1-2. Ngekusho kweTihlabelelo 25:14, yini lokufanele siyente nangabe sifuna kuba bangani labakhulu baJehova?

 NGUBUPHI buntfu locabanga kutsi bubalulekile kuze nichubeke nibangani nalotsite? Kusenekwenteka ungatsi bangani sibili kufanele batsandzane futsi basekelane. Mhlawumbe awucabangi kutsi kwesaba kubalulekile kuze bantfu babe bangani labakhulu. Nobe kunjalo, njengobe umbhalo lokusekelwe kuwo lesihloko ukhombisa, labo labafuna kuba bangani labakhulu baJehova kufanele ‘bamesabe.’​—Fundza Tihlabelelo 25:14.

² Ngisho nobe sinesikhatsi lesingakanani sikhonta Jehova, sonkhe kufanele sichubeke simesaba. Kodvwa kusho kutsini kwesaba Nkulunkulu? Yini lesingayenta kuze sifundze kwesaba Jehova? Yini lesingayifundza mayelana nekwesaba Nkulunkulu ku-Obadiya, kuMphristi Lophakeme Jehoyada naseNkhosini Jehowashi?

3. Chaza kutsi kwesaba kungasivikela njani.

³ Singesaba nangabe sibona ngatsi sitawuba sengotini. Lokwesaba kungaba kahle ngobe kungasisita kutsi sente tincumo letikahle. Kwesaba kuwa kungasenta kutsi singahambi dvutane neliwa. Kwesaba kulimala kungasenta kutsi sibalekele simo lesingaba yingoti. Kwesaba kutsi bungani betfu nemuntfu lesimtsandzako bungahle buphele kungasenta kutsi singasho tintfo letitamvisa buhlungu nobe sitente.

4. Sathane ufuna bantfu bamesabe njani Jehova?

⁴ Sathane ufuna kutsi bantfu besabe Jehova ngendlela lekabi. Usekela umbono lowashiwo ngu-Elifazi, wekutsi Jehova unguNkulunkulu  lohlala atfukutsele, lofuna kusijezisa futsi lesingeke sikhone kumjabulisa. (Jobe 4:18, 19) Sathane ufuna kutsi simesabe kakhulu Jehova size siyekele kumkhonta. Kuze kungenteki loko, kufanele sifundze kuhlonipha Jehova futsi sesabe kumvisa buhlungu.

5. Kusho kutsini kwesaba Nkulunkulu?

⁵ Umuntfu lowesaba Nkulunkulu ngendlela lekahle uyamtsandza futsi akafuni kwenta nobe ngabe yini lengalimata buhlobo bakhe naye. Jesu bekamesaba ngaleyondlela Nkulunkulu. (Heb. 5:7) Bekangamesabi ngendlela yekutsi bekahlale etfukile. (Isa. 11:2, 3) Kunaloko, bekamtsandza kakhulu Nkulunkulu futsi bekafuna kumlalela. (Joh. 14:21, 31) NjengaJesu, simhlonipha kakhulu Nkulunkulu ngobe uyasitsandza, uhlakaniphile, ulungile futsi unemandla. Siyati nekutsi Jehova usitsandza kakhulu futsi unendzaba nekutsi siyasilalela yini sicondziso sakhe. Nasingamlaleli Jehova uva buhlungu, kodvwa nasimlalela uyajabula.​—Hla. 78:41; Taga 27:11.

6. Nguyiphi lenye indlela lesingakufundza ngayo kwesaba Nkulunkulu? (Tihlabelelo 34:11)

⁶ Asizange sitalwe simesaba Jehova; kufanele sikufundze. (Fundza Tihlabelelo 34:11.) Lenye indlela lesingakwenta ngayo loko kutsi sibuke indalo. Nasichubeka sibuka kuhlakanipha kwaNkulunkulu, emandla akhe kanye nendlela lasitsandza ngayo, njengobe kubonakala “etintfweni latidalile,” sitamhlonipha kakhulu futsi simtsandze kakhulu. (Rom. 1:20) Lomunye dzadze lokutsiwa ngu-Adrienne utsi: “Kuhlakanipha kwaJehova lokubonakala endalweni kuyangimangalisa futsi kungenta ngibone kutsi ukwati kahle loko lokungilungelako.” Kucabangisisa ngaloko kwamenta waphetsa ngekutsi atsi: “Ngingayenta njani-ke intfo lengangehlukanisa naJehova longuMtfombo wekuphila kwami?” Ungatinika yini sikhatsi kuleliviki ucabange ngendalo? Kwenta kanjalo kutakwenta kutsi umhloniphe kakhulu Jehova futsi umtsandze kakhulu.​—Hla. 111:2, 3.

7. Umthantazo ungasisita njani kutsi sifundze kwesaba Jehova?

⁷ Lenye indlela lesingafundza ngayo kwesaba Nkulunkulu kutsi sithantaze njalo. Nasichubeka sithantaza, Jehova uba nguMuntfu mbamba kitsi. Ngaso sonkhe sikhatsi nasicela kutsi asiphe emandla ekubeketelela inkinga letsite, loko kusikhumbuta kutsi unemandla lamakhulu. Nasimbonga ngesipho lesiyiNdvodzana yakhe, sitikhumbuta indlela lasitsandza ngayo. Nasincusa kutsi asisite ngenkinga letsite, sisuke sitikhumbuta kutsi uhlakaniphe kakhulu. Imithantazo lenjalo yenta kutsi simhloniphe kakhulu Jehova. Ngetulu kwaloko, yenta kutsi sitimisele kakhulu kugwema nobe ngabe yini lengalimata buhlobo betfu naye.

8. Yini lesingayenta kuze sichubeke sesaba Nkulunkulu?

⁸ Singachubeka simesaba Nkulunkulu ngekutsi sidadishe liBhayibheli sinemgomo wekufundza etibonelweni letinhle nasetibonelweni letimbi letiseBhayibhelini. Ase sicoce ngetinceku taJehova letetsembekile letimbili, lokungu-Obadiya, lebekasebenta esigodlweni seNkhosi Ahabi, kanye neMphristi Lophakeme Jehoyada. Sitawubese sibona kutsi yini lesingayifundza eNkhosini Jehowashi yakaJuda, leyacala kahle kodvwa leyabese iyamshiya Jehova ngekuhamba kwesikhatsi.

9. Kuhlonipha Jehova kwamsita njani Obadiya? (1 Emakhosi 18:3, 12)

⁹ LiBhayibheli nalicala kukhuluma nga-Obadiya b litsi: “Obadiya bekamhlonipha kakhulu  Jehova.” (Fundza 1 Emakhosi 18:3, 12.) Loko kwamsita njani Obadiya? Kwamenta waba yindvodza leyetsembekile naleyetsenjwako; kungako inkhosi yambeka kutsi abe ngumphatsi esigodlweni sayo. (Catsanisa naNehemiya 7:2.) Ngenca yekutsi Obadiya bekamesaba Nkulunkulu, loko kwamenta waba nesibindzi lesimangalisako, lebekuyintfo lebekayidzinga kakhulu. Waphila ngesikhatsi kubusa iNkhosi Ahabi lebeyiyimbi, ‘leyenta lokubi kakhulu emehlweni aJehova kuwendlula onkhe [emakhosi] labusa ngaphambi kwayo.’ (1 Khos. 16:30) Ngetulu kwaloko, Ahabi bekashade naJezebeli, lebekakhonta Bhali futsi amenyanya kakhulu Jehova kangangekutsi wetama kucedza kukhonta kweliciniso kulombuso wasenyakatfo. Waze wabulala ngisho nebaphrofethi baNkulunkulu labanyenti. (1 Khos. 18:4) Ngako kusebaleni kutsi Obadiya wakhonta Jehova ngesikhatsi lebesimatima kakhulu.

10. Obadiya wasikhombisa njani sibindzi lesimangalisako?

¹⁰ Obadiya wasikhombisa njani sibindzi lesimangalisako? Ngesikhatsi Jezebeli afuna baphrofethi baNkulunkulu kuze ababulale, Obadiya watsatsa labangu-100 babo wabafihla, ‘wafaka labangu-50 emgedzeni ngamunye futsi wachubeka wabapha tinkhwa nemanti.’ (1 Khos. 18:13, 14) Kube Jezebeli weva ngaloko, bekatambulala. Obadiya naye bekangumuntfu, ngako bekangakufuni kufa. Kodvwa bekamtsandza kakhulu Jehova nalabo labamkhontako kwendlula indlela lebekatsandza ngayo kuphila kwakhe.

11. Bantfu baJehova lamuhla bamlingisa njani Obadiya? (Buka nesitfombe.)

¹¹ Lamuhla linyenti lebantfu baJehova lihlala emaveni lapho umsebenti wetfu uvinjelwe khona. Bayatihlonipha tiphatsimandla, kodvwa njenga-Obadiya labazalwane nabodzadze labaligugu banika Jehova lokukwakhe, lokukukhonta yena yedvwa. (Mat. 22:21) Bakhombisa kutsi bayamesaba Nkulunkulu ngekutsi balalele yena kunekulalela bantfu. (Imis. 5:29) Loku bakwenta ngekutsi bashumayele tindzaba letimnandzi baphindze bahlangane ndzawonye ngasense. (Mat. 10:16, 28) Benta lokusemandleni kuze bazalwane babo nabodzadze batfole tintfo labatidzingako kuze bahlale basondzelene naJehova. Cabanga ngesibonelo  saHenri, lohlala eveni lelise-Africa lapho umsebenti wetfu bewuvinjelwe khona. Ngaleso sikhatsi, Henri wavolontiya kumikisela bazalwane betfu nabodzadze tincwadzi letisekelwe eBhayibhelini. Wabhala watsi: “Ngingumuntfu lonemahloni. Ngako ngiyaciniseka kutsi kumesaba kakhulu Jehova kwangisita ngaba nesibindzi lebengisidzinga.” Nawucabanga, ungaba naso yini sibindzi njengaHenri? Ungaba naso nangabe umesaba Nkulunkulu.

12. Umphristi Lophakeme Jehoyada nemfati wakhe bakhombisa njani kutsi betsembekile kuJehova?

¹² Umphristi Lophakeme Jehoyada bekamesaba Jehova futsi loko kwenta kutsi etsembeke kuye futsi asekele kukhonta kweliciniso. Loku kwabonakala ngesikhatsi indvodzakati yaJezebeli, lokungu-Athaliya, atsatsa bukhosi bakaJuda ngendlovuyangena. Bantfu bebafutile kumesaba Athaliya. Bekanenhlitiyo lembi futsi bekafuna kubusa kangangekutsi waze wetama kubulala yonkhe intalelwane yasebukhosini, lokubatukulu bakhe! (2 Khr. 22:10, 11) Munye kulabantfwana, lokunguJehowashi, wasindza ngobe umfati waJehoyada, lokunguJehoshabathi, wamsindzisa. Yena nendvodza yakhe bafihla lomntfwana futsi bamnakekela. Ngaleyondlela, yena nemyeni wakhe basita kutsi kuvikelwe luhla lwekutalwa lwemndeni waDavide. Jehoyada beketsembekile kuJehova futsi bekangamesabi Athaliya.​—Taga 29:25.

13. Ngesikhatsi Jehowashi aneminyaka lengu-7, Jehoyada waphindze wakhombisa njani kutsi wetsembekile?

¹³ Ngesikhatsi Jehowashi sekaneminyaka lengu-7, Jehoyada waphindze wakhombisa kutsi wetsembekile kuJehova. Wakha licebo. Naliphumelela lelicebo, Jehowashi bekatawuba yinkhosi, njengobe bekunguye indlalifa lebekufanele ihlale esihlalweni sebukhosi saDavide. Kodvwa nangabe lelicebo lingaphumeleli, kusenekwenteka Jehoyada bekatawufa. Basitwa nguJehova, lelicebo laphumelela. Jehoyada wasitwa tindvuna kanye nemaLevi, futsi babeka Jehowashi kutsi abe yinkhosi, babulala Athaliya. (2 Khr. 23:1-5, 11, 12, 15; 24:1) Jehoyada wabese “wenta sivumelwane emkhatsini waJehova nenkhosi kanye nebantfu, kutsi bebatawuchubeka babantfu baJehova.” (2 Khos. 11:17) “Waphindze wabeka bogadzi ngasemagedeni endlu yaJehova kuze kungangeni muntfu longcole nganome ngabe nguyiphi indlela.”​—2 Khr. 23:19.

14. Jehoyada wahlonishwa njani ngekuhlonipha Jehova?

¹⁴ Ngaphambi kwaloko, Jehova bekatsite: “Ngiyabahlonipha labangihloniphako.” Loko kwaba liciniso ngobe wambusisa Jehoyada. (1 Sam. 2:30) Sibonelo nje, Jehova wenta kutsi tento letinhle letentiwa ngulomphristi lophakeme tibhalwe kuze sisitakale nasitifundza. (Rom. 15:4) Ngesikhatsi Jehoyada afa, wahlonishwa ngendlela lekhetsekile ngobe bamngcwaba “eDolobheni laDavide lapho kwangcwatjwa khona emakhosi ngenca yebuhle labekabentile ka-Israyeli, abentela Nkulunkulu weliciniso kanye nendlu yaNkulunkulu.”​—2 Khr. 24:15, 16.

15. Yini lesingayifundza endzabeni yaJehoyada? (Buka nesitfombe.)

¹⁵ Indzaba yaJehoyada ingasisita sonkhe kutsi sifundze kwesaba Nkulunkulu. Labadzala belibandla bangamlingisa Jehoyada ngekutsi bahlale baphapheme futsi bavikele umhlambi waNkulunkulu ngekwetsembeka. (Imis. 20:28) Lasebakhulile bangafundza kuJehoyada kutsi nangabe besaba Jehova futsi bahlale betsembekile kuye angabasebentisa kuze bafeze injongo yakhe. Akabalahli. Labasebasha bangayinaka indlela Jehova lamphatsa ngayo Jehoyada futsi bamlingise ngekutsi bahloniphe lasebakhulile, ikakhulukati labo lesebanesikhatsi lesidze bakhonta  Jehova ngekwetsembeka. (Taga 16:31) Ngetulu kwaloko, sonkhe singafundza kuletindvuna nakumaLevi labasekela Jehoyada. Shengatsi singabasekela ngekwetsembeka labo “labasiholako” ngekutsi sibahloniphe.​—Heb. 13:17.

16. Yini lekhombisa kutsi iNkhosi Jehowashi beyingaketsembeki?

¹⁶ Jehoyada wasita iNkhosi Jehowashi kutsi ibe ngumuntfu lokahle. (2 Khos. 12:2) Ngenca yaloko, lenkhosi leseyinsha beyifuna kujabulisa Jehova. Kodvwa ngemuva kwekushona kwaJehoyada, Jehowashi wacala kulalela tindvuna lebetihlubukile. Waba yini umphumela? Yena nebantfu lebekababusa “bacala kukhonta tinsika letingcwele kanye netithico.” (2 Khr. 24:4, 17, 18) Adzabuke kakhulu, Jehova “wachubeka atfumela baphrofethi kutsi bababuyisele . . . , kodvwa bona abazange balalele.” Abazange balalele ngisho naZakhariya, lobekayindvodzana yaJehoyada, lebekangagcini nje ngekuba ngumphrofethi waJehova nemphristi kodvwa abephindze abe ngumzala waJehowashi. Ecinisweni, Jehowashi waze wabulala Zakhariya, nanobe batali baZakhariya bebasindzise kuphila kwakhe.​—2 Khr. 22:11; 24:19-22.

17. Tintfo tamhambela njani Jehowashi?

¹⁷ Jehowashi akazange achubeke amesaba Jehova futsi tintfo atimhambelanga kahle. Naku Jehova lebekakushito: “Labo labangedzelelako batawedzelelwa.” (1 Sam. 2:30) Libutfo lelincane laseSiriya lancoba libutfo laJehowashi “lelikhulu” futsi ‘lamlimata kakhulu.’ Ngemuva kwekutsi emaSiriya sekahambile, Jehowashi  wabulawa tisebenti takhe ngenca yekubulala Zakhariya. Bantfu babona ngatsi lenkhosi beyiyimbi kakhulu kangangekutsi beyingakufaneli kungcwatjwa “endzaweni yekungcwaba emakhosi.” c​—2 Khr. 24:23-25.

18. Ngekuvumelana naJeremiya 17:7, 8, yini lesingayenta kuze singafani naJehowashi?

¹⁸ Yini lesingayifundza esibonelweni saJehowashi? Jehowashi bekanjengesihlahla lesinetimphandze letimfishane lesidzinga kusekelwa ngelugodvo. Ngesikhatsi Jehoyada lebekamsekela ashona, Jehowashi wacala kulalela tihlubuki futsi wabese akasetsembeki kuJehova. Lesibonelo sikhombisa kutsi akukafaneli silalele Jehova ngenca nje yemalunga emindeni yetfu nalabanye ebandleni labasibekela sibonelo lesihle sekwenta loko. Kuze ngamunye wetfu ahlale asondzelene naJehova, kufanele simtsandze kakhulu futsi simhloniphe kakhulu. Loko singakwenta ngekutsi sihlale sidadisha liBhayibheli, sicabangisise ngalesikufundzako futsi sithantaze.​—Fundza Jeremiya 17:7, 8; Khol. 2:6, 7.

19. Yini Jehova lacela kutsi siyente?

¹⁹ Jehova akaceli lokungetulu kwemandla etfu. Loko lakucelako kuchazwe kahle kuMshumayeli 12:13, lotsi: “Yesaba Nkulunkulu weliciniso futsi ugcine imiyalo yakhe, ngobe nguloku lokubaluleke kakhulu umuntfu lokufanele akwente.” Nasesaba Nkulunkulu, sitawukhona kubhekana netinkinga esikhatsini lesitako futsi sime sicinile njenga-Obadiya naJehoyada. Kute lokungacedza buhlobo betfu naJehova.