1. Ngekusho kwa-1 Phetro 5:2, ngumuphi umsebenti lobalulekile lowentiwa ngulabadzala belibandla?

 LABADZALA belibandla baniketwe umsebenti wekunakekela timvu taJehova letiligugu. Ubalulekile kubo lomsebenti wekunakekela bazalwane babo nabodzadze futsi basebenta kamatima kuze babe ‘belusi labelusako.’ (Jer. 23:4; fundza 1 Phetro 5:2.) Sijabula kakhulu ngekuba nalamadvodza emabandleni lesikuwo!

2. Ngutiphi letinye tinkinga lokungenteka labadzala belibandla babhekane nato?

² Labadzala belibandla bangahle babhekane netinkinga letinyenti nabenta imisebenti yabo. Kunakekela libandla akusiwo umsebenti lomelula. Tony, longulomdzala welibandla eMelika kwadzingeka kutsi alinganisele kutsi wemukela imisebenti lengakanani ebandleni. Utsi: “Ngesikhatsi kucala i-COVID-19, ngetama kwenta umsebenti lomnyenti wekuhlela imihlangano kanye nemsebenti wekushumayela. Kodvwa ngisho nobe bengenta lokunyenti kanganani bekuhlale kukhona lokufanele kwentiwe. Ngekuhamba kwesikhatsi, besengite sikhatsi sekufundza liBhayibheli, sekutidadishela nesekuthantaza.” Ilir, longulomdzala welibandla eKosovo, wabhekana nenkinga leyehlukile. Ngesikhatsi asendzaweni lebeyinemphi, wakutfola kumatima kulalela sicondziso lesivela enhlanganweni. Utsi: “Kwadzingeka ngibe  nesibindzi ngesikhatsi lihhovisi leligatja linginika umsebenti wekunakekela bazalwane nabodzadze lebebasetindzaweni letiyingoti. Bengesaba futsi lesicondziso besibonakala singeke sisebente.” Tim, lositfunywa selivangeli e-Asia, wakutfola kumatima kwenta lebekufanele akwente njalo ngelilanga. Utsi: “Ngaletinye tikhatsi bengitiva ngidzinwe kakhulu kutsi nginganakekela bazalwane nabodzadze.” Yini lengasita labadzala belibandla lababhekene netinkinga letinjena?

3. Singazuza njani nasibuka sibonelo saGideyoni lebekaSikhulu?

³ Labadzala belibandla bangafundza esibonelweni saGideyoni lebekaSikhulu. (Heb. 6:12; 11:32) Bekavikela bantfu baNkulunkulu futsi abelusa. (Khu. 2:16; 1 Khr. 17:6) NjengaGideyoni, labadzala belibandla banikwe umsebenti wekunakekela bantfu baNkulunkulu kulesikhatsi lesimatima. (Imis. 20:28; 2 Thim. 3:1) Singafundza endleleni Gideyoni bekalinganisela ngayo, atfobekile futsi alalela. Kubeketela kwakhe kwavivinyeka kuso sonkhe lesikhatsi enta umsebenti wakhe. Ngisho nobe singulabadzala belibandla nobe singasibo, sonkhe singatifundzisa kubonga ngemsebenti lomuhle lowentiwa ngulabazalwane. Singabasekela labazalwane labasebenta kamatima kuze basinakekele.​—Heb. 13:17.

4. Gideyoni wakhombisa njani kutsi uyalinganisela futsi utfobekile?

⁴ Gideyoni bekalinganisela futsi atfobekile. b Ngesikhatsi ingilosi yaJehova imtjela kutsi unikwe umsebenti wekusindzisa ema-Israyeli kubakaMidiyani lebebanemandla, lendvodza letfobekile yaphendvula yatsi: “Indlu yami ngulencane esiveni saManase futsi angisilutfo endlini yababe.” (Khu. 6:15) Gideyoni wabona ngatsi lomsebenti bewungetulu kwemandla akhe. Kodvwa Jehova bekati kutsi angakhona kuwenta. Ngekusitwa nguye, wawenta kahle lomsebenti.

5. Kunini lapho kungaba matima khona ngalomdzala welibandla kutsi alinganisele futsi atfobeke?

⁵ Labadzala belibandla benta konkhe labangakwenta kuze balinganisele futsi batfobeke kuto tonkhe tintfo. (Mik. 6:8; Imis. 20:18, 19) Abatishayi sifuba ngenca yemakhono abo nobe tintfo labaphumelele kutifeza futsi abacabangi kutsi abasilutfo ngenca yekutsi bente emaphutsa. Nobe kunjalo, lomdzala welibandla angavivinyeka. Sibonelo nje, angemukela imisebenti  leminyenti bese utfola kutsi kumatima kuyenta yonkhe. Angahle asolwe ngendlela lente ngayo umsebenti lotsite nobe advunyiswe ngendlela lente ngayo lomunye umsebenti. Yini labadzala labangayifundza kuGideyoni letawubasita etimeni letinjalo?

6. Yini labadzala belibandla labangayifundza kuGideyoni? (Buka nesitfombe.)

⁶ Cela lusito. Umuntfu lolinganiselako uyakwati loko langakhona kukwenta. Gideyoni wakhombisa kutsi uyalinganisela ngekutsi acele lusito kulabanye. (Khu. 6:27, 35; 7:24) Labadzala belibandla labahlakaniphile benta lokufanako. Tony, lesike sakhuluma ngaye utsi: “Indlela lengakhula ngayo beyenta kutsi ngemukele imisebenti leminyenti kunaleyo lebengitawukhona kuyenta. Ngako ngancuma kutsi ekukhonteni kwetfu kwemndeni sicoce ngendzaba yekulinganisela futsi ngacela umkami kutsi asho loko lakucabangako. Ngaphindze ngabukela i-video leku-jw.org letsi Baceceshe Labanye, Ubetsembe Futsi Ubasite Babe Nemandla, NjengaJesu.” Tony wabese ucela labanye kutsi bamsite. Waba yini umphumela? Utsi: “Imisebenti yelibandla iyentiwa futsi senginesikhatsi lesinyenti sekucinisa buhlobo bami naJehova.”

7. Labadzala belibandla bangamlingisa njani Gideyoni nabasolwa? (Jakobe 3:13)

⁷ Ungatfukutseli nawusolwa. Lokunye lokungavivinya labadzala belibandla kulapho lotsite abasola. Nalana sibonelo saGideyoni singabasita. Bekati kutsi unesono, ngako wehlisa umoya ngesikhatsi baka-Efrayimu bamsola. (Khu. 8:1-3) Akazange abaphendvule atfukutsele. Wakhombisa kutsi utfobekile ngekutsi alalele loko bebakhala ngako futsi akhulume nabo ngemusa, loko kwenta lesimo sabancono. Labadzala belibandla labahlakaniphile balingisa sibonelo saGideyoni ngekutsi balalelisise futsi bakhombise kutfobeka nabasolwa. (Fundza Jakobe 3:13.) Nabenta njalo, libandla litawuba nekuthula.

8. Yini labadzala belibandla lokufanele bayente nabadvunyiswa? Niketa sibonelo.

⁸ Lonkhe ludvumo lunike Jehova. Ngesikhatsi Gideyoni advunyiswa ngekuncoba bakaMidiyani, lonkhe ludvumo walunika Jehova. (Khu. 8:22, 23) Labadzala belibandla bangamlingisa njani Gideyoni? Banganika Jehova lonkhe ludvumo nganobe yini labakhona kuyifeza. (1 Khor. 4:6, 7) Nasi sibonelo, nangabe lomdzala welibandla anconywa ngelikhono lakhe lekufundzisa, angenta kutsi kunakwe umtfombo walemfundvo, lokuliVi laNkulunkulu nobe kunakwe kuceceshwa lakutfole enhlanganweni yaJehova. Labadzala bangacabanga nangekutsi kuyenteka yini ngaletinye tikhatsi bente kunakwe bona kakhulu. Cabanga ngalokwenteka kulomunye lomdzala welibandla lokutsiwa nguTimothy. Nakasandza kuba ngulomdzala, Timothy bekakutsandza kubeka tinkhulumo telinyenti. Utsi: “Bengivame kusebentisa tingeniso nemifanekiso leyinkimbinkimbi. Loko bekwenta kutsi labanye bangidvumise. Lokubuhlungu kutsi bebavama kunaka mine kunekunaka liBhayibheli nobe Jehova.” Ngekuhamba kwesikhatsi, Timothy wabona kutsi bekufanele ashintje indlela lafundzisa ngayo kuze kunganakwa yena kakhulu. (Taga 27:21) Waba yini umphumela? Utsi: “Bazalwane nabodzadze bavame kungitjela kutsi inkhulumo lengiyibekile ibasite njani kutsi babeketelele inkinga letsite, bacinisele nababhekene nesimo lesitsite nekutsi ibasitile basondzelana naJehova. Kungijabulisa kakhulu kuva emavi lanjena kunangalesikhatsi kudvunyiswa mine eminyakeni leyendlulile.”

9. Yini leyenta kwaba matima ngaGideyoni kutsi alalele Jehova futsi abe nesibindzi? (Buka sitfombe lesisekhasini lekucala.)

⁹ Ngemuva kwekutsi Gideyoni abekwe kutsi abe sikhulu, kwadzingeka alalele futsi abe nesibindzi. Wanikwa umsebenti loyingoti wekubhidlita  li-al’thare laBhali lebelilababe wakhe. (Khu. 6:25, 26) Ngekuhamba kwesikhatsi, ngemuva kwekutsi sekahlanganise libutfo watjelwa kabili kutsi alinciphise. (Khu. 7:2-7) Ekugcineni, watjelwa kutsi aye enkambu yesitsa afike asihlasele ekhatsi nebusuku.​—Khu. 7:9-11.

10. Kunini lapho kungaba matima khona ngalomdzala welibandla kutsi alalele?

¹⁰ Labadzala belibandla kufanele ‘bakulungele kulalela.’ (Jak. 3:17) Lomdzala lolalelako uhlale akulungele kutfobela loko lokushiwo yimiBhalo nesicondziso lesivela enhlanganweni yaNkulunkulu. Ngako ubabekela sibonelo lesihle labanye. Kodvwa ngalesinye sikhatsi kungahle kube matima ngalomdzala kutsi alalele. Sibonelo nje, angahle akutfole kumatima kuhambisana neticondziso latitfolako. Kuletinye timo, angahle atibute kutsi sicondziso lesitsite sitawusebentiseka yini vele nobe kutsi sihlakaniphile yini. Nobe angahle acelwe kutsi ente umsebenti longenta aboshwe. Labadzala bangasilingisa njani sibonelo saGideyoni sekulalela etimeni letinjengaleti?

11. Yini lengasita labadzala kutsi balalele?

¹¹ Silalelisise sicondziso futsi usisebentise. Nkulunkulu watjela Gideyoni kutsi alibhidlite njani li-al’thare lababe wakhe nekutsi alakhe kuphi li-al’thare lelisha laJehova, wamtjela nesilwane lebekufanele anikele ngaso. Gideyoni akazange asingabate lesicondziso, wavele wenta njengobe atjeliwe. Lamuhla, labadzala batfola ticondziso enhlanganweni yaJehova ngetincwadzi, ngetimemetelo, baphindze batfole letinye ticondziso letisisita kutsi sihlale siphephile futsi sisondzelene naJehova. Siyabatsandza labazalwane ngekulalela ticondziso labatitfola enhlanganweni yaJehova. Emabandla ayasitakala.​—Hla. 119:112.

12. Labadzala bangawasebentisa njani emavi laKumaHebheru 13:17 nakunelushintjo lolwentiwa yinhlangano?

¹² Kulungele kwenta lushintjo. Khumbula kutsi Jehova watjela Gideyoni kutsi ajikise cishe onkhe emasotja akhe. (Khu. 7:8) Kungenteka Gideyoni wacabanga: ‘Luyadzingeka yini vele lolushintjo? Lendlela itawusebenta yini?’ Nobe kunjalo, Gideyoni walalela. Labadzala lamuhla balingisa Gideyoni ngekutsi balandzele sicondziso senhlangano nayenta lushintjo. (Fundza KumaHebheru 13:17.) Sibonelo nje, nga-2014 Sigungu Lesibusako sashintja indlela lebekutawubhadalwa ngayo kwakhiwa kwemaHholwa eMbuso nemaHholwa emhlangano. (2 Khor. 8:12-14) Emabandla bekangeke asabhadala sikweledi. Kunaloko, emabandla emhlabeni wonkhe bekatawufaka ndzawonye imali kuze kwakhiwe takhiwo tenhlangano nobe ngukuphi labetidzingeka khona, ngisho nobe bazalwane kuleyondzawo banalokuncane. Ngesikhatsi José eva ngalolushintjo, wangabata kutsi loko bekutawusebenta, wacabanga watsi: ‘Kute ngisho nalinye liHholwa leMbuso lelitakwakhiwa. Tintfo atihambi kanjalo lana.’ Yini leyasita José kutsi asekele lesicondziso? Utsi: “Emavi lakuTaga 3:5, 6 angikhumbuta kutsi ngetsembele kuJehova. Loko kwaba nemiphumela lemihle kakhulu! Asigcini  nje ngekwakha emaHholwa eMbuso lamanyenti, kodvwa sesifundze netindlela letehlukene tekunikela kuze kube nekulingana.”

13. (a) Yini Gideyoni lebekaciniseka ngayo? (b) Labadzala belibandla bangamlingisa njani Gideyoni? (Buka nesitfombe.)

¹³ Yenta intsandvo yaJehova ngesibindzi. Gideyoni walalela Jehova nanobe bekesaba futsi lomsebenti uyingoti. (Khu. 9:17) Ngemuva kwekucinisekiswa nguJehova, Gideyoni wabese uciniseka ngalokuphelele kutsi Nkulunkulu bekatamsita njengobe avikela bantfu bakhe. Labadzala belibandla labahlala etindzaweni lapho umsebenti wetfu uvinjelwe khona balingisa Gideyoni. Ngesibindzi, bayahola emhlanganweni welibandla nasemsebentini wekushumayela nanobe basongelwa ngekuboshwa, ngekuphenywa ngemibuto, ngekuphelelwa ngumsebenti nobe ngebudlova. c Ngesikhatsi sekuhlupheka lokukhulu, kutawudzingeka labadzala babe nesibindzi sekulalela ticondziso labatawutitfola ngisho nobe loko kungaba yingoti kanganani. Leticondziso tingahle tifake ekhatsi kumemetela umlayeto lonjengesangcotfo nobe kumemetela loko lokufanele kwentiwe kuze sisindze nakuhlasela Gogi WakaMagogi.​—Hez. 38:18; Semb. 16:21.

14. Yini leyenta kwaba matima ngaGideyoni kutsi acinisele?

¹⁴ Umsebenti waGideyoni wekuba sikhulu bewudzinga kutsi asebente kamatima. Ngesikhatsi bakaMidiyani babaleka emphini, Gideyoni wabacosha kusuka esihosheni saseJezreyeli kuyofika eMfuleni iJordane, lokungenteka kutsi beyitungeletwe ngemahlatsi. (Khu. 7:22) Gideyoni wafike wema yini eJordane? Cha! Nanobe bekadziniwe, yena nalamadvodza langu-300 lebekanawo bewela lomfula futsi bachubeka nekubacosha. Ekugcineni babakhandza bakaMidiyani futsi babancoba.​—Khu. 8:4-12.

15. Yini lengenta kube matima ngalomdzala welibandla kutsi acinisele?

¹⁵ Ngalesinye sikhatsi, lomdzala welibandla angahle ative akhatsele kakhulu ngenca yemisebenti yasebandleni kanye nekunakekela umndeni  wakhe. Esimeni lesikanjalo, labadzala belibandla bangamlingisa njani Gideyoni?

16-17. Yini leyasita Gideyoni kutsi acinisele, futsi yini labadzala labangaciniseka ngayo? (Isaya 40:28-31) (Buka nesitfombe.)

¹⁶ Ciniseka kutsi Jehova utakunika emandla. Gideyoni bekaciniseka kutsi Jehova utamnika emandla futsi akazange advumateke. (Khu. 6:14, 34) Ngalelinye lilanga, Gideyoni nemadvodza lebekahamba nawo bebacosha ngetinyawo emakhosi lamabili akaMidiyani lokungenteka bekagibele emakamela. (Khu. 8:12, 21) Nobe kunjalo, ngekusitwa nguJehova ema-Israyeli awancoba. Ngendlela lefanako, labadzala belibandla bangetsembela kuJehova, loyo ‘longadzinwa futsi longakhatsali.’ Utawubanika emandla nabawadzinga.​—Fundza Isaya 40:28-31.

¹⁷ Cabanga ngesibonelo saMatthew lolilunga leKomidi Lebonisana Netibhedlela. Yini lemsita kutsi acinisele? Matthew utsi: “Ngikubonile kuba liciniso kwemavi laKubaseFiliphi 4:13. Etikhatsini letinyenti nangidzinwe kakhulu, bengithantaza ngalokusuka enhlitiyweni ngincenga Nkulunkulu kutsi angiphe emandla lengiwadzingako kuze ngisite bazalwane bami. Etikhatsini letinjalo, ngiyibonile indlela umoya waJehova longinike ngayo emandla futsi wangisita kutsi ngicinisele.” NjengaGideyoni, labadzala belibandla basebenta kamatima kuze banakekele bantfu baJehova ngisho nobe loko kuhle kungabi melula. Nanobe kunjalo, bayalinganisela futsi bayavuma kutsi angeke bakhone kuhlale benta konkhe labafise kukwenta. Nanobe kunjalo, bayaciniseka kutsi Jehova utawubeva nabacela lusito futsi utawubanika emandla ekucinisela.​—Hla. 116:1; Fil. 2:13.

18. Sesibuketa, labadzala bangamlingisa njani Gideyoni?

¹⁸ Labadzala belibandla bangafundza lokunyenti kuGideyoni. Labadzala kufanele bakhombise kutsi bayalinganisela futsi batfobekile nabemukela imisebenti letsite nalapho basolwa nobe badvunyiswa. Kufanele balalele futsi babe nesibindzi, ikakhulukati njengobe lelive liya ngasekupheleni. Ngetulu kwaloko, kufanele baciniseke kutsi ngisho bangabhekana natiphi tinkinga, Nkulunkulu utawubanika emandla. Siyajabula ngalabelusi labasebenta kamatima futsi ‘siyachubeka sibaphatsa ngenhlonipho bantfu labanjengabo.’​—Fil. 2:29.