanguluka. Labadzala belibandla bamsita kutsi abuyele kuJehova. Lamuhla  ungulomdzala welibandla futsi ulihlahlandlela lelikhetsekile.

6. Ngubaphi bafati lababili lesitawucoca ngabo?

⁶ Asesicoce ngeTaga sehluko 9, lapho khona sifundza ngekuhlakanipha nebulima lokumelelwa bafati lababili. (Catsanisa naKubaseRoma 5:14; KubaseGalathiya 4:24.) Njengobe sisafundza, khumbula kutsi live laSathane liyakutsandza kutiphatsa kabi kanye netitfombe letingcolile. (Ef. 4:19) Ngako kubalulekile kutsi sichubeke sifundza kwesaba Nkulunkulu futsi sitibalekele tintfo letimbi. (Taga 16:6) Nasenta njalo, sonkhe ngisho sibadvuna nobe sibesifazane, kungasisita loko lesikufundza kulesehluko. Ngamunye kulabafati uchazwa ngekutsi umema labo labangakahlakaniphi, lokungulabo “labete lwati.” Kuba shengatsi ngamunye wabo utsi: ‘Wotani endlini yami futsi sidle.’ (Taga 9:1, 5, 6, 13, 16, 17) Kodvwa akufanani loko lokwenteka kulabo labemukela lesimemo.

7. Ngekusho kweTaga 9:13-18, uba yini umphumela kulabo labemukela simemo semfati losilima? (Buka nesitfombe.)

⁷ Cabanga ngesimemo lesivela ‘kumfati losilima.’ (Fundza Taga 9:13-18.) Ngesibindzi umemeta labo labete lwati utsi: ‘Ngenani lapha’ nitewudla. Uba yini umphumela? “Indlu yakhe iyindlu yalabafile.” Kungenteka uyakhumbula kutsi ekucaleni kwencwadzi yeTaga kusetjentiswa inkhulumo lengumfanekiso. Secwayiswa ngemfati “lokhohlakele” futsi “lotiphatsa kabi.” Naku lesitjelwa kona: “Kuya endlini yakhe kufana nekutimikisa ekufeni.” (Taga 2:11-19) Taga 5:3-10 tisecwayisa ngalomunye ‘umfati lokhohlakele’ ‘tinyawo takhe letehlela ekufeni.’

8. Ngusiphi sincumo lokufanele sisente?

⁸ Labo labeva ‘lomfati lisilima’ kufanele bente sincumo: Batasemukela yini simemo sakhe nobe ngeke basemukele? Natsi kungadzingeka sente sincumo lesifanako. Sitawenta njani nasihlangana nesimo lesifaka ekhatsi kutiphatsa kabi nobe titfombe letingcolile, njengobe kutfolakala nasetinhlelweni letitsite naku-Internet?

9-10. Ngutiphi letinye tizatfu letenta kubaluleke kutsi sigweme kutiphatsa kabi?

⁹ Kunetizatfu letivakalako letenta kudzingeke sigweme kutiphatsa kabi. “Umfati losilima” utsi: “Emanti ekwebiwa amnandzi.” Ayini ‘lamanti ekwebiwa’? LiBhayibheli lifananisa kuya ecansini kwebantfu labashadene nemanti lacabulako. (Taga 5:15-18) Indvodza nemfati labashade ngalokusemtsetfweni bavumelekile kuya ecansini. Kodvwa kungulokwehlukile ‘ngemanti ekwebiwa.’ Lokusho kuya ecansini  lokungakavumeleki. Loku kuvame kwenteka emasitseleni njengobe nelisela livame kweba emasitseleni. ‘Lamanti ekwebiwa’ angabonakala amnandzi nangabe labo labawanatsako babona ngatsi bayakhona kukufihla loko labakwentako. Bayatiyenga! Jehova ubona konkhe. Kute lokubuhlungu kwendlula kungasatsandvwa nguye, ngako kute ‘lokumnandzi’ ngaloko. (1 Khor. 6:9, 10) Kodvwa kunalokunye lokubuhlungu.

¹⁰ Kutiphatsa kabi kungenta umuntfu ative anemahloni, ative angasilutfo, kutfolakale umntfwana kungahloswa futsi kungabhidlita nemindeni. Ngako kukuhlakanipha kungayi ‘endlini’ yemfati losilima futsi udle khona. Ngetulu kwekulahlekelwa buhlobo naJehova, bantfu labanyenti labatiphatsa kabi batfola tifo letibulalako. (Taga 7:23, 26) Vesi 18 esahlukweni 9 wephetsa ngekutsi: “Labo lababitwe ngulomfati basekujuleni kweliThuna.” Yini leyenta bantfu labanyenti bemukele simemo salomfati nanobe loko kuyingoti?​—Taga 9:13-18.

11. Yini leyenta kube yingoti kakhulu kubuka titfombe letingcolile?

¹¹ Inkinga levamile lokufanele siyibalekele kubuka titfombe letingcolile. Labanye bacabanga kutsi kubuka titfombe letingcolile akusiyo ingoti. Kodvwa titfombe letingcolile tiyingoti, tehliselana sitfunti futsi akusimelula kutiyekela. Tiyahlala engcondvweni; akusimelula kutisusa. Ngetulu kwaloko, titfombe letingcolile atitibulali tifiso letimbi, kodvwa titenta tibe nemandla kakhulu. (Khol. 3:5; Jak. 1:14, 15) Linyenti lebantfu lababuka titfombe letingcolile ligcine litiphetse kabi.

12. Sikhombisa njani kutsi setama kugwema titfombe letingasenta sibe nesifiso sekuya ecansini?

¹² Yini emaKhristu lokufanele ayente nangabe kuvela titfombe letingcolile etintfweni tawo tebuchwephesha? Kufanele sitisuse ngekushesha. Kungaba melula kukwenta loko nangabe sikhumbula kutsi intfo leligugu kakhulu kitsi buhlobo betfu naJehova. Ecinisweni, ngisho netitfombe letingakangcoli tingasenta kutsi sibe nesifiso sekuya ecansini. Yini leyenta kutsi sitigweme? Kungobe asifuni kuphinga ngisho nakancane etinhlitiyweni tetfu. (Mat. 5:28, 29) Lomunye lomdzala welibandla waseThailand lokutsiwa nguDavid utsi: “Ngiyatibuta: ‘Ngisho nobe letitfombe tingakukhombisi kungcola, Jehova utawujabula yini nangabe ngichubeka ngitibuka?’ Kucabanga ngalendlela kuyangisita kutsi ngente ngekuhlakanipha.”

13. Yini lesisita kutsi sente tintfo ngekuhlakanipha?

¹³ Kwesaba kwenta intfo lengenta Jehova angasajabuli kutasisita kutsi sente ngekuhlakanipha. Kwesaba Nkulunkulu “kusicalo sekuhlakanipha.” (Taga 9:10) Loku kuvetwa kahle emavesini ekucala lakuTaga sehluko 9, lapho sifundza khona ngalolomunye umfati lomelela “kuhlakanipha lokungiko.”

14. Ngusiphi simemo lesehlukile lesitfolakala kuTaga 9:1-6?

¹⁴ Fundza Taga 9:1-6. Lana sifundza ngesimemo lesivela kuMtfombo neMsunguli wekuhlukanipha lokungiko, lokunguMdali wetfu lohlakaniphe ngalokuphelele. (Taga 2:6; Rom. 16:27) Kulamavesi sifundza ngendlu lenkhulu lenetinsika letingu-7. Loku kukhombisa kutsi Jehova uyephana futsi wemukela bonkhe labo labafuna kusebentisa kuhlakanipha kwakhe ekuphileni kwabo.

15. Yini Nkulunkulu lacela kutsi siyente?

¹⁵ Jehova wephana ngesandla lesivulekile. Lobuntfu bakhe buvetwa kahle “kuhlakanipha lokungiko,” lokumelelwa ngumfati lokukhulunywa ngako kuTaga sehluko 9. Lendzaba iveta kutsi lomfati uyilungise kahle inyama, wadidiyela kahle neliwayini futsi wadeka  nelitafula endlini yakhe. (Taga 9:2, umbhalo longentasi) Ngetulu kwaloko, vesi 4 na-5 utsi: “Kukhuluma nalabete lwati kutsi: ‘Wotani nidle sinkhwa sami.’” Kubaluleke ngani kutsi siye endlini yekuhlakanipha lokungiko futsi sidle etafuleni lelidekiwe? Jehova ufuna bantfwana bakhe bahlakaniphe futsi baphephe. Akafuni sifundze kabuhlungu emaphutseni etfu. Kungako ‘bantfu labalungile ababekela kuhlakanipha.’ (Taga 2:7) Nangabe simesaba Jehova, sitawufuna kumjabulisa. Sitasilalela seluleko sakhe lesihlakaniphile futsi sitasisebentisa.​—Jak. 1:25.

16. Kwesaba Nkulunkulu kwamsita njani Alain kutsi ente sincumo lesihlakaniphile, futsi waba yini umphumela?

¹⁶ Cabanga ngendlela lokwamsita ngayo Alain kwesaba Nkulunkulu kutsi ente sincumo lesihlakaniphile. Naku lokushiwo ngu-Alain longulomdzala welibandla futsi longuthishela: “Labanyenti lengisebenta nabo batsatsa emafilimu lakhombisa kungcola njengendlela yekufundzisa ngetemacansi.” Kodvwa Alain bekati kutsi loko akusilo liciniso. Utsi: “Ngenca yekutsi ngesaba Nkulunkulu, angizange ngivume kuwabukela lamafilimu. Ngabachazela kutsi yini lebeyingenta ngingawabukeli.” Bekasebentisa seluleko lesitfolakala ‘ekuhlakanipheni lokungiko’ lesitsi “hambani ngendlela lekhombisa kutsi ninekucondza.” (Taga 9:6) Labanye bothishela yabachaza indlela Alain lenta ngayo, futsi nyalo sebadadisha liBhayibheli, babakhona nasemihlanganweni yelibandla.

17-18. Ngutiphi tibusiso letitfolwa ngulabo labemukela simemo lesivela ‘ekuhlakanipheni lokungiko,’ futsi yini labangayilangatelela? (Buka nesitfombe.)

¹⁷ Jehova usebentisa umfanekiso webafati lababili kuze asikhombise kutsi singaba nelikusasa lelijabulisako. Labo labemukela simemo ‘kulomfati losilima’ futsi lomemetako banake nje kutijabulisa emasitseleni. Ecinisweni, baphilela lilamuhla, bayakhohlwa ngelikusasa. Siphetfo sabo ‘sisekujuleni kweliThuna.’​—Taga 9:13, 17, 18.

¹⁸ Kungulokwehlukile kulabo labemukela simemo ‘ekuhlakanipheni lokungiko’! Tivakashi tako tiyajabula ngobe tinako konkhe letikudzingako kuze tihlale tisondzelene naJehova. (Isa. 65:13) Asebentisa umphrofethi Isaya, Jehova watsi: “Ngilalelisiseni futsi nidle lokukahle, nitawujabula kakhulu ngekudla lokunemsoco.” (Isa. 55:1, 2) Sifundza kutsandza loko Jehova lakutsandzako nekwenyanya loko lakwenyanyako. (Hla. 97:10) Siyajabula ngenca yekutsi simema labanye kutsi bafundze ‘ekuhlakanipheni lokungiko.’ Kuba ngatsi ‘siyamemeta sisetindzaweni letiphakeme telidolobha sitsi: “Bonkhe bantfu labete lwati abangene lapha.”’ Tibusiso letitawutfolwa ngitsi kanye nalabo  labemukela lesimemo atisito nje tanyalo kuphela. Kodvwa taphakadze, titawenta kutsi siphile phakadze njengobe ‘sihamba endleleni lekhombisa kutsi sinekucondza.’​—Taga 9:3, 4, 6.

19. Ngekuvumelana neMshumayeli 12:13, 14, yini lokufanele sitimisele kuyenta? (Buka nelibhokisi lelitsi “ Kwesaba Nkulunkulu Kuyasisita.”)

¹⁹ Fundza Umshumayeli 12:13, 14. Shengatsi kwesaba Nkulunkulu kungasenta silondvolote tinhlitiyo tetfu futsi kusisite sihlale sitiphatsa ngendlela lehlantekile futsi sinebuhlobo lobuhle naNkulunkulu kulamalanga ekugcina lamabi. Lokwesaba Nkulunkulu kutasenta sichubeke simema labanye labanyenti kutsi bafune “kuhlakanipha lokungiko” futsi bazuze kuko.